ئه‌ڤرۆ:

ده‌زگه‌هێن راگه‌هاندنا ئۆرۆپا ئاماژه‌ ب هندێ دكه‌ن كو ژنێن ئیرانێ سه‌ركێشیا شوره‌شه‌كا مه‌زن ل ئیرانێ دكه‌ن و ده‌ستهه‌لاتێ د ده‌مێ سێ حه‌فتیێن بۆری دا ب هه‌موو شیانێن خوه‌ خواست خوه‌نیشاده‌ران سه‌ركوت بكه‌ت لێ هه‌تا نها ژی خوه‌نیشادان د به‌رده‌وامن و دڤێت ده‌ستهه‌لاتا ئیرانێ ده‌ستان ژ توندوتیژیێ به‌رده‌ت.

ئاژانسا دویچه‌ یا ئه‌لمانیا د راپۆرته‌كێ دا دیار كریه‌ كو نها ژن ل ئیرانێ سه‌ركێشیا شوره‌شه‌كا نوو و مه‌زن دكه‌ن، ژنێن ئیرانێ ب سالانه‌ كو ژ ئالیێ ده‌ستهه‌لاتێ ڤه‌ دهێنه‌ ته‌په‌سه‌ركرن و ره‌نگه‌ چو جاره‌كێ به‌رپرسێن ئیرانێ هزرا هندێ ژی نه‌دكرن كو دێ رۆژه‌كێ وه‌سا ژن بهێز ده‌ركه‌ڤنه‌ مه‌یدانان و دژبه‌ریا سیسته‌مێ نها كه‌ن، ئه‌و یه‌ك ژی نیشا دده‌ت كو ژنێن نها گه‌له‌ك وێره‌كن و بهێزن و هه‌كه‌ ده‌ستهه‌لاتا نها یا ئیرانێ ل سه‌ر هه‌لوه‌ستێ خوه‌ یێ نها ل دژی خه‌لكی به‌رده‌وام بیت و بزاڤا سه‌ركوتكرنا خوه‌نیشاده‌ران بكه‌ت دێ ره‌وش گه‌له‌ك خرابتر لێ هێت.

ده‌زگه‌هێن راگه‌هاندنا فره‌نسا ژی ئاماژه‌ ب هندێ دكه‌ن كو قۆناغه‌كا نوو ل ئیرانێ ده‌ستپێكریه‌، گه‌نج و ژن ئێدی ژ چو تشته‌كێ ناترسن، وان ئازادیا خوه‌ دڤێت، لاوێن ئیرانێ ب تایبه‌تی ژی كچێن وی وه‌لاتی ئێدی ژ سیسته‌مێ نها بێزار بووینه‌، وان دڤێت ئازاد بژین و بێگومان سیسته‌مێ نها ئاسته‌نگه‌ ل هه‌مبه‌ر ئازادیا وان، ژ به‌ر هندێ ژی نها ژن و لاوێن ئیرانی بێی ترس ده‌ست ب خوه‌نیشادانان دكه‌ن و داخوازا نه‌مانا ده‌ستهه‌لاتا نها دكه‌ن، ئه‌و یه‌ك ژی نیشانا ده‌ستپێكرنا قۆناغه‌كا نوو یه‌، ئێدی وه‌كو سالێن بۆری خه‌لك ژ ده‌ستهه‌لاتێ ناترسن، ئه‌و وێره‌كیا نها ل ده‌ف لاوێن ئیرانێ ل دژی ده‌ستهه‌لاتێ دروست بوویی دشێت ببیته‌ ئه‌گه‌رێ ژناڤچوونا سیسته‌مێ نها یێ ئیرانێ.

ل ئالیێ دی رۆژناما نیویورك تایمز ژی د راپۆرته‌كێ دا دیار كریه‌ كو سێ حه‌فتی بۆرین و هه‌تا نها ژی خوه‌نیشادان ل هه‌موو ده‌ڤه‌رێن ئیرانێ به‌رده‌وامن، هێزێن ئێمناهیێ گه‌له‌ك بزاڤ كرن كو وه‌كو خوه‌نیشادانێن چه‌ند سالێن بۆری دیسان خه‌لكی سه‌ركوت بكه‌ن، لێ ڤێجارێ لاوێن ئیرانێ ناترسن و ئه‌و ژی به‌رسڤا ئێرشێن هێزێن ئێمناهیێ دده‌ن، هه‌تا نها نێزیكی دوسه‌د كه‌سان جانێ خوه‌ ژ ده‌ست داینه‌ و چه‌ند هزار كه‌س ژی هاتینه‌ ده‌سته‌سه‌ر كرن لێ خوه‌نیشادان ل ته‌هرانێ و هه‌موو باژێرێن دی یێن ئیرانێ به‌لاڤ بووینه‌ و ترسه‌كا مه‌زن ل ده‌ف به‌رپرسێن ئیرانێ دروست بوویه‌، چونكی ڤێجارێ خوه‌نیشادان ل هه‌موو ده‌ڤه‌ران به‌لاڤ بووینه‌ و خه‌لك ژ هێزێن ئێمناهیێ ناترسن، ب تایبه‌تی ژی ژن گه‌له‌ك وێره‌كن و داخوازا نه‌مانا سیسته‌مێ نها یێ ئیرانێ دكه‌ن، قۆناغه‌كا نوو یا لاوازیا ده‌ستهه‌لاتێ ل ئیرانێ ده‌ستپێكریه‌ و حوكمه‌تا ئیرانێ ب هه‌موو شیانێن خوه‌ هه‌تا نها نه‌شیایه‌ خه‌لكی بێده‌نگ بكه‌ت.

ئه‌ڤرۆ:

ناڤه‌ندا چاڤدێریا مافێن مرۆڤی یا سووریێ راگه‌هاند كو چه‌ند رۆژن ل سه‌ر سنۆرێ توركیا ب تایبه‌تی ژی ل ده‌ڤه‌رێن سنۆری یێن باژێرێ حه‌سه‌كێ یێ رۆژئاڤایێ كوردستانێ ل گه‌ل توركیا هێزێن ئه‌مریكا و رۆسیا بجه بووینه‌ و په‌یوه‌ندیێن وان ژی گه‌له‌ك باشن و رێگری ل هێزێن توركیا ژی كرینه‌ كو ل وان ده‌ڤه‌رێن سنۆری هاتنوچوونێ نه‌كه‌ن، ئه‌و یه‌ك ژی بوویه‌ جهێ دلگرانیا توركیا و وه‌زاره‌تا ده‌رڤه‌ یا توركیا دوهی نه‌رازیبوونا خوه‌ ل هه‌مبه‌ر هه‌لوه‌ستێ نوو یێ رۆسیا و ئه‌مریكا دیار كریه‌.

ناڤه‌ندا چاڤدێریا مافێن مرۆڤی ئه‌و یه‌ك ژی دیار كریه‌ كو رۆسیا و ئه‌مریكا ل دژی هندێ نه‌ كو توركیا به‌رده‌وام ب رێیا ئێرشێن ئه‌سمانی ره‌وشا رۆژئاڤایێ كوردستانێ ئالۆز بكه‌ت و به‌ری نها هه‌ر دو وه‌لاتێن زلهێزێن جیهانێ ژی دژبه‌ریا خوه‌ ل هه‌مبه‌ر سیاسه‌تا توركیا ل باكورێ سووریێ دیار كرینه‌ و داخواز ژ توركیا كرینه‌ كو ئالۆزیێن نوو ل باكورێ سووریێ دروست نه‌كه‌ت.

ئه‌ڤرۆ:

ل گۆر راپۆرته‌كا BBC د ناڤ چه‌ند رۆژێن بۆری دا پتر ژ سه‌د هزار گه‌نجێن رۆسیا ژ ترسا هندێ كو نه‌چنه‌ شه‌ری ژ وی وه‌لاتی ڕه‌ڤینه‌ و به‌رێ خوه‌ دده‌نه‌ وه‌لاته‌كێ دی و نها چه‌ند هزار گه‌نجێن رۆسیا چووینه‌ جۆرجیا و هه‌روه‌سا ب هزاران گه‌نجێن رۆسی ژی ل سه‌ر سنۆری فنله‌ندا ئاسێ بووینه‌ و به‌رپرسێن فنله‌ندا رێ ناده‌ن كو ئه‌و بچنه‌ وه‌لاتێ وان.

هه‌مان ئاژانسێ ئه‌و یه‌ك دیار كریه‌ كو رۆسیا د شه‌رێ ل ئۆكرانیایێ دا تووشی شكه‌ستنێ بوویه‌ و ژ به‌ر هندێ ژی هه‌ری دووماهیێ پۆتینی فه‌رمان دا كو هێزێن نوو بچنه‌ شه‌رێ ئۆكرانیایێ لێ گه‌نجێن رۆسی ناخوازن بچنه‌ شه‌ری و ژ ترسا شه‌ری ژی دڕه‌ڤن و به‌رێ خوه‌ دده‌نه‌ وه‌لاته‌كێ دی، ئه‌و یه‌ك ژی نیشا دده‌ت كو رۆسیا د شه‌رێ هه‌تا نها یێ ل ئۆكرانیایێ دا شكه‌ستن خواریه‌ و خه‌لك پشته‌ڤانیێ ل سیاسه‌تا پۆتینی ناكه‌ن.