ئه‌ڤرۆ،

تیما لاوێن یانا دهۆك رێزا ئێكێ‌ یا قاره‌مانیا ئیراقێ‌ بۆ یاریا پایسكلان ژ ده‌ست دا،ژ چارچووڤێ‌ هه‌ڤڕكیێن قۆناغا سێیێ‌ دا ئه‌وا ب پشكداریا زێده‌تری 22 یانێن ئیراقێ‌ ل هه‌ولێرا پایته‌خت بۆ ئاستێن، پێشكه‌فتیان، لاوان، كچان و تازه‌پێگه‌هشتیان هاتینه‌ ئه‌نجامدان.

تیما یانا دهۆك ب كێمتریا 16 پشك ژ چركه‌كێ‌ رێزا ئێكێ‌ بۆ یانا حه‌دبا یا مووسلی هێلا و پاشڤه‌چوو رێزا دویێ‌ پشتی هنگافتنا دو یاریزانێن وان وه‌هبی سلێمان و مونته‌زر عه‌لی ئه‌وێن دوهی د به‌ریكانا 40كم سه‌ر ئاستێ‌ تیما تووشی روودانا كه‌فتنێ‌ بووین، بۆ به‌ریكانا 80كم یاریزانێن كت ژی دهۆكێ‌ رێزا دویێ‌ هات كو سه‌رجه‌مێ‌ گشتی رێزبه‌ندیا دویێ‌ یا هه‌رسێ‌ قۆناغا وه‌رگرت.

لدور ڤێ‌ یه‌كێ‌ تارق سه‌عید راهێنه‌رێ‌ تیما دهۆكێ‌ بۆ رۆژناما ئه‌ڤرۆ گۆت: مه‌ ب ئارمانج و هیڤیێن رێزا ئێكێ‌ ب چار یاریزانێن خوه‌ و هه‌تا چركێن دووماهیێ‌ دا پشكداری كربوو سه‌رباری هنگاڤتنا دو یاریزانێن مه‌  دهۆكێ‌ هه‌ڤڕكی بۆ رێزا ئێكێ‌ دكر لێ‌ كارتیكرنا هنگاڤتنێ‌ ل سه‌ر دو باشترین یاریزانێن مه‌ دیاربوون و بتنێ‌ 16 پشك ژ چڕكه‌كێ‌ دناڤبه‌را مه‌ و تیما ئێكێ‌ دا هه‌بوون.

هه‌روه‌سا ناڤهاتی گۆت: سه‌رباری هنگاڤتنێ‌ ژ ئاست و شیانێن یاریزانێن خوه‌ درازیمه‌ و رژدین بۆ  قۆناغا چارێ‌ و ڤه‌بڕ یا ناسناڤی نه‌هێلین ژ ده‌ستێ‌ مه‌ ب ده‌ركه‌ڤیت، هه‌موو پێشبینی دهێنه‌ كرن ئه‌ڤ قۆناغه‌ ل پارێزگه‌ها دهۆكێ‌ بهێته‌ ئه‌نجامدان له‌ورا دێ‌ هه‌موو بزاڤا كه‌ین ناسناڤێ‌ خوه‌ یێن سالێن بوری ب ناڤێ‌ لاوێن یانا دهۆكێ‌ پارێزین و هه‌ر ژ نوكه‌ دێ‌ كار و پلان بۆ ڤێ‌ ئارمانجێ‌ هێنه‌ دانان.

ئه‌ڤرۆ،عه‌لی زاخۆ

د داخویانیه‌كێ‌ دا سه‌رۆكێ‌ یانا زاخۆ دیاركر پشتی هه‌لوه‌شاندنا گرێبه‌ستا یاریزانێ‌ وان یێ‌ رۆمانی ئه‌وێ‌ ژ نشكه‌كێ‌ ڤه‌ لێڤه‌بوویی ئێكسه‌ر هزر بۆ شوون جهێ‌ وی هاته‌ كرن ل گه‌ل یاریزانه‌كێ‌ به‌رازیلی گه‌هشتینه‌ رێكه‌فتنێ‌ بۆ تیما ته‌پا پێی ئه‌وا دێ‌ به‌رهه‌ڤیان بۆ وه‌رزێ‌ نوو یێ‌ خولا پلانایابا ئیراقێ‌ دكه‌ت.

زێده‌تر بلند شه‌فیق بۆ رۆژناما ئه‌ڤرۆ گۆت: هه‌رچه‌نده‌ ل ئه‌ینیا بوری پیشه‌كارێ‌ رۆمانی نیكۆلا كاتالین گه‌هشتبوو باژێرێ‌ زاخۆ بۆ گریبه‌ستا فه‌رمی و ناساندنێ‌ بۆ جه‌ماوه‌ری كو به‌ری بهێت مه‌ رێكه‌فتن ل گه‌ل كربوو، لێ‌ پشتی ل زاخۆ هاتیه‌ پێشوازیكرن ژ نشكه‌كێ‌ ڤه‌ خوه‌ دیاركر یێ‌ ئارام نینه‌ و ده‌رۆنێ‌ وی تێكچوویه‌ له‌ورا بۆ مه‌ گۆمان چێبوون ئه‌ڤی یاریزانی نه‌ڤێت یاریێ‌ بۆ زاخۆ بكه‌ت ئه‌ڤچا ژبه‌ركو خولا ئیراقێ‌ یا درێژه‌ و بڤی شێوه‌یی بیت دێ‌ كارتیكرنا نه‌رێنی ل سه‌ر تیمێ‌ كه‌ت نه‌چاربووین گرێبه‌ستا وی ب هه‌لوه‌شینین و دووباره‌ ڤه‌گه‌ڕێته‌ وه‌لاتێ‌ خوه‌، سه‌رباری هه‌ر تشته‌كێ‌ پێدڤی بوو هاتبوو دابینكرن لێ‌ یێ‌ رژد بوو لسه‌ر گرێبه‌ستا خوه‌ لێڤه‌بیت، له‌ورا مه‌ چو پێرابوونێن یاسایی و رێگری ل چوونا وی نه‌گرت، پشتی ئه‌ڤ بابه‌ته‌ ب دووماهی هاتی ژبه‌ركو هنده‌ك بژاردێن دی هه‌بوون ئێكسه‌ر مه‌ هزرا شوون جهێ‌ وی كر و ده‌ست ب دانۆستاندنێ‌ ل گه‌ل یاریزانێ‌ پیشه‌كار بكه‌ین.

ناڤهاتی دیاركر ئه‌و گه‌هشتینه‌ رێكه‌فتنا دووماهیێ‌ ل گه‌ل یاریزانه‌كێ‌ به‌رازیلی و نێزكترین ده‌م دا په‌یوه‌ندیێ‌ ب تیمێ‌ كه‌ت به‌ری ده‌ستپێكرنا كه‌مپێ‌ راهێنانێن تیمێ‌ و خوه‌ به‌رهه‌ڤكرن بۆ وه‌رزێ‌ نوو یێ‌ خولێ‌ كو باشترین شێوه‌ ئاماده‌كاریا بكه‌ین

ئه‌ڤرۆ،

د دیداره‌كێ‌ ستێرێ‌ گه‌نج یێ‌ پارێزگه‌ها دهۆكێ‌ و یاریزانێ‌ نوو یێ‌ یانا نه‌فت یا به‌غدایی ئه‌حمه‌د سه‌بری چوونا خوه‌ ژ یانا دهۆك بۆ نه‌فتێ‌ ب پێنگاڤا ئێكێ‌ یا هیڤیێن خوه‌ دانن و سۆپاسیا هه‌ردو كارگێریێن یانا خوه‌ یا نوو و به‌رێ‌ كرن.

زێده‌تر ناڤهاتی بۆ رۆژناما ئه‌ڤرۆ گۆت: ده‌ستپێكێ‌ سۆپاسیا هه‌ردو كارگێریێن یانا خوه‌ یا دایك دهۆكێ‌ دكه‌م ئه‌وێن هه‌ڤكار و پشته‌ڤانێن من بووین و هه‌روه‌سان بۆ هه‌ر راهێنه‌ره‌كێ‌ من كار ل گه‌ل كری وه‌كو یاریزان و داخوازا لێبۆرینێ‌ ژ هه‌موو جه‌ماوه‌رێ‌ یانێ‌ دكه‌م بۆ وه‌رزێ‌ بهێت نه‌شیام به‌رده‌وامیێ‌ ل گه‌ل یانێ‌ بده‌م، دلێ‌ من ل گه‌ل دهۆكێ‌ یه‌ و هیڤیا من ئه‌وه‌ د هه‌ردو یاریێن بهێت یێن ڤه‌بڕ دا سه‌رفه‌رازی ڤه‌گه‌ڕێته‌ خولا پلا نایابا ئیراقێ‌ ژبه‌ركو ئه‌و جهێ‌ وێ‌ یێ‌ دروسته‌.

ژلایه‌كێ‌ دووڤه‌ ئه‌حمه‌د سه‌بری گۆت: سه‌رباری چه‌ند یانه‌ هه‌بوون گرێبه‌ستێ‌ ل گه‌ل ئیمزابكه‌م لێ‌ ژبۆ ئارمانجێن من مه‌زنن و هیڤیا پاشه‌رۆژه‌كا باشتر دكه‌م له‌ورا گرێبه‌ستا یانا نه‌فتێ‌ پێنگاڤا من یا ئێكێ‌ یه‌ بۆ هیڤیا من ئه‌وژی به‌ر ب هه‌لبژارتیێ‌ ئیراقێ‌ بچم و پشكداریێ‌ د یاریێن نێڤده‌وله‌تی و ئاسیا دا بكه‌م، له‌ورا بۆ ب جهئینانا ڤێ‌ هیڤیێ‌ ب سانه‌هی نینه‌ و ئه‌ركێ‌ من ب زه‌حمه‌ته‌، هه‌موو بزاڤا كه‌م ژبۆ به‌رده‌وامیا ئاستێ‌ خوه‌ و بلندكرنا هونه‌ر و شیانێن خوه‌ پێخه‌مه‌ت ل گه‌ل یانا خوه‌ یا نوو به‌ر ب سه‌ركه‌فتنا بچین و ب گه‌هینه‌ ئارمانجان.

ئه‌ڤرۆ،

ل ئه‌ینیا بوری ب پشكداریا 110 یاریزانێن سنۆرێ‌ قه‌زا و باژێرێن پارێزگه‌ها دهۆكێ‌ و بۆ جارا ئێكێ‌ یه‌ قاره‌مانیا پارێزگه‌هێ‌ یا یاریا كیك بۆكسێنگێ‌ ل سه‌ر ئاستێ‌ ژیێن جودا ل باژێرێ‌ ئامێدیێ‌ بهێته‌ ئه‌نجامدان ئه‌وا ژلایێ‌ ئێكه‌تیا كیك بۆكسینگا پارێزگه‌هێ‌ و ب هه‌ڤكاری ل گه‌ل نوونه‌راتیا دهۆك یا لژنا ئۆلمپیا كوردستانێ‌ هاتیه‌ رێكخستن و ئه‌نجام ب ڤی ره‌نگی بوون.

ل سه‌ر ئاستێ‌ لاوان، یانا دهۆك رێزا ئێكێ‌ هات، یانا زانكۆیا پۆلیته‌كنیك رێزا دویێ‌ و یانا ته‌ناهی رێزا سێیێ‌ هات، بۆ  ئاستێ‌ تازه‌پێگه‌هشتیان، دهۆك رێزا ئێكێ‌، زانكۆیا پۆلیته‌كنیك رێزا دویێ‌ و زاخۆ رێزا سێیێ‌ هات، بۆ ئاستێ‌ پشكۆژان، یانا ئامێدیێ‌ رێزا ئێكێ‌ هات، زانكۆیا پۆلیته‌كنیك و ته‌ناهی رێزێن دویێ‌ و سێیێ‌ هاتن.

لدۆر ڤێ‌ قاره‌مانیێ‌ مه‌حفۆرز ئیبراهیم سه‌رۆكێ‌ ئێكه‌تیا كیك بۆكسینگا پارێزگه‌ها دهۆكێ‌ بۆ رۆژناما ئه‌ڤرۆ گۆت: ب هه‌موو لایه‌ناڤه‌ قاره‌مانیه‌كا سه‌ركه‌فتی بوون، تایبه‌ت رێكخستن، هونه‌ری و ئاست، یا گرنگ بوو مه‌ ئه‌و رێژا پشكداربووی كو بۆ جارا ئێكێ‌ یه‌ هژمارا وان بگه‌هیته‌ 110 یاریزانان و هه‌روه‌سان بۆ جارا ئێكێ‌ یه‌ ل باژێرێ‌ ئامێدیێ‌ بهێته‌ ئه‌نجامدان، بۆ ئاستێ‌ كچان ژی ئه‌م به‌رهه‌ڤیان دكه‌ین ل16ێ‌ ڤێ‌ مه‌هێ‌ سالرۆژا دامه‌زراندنا پارتی دیموكراتی كوردستان قاره‌مانیا سه‌ر ئاستێ‌ كچان ب شێوه‌كێ‌ جوانتر و رێكخستی ئه‌نجامده‌ین.

سالح كه‌كو راهێنه‌رێ‌ به‌رنیاس هه‌لبژارتیێ‌ ئیراقێ‌ و یانا دهۆك گۆت: د ماوێ‌ هه‌ردو رۆژێن قاره‌مانیێ‌ دا نڤشه‌كێ‌ نوو یێ‌ یاریزانێن كیك بۆكسینگێ‌ پێشچاڤبوو ئه‌ڤچه‌نده‌ ژی جهێ‌ دلخوه‌شیێ‌ یه‌ كو پێشبینیا پاشه‌رۆژه‌كا گه‌ش دكه‌ین بۆ ڤێ‌ یاریێ‌ ژبه‌ركو هه‌موو یاریزان د ژیه‌كێ‌ بچووك دا بوون، پێنه‌ڤێت هه‌كه‌ پشته‌ڤانیا دارایی و مه‌عنه‌وی ژی بۆ بهێته‌ كرن گه‌شبینم دێ‌ سه‌ر ئاستێ‌ ئیراقێ‌ و ده‌رڤه‌ ژی مه‌ باشترین یاریزانێن كوڕێن پارێزگه‌هێ‌ هه‌بن و هه‌ڤڕكیا ده‌رڤه‌ كه‌ن.

ئه‌ڤرۆ،

چاڤه‌ڕێ‌ دهێته‌ كرن ل 17ێ‌ چڕیا ئێكێ‌ یا بهێت رێوره‌سمێن خه‌لاتكرنا باشترین یاریزانێن خول و قاره‌مانیێن  یاریا ته‌پا پێی بۆ وه‌رزێ‌ 2021- 2022 ل فره‌نسا بهێنه‌ ئه‌نجامدان ئه‌وا سالانه‌ ژلایێ‌ كۆڤارا فرانس فۆتبۆل خه‌لاتێ‌ باشترین یاریزانێن جیهانێ‌ و دیسان گۆلپارێز بۆ خه‌لاتێ‌ یاشین، یاریزانێ‌ پێشكه‌فت خه‌لاتێ‌ كۆپا، خه‌لاتێ‌ باشترین هێرشبه‌ری و باشترین یانه‌ ل جیهانێ‌ دهێنه‌ هه‌لبژارتن، د ئه‌ڤ ساله‌ دا هه‌ردو ستێرێن یانا پاریس سانجێرمان لیۆنێل مێسی و نیمار دا سێلڤا دناڤ لیستا 30 یاریزانێن به‌ربژێر دا نه‌بوون.

به‌ربژارێن خه‌لاتێ‌ یاریزانێ‌ پێشكه‌فتی

چاڤی- به‌رشه‌لۆنا، ئیدواردۆ كاماڤینگا- ریال مه‌درید، كه‌ریم ئادیمی و كۆت بیلینگهام- برۆسیا دۆرتمۆند، رایان گراڤینێرگ و جه‌مال مۆسێلا- بایرن میونخ، نۆن كیندێچ – پاریس سانجێرمان، بۆكایۆ ساكۆ- ئارسنال، فلۆریان فرێتز -بایرن لیڤه‌ركۆزن، چاشكۆ جڤاردیۆل- لایپیزیك.

به‌ربژارێن باشترین گۆلپارێز .

ئیدرسۆن- مانشسته‌ر ستی، تیپۆ كۆرتۆا-  ریال مه‌درید، ئه‌لیسۆن بیكه‌ر- لیڤه‌رپۆل، یاسین بۆنۆ- سیڤییا، میاك ماینیان- میلان، كیڤین تراب- ئینتراخت فرانكفۆرت، هۆگۆ لۆرێس- تۆتنهام، مانوێل نویێر- بایرن میۆنخ، ئیدوارد میندی- چێلسی، یان ئۆبلاك- ئه‌تله‌تیكۆ مه‌درید.

به‌ربژارنێن یاریزانا كچ.

كریستیانی ئندلۆ،سێلما باسا، كاترینا ماكاریۆ- ئۆلمپیك لیۆن، لینا ئۆبیردۆرڤ- فۆلفسبۆرگ، كادیدیاتۆ دیاتی- پاریس سانجێرمان، لویس برۆنز، ئه‌لێكسیا بۆتیاس، فرێدۆلینا- به‌رشه‌لۆنا، فیفیان میدیما- ئارسنال،سام كێر- چێلسی.

باشترین یاریزانێ‌ جیهانێ‌

تیپۆ كورتۆا، كه‌ریم بنزێمه‌، كاسێمیرۆ، ڤینیسیۆس جونێرۆ، ئه‌نتۆنیۆ رۆدێگر، لۆكا مۆدرێچ- ریال مه‌درید، محه‌مه‌د سه‌لاح، لویس دیاز، تراینت ئه‌لكسه‌نده‌ر ئارنۆلد، فابیانۆ، دارۆین نۆنێز، فێرجێل ڤان دایك- لیڤه‌رپۆل، برناردۆ سێلڤا، ریاز محرز، فێل فۆدین، كیڤین دی برۆین، ئیرلینگ هالان، جواو كانسێلۆ- مانچسته‌ر ستی، سادیۆ مانی، جوشۆا كیمیچ- بایرن میۆنخ، رافائێل لیاۆ، میاك ماینیان- ئه‌ی سی میلان، كریستیانۆ رۆنالدۆ- مانچسته‌ر یۆنایتد، رۆبێرت لیڤاندۆڤێسكی- به‌رشه‌لۆنا، كریستۆفه‌ر نكونكو- لایبزیك، هیۆنگ سۆن، هاری كین- تۆتنهام، سبه‌ستیان هالكه‌ر- بورۆسیا دۆرتمۆند، كلیان مباپی- پاریس سانجێرمان، دۆشان فلاهۆڤێچ- یۆڤانتۆس.