هەولێر، قائید میرۆ:

شاره‌زایه‌كێ قانوونی دیار کر کو خه‌لك ب شاشی مۆبایلێ بكاردئینن، زۆر جارا ده‌مێ په‌یدابوونا ئاریشه‌یان دناڤا خێزانێ ژن یان زه‌لام دێ ده‌نگی تۆمار كه‌ت یان وێنه‌یان گریت و گۆت؛ ڤێ چەندێ ژی ل گوره‌ی قانوونێ سزایێن توند هه‌نه‌.

ئارام فوئاد، شاره‌زایێ قانوونی د دیدارەکێ دا بۆ رۆژنامەیا ئه‌ڤرۆ دیار كر، زۆر جارا ده‌مێ په‌یدابوونا ئاریشه‌یان دناڤا خێزانێ دا دێ بینی ژن یان زه‌لام دێ مۆبایلا خۆ بشێوه‌یه‌كێ ڤه‌شارتی دانیت هه‌تا ده‌نگی تومار بکەت، ل ده‌مێ هه‌واركرنێ یان قه‌سا دبێژنه‌ ئێك دێ تۆماركه‌ن، یانژی دێ وێنه‌یێن ژۆرا خۆیا تایبه‌ت گرن هه‌تا بۆ كه‌س و كارێن خۆ فرێكه‌ن و بێژنێ حالێ من ئه‌ڤه‌یه‌ و ئاریشه‌ هه‌نه‌.
ئارام دیار کر ژی، ل گوره‌ی قانوونا به‌رهنگاربوونا توندوتیژیا خێزانی، ده‌ربازكرنا حه‌ره‌مێ تایبه‌ت یان ئه‌و تشتێ زۆرێ تایبه‌ت یێ مرۆڤی وه‌كی ژۆرا نڤستنێ بهێته‌ ئاشكرا كرن بۆ كه‌سێن به‌رامبه‌ر، ل گوره‌ی قانوونێ ئه‌نجامدانا ره‌فتاره‌كا بڤی شێوه‌ی سزایێن خۆ هه‌نه‌.
شارەزایێ قانوونی دیار کر، له‌وڕا ب چو شێوه‌یه‌كی نابیت وێنه‌ و ده‌نگێ كه‌سه‌كی بهێته‌ تۆماركرن و گرتن بێی ره‌زامه‌ندیا وی كه‌سی، تنێ ب فه‌رمانا دادوه‌ری ئه‌و كار دهێته‌ ئه‌نجامدان و گۆت؛ چونكه‌ ئه‌گه‌ر مۆله‌ت نه‌بیت گرتنا وێنه‌ی یانژی تۆماركرنا ده‌نگی دچیته‌ د چوارچوڤێ تاوانا توندوتیژیا ده‌روونی و جڤاكی دا، كه‌سێ به‌رامبه‌ر دشێت وه‌كی به‌لگه‌ هه‌مبه‌ر دادگه‌هێ بكاربینیت ل دژی كه‌سێ زێده‌گاڤی كری ل تۆماركرنا ده‌نگی و گرتنا وێنه‌یان.
ئارام فوئاد ئەو چەندە ژی دیار کر، خه‌لك به‌رۆڤاژی تێگه‌هشتیه‌ و ئه‌گه‌ر بۆ نموونه‌ كه‌سه‌ك بچیته‌ هه‌مبه‌ر دادوه‌ری و بێژیت ئه‌ڤه‌ ده‌نگێ وی كه‌سێ سكالا لسه‌ر هه‌یه‌ یان وێنه‌یێ وی هاتیه‌ گرتن، دێ به‌لگه‌ دژی ئه‌وی كه‌سی هێته‌ بكارئینان و گۆت؛ چونكه‌ كه‌سێ به‌رامبه‌ر دشێت ئێكسه‌ر سكالایێ ل دادگه‌هێ تۆمار بكه‌ت ئه‌وژی ب تۆمه‌تا سیخۆریێ و تۆماركرنا نه‌ڕه‌وا دناڤا مالێ دا. وی ده‌می دێ دادوه‌ر فه‌رمانا ده‌سته‌سه‌ركرنێ بۆ كه‌سێ زێده‌گاڤی ئه‌نجامدای ده‌ركه‌ت.
شارەزایێ قانوونی ئارام د بەردەوامیا ئاخفتنێن خۆدا دیار کر به‌ری دادوەر لسه‌ر ئاریشه‌یێ بڕیارێ بده‌ت دێ ئه‌ڤێ باده‌كێ ئێكلا كه‌ت و بڕیارا ده‌سته‌سه‌ركرنێ و غه‌رامێ ده‌ركه‌ت، ژبه‌ركو ره‌فتارێن بڤی ره‌نگی سزایێ توند یێ ده‌سته‌سه‌ركرنێ و زیندانكرنێ هه‌یه‌ و گۆت؛ چونكه‌ قانوون پاراسنا كه‌رامه‌ت و سه‌قامگیریا خێزانێ ل پێش هه‌موو تشته‌كی ددانیت، رێیێ ناده‌ت مۆبایل ببیته‌ ئه‌گه‌ر ژبۆ هه‌لوه‌شاندنا حورمه‌تا ناف مالێ.

ب، شەیما عەلی:

هەموو کەس د ژیانا خۆ دا شاشییان دکەن، بەلێ دەمێ شاشیەک کارتێکرنێ بۆ چەندین سالان ل سەر ژیانا تە بکەت، پێدڤییە ب زویترین دەم ڕاستڤە بکەی،
چ جارا وەک ئافرەتەکا ژیر ڤان کاران بۆ چ زەلامان نەکە:
-1 دەستا ژ خەونێن خۆ بەرنەدە: پێدڤییە بزانی ئەو زەلامێ ب ڕاستی ئافرەتەک خۆش بڤێت، چ جاران داخازێ ژێ ناکەت کو دەستا ژ خەونێن خۆ بەردەت و بکەتە قوربانی؛ بەڵکو پالپشتییا وێ دکەت و هاریکارییا وێ دکەت بۆ پێشکەفتنێ. ژبەرهندێ، چ جاران دەستا ژ خەونێن خۆ بەرنەدە.
-2 بێرێزیێ قەبیل نەکە ژ ترسا بتنێبۆنێ: پشتڕاست به کو قەبولکرنا بێڕێزیێ گەلەک زەحمەتترە ژ تنێبۆنێ، بابەت ئەوە دەمێ تۆ بێڕێزیێ قەبیل دکەی، بارودۆخ بەر ب خرابتربوونێ دچیت نەکو باشتربوونێ.
-3 هاریکارییا دارایی بۆ زەلامی نەکە هەکە ب مەبەست کار نەکەت: فشارێن دەرڤە گەلەک پترن ژ وێ چەندێ ئه‌وا تۆ هزر تێدا دکەی، ژبەرهندێ هاریکارییا هەڤژینێ تە ژ رویێ دارایی ڤە کارەکێ باشە؛ بەلێ دەمێ هەڤژینێ تە ب مەبەست دمینیتە مال و کار نەکەت و هەتا هەولا بۆ دیتنا کاری ژی نەکەت، بزانه کو تۆ دهێیە بکارئینان.:
-4 ئەگەر خۆشتڤیێ تە بیت نە وەک هەڤژین گرنگیێ نەدێ: ئەو شاشیا کچ جار جاران دکەن ئەوە کو گرنگییدانا تەمام ددەنە وی زەلامێ د ژیانا وان دا، بەلێ بتنێ خۆشتڤینە و نە هەڤژینن. لەوا پێدڤی یە تۆ سنوران دانی.
-5 نەکە هەموو ناسنامەیا خۆ: تە ب خۆ خەونێن خۆ هەنە، ئارمانجێن خۆ هەنە، پەیوەندیێن هەڤالینیێ و خێزانا خۆ هەیە بەری وى بنیاسی. ژبەرهندێ دەمێ تۆ وی دکەیە هەموو ناسنامەیا خۆ، دێ چ ب سەرێ تە هێت دەمێ ئەو د ژیانا تە دا نەما؟ تۆ ژی دێ بێ هەبوون مێنی! ژ بەر هندێ حەز ژێ بکە و شانازیێ پێ ببه، بەلێ بلا ئەو هەموو هەبوونا تە نەبیت.
-6 کەسێن دەوروبەرێن خۆ پشتگوهـ نەئێخە بۆ ئێک کەس: هندەک کەس دەمێ دکەڤنە د پەیوەندیەکێ دا یان هەڤژینیێ دکەن، کەسێن دی ل جەم وان گرنگ نامێنن؛ هەڤال و خێزانا خۆ پشتگوهـ دئێخن، ئەڤە مەترسیدارترین کارە تۆ بکەی، چونکی ژیان بتنێ ئەو کەس نینە ئه‌وێ دهێتە د ژیانا تە دا، تە پێدڤی ب پالپشتییا کەسێن دیتر ژی هەیە.