ئامێدیێ، مەحمود نهێلی:

ژ بۆ پتر جوانكرنا باژێڕی و راكێشانا گەشتیاران و چێكرنا جهێن بێهنڤەدانێ، رازیبوون ل سەر چێكرنا دو پاركان ل سەنتەرێ دەڤەردارییا ئامێدیێ هاتیە كرن و ل دەمەكێ نێزیك دەست ب چێكرنا وان دێ هێتە كرن.
ئەندازییار ئەڤراز حەسەن، سەرۆكێ باژێرڤانیا ئامێدیێ بۆ رۆژناما ئەڤرۆ دیار كر، ژ بەر هندەك دیمەنێن ناڤ باژێڕی، ل سەنتەرێ ئامێدیێ نە دجوان و سەرنجڕاكێش بوون، ب تایبەت ژی ل نێزیك گوڕستانا میران، ژ بەر وێ یەكێ بڕیار هاتیەدان، ئەو جهـ بهێنە خراب كرن و گۆت: «پشتی خرابكرنێ رازیبوون ل سەر چێكرنا دو پاركان، ل وان هەردو جهان هاتیە كرن».
دیار ژی كر، ئەو جهێن دێ بنە پارك و جهێن بێهنڤەدانێ، ئێك دكەڤیتە نێزیك گۆڕستانا میران و یا د ژی دكەڤیتە تەنشت كەنیشتا كریستیانا و گۆت: «ئەڤ هەردو پاركە ب گوژمێ 136 ملیۆن دیناران ل سەر بودجەیا پارێزگەها دهۆكێ و ل ژێر چاڤدێرییا دەڤەردارییا ئامێدیێ ب رەنگەكێ ئێكسەر دهێنە چێكرن».
سەرۆكێ باژێرڤانیا ئامێدیێ ئاشكرا ژی كر، دو ئاڤاهیێن كەڤن ل نێزیك گۆڕستانا میران بوون و دیمەنەكێ كرێت دابوو گۆڕستانا میران، ژ بەر وێ یەكێ ب رازیبوونا پارێزگەها دهۆكێ ئەو هەردو ئاڤاهیە هاتنە خرابكرن و جهێ وان هاتیە دەشتكرن و دێ بنە پارك و دێ دیمەنەكێ جوان دەنە گۆڕستانا میران و باژێڕێ ئامێدیێ.

دوهی رۆژا شەمبی 20/6/2026 ب بەرهەڤبوونا د. سالار عوسمان، بەرپرسێ پشکا رەوشەنبیری و راگەهاندنێ پ. د. ک و هەڤال ئەبوبەکر، پارێزگارێ سلێمانیێ، ساناو فرەیدوون جوانڕۆیی هاریکارا مەکتەبا رێکخستنا سلێمانی – هەلەبجە، راپەرین پ. د. ک، ئازاد تەوفیق پارێزگارێ بەرێ یێ هەلەبجە، د. نیاز نوری، نەقیبێ سەندیکایا هونەرمەندان، ژمارەیەکا بەرچاڤ ژ نڤیسەران و رۆژنامەڤانان و ئەدیبێن باژێرێ سلێمانیێ گۆڤارا هەردەم دویەمین دیدارا هەردەم ل باژێری سلێمانیێ سازکر.
ل دەستپێکێ خۆلەکەک رێزگرتن بۆ گیانێ شەهیدان و سەروەرێ وان بارزانیێ نەمر و ئدریسێ هەردەم ساخ راوەستیان.

دهۆك، لەزگین و دلۆڤان:

رێڤەبەرێ گشتی یێ بەنداڤێن هەرێما كوردستانێ دیاركر، ژ بەر بارانبارینێن زۆر د ئەڤ سالە دا، ڕێژەیا كۆمكرنا ئاڤێ د بەنداڤان دا 15% زێدە بوویە، ئەڤ چەندە بوویە ئەگەر، گەلەك دەڤەر ژ مەترسیا لەهیان بهێنە پاراستن و دبێژیت: د نوكە دا كار لسەر چێكرنا شەش بەنداڤێن نوو ل هەرێما كوردستانێ‌ دهێتە كرن.
ڕەحمان خانی، ڕێڤەبەرێ گشتی یێ بەنداڤێن هەرێما كوردستانێ بۆ رۆژنامەیا ئەڤرۆ گۆت: «وەزارەتا چاندن و ژێدەرێن ئاڤێ یا حكومەتا هەرێما كوردستانێ پلانەكا بەردەوام هەیە بۆ چێكرنا بەنداڤ و پۆندێن نوو، د نوكە دا 12 بەنداڤ د قووناغا بجهئینانێ دانە، بەلێ ژ بەر ئاستەنگ و ڕەوشا دارایی، ب تنێ كاركرن لسەر شەش بەنداڤان بەردەوامە بۆ هندێ ب زووترین دەم بهێنە تەمامكرن».
گۆت ژی: «كاركرن د شەش بەنداڤێن دی دا ب شێوەیەكێ دەمكی ڕاوەستیایە و بجهئینانا تمامیا پلانێن وان گرێدایی دابینكرنا بودجەیا پێدڤی یە، هەر دەمێ ڕەوشا دارایی یا هەرێمێ بەر ب باشتربوونێ چوو، ئێكسەر دەست ب تەمامكرنا وان شەش بەنداڤان ژی دێ هێتە كرن».

زاخۆ، دلۆڤان هالۆ:

یونس محەمەد، سەرۆكێ باژێڕڤانیا زاخۆ بۆ ڕۆژناما ئەڤرۆ دیاركر كو ب گوژمێ پتر ژ چار ملیار دیناران و ب درێژاهیا 10 كیلۆمەتران جادەیێن تاخێ ئەردەوان ل ئیدارەیا سەربخوە یا زاخۆ دهێنە چێكرن و قێركرن.
سەرۆكێ باژێڕڤانیا زاخۆ، ئاماژە ب وێ چەندێ ژی كر كو زێدەباری چێكرن و قێركرنا جادەیان ل تاخێ ئەردەوان ب درێژاهیا پتر ژ چار كیلۆمەتر و 500 مەتران سۆلینێن ئاڤڕێژ دهێنە چێكرن.
یونس محەمەد گۆت: «سەرۆكاتیا باژێرڤانیا زاخۆ ب ڕژدی كار بۆ گەهاندنا خزمەتگوزاریان بۆ هەموو تاخ و كۆلانێن دەڤەرێ و دابینكرنا ژینگەهەكا گۆنجایی و پێشكەفتی بۆ وەلاتیان دكەت، كاروانێ ئاڤەدانكرنێ یێ بەردەوامە بۆ زێدەتر جوانكرن و پێشڤەبرنا باژێڕێ زاخۆ».

دهۆك، لەزگین جۆقی:

رێڤەبەرێ سایلۆیا شێخان دیار كر كو بڕیارەكا نوو بۆ وەرگرتنا گەنمێ جۆتیارێن ماددەیێ‌ 140 ل هندەك دەڤەرێن كوردستانی یێن سەر ب پارێزگەها نەینەوا ڤە هاتەدان و دبێژیت: ئەڤ سالە دێ گەنمێ خۆ رادەستی سایلۆیا رۆڤیا و شێخان كەن.
خالد بیبۆ، رێڤەبەرێ سایلۆیا شێخان بۆ ئەڤرۆ گۆت: «جۆتیارێن تلسقوف و تلكێفێ و ئەلقۆش و چەندین دەڤەرێن دی یێن كوردستانێ‌ یێن دكەڤنە سنۆرێ‌ پارێزگەها نەینەوا دێ گەنمێ خۆ بەنە سایلۆیا رۆڤیا، هەروەسا گەنمێ هندەك جۆتیاران ل سایلۆیا شێخان دێ هێتە وەرگرتن.