د. عەلی تەتەر، پارێزگارێ دهۆكێ ب ئامادەبوونا ئەندازیار شێرزاد قادر، ڕێڤەبەرێ گشتی یێ ڕێڤەبەرییا ڕێك و پران و ئەڤادانكرن و ئاكنجیكرنێ‌ ل دهۆكێ و سەرپەرشتێن كۆمپانییا بجهئینەر، دوهی 22/7/2026 سەرا پڕۆژەیێ ستراتیژی یێ جۆتسایدكرنا رێیا ئێتیت بۆ باعەدرێ دا.
پارێزگارێ دهۆكێ د كۆنگرەكێ ڕۆژنامەڤانی دا سوپاسییا مەسرور بارزانی، سەرۆكێ حوكمەتا هەرێما كۆردستانێ كر بوو ڕازیوون و پشتەڤانییا وی یا بەردەوام بۆ پڕۆژەیێن گرنگ ل هەموو دەڤەران و گۆت: «ب ڕێژەیا پتر ژ 80% كار لسەر پڕۆژەی هاتیە كرن، پڕۆژە 11 ئاندەرپاس و ئۆڤەرپاسان ل گەل ڤەكرن و قێركرنا پتر ژ 30 كیلۆمەترێن ٣ڕێكێن خزمەتگوزاری و هەژمارەكا زۆرا ئاڤڕێژان ب خۆڤە دگریت».

دهۆك، دلۆڤان ئاكرەیی:

پەیڤدارێ حوكمەتا هەرێما كوردستانێ دیاركر، حوكمەتا هەرێما كوردستانێ لێخوشبوون بۆ قەرێن كەڤن یێن كارەبێ ب رێژەیا 50% دا، دیسا لێخوشبوونا 20% یا سزایێن هاتنوچوونێ ژی هاتیە درێژكرن و حوكمەت ب هووری دێ چاڤدێریا پرسا بهایێ پانزینێ ل هەرێمێ كەت.
پێشەوا هەورامانی، پەیڤدارێ حوكمەتا هەرێما كوردستانێ بۆ رۆژنامەیا ئەڤرۆ گۆت: «دەمێ‌ لێخۆشبوونێ ل سەر قەرێن كەڤن یێن كارەبا مالان و چاندنێ ب رێژەیا 50%، ب تنێ بۆ مەهەكێ یە و یێن جهێن بازرگانی بڕیار لێخوشبوونا 25%یە و ل رۆژێن بهێن دێ وەزارەتا كارەبێ هووركاریێن چاوانیا دانا وان قەرێن كارەبێ راگەهینیت».
ل دۆر بهایێ پانزینێ ژی گۆت: «ژ چو لایەن و بازرگانان ناهێتە قەبوولكرن، كو ل وان بهایێن هاتینە دیاركرن، گرانتر پانزینێ‌ بفرۆشن، هەر لایەنەكێ بەروڤاژی بڕیارێ سەرەدەریێ بكەت دێ هێتە سزادان».

ئامێدیێ، مەحمود نهێلی:

ژ بەر نەبوونا كارەبا موەلیدێ و كێم بوونا كارەبا نیشتیمانی، هەروەسا نەراكرنا گلێشی ژ لایێ كۆمپانیا پاقژكرنێ ڤە، هەژمارەكا وەلاتیێن ناوچەدارییا شێلادزێ خوەنیشادانەك ئەنجام دا و داخوازا چارەسەكرنا ئاریشەیێن خوە دكەن.
ئێك ژ وەلاتیێن ڤێ ناوچەداریێن كو پشكدار بوو د وێ خرڤەبوونێ دا بۆ ئەڤرۆ دیار كر، ئەڤە چەندین رۆژە كارەبا وان یا موەلیدێ خراب بووی و كارەبا نیشتیمانی ژی یا كێمە و گەلەك جاران كارەبا وان بۆ زێدەتری 12 دەمژمێران نینە و گۆت: «ژ بەر ڤان ئەگەران، مە ئەڤ خرڤەبوونە ئەنجامدایە و داخواز دكەین ئەڤ ئاریشەیا مە بهێتە چارەسەركرن».
وەلاتیەكێ دی یێ پشكدار د خرڤەبوونێ دا بۆ ئەڤرۆ گۆت: «ئاریشەیا مە نە ب تنێ كارەبە، گەلەك ئاریشەیێن دی ژی مە هەنە، وەكو: نەراكرنا گلێشی، كو چەند حەفتیە گلێش ل كۆلانان كۆمڤەبوویە».
وارشین سەلمان، دەڤەردارێ ئامێدیێ ل دۆر خرڤەبوونێ‌ بۆ ئەڤرۆ دیار كر، ئەو ل سەر هێلێنە ژ بۆ چارەسەركرنا ئاریشەیێن وان، ب تایبەت یێن گرێدایی كارەبێ و راكرنا گلێشی و گۆت: «كەسەكی رازبیوونا خوە دیار كریە، كو موەلیدەكێ دانیتە وی تاخی، هەروەسا رێژا بەردانا كارەبا نیشتیمانی ژی بۆ ڤێ دەڤەرێ بهێتە زێدەكرن، دیسا د ڤان نێزیكان دا ئاریشەیا رانەكرنا گلێشی ژی دێ هێتە چارەسەكرن».

دهۆك، لەزگین جۆقی:

بۆ جارا ئێكی كۆمەلگەهەكا كارگێڕی ب شێوەیەكێ‌ مۆدرێن و سەردەمیانە ل ناوچەداریا خانكێ دئ هێتە دروستكرن.
زەردەشت شێخ شامۆ، ڕێڤەبەرێ ناوچەداریا خانكێ بۆ ئەڤرۆ گۆت: «دەست ب دروستكرنا پڕۆژەیێ ئاڤاهییێ ناوچەداریا خانكێ هاتییە كرن، كو ب گوژمێ پتر ژ ئێك ملیار دیناران دهێتە بجهئینان».
گۆت ژی: «پشتی پڕۆژە تەمام دبیت، هەموو فەرمانگەهێن خزمەتگوزاری د ڤی ئاڤاهی دا دێ خزمەتا خەلكی كەن و كارێن وان ب ڕێڤەبەن».

رەمەزان زەكەریا:

د چارچۆڤێ بزاڤێن بەردەوام یێن باژێرڤانیا ئاكرێ دا بۆ پێشخستنا ژێرخانا باژێڕی و باشتركرنا جادەیێن هاتنوچوونێ، جادەیێن ناڤخۆیی ل تاخێ 11ی ئیلۆنێ‌ ب شێوازەكێ ئەندازیاری و ڕێكوپێك دهێنە بەرفرەهكرن.
زێرەڤان تەمۆ، پەیڤدارێ سەرۆكاتیا باژێرڤانیا ئاكرێ بۆ ئەڤرۆ گۆت: «بەرفرەهكرنا جادەیان دبیتە سەدەم بۆ سنۆرداركرنا ئاستەنگ و قەلەبالغیا ترۆمبێلان د ناڤا تاخی دا و ب ساناهیكرنا هاتنوچوونا رۆژانە یا ئاكنجیان و شۆفێران و جوانكرن و ڕێكخستنا تاخان و ل سەر پێشینەیا هەیڤانەیا باژێرڤانیا ئاكرێ ئەڤ پرۆژە دهێنە بجهئینان».

دهۆك، لەزگین جۆقی:

جێگرێ پارێزگارێ نەینەوا بۆ رۆژنامەیا ئەڤرۆ دیار كر كو شنگالێ پێدڤی ب بجهئینان و بهێزكرنا خزمەتگوزاریێن سەرەكی و ئاڤاكرنێ هەیە.
غەزوان ئەلداودی، جێگرێ پارێزگارێ نەینەوا ئاشكرا كر، شنگالێ‌ پێدڤی بجهئینان و بهێزكرنا خزمەتگوزاریێن سەرەكی و ئاڤاكرنا سەنتەرێ‌ دەڤەرداریێ‌ و گوندێن سەر ب وێ ڤە هەیە.
ناڤهاتی گۆت: «ئەم دوپاتییێ ل گرنگییا ئێكخستنا بزاڤێن حكومەتا خوەجهی و هەڤپشكان ل گەل ڕێكخراوێن نێڤدەولەتی دكەین، بۆ دابینكرنا هەموو ئاسانكاریێن پێدڤی بۆ سەرئێخستنا پلانا وەبەرهێنان و گەشەپێدانێ، دا كو ببتە ئەگەرێ بلەزكرنا پرۆسێسا ئاڤاكرنێ و دەستەبەركرنا ئارامی و گەشەپێدانا بەردەوام ل دەڤەرێ».

زاخۆ، دلۆڤان هالۆ:

جگەرخوین تاهر، ڕێڤەبەرێ گشتی یێ وەبەرهێنانێ ل ئیدارەیا سەربخوە یا زاخۆ بۆ ڕۆژناما ئەڤرۆ دیاركر كو پڕۆژەیەكێ نوو یێ وەبەرهێنانێ، كو هۆلەكا سینەمایێ یا مەزنە، ل سەر ڕووبەرێ دو هزار مەتران و ب گوژمێ ئێك ملیۆن دۆلاران، ل ئیدارەیا سەربخوە یا زاخۆ دێ‌ هێتە دروستكرن.
ڕێڤەبەرێ گشتی یێ وەبەرهێنانێ ل ئیدارەیا سەربخوە یا زاخۆ گۆت: «ئەڤ هۆلا سینەمایێ ل دەمەكێ نێزیك ل سەر جاددەیا 60 مەتری د ناڤبەرا گوندێ دەشتمرێ و نیۆ زاخۆ دا دێ هێتە دورستكرن، كو ژ 306 كورسیێن ڕوونشتنێ پێك دهێت».
گۆت ژی: «د ڤی پڕۆژەیی دا خوارنگەهـ و پەرتووكخانەكا بچووك و پاركا دو نهۆمی یا ڕاوەستاندنا تڕۆمبێلان هەیە، دیسا د پلانا مە دایە، ل داهاتی فیستەڤالا فلمان ژی ل ڤێ هۆلا سینەما زاخۆ بهێتە ئەنجامدان».