قەیس وەیس:

تیما باسكێت بۆلا یانەیا زاخۆ پلێتا دەربازبوون بۆ فینالا خولا ئیراقێ‌ یا پیشەكاران ب دەستڤە ئینا پشتی شیایی د دیارییا دویێ ژ چارچووڤەیێ قووناغا چارگۆشەیا زێرین سەركەڤتنێ‌ ل سەر هەڤڕكا خوە نەفت میسان بینیت ب ئەنجامێ‌ 81 خالان بەرانبەر 51 خالان، د یارییا واندا ئەوا ل هۆلا گرتییا بنگەهێ‌ وەرزش و لاوێن زاخۆ هاتیە كرن.
د یارییا ئێكێ‌ یا ڤێ‌ قووناغێ‌ دا ئەوا ل باژێرێ‌ میسان هاتیە كرن، یانەیا زاخۆ شیابوو ب ئەنجامێ‌ 71 خالان بەرانبەر 67 خالان سەركەڤتنێ‌ بنیت ژ سەرجەمێ‌ هەردو یارییان شیا دەربازبیتە فینالا خولێ‌ كو دبیتە جارا ئێكێ‌ د دیرۆكا خوە دا ب گەهیتە ڤێ‌ قووناغێ‌.
ژلایەكێ‌ دووڤە یانەیا دیفا ئەلجویی قارەمانا وەرزێ‌ بۆری ژی دەربازبوو یارییا فینالێ‌ پشتی شیایی د هەردو یاریێن خوە دا ب سەركەڤیت ل سەر یانەیا حەشد ئەلشەعبی ب 100 خالان بەرانبەر 90 خالان، و یارییا دویێ 83 خالان بەرانبەر 70 خالان.
ل دۆر دەربازبوونا وان بۆ فینالێ‌ و پێنگاڤێن داهاتی جوتیار عەلی ڕاهێنەرێ‌ تیما زاخۆ بۆ رۆژنامەیا ئەڤرۆ گۆت: هەروەكو مە پێشتر بۆ هەوە خویاكر ب مۆرالەكا بلند و پشتەڤانییا جەماوەری ئەم شیایین ب سەركەڤین و دەربازبینە فینالێ‌، ئەڤە ژی دەستكەڤتەكێ‌ نوویە بۆ باسكێت بۆلا زاخۆ و یانەیێ، گەلەك كەیفخوەشین ئەم شیاین ب گەهینە ڤێ‌ قووناغێ‌، دەلیڤەیەكا دیرۆكی بەرانبەری مە یە، یارییا فینالێ‌ بتنێ‌ ئێك یاری نابیت بەلكۆ ل دووڤ سیستەمێ‌ خولێ‌ دێ‌ پێنچ یاری دناڤبەرا مە هەردو یانەیان دهێتە كرن ئەڤە ژی سیستەمێ‌ جیهانی یە.
هەروەسان گۆت: ژ سەرجەمێ‌ هەرپێنج یاریێن دناڤبەرا مە دا هەر تیمەكا سێ‌ سەركەڤتنان بنیت دێ‌ ب فەرمی بیتە قارەمانا وەرزێ‌ ئەڤ سالە یا خولێ‌، هەرچەندە ژڤانێ‌ یاریێن داهاتی دیار نەكرینە لێ‌ هەر ژ نوكە ئەم دێ‌ ب شێوەیەكێ‌ جودا دەست ب بەرهەڤیان كەین و هەموو هێز و هیڤی و ئارمانجا مە سێ سەركەڤتنن ژبۆ گەهشتن بەر ب خەونا مە یا مەزن، كارگێرییا یانەیێ گەلەك هاریكارە و پشتەڤانێن مەنە و هەروەسان مە لەشكەرەكێ‌ مەزن یێ پشتەڤانان وەفدارێن ناڤێ‌ زاخۆ ب هیڤی نە دیرۆكەكا نوو بینن و ناسناڤی بۆ باژێرێ‌ خوە و كوردستانێ‌ ب دەستڤە بینن.
بۆ زانین د دیرۆكا خولا باسكێت بۆلا ئیراقێ‌ یانەیا دهۆك پێنج جاران ناسناڤ ب دەستڤە ئینایە، پترترین یانە ناسناڤ دەستڤە ئینایی یانەیا كەرخ بوویە، هەروەسان هەر ئێك ژ یانەیێن نەفت حەفت جاران، ئەلرەشید پێنج جاران، دیفاع ئەلجەوی جار جاران، حللە و شورتە هەر ئێك سێ‌ جاران، جەیش و كارەبا هەر ئێك دو جاران و یانەیا جەوییە جارەكێ‌.

ڕاپۆرتێن ڕۆژنامەڤانی ل ئیتالیایێ دوباتی ل سەر گەهشتنا ڕێكەفتنا دەستپێكی دناڤبەرا ستێرێ‌ پێشتر یێ ئیتالیا ئەندرێیا پێرلۆ و فدراسیۆنا فوتبۆلا ئیتالیا ژبۆ وەرگرتنا پۆستێ‌ ڕاهێنەراتییا هەلبژارتیێ ئیتالیا پشتی چوونا ڕاهێنەرێ‌ بەرێ‌ جینارۆ گاتۆزۆ ئەوێ‌ نەشیایی هەلبژارتیێ ئیتالیا ب گەهینە مۆندیالا 2026ێ‌.
رۆژنامەیا لاگازیتا دیلۆ سپۆرت یا ئیتالی بەلاڤكرییە، د ماوەیێ بۆری دا فدراسیۆنا فوتبۆلا ئیتالیا گەهشتیە ڕێكەڤتنێ‌ دگەل ستێرێ‌ پێشتر یێ ئیتالیا ئەندرێیا پێرلۆ ژبۆ وەرگرتنا ئەركێ‌ ڕاهێنەراتییا هەلبژارتیێ ئیتالیا و گرێبەستا وی هەتا سالا 2030ێ‌ دێ‌ بەردەوامبیت پشتی ڕازیبوون ل سەر مەرجێن دارایی و هونەری، بڕیارە د رۆژێن بهێت ببیتە فەرمی.

د داخویانیەكێ‌ دا عەبدولغەنی شەەهد ڕاهێنەرێ‌ وەرزێ‌ بۆری یێ هەردو یانەیێن دهۆك و زاخۆ گۆت: وەكو كەسەك یێ سەربوور هەی دگەل هەردو یانەیێن دهۆك و زاخۆ، ئەو سەرەدەرییا جوان یا خەلكی و كاركرنا ئەكادیمی یا هەردو یانەیان، من هیچ جارەكێ‌ ئاریشەیا نەبوونا مووچەیان یان مایتكرن د كارێن راهێنەری دا كو كارتیكرنێ‌ ل سەر پلانان بكەت من نە دیتیە، بەروڤاژی ئەو سەردەرییا یانەیێن دی یێن ئیراقێ‌ بەرانبەر پرانییا ڕاهێنەران دكەن گەلەك جاران ئاریشە پەدابووینە و مافێ‌ چەند راهێنەران هەتا یاریزانان ژ هاتینە خوارن لەوما ژی ژینگەها كاری ل گەل یانەیێن دهۆك و زاخۆ باشترە ژ هەموو یانەیێن دی یێن ئیراقێ‌.
ژلایەكێ‌ دووڤە عەبدولغەنی شەهد گۆت: دەما تو یانەیێن كوردستانێ‌ دهەلسەنگینی دناڤبەرا هەر چار یانەیان دا هەڤڕكییەكا تایبەت یا هەی، ژلایێ پشتەڤانان، ژلایێ یانەیان ڤە، ئەڤە ژی هێزەكا دی و جوانیەكا دی ددەتە خولا ئیراقێ‌، ژلایەكێ‌ دووڤە هەڤڕكییەكا دی دناڤبەرا یانەیان دا هەیە ئەو ژی ئینانا یاریزانێن باش و دانا پارەیەكێ‌ زەبلحەیت پێخەمەت یاریێ بۆ یانەیا وی بكەت و نە چیتە یانەیەكا دی، یا ژ هەموو یێ گرنگتر ئەوە دناڤبەر هەر چار یانەیێن كوردستان یدا هەڤڕكییەكا دی هەییە ئەو ژی كی دێ‌ ل پێشییا ڕێزبەندیێ بیت و كی ژ یانە دێ‌ بەری یانەیا دی بیت، ئەڤە ژی خالەكا ئەرێنیی بۆ هێزا خولێ‌ و هەڤڕكێ.
ل دۆر گرێبەستێن گران بوها یێن یانەیا گۆت: هەرچەندە ئەڤ بابەتە ب وانڤە گرێدایە، لێ‌ هەكە سنۆرەك بۆ گرێبەستان هەبیت گەلەك باشتر بوو سەرباری هندەك یاریزان ژ هەژی وێ گرێبەستا گران بوهانە، لێ‌ سەرنجراكێشە كو گرانبووهایا یاریزانان هەر دناڤبەرا هەڤڕكییا یانەیان بوویە نموونە ئینانا یاریزانان و هەڤڕكییا گرێبەستان دناڤبەرا دهۆك و زاخۆ ، هەولێر و نەورۆز جێوازترە ژ یانەیێن دی یێن ئیراقێ‌، بتنێ‌ هوسا هزر دكە نئێك ژ یێ دی باشتر بیت، هزر د یانەیێن وەكو زەورا دا یانە هەر یانەیەكا دی دا ناكەن و ئەڤە ڕاستییە.

پشتی بۆ ماوەیێ دو حەفتیان ل سەر دانۆستاندنێن بەردەوام و ناكۆكیێن كارگێری ب فەرمی محەمەد سەلاح یاریزانێ‌ پێشتر یێ یانەیا لیڤەرپۆلا ئنگلتەرایێ و ستێرێ‌ هەلبژارتیێ مسرێ‌ ل گەل یانەیا بەشكتاش یا توركی گەهشتە ڕێكەڤتنێ‌ و گرێبەست بۆ ئێك وەرز ئیمزاكر، پشتی ب ڕێیا تلفونەكا سەرۆكێ‌ توركیا رەجەب تەیب ئەردۆگان یاریزان ڕازیبووی.
ل دووڤ رۆژنامەیێن توركیا ل سەر گڤاشتنێن پشتەڤانان و نەگەهشتنا ڕێكەڤتنا دەستپێكێ‌ دناڤبەرا محەمەد سەلاح و كارگێرییا بەشكتاش، سەرۆكێ‌ توركیا رەجەب تەیب ئەردۆگان هیڤیێن پشتەڤانان بجهئینا ب ڕێیا تلەفۆنەكێ‌ دگەل ستێرێ‌ مسری محەمەد سەلاح گەهشتە ڕێكەڤتنا دووماهیێ و ڕازیبوو ل سەر گرێبەستێ‌ ب مووچەیی سالێ‌ 12 ملیۆن یۆرۆیان.

پشتی ب دووماهی هاتنا مۆندیالا 2026ێ‌ ئێدی پشتەڤانێن وەرزشی دێ‌ بەر ب تەماشەكرن و دۆڤچوونا خولێن ئۆرۆپا و نافخۆ كەت ئەوا كو ژڤانێ‌ وەرزێ‌ نوو یێن خولێن جیهانی بۆ یارییا فوتبۆلێ‌ بەر ب نێزیك بوون دهێت.پشتی ب دووماهی هاتنا مۆندیالا 2026ێ‌ ئێدی پشتەڤانێن وەرزشی دێ‌ بەر ب تەماشەكرن و دۆڤچوونا خولێن ئۆرۆپا و نافخۆ كەت ئەوا كو ژڤانێ‌ وەرزێ‌ نوو یێن خولێن جیهانی بۆ یارییا فوتبۆلێ‌ بەر ب نێزیك بوون دهێت.بڕیارە ژڤانێ‌ هەر پێنچ خولێن مەزنە ئۆرۆپا دێ‌ بڤی دەمی هێنە ئەنجامدان، خولا ئسپانیا ل 16-8- 2026، ژلایەكێ‌ دووڤە خولا ئنگلتەرا دێ‌ ل 22- 8- 2026ێ‌ هێتە كرن، پشتی وێ‌ ب رۆژەكێ‌ ل 23-8- 2026ێ‌ خولا فرەنسا دێ‌ دەستپێكەت، د هەمان رۆژ دا بڕیارە خولا ئیتالیا ژی بهێتە ئەنجامدان، پێنجەمین مەزنە خولێن ئۆرۆپا یا ئەلمانییا ئەوا دێ‌ ل 28-8- 2026ێ‌ دەستپێكەت.

د ئێكەم كۆنگرەیێ خوە یێ رۆژنامەڤانی دا یۆرگن كلۆپ پشتی ب فەرمی بوویە ڕاهێنەرێ‌ هەلبژارتیێ ئەلمانیا دیار كر ئەو دێ‌ كار كەت دوبارە گرنژینێ‌ پێخیتە ل سەر لێڤێن هەمی پشتەڤانێن ئەلمانیا و بایرن میۆنخ بلا نە ترسیت.
د پشكەكا دیدارا خوە دا گۆت: هاتنا من بۆ ناڤ هەلبژارتیێ ئەلمانییا شانازییە، من كۆمەكا هزر و پلانان ل گەل خوە ئیناینە، ئەلمانییا هەردەم دێ‌ ب هێز مینی تلێ‌ د نوكە دا نە بتنێ‌ پێدڤی ب گوهۆڕینا چەند یاریزانایە بەلكو گوهۆڕینا هزری و هێزكرنا وەفداریێ یە، ڕاستە پێشتر ڕاهێنەرێ‌ لایبزیك و دۆرتمۆند بووم، بلا بایرن میۆنخ نە ترسیت كو چو یاریزانانێن وان ژێناگرم، 56 یاریزان هاتینە دەستنپێشانكرن و كۆمەكا باش یا ڤێ‌ یانەیێ دناڤدانە، ژبەركو یاریزانێن خودان شیان هەنە.