قەیس وەیس:

د چەند رۆژێن بۆری دا هندەك روودان و بزاڤێن جورە و جور دناڤا یانەیێن پشكدار د خولا ستێرێن ئیراقێ‌ یا فوتبۆلێ‌ دا پەیدابووین و دەستپێكەكا گەرماتیا گرێبەستێن یاریزانان هاتە پێش خوە بەرهەڤكرن بۆ وەرزێ‌ نوو 2026-2027، ئەوا بڕیارە هەڤڕكیێن خولێ‌ دێ‌ ل 14ێ‌ تەباخا بهێت ب پشكدارییا 20 یانەیان دەستپێبكەت، گشت یانەیێن پشكدار ژ وانا یانەیێن كوردستانی ل سەر دانۆستاندنان و ئینانا یاریزان و ڕاهێنەران بەردەوامن.
دهۆك نە ڕاوەستیایە
سەرباری بێدەنگییا یانەیا دهۆك ب نووكرن و ئیمزاكرنا گرێبەستێن یاریزانان هەروەسان پشتی ل حەفتییا بۆری گرێبەستا ڕاهێنەرێ‌ ئیرانی یەحیا گۆلمحەمەد هاتیە ڕاگەهاندن، یانە ل سەر دانۆستاندنان ل گەل كۆمەكا یاریزانێن خوە یێن وەرزێ‌ بۆری بەردەوامە ژبۆ نووكرنا گرێبەستان، هەروەسان بزاڤێن ئینانا چەند یاریزانێن نوو دكەت، لدووڤ دەنگۆباسێن بەلاڤبووی هادی كەریم یاریزانێ‌ پێشتر یێ یانەیا زاخۆ نێزیكی ئیمزاكرنا گرێبەستا دهۆكێ‌ یە، هەروەسان ل حەفتییا بۆری هاتبوو بەلاڤكرن هەر ئێك ژ هیرشبەرێ‌ سوری مەحمۆد ئەلمواس، شەریف عەبد كازم، یێ‌ بەرازیلی ڕایكار سانتۆس، ڕێوان ئەمین، سێ‌ یاریزانێن گەنج یێن هەلبژارتیێ لاوێن ئیراقێ‌، یێ‌ بەرازیلی ئیگۆرد هێنریك و یونس حەمۆد پەیوەندی ب یانەیا دهۆكێ‌ كرینە.
پارێزگارێ‌ دهۆكێ‌: دەستان ژ دهۆكێ‌ بەرنادەین
د كۆنگرەیەكێ‌ رۆژنامەڤانی دا د. عەلی تەتەر پارێزگارێ‌ دهۆكێ‌ بۆ رۆژنامەڤانان دیار كر كو ئەو دەستان ژ پشتەڤانییا یانەیا دهۆكێ‌ بەرنادەن و یانە بخوە ژی یا ئاگەهدارە مە پارە بۆ یانەیێ قەركرینە و وەكو كەسەك نە هێلایە یانە هەست بێ‌ پشتەڤانیێ بكەت، لێ‌ ئێك تشت هەیە دڤێت هەمی بزانن، هەوە ئاگەهی ژ كاودانێن رۆژهەلاتا ناڤەڕاست هەیە، كاودانێن شەڕی و یێن ئیراقێ‌ هەیە، لڤینا ڕاوەستیایی و داهات یێ كێم بووی، پێشتر پشتبەستنا مە ل سەر داهاتێ‌ ناڤخۆ بوو، پشتی شەڕی داهات گەلەك یێ‌ كێمبووی، حەزدكەم پشتەڤان ل كاودانا تێبگەهن و كاودانێن دەولەتی و بازرگانییا نێڤدەولەتی تێبگەهن، ئەو لڤینا بازرگانی یا جارا نەمایە و ڕاوەستیایە، نەبتنێ‌ داهاتێ‌ هەرێمێ‌ بەلكو یێ ئیراقێ‌ ب گشتی كێمبوویە، پشت ل یانەیێ‌ نە هاتیە كرن و هیچ جوداهییەك نینە دناڤبەرا یانەیان و حوكمەتا هەرێما كوردستانی ب یەكسانی پشتەڤانیێ دكەت، هیچ پارەیەك بۆ یانەیەك نە مەزێخیت و بۆ یانەیەكێ‌ مەزێخیت، پشتەڤانییا مە بۆ دهۆكێ‌ دێ‌ بەردەوام بیت.
پیتەر گۆرگیس دێ‌ چیتە مسرێ‌
لدووڤ ژێدەرێن رۆژنامەڤانی ستێرێ‌ یانەیا دهۆك و گۆلكەرێ‌ سێیێ‌ یێ‌ خولا ستێرێن ئیراقێ‌ پیتەر گۆرگیس نێزیكێ‌ ئیمزاكرنا گرێبەستەكێ‌ یە دگەل یانەیا ئەهلی یا مسری و بڕیارە د ڤێ‌ حەفتیێ دا دانۆستاندنێن وان بگەهنە ئەنجامەكی، پێشتر پیتەری ئەوچەندە دیاركربوو هەكە گرێبەستا هیچ یانەیەكا دەرڤەیی ئیراقێ‌ ئیمزا نەكر ئەو دێ‌ دوبارە ڤەگەڕێتە دهۆكێ‌ و گرێبەستا خوە نووكەت.
هارۆن ئەحمەد: نە خائینم
ستێرێ‌ پێشتر یا یانەیا دهۆكێ‌ هارۆن ئەحمەد د بەرسڤەكێ‌ دا بۆ پشتەڤانێن یانەیا دهۆك ل تۆرا كۆمەلاتی ل ئەكوانتێ‌ خوە یێ‌ تایبەت دا گۆت: «ل نێزیكترین دەم دا دێ‌ ب ڕێیا لایڤەكی دا رۆهنكرنێ‌ دەم دا راستییا چوونا من ژ دهۆكێ‌ بۆ هەموو لایەكی دیار بكەم، چنكو من نەڤێت جەماوەر زێدەتر بیتە قوربان، من بڕیار دابو ونە ئاخڤم، بەس من لڤێرە فەر دیت د وەختێ‌ خوە دا ڕاستیێ دیاربكەم و گەلەك بابەتێن دی ژی بهێنە گرتن»، ئەڤ داخویانیە هات پشتی هارۆنی گرێبەستا یانەیا زاخۆ ئیمزاكری و بەشەكێ‌ زوور یێ‌ پشتەڤانێن دهۆكێ‌ هارۆن ب خائین دایە نیاسین.
زاخۆ مێركاتۆیەكا ب هێز دەستپێكر
پشتی ل حەفتییا بۆری كارگێرییا یانەیا زاخۆ ڕاهێنەرێ‌ خوە یێ‌ تونسی ماهر كەنزانی دگەل كادرێ‌ وی د پرێسكۆنفرانس دا پێشكێشی دەزگەهێن ڕاگەهاندنێ‌ كری، دەست ب ئینانا یاریزانێن نوو ژی هاتیە كرن و گرێبەستا چەند یاریزانێن وەرزێ‌ بۆری ژی ئیمزاكرینە، پشتی گرێبەستا هارۆن ئەحمەد ستێرا یانەیا دهۆك هاتیە فەرمیكرن، شێركۆ كەریم گرێبەستا خوە دگەل یانەیێ نوو كر، هەروەسان بفەرمی گرێبەستا یاریزانێ‌ پێشتر یێ یانەیا كەرخ ئەسیر سالح هاتە ئیمزاكرن، ژلایەكێ‌ دووڤە محەمەدعەل عەبۆد گرێبەستا خوە نووكر، ل گۆرەیی زانیاریێن دەست ب رۆژنامەیا ئەڤرۆ كەڤتین یانەیا زاخۆ یا بزاڤێن ئینانا دو ستێرێن هەلبژارتیێ ئیراقێ‌ دكەت ئەوێن دنوكەدا پشكدار د مۆندیالێ‌ دا.
ئەحمەد سەبری دناڤبەرا زاخۆ و ئەلگەرمە دا
پشتی بفەرمی ژلایێ یانەیا زاخۆ هاتبوو ڕاگەهاندن ئەوا گرێبەستا یاریزان ئەحمەد سەبری ئیمزاكری، لێ‌ هاتە ئاشكەراكرن كو ئەوی گرێبەستا یانەیا ئەلگەرمە یا ئیمزاكری، لدۆر ڤێ‌ چەندێ‌ و پشتی بۆرینا كێمتر 12 دەمژمێرا ڕۆهنكرنە ژلایێ كارگێریێ ڤە هاتە دان و بەلاڤكرییە: یانەیا زاخۆ ڕێكەڤتنا دووماهیێ ل گەل یاریزان ئەحمەد سەبری كربوو و هەمی تشت هاتبوونە ئێكلا كرن، لێ‌ ژبەركو یاریزانی د هەمان دەم دا ب شێوەیێ ڤەشارتی پابەند نەبوو ب خالێن یاسایی دگەل یانەیێ و گرێبەستا یانەیەكا دی ئیمزاكربوو كو ل دژی پرەنسیپ و بنەمایێن پیشەكاریێ یێن ڕێكەڤتنێ‌ ل گەل یانەیی بوو، كارگێریا یانەیێ بڕیاردا دەستبەرداری ڤێ‌ گرێبەستێ‌ بیت، یانەیا زاخۆ ژ هەر یاریزانەكی مەزنترە و سەركەڤتنێ‌ بۆ وی دخوازین.

لژنەیا ئاماران و ڕیكۆردا ل فدراسیۆنا فوتبۆلا جیهانی فیفا دیار كر یاریزانێ‌ هەلبژارتیێ مەكسیك جێلبێرتۆ مۆرا یێ‌ 17 سال و240 رۆژ بچووكترین یاریزانە دناڤا مۆندیالێ‌ دا، دووڤدا لینارت كارل یاریزانێ‌ هەلبژارتیێ ئەلمانیا یێ‌ 18 سالی یە، یێ‌ هەلبژارتیێ ئسپانیا لامین یامال ل ڕێزا سێیێ‌ 18 سالی یە، ژ لایەكێ‌ دووڤە دیاركر كو یاریزانێ‌ هەلبژارتیێ ئسكۆتلەندا كرێچ جۆردۆن یێ‌ 42 سالی و 162 رۆژان دبیتە مەزنترین یاریزان دناڤا مۆندیالێ‌ دا، ژلایەكێ‌ دووڤە دیاركر كو ددیرۆكا مۆندیالان دا مەزنترین گۆلپارێزێ‌ هەلبژارتیێ مسرێ‌ عیسام ئەلخزر بوویە ئەوێ‌ ژیێ وی گەهشتبوو 45 سال و 161 رۆژان دووماهی مۆندیال یا 2018ێ‌ بوو، بچووكترین یاریزان د دیرۆكا مۆندیالان دا هەتا نوكە یێ‌ ئیرلەندا باكۆرە نۆرمان وایتسایدە ل مۆندیالا 1982 پشكداربوو.

ستێرێ‌ هەلبژارتیێ توركیا ئاردا گۆلەر داخوازا لێبۆرینێ‌ ژ جەماوەر و خەلكێ‌ توركیا كر پشتی نەشیایین د یارییا دویێ ل دووڤ ئێك سەركەڤتنێ‌ بینن و دەربازبوون بۆ قووناغا 32ێ‌ ژ دەست بدەن، پشتی دیارییا دویێ دا تووشی خوسارەتیێ بوویی دگەل هەلبژارتیێن ئوسترالیا و باراگۆایی.
ئاردایی بۆ دەزگەهێن ڕاگەهاندنێ‌ گۆت: هەست ب شەرمێ‌ دكەین بەرانبەر خەلكێ‌ خوە، مە پێشبینیا وێ‌ چەندێ‌ نە دكر، د یارییا بەرانبەر باراگۆایی مە سۆزا سێ‌ خالان دابو ولێ‌ نەگەهشتینە ئارمانجا خوە، مە شاشی هەبوون و زوو گۆل ل سەر مە هاتە تۆماركرن، زێدەتر نەشێن باخڤم بتنێ‌ دڤێت بۆ داهاتی ئەم باشتر بین.

ڕێژەیا كارتێن سۆر بەر تۆماركرنا ڕیكۆردی
پشتی ب دووماهی هاتنا یاریێن گەڕا ئێكێ‌ و دەستپێكرنا گەڕا دویێ ژ قووناغا كۆمان ڕێژەیا كارتێن سۆر بەر بلندبوونێ‌ دچیت، بتنێ‌ پشتی 30 یاریێن بۆری دا حەفت كارتێن سۆر بۆ یاریزانان هاتینە دان كو پترە ژ سەرجەمێ‌ كارتێن سۆر یێن مۆندیالا رۆسیا 2018 و قەتەر 2022ێ‌ كو د هەر مۆندیالەكێ‌ دا بتنێ‌ چار كارتێن سۆر هەبوون، دهێتە چاڤەڕێ‌ كرن مۆندیالا 2026ێ‌ ڕێژەیا كارتێن سۆر بەر تۆماركرنا ڕیكۆردی بچیت هەكە بڤی شێوەیی بیت، بۆ زانین مۆندیالا ئەلمانیا 2006ێ‌ پترترین كارتێن سۆر بوون كۆ گەهشتبوونە 28 كارتێن سۆر.