ئەندامەکێ پەرلەمانێ تورکیا دیار دکەت سەرەدانا نوونەرێ سەرۆکێ ئەمریکا بۆ هەرێما کوردستانێ و دیدارا ل گەل مەزلوم عەبدی نیشا ددەت کو ئەمریکا هەست ب ڤێ یەکێ کریە ئێدی بێی بەرچاڤ وەرگرتنا رۆل و سەنگێ کوردان نەشێن چو گوهۆڕینان ل دەڤەرێ بکەن.

سینان چیفت یورەک ئەندامێ پەرلەمانێ تورکیا دیار کر، سەرەدانا ڤێ دووماهیێ یا تۆم باراکی بۆ هەولێرێ و دیدارێن وی ل گەل سەرکردایەتیا هەرێما کوردستانێ و مەزلوم عەبدی فەرماندارێ گشتی یێ هەسەدێ نیشا ددەت کو ئەمریکا دزانیت بێی بەرچاڤ وەرگرتنا رۆل و سەنگێ کوردان ئەو نەشێن چو گوهۆڕینان ل دەڤەرێ بکەن و گۆت: (ئێدی ئەمریکی بخوازن هەر گوهۆڕینەکێ ل دەڤەرێ بکەن یان ژی دەست ب بەرنامەیەکێ نوو بۆ رۆژهەلاتا ناڤین بکەن دڤێت رۆلێ کوردان بەرچاڤ وەربگرن و ئەو سەردەم نەما کار بۆ ڤێ یەکێ بهێتە کرن بێی کوردان گوهۆڕینان بکەن و کوردان بێی ماف بهێلن).
ئەندامێ پەرلەمانێ تورکیا ئەو یەک ژی دیار کر، دڤێت تورکیا و هەموو وەلاتێن دی یێن رۆژهەلاتا ناڤین ئێدی چو حسابێن شاش نەکەن، بەری نها گەلەک جاران ئینکارا کوردان هاتیە کرن، لێ نها سەردەمێ ئینکارکرنا کوردان نەمایە و دڤێت تورکیا و هەموو وەلاتێن دی یێن رۆژهەلاتا ناڤین راستیا هەی قەبوول بکەن، ئێدی تورکیا و ئیران و وەلاتێن دی نەشێن وەسا نیشا بدەن کو کورد نین یان ژی ئەو دشێن بێی کوردان یا دڤێت ئەنجام بدەن و گۆت: (د ئاستێ نێڤدەولەتی و هەروەسا د ئاستێ رۆژهەلاتا ناڤین دا ژی گوهۆڕینێن گەلەک مەزن روو داینە و نها هەموو وەلاتێن جیهانێ هەبوونا کوردان قەبوول کرینە، ل سووریێ و ئیراقێ کوردان شیاینە هەبوونا خوە وەکو نەتەوەیەک جودا بدەنە قەبوول کرن و بێگومان ل تورکیا ژی قووناغەکا نوو دەستپێکریە و گرنگە بەرپرسێن تورکیا ژی راستیا هەی قەبوول بکەن، دڤێت بەرپرسێن تورکیا باش بزانن بێی کوردان ئێدی رەوشا تورکیا ئارام نابیت، بەرنامەیێن مەزن بۆ پاشەرۆژا رۆژهەلاتا ناڤین هەنە و گرنگە تورکیا ژی ئێدی ب کریاری کار بۆ چارەسەرکرنا پرسا کوردی بکەت و دەست ژ سیاسەتا خوە یا مژوولکرنا کوردان بەردەت).
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، کورد ل رۆژهەلاتا ناڤین هێزەک مەزنن، کورد فاکتەرێ ئارامیێ نە، کوردان ل سووریێ و ئیراقێ د شەڕێ ل دژی تیرۆرێ دا گەلەک قوربانی دان و نها هەرێما کوردستانێ ئێکە ژ دەڤەرێن هەی ئارام و پێشکەفتی ل رۆژهەلاتا ناڤین، هەروەسا پێکڤەژیانا ئاشتیانە یا هەموو نەتەوەیان ل هەرێما کوردستانێ ژی بۆ هەموو جیهانێ سەلماندیە کو کوردان دڤێت ل گەل هەموو نەتەوەیێن دی پێکڤە وەکو برا بژین.
ئەندامێ پەرلەمانێ تورکیا ئەو یەک ژی نەڤەشارت کو، ئەمریکا هەر بەرنامەیەک بۆ دەڤەرێ هەبیت دێ رۆلێ کوردان بەرچاڤ وەرگریت، سەرەدانا تۆم باراکی بۆ هەولێرێ و ل وێرێ هەڤدیتنا وی یا ل گەل مەزلوم عەبدی ژی نیشا ددەت ئەمریکا گرنگیەکا مەزن ددەتە کوردان و بێگومان هەکە هەموو هێز و ئالیێن سیاسی یێن کوردی پێکڤە کار بکەن دێ وی دەمی پێگەهێ کوردان ژی بهێزتر لێ هێت و گۆت: (بهێزبوونا پێگەهێ هەرێما کوردستانێ دهێتە رامانا بهێزبوونا رۆژئاڤایێ کوردستانێ ژی و دەمێ هەر دو پارچەیێن کوردستانێ بهێز بن بێگومان دێ حسابەک مەزن د ئاستێ جیهانی و رۆژهەلاتا ناڤین دا بۆ کوردان هێتە کرن).

ئەندامەکێ سەرکردایەتیا ئەنجوومەنێ نشتیمانی یێ کوردی ل سووریێ دیار دکەت، بێی پشکداریا کوردان د حوکمەتا سووریێ دا شام نەشێت پرسێن هەی چارەسەر بکەت و دڤێت کورد ل سووریێ بگەهنە مافێن خوە، دڤێت کوردان رۆلەک بەرچاڤ د رێڤەبەریا سووریێ دا هەبیت و ژ بەر ڤێ یەکێ ژی گرنگە شام راستیا هەی قەبوول بکەت و رێزێ ل هەموو مافێن گەلێ کورد ل سووریێ بگریت.
ئیبراهیم برۆ ئەندامێ لیژنەیا پەیوەندیێن دەرڤە یا ئەنجوومەنێ نشتیمانی یێ کوردی ل سووریێ ئەو یەک ژی دیار کر، ئەو گەلەک گرنگیێ ددەنە ئێکەتیا ناڤمالیا کوردی و کۆنفرانسێ قامشلۆ ژی گاڤەک مەزن و گرنگ بوو، لێ مخابن هەسەدە و هێزێن دگەل دا وەکو پێدڤی هەتا نها بۆ ئێکگرتنا کوردان کار نەکرینە و گەلەک ئاستەنگی هەنە و دڤێت هەسەدە و هێزێن ل گەل وێ کار بکەن دا پرسێن هەی بهێنە چارەسەرکرن و گۆت: (گەلەک گرنگە کورد پێکڤە ل سووریێ کار بکەن، ئێکەتیا کوردان ل سووریێ گەلەک یا گرنگە و شام ژی نەچارە وی دەمی هزرەکا جودا بۆ کوردان بکەت، نابیت شاشیێن بەری نها بهێنە دوبارە کرن، چونکی ل سووریێ گوهۆڕینێن مەزن روو داینە و دهێتە چاڤەرێکرن د پاشەرۆژێ دا ژی گوهۆڕینێن مەزن روو بدەن، ژ بەر ڤێ یەکێ ژی ئەم دوپات دکەین دڤێت کورد پێکڤە کار بکەن و ئێکگرتی بن).
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، ڤەگەرا ئاوارەیان بۆ عەفرینێ و دەڤەرێن دی یێن رۆژئاڤایێ کوردستانێ گەلەک گرنگە و د هەمان دەمی دا دڤێت شێوەیێ رێڤەبەریێ ل رۆژئاڤایێ کوردستانێ ژی بهێتە گوهۆڕین و هەکە تشتەک وەسا روو بدەت دێ گەلەک وەلاتیێن دی یێن کورد ژی ڤەگەرنە ڤە مالێن خوە و وی دەمی دێ رەوشا رۆژئاڤایێ کوردستانێ گەلەک باشتر لێ هێت و گۆت: (هەم ل سووریێ و هەم ژی ل رۆژئاڤایێ کوردستانێ رەوشەکا نوو هاتیە پێش و کەس نەشێت وەکو بەری نها سیاسەتێ بکەت، دڤێت هەموو هێزێن سیاسی ل سووریێ ل گۆر راستیا نها کار بکەن، ژ بەر ڤێ یەکێ ژی گرنگە پەیەدە و رێڤەبەریا خوەسەر ژی ل گۆر راستیا هەی سەرەدەریێ بکەن و هەلوەستێ خوە ل هەمبەر هێزێن دی یێن سیاسی بگوهۆڕن).
ئیبراهیم برۆ د دووماهیا ئاخڤتنا خوە دا ئاماژە ب ڤێ یەکێ ژی کر، سیستەمێ نها یێ سووریێ ژی دڤێت بهێتە گوهۆڕین، دڤێت سیستەمێ سووریێ ببیتە فیدرالی، هەکە تشتەک وەسا روو بدەت بێگومان دێ پرسا کوردی و هەروەسا پرسا نەتەوەیێن دی یێن ل سووریێ ژی هێتە چارەسەرکرن، ژ بەر ڤێ یەکێ ژی بەری نها مە چەندین جاران ئاماژە ب ڤێ یەکێ کریە کو پێدڤیا سووریێ ب سیستەمەک فیدرالی هەیە.