ب ئامادەبوونا د. عەلی تەتەر، پارێزگارێ دهۆكێ و دكتۆرە ڤیان سلێمان، هاریكارا بەرپرسێ مەكتەبا ڕێكخستنا پارتی ل پارێزگەهێ و د. نەوزاد عەبدوللا، بەرپرسێ لقێ ئێك یێ پارتی و د. داود سلێمان، سەرۆكێ زانكۆیا دهۆك، دوهی 20/7/2026 «سەنتەرێ داهێنان» ژ لایێ زانكۆیا دهۆك و ئەنستیتیۆتا داهێنان و نویگەری یا كوردستان ل كۆلیژا ئەندازیاری هاتە ڤەكرن.
پارێزگارێ دهۆكێ د پەیڤەكێ دا دەستخۆشی ل ڕێكخەرێن ڤەكرنا سەنتەرێ ناڤبری كر و پشتەڤانیا بەردەوام یا حوكمەتا هەرێما كوردستانێ بۆ سازیێن پێشڤەبرنا بیاڤێن جودا و پشتەڤانییا كەسانێن بەهرەمەند و داهێنەر دوپاتكر و هیڤیا سەركەفتنێ بۆ خواست.

زاخۆ، دلۆڤان هالۆ:

گوهدار شێخۆ، سەرپەرشتێ ئیدارەیا سەربخوە یا زاخۆ د كۆنگرەیەكێ ڕۆژنامەڤانی دا دیاركر كو وان ڕازیبوون ل سەر دورستكرنا 50 كارگەهان ل سنۆرێ ئیدارەیا سەربخوە یا زاخۆ دایە و دبێژیت: هندەك ژ وان كارگەهان ب دووماهی هاتینە و هندەك هێشتا د قووناغا بجهئینانێ‌ دانە، ب رێكا ڤەكرنا ڤان كارگەهان دەلیڤەیێن كاری بۆ گەنجان دێ‌ پەیدابن.
سەرپەرشتێ ئیدارەیا سەربخوە یا زاخۆ، سەبارەت قێركرنا جاددەیان گۆت: «پرۆسێسا قێركرنا جاددەیان ل زاخۆ بەردەوامەن ب ڕێژەیا 95% ب دووماهی هاتینە، ئارمانجا مە ئەوە ب ڕێژەیا 100% جاددەیێن زاخۆ بهێنە قێركرن، هەر كەسەكێ حەوشا وی یان خانیێ وی ژی بەر جاددەیێ بكەڤیت، دێ پارچەیەكا ئەردی یا 200 مەتری وەكو قەرەبوو وەرگریت و دێ هاریكار ژی بین بۆ دروستكرنا خانیێن وان».
زێدەتر گۆت: «ئەم دێ بزاڤان كەین، ڕێكا هاتنوچوونێ بۆ جهێ وان پارچەیێن ئەردی ژی دروست بكەین، یێن ل سەر فەرمانبەران دهێنە بەلاڤكرن».

رەمەزان زەكەریا:

ب مەرەما پاراستنا بەڕژەوەندییا گشتی و رووبڕووبوونا هەر جۆرە زێدەگاڤییەكێ، دەڤەردارێ ئاكرێ كۆمبوونەكا بەرفرەهـ ب ئامادەبوونا ڕێڤەبەرێن ناوچەداریان و لایەنێن ئەمنی و ئیداری ل دیوانا دەڤەرداریێ‌ ئەنجام دا.
كۆمبوون یا تایبەت بوو، بۆ دانانا سنۆرەكێ یاسایی بۆ زێدەگاڤییان و پاراستنا سامانێ گشتی ل سنۆرێ دەڤەرداریێ، ڕێگریكرن ل هەر جۆرە دەستدرێژی و زێدەگاڤییەكێ ل سەر مۆلك و مالێ گشتی، وەكو: دارستان، پاوان و حەرەمێن جادەیان، دیسا پاراستنا ژینگەهێ و داڕشتنا نەخشەڕێیەكێ بۆ پاقژڕاگرتنا دەڤەرێ ژ بەرمایكان و ڕاگرتنا هاڤسەنگییا ژینگەهێ و كێمكرنا روودانێن ئاگربەربوونێ.
بڕیار هاتەدان، لژنەیەكا هەڤپشك ژ دام و دەزگەهێن پەیوەندیدار بهێتە پێكئیان و لیژنە دووڤچوونا مەیدانی بكەت و ڕێنومایێن یاسایی بێ جوداهی بجه بینیت.

دهۆك، لەزگین جۆقی:

رێڤەبەری گشتی یێ‌ وەبەرهێنانێ ل پارێزگەها دهوكێ دیار كر كو هەژمارا مۆلەتێن وەبەرهێنانێ زێدەبووینە و دبێژیت: ل سالا 2019 ب تنێ دو پڕۆژەیێن وەبەرهێنانێ‌ ل دهۆكێ‌ مۆلەت وەرگرتبوو، لێ نوكە 365 پڕۆژەیان مۆلەت وەرگرتیە.
هەڤال سەدیق، رێڤەبەری گشتی یێ‌ وەبەرهێنانێ ل پارێزگەها دهوكێ بۆ ئەڤرۆ گۆت: «ل سالا 2019 دو پرۆژەیان مۆلەت وەرگرتبوو، ل سالا 2020 بوونە 15 پڕۆژە، ل سالا 2021 بوونە یازدە پڕۆژە، ل سالا 2022 بوونە 16 پڕۆژە، ل سالا 2023 بوونە 29 پڕۆژە ل سالا 2024 بوونە 34 پڕۆژە، ل سالا 2025 بوونە 45 پرۆژە و ئەڤ سالە هەتا نوكە حەفت پڕۆژەیان مۆلەت وەرگرتییە»
گۆت ژی: «ب تنێ‌ د كابینەیا نەهێ دا 159 مۆلەت بۆ پڕۆژەیان هاتینەدان».

هەولێر، قائید میرۆ:

پەڕلەمانتارەكێ فراكسیۆنا پارتی ل پەرلەمانێ كوردستانێ ئاشكراكر، سەرەڕای كو پەڕلەمان یێ كارا نینە، بەلێ پەڕلەمانتارێن پارتی بەردەوام دووڤچوونا ئاڕێشەیێن وەلاتیان دكەن و دبێژیت: فراكسیۆنا پارتی هەژمارەك لیژنە بۆ ڤێ مەرەمێ پێكئیناینە.
نسرەت سۆفی، پەڕلەمانتارێ فراكسیۆنا پارتی ل پەرلەمانێ كوردستانێ بۆ رۆژناما ئەڤرۆ دیاركر، راستە نوكە پەڕلەمان یێ كارا نینە، بەلێ ئەو بەردەوام كار بۆ خزمەتكرنا وەلاتیان دكەن و گۆت: «پەڕلەمانتارێن فراكسیۆنا پارتی ل هەر دەڤەرەكێ بن، بەردەوام د ناڤا خەلكی دانە، چونكی بەری هەلبژارتنان مە سۆز دابوو وەلاتیێن خۆ، ئەم ل گەل وان بین د هەر رەوشەكێ‌ دا، نوكە ئەم دزانین وەلاتیان چەندین ئاڕێشە هەنە و ئەم یێ كار بۆ چارەسەركرنا وان ئاڕێشەیان دكەین».
نسرەت سۆفی گۆت ژی: «فراكسیۆنا پارتی بەری نوكە كۆمبوونەك ئەنجامدایە و چەند لیژنەك پێكئیناینە، كارێ وان لیژنا دووڤچوونا ئاڕێشەیێن وەلاتیانە، ئەم وەكی پەڕلەمانتارێن پارتی بەردەوام ئاڕێشەیێن خەلكی كۆم دكەین و سەرەدانا وەزارەت و فەرمانگەهێن حوكمەتێ دكەین، هەتا ئاڕێشە بهێنە چارەسەركرن».

ئامێدیێ، مەحمود نهێلی:

نیڤ مەهە چار موەلیدێن تاخێ سەرهەلدان ل ناوچەداریا شێلادزێ ئاگر بەربوویێ و ژ كار كەفتی نە، ل وێ رۆژێ و تا نوكە زێدەتری هزار مالێن ڤی تاخی د بێ كارەبن.
ئێك ژ وەلاتیێن ڤی تاخی بۆ رۆژناما ئەڤرۆ دیار كر، ئەڤە 14 رۆژن ئاگر بەربوویە موەلیدێن تاخێ وان و گۆت: «هەتا نوكە ئەم د بێ كارەبین، ل رۆژێ ل بەر گەرمێینە و ب شەڤێ ژی د تاریێ داینە».
ناڤهاتی داخواز كر، ئاڕێشەیا وان بهێتە چارەسەركرن یان كارەبا نیشتیمانی بۆ وان بهێتە زێدەكرن یان ژی ئەڤ موەلیدێن وان بهێنە چێكرن و بكەڤنە كاری.
رزگار عوبەید، رێڤەبەرێ ناوچەدارییا شێلادزێ ل دۆر ئاڕێشەیا وان بۆ ئەڤرۆ گۆت: «ئەم ل گەل لایەنێن پەیوەندیدار ل سەر هێلن بۆ چارەسەركرنا ئاڕێشەیا وان، هەر ژ رۆژا ئێكێ یا روودانا ئاگرین ئەم ل گەل خودانێن موەلیدەیان و دەڤەرداێ ئامێدیێ و رێڤەبەرێ كارەبێ د پەیوەندیێ داینە، داكو ب زووترین دەم ئاڕێشەیا وان بهێتە چارەسەركرن و كارەب بۆ ڤی تاخی ڤەگەڕیتەڤە».

دهۆك، دلۆڤان ئاكرەیی:

رێڤەبەرێ قەرێ بچووك ل وەزارەتا كار و كاروبارێن جڤاكی دیاركر، بڕیارە بەری دووماهییا ئەڤ سالە، قووناغەكا دی یا پڕۆژەیێ «گەشانەوە» بهێتە ڕاگەهاندن و دبێژیت: ئارمانج ژێ‌ پشتەڤانیكرنا پڕۆژەیێن بچووك و ناڤنجی یە ل هەرێمێ‌، د ڤێ قووناغێ دا 100 كەس دێ مفاداربن و بۆ هەر پڕۆژەكی 150 ملیۆن دینار هاتینە تەرخانكرن.
ئارام ئەنوەر، رێڤەبەرێ قەرێ‌ بچووك بۆ رۆژنامەیا ئەڤرۆ گۆت: «پێشكێشكرن ب شێوەیەكێ ئەلیكترۆنی یە و خوازیار دشێن ب رێكا مالپەڕێ «گەشانەڤە فۆرم» داخوازیێن خۆ پێشكێش بكەن، پاشی هەلسەنگاندن و هووربینی بۆ پڕۆژەیێن وان دێ هێتە كرن، پێدڤی یە خوازیار وەلاتیێ هەرێمێ بیت و ژییێ‌ وی د ناڤبەرا 21 بۆ 60 سالیێ دا بیت و جهێ پڕۆژەیێ‌ وی ل هەرێما كوردستانێ بیت، ژ 100 كارمەندان پتر نەبن، پڕۆژەیێ‌ وی ب كێمی 12 مەهان كار كربیت و هەر كەسەك ب تنێ دشێت ئێك جار داخوازیێ پێشكێش بكەت».