ئامێدیێ، مەحمود نهێلی:

د بەردەوامیا گەهاندنا پڕۆژەیێن خزمەتگوزاری دا، ئەوێن ژ لایێ حكومەتا هەرێما كوردستانێ ڤە بۆ دەڤەرا ئامێدیێ دهێنە پێشكێشكرن، جادە و كۆلانێن هەژمارەكا گوندێن سنۆرێ ناوچەدارییا سەرسنكێ ب گوژمێ پتر ژ 200 ملیۆن دیناران دهێنە چێكرن.
وارشین سەلمان، دەڤەردارێ ئامێدیێ بۆ رۆژناما ئەڤرۆ دیاركر، كاركرن ل سەر چێكرن و سەبكرنا كۆلانێن گوندێن (هەمزیكێ و بلێجانكێ و بۆتیا) ل گەل ڤەكرنا رێكا گۆڕستانا گوندێ (مێرگەتوی) ل سنۆرێ ناوچەدارییا سەرسنكێ بەردەوامە و د قووناغێن دوماهیێ دانە و گۆت: «پڕۆژەیێن چێكرنا جادەیێن ڤان گوندان ب گوژمێ 289 ملیۆن دیناران ل سەر بودجا تایبەت یا پارێزگەها دهۆكێ دهێنە بجهئینان، ئەڤ پرۆژەیە د دەمەكێ نێزیك دا دێ كەڤنە د خزمەتا خەلكێ دەڤەرێ دا».

هەولێر، قائید میرۆ:

بەرپرسەكێ وەزارەتا بازرگانی و پیشەسازی ل هەرێما كوردستانێ خویاكر، تۆماركرنا وەلاتیان د فۆرما ئەلكترۆنی یا ئاهێن خوارنێ‌ دا، دوبارە دەستپێكریە و وەلاتیێن خۆ تۆمار نەكری، نوكە دشێن خۆ تۆمار بكەن، هەروەسا ڤەگوهاستنا ناڤێن وەلاتیان ژی دێ بڕێڤەچیت.
نەوزاد شێخ كەمال، رێڤەبەرێ گشتیێ بارزگانی بۆ رۆژناما ئەڤرۆ دیاركر، پرۆسەیا تۆماركرنا فۆرما خوارنێ بۆ وەلاتیێن نەهاتینە تۆماركرن، هاتیە كاراكرن و گۆت: «هەر وەلاتیەكێ بەری نوكە كارتا نیشتیمانی نەبیت یان ل دەرڤەی وەلاتی بوویە، دكاریت ب شێوەیێ ئونلاین خۆ تۆمار بكەت و ببیتە خوەدیێ فۆرما ئەلكترۆنی، چونكی یا دیارە سیستەمێ بەرێ كار ناكەت و فۆرما خوارنێ نوكە ب تنێ ب شێوەیێ ئەلكترۆنی كار دكەت و بەروڤاژی یێ خۆ تۆمار نەكەت، ژ پشكا مەهانە یا ئاهێن خوارنێ‌ مفادار نابیت».
نەوزاد شێخ كامل گۆتژی: «د دەمەكێ نێزیك دا دێ پرۆسەیا ڤەگوهاستنا فۆرمێن خوارنێ و زارۆكێن نوو پەیدابووی ژی بهێنە تۆماركرن، بەلێ ل هەمبەر ڤێ پرۆسێ دێ پارە هێتە وەرگرتن و مەرجە وەلاتی ماستەركارت هەبیت، بڕیارە تیمەك ل بەغدا بهێت و راهێنانێ ب فەرمانبەران بكەت، ل دۆر هووركاریێن تۆماركرنێ و ڤەگوهاستنا ناڤێن وەلاتیان».

رەمەزان زەكەریا:

هژمارەكا خانویێن زێدەگاڤی ل ئاكرێ هەنە، دەما چەندین سالایە نەهاتینە تاپۆكرن، بڕیار بوو، د سالا 2022 چەندین خانویێن زێدەگاڤی بهێنە تاپۆكرن، بەلێ هەتا نوكە ب تنێ كارێ تاپۆكرنا 200 خانویێن زێدەگاڤی ل ئاكرێ هاتینە تەمامكرن.
بلند رەزا، سەرۆكێ باژێرڤانیا ئاكرێ بۆ ئەڤرۆ گۆت: «هەر كەسێ داخوازیا خوە دابیتە باژێرڤانیێ، ئەم كار ل سەر دكەین، نێزیكی 200 خانوی بەرەڤ دووماهیێ دچن، كو بهینە تاپۆكرن».
ناڤبری گۆتژی: «ئەو خانویێن مایی ژی ل قووناغا نەخشەی دانە كو نەخشەیێن كەرتی و بنەرەتی نوكە چێدكەین و كار ل سەر دكەین، هەردەما ئەو نەخشە تەمامبوون، قووناغ ب قووناغ هەموو خانوی دێ هێنە تاپۆكرن».

رەمەزان زەكەریا

رێڤەبەرێ كاروبارێن شوونەواری ل هەرێما كوردستانێ ئاشكراكر، بەرهەڤی بۆ ڤەگەراندنا شانەدەر زێت بۆ هەرێما كوردستانێ هاتینە كرن كو بریارە ل شكەفتا شانەدەر مۆزەخانەیەكا ڤەكری بهێتە دروستكرن دناڤ دا بهێتە دانان، بۆ وێ چەندێ گەشتیار سەرەدانان بكەن، ژ بەر كو ئێكەم نیاندەرتالە ب وی جۆری هاتیە دیتن ل رۆژهەلاتا ناڤەراست بهێتە دیتن.

محەمەد لەشكری، رێڤەبەرێ كاروبارێن شوونەواری ل هەرێما كوردستانێ راگەهاند، پشتی ڤەدیتنا شانەدەر زێت ل شكەفتا شانەدەر بۆ ڤەكۆلینێ هاتیە رەوانەكرن بۆ دەرڤەی وەلاتی، بریارە پشتی دو سالان ئەگەر چو پشكنینێن دی بۆ نەهێنەكرن ل سالا داهاتی بۆ كوردستانێ بزڤرینن، ژلایێ شوونەواریڤە پێنگاڤەكا گرنگە بۆ كوردستانێ، چونكی ئەو نیاندەرتالێ ل شانەدەر هاتیە دیتن ل رۆژهەلاتا ناڤین ئێكانەیە و هەتا نوكە تشتێ وەسا نەهاتیە دیتن، ژیێ وی بۆ 75 هزار سالان بەریا نوكە ڤەدگەریت.
ناڤبری گۆتژی: بەرهەڤی بۆ ڤەگەراندنا شانەدەر زێت هاتیە كرن كو دێ ل مۆزەخانەیا شكەفتا شانەدەر هێتەدان و بریارا دروستكرنێ هاتیە دان، دێ مۆزەخانە یا ڤەكری بیت بۆ وێ چەندێ دەمێ گەشتیار سەرەدانێ‌ دكەن ب ساناهی ببینین، دیزاینێ مۆزەخانەیێ تەمام بوویە و ب تنێ مایە دەست ب دروستكرنێ بهێتەكرن.
ڤەكۆلەرێن بەریتانی شیان روخسارێ ئافرەتەكا نیاندەرتال ل كوردستانێ ڤەبینن و نێزیكی 75 هزار سالان بەری نوكە ژیایە، كاسا سەرێ وێژی ژلایێ شوونەوارناسێن زانكۆیا كامبریج ل ناڤ شكەفتا شانەدەر ڤەدیت، ناڤێ شانەدەر زێت ل سەر دانا،ل گۆر ڤەكۆلینا شانەدەر زێت د ژیێ 40 سالیێ دا بووە كو وەغەركری، ڤەدیتنا شانەدەر زێت دەستكەفتەكێ گرنگێ زانستیە بۆ ڤەكۆلینێ ل سەر مرۆڤی نیاندەرتال، ل ناڤ تاقیگەهێن زانكۆیا كامبریج ب هەڤكاریا دو هونەرمەندێن هولەندی شانە روخسارێ شانەدەر زێت ڤەدیتن و ب رەنگێ 3D دێ‌ هێتە نیشاندان.