سندس سالح سلێڤانەیی

شێوەكارا گەنج (دێژین لوقمان) د دیدارەكێ‌ دا بۆ رۆژنامەیا ئەڤرۆ گۆت: حەزژێكرنا من بۆ كارێ‌ شێوەكاری و چێكرنا كەڤالان بۆ بەری چەندین سالان دزڤڕیت، لەورا ئەز چوومە پەیمانگەها هونەرێن جوان و من پشكا شێوەكاری هەلبژارت و ل پەیمانگەهێ‌ گەلەك دەرگەه بۆ من ڤەبوون كو ئەز ب شێوەیەكێ‌ ئەكادیمی فێری هونەرێ‌ چێكرنا كەڤالان ببم و هیڤیا من ئەوە ل پاشەڕۆژێ‌ بشێم ل دووف شیانێن خۆ خزمەتا هونەرێ‌ كوردی و دەڤەرا خۆ بكەم.
هەروەسا گۆت: دووماهی كارێ‌ من بەری دو حەفتیان بوو، ئەو ژی پشكداریا من بوو ب (10) كەڤالان ل فێستیڤالا پەیمانگەهێ‌ و ئەز گەلەك گرنگیێ‌ ب سروشتی ددەم و ناڤەرۆكا پتریا كەڤالێن من ل دۆر سرۆشتێ‌ جوانێ‌ كوردستانێ‌ نە، دەربارەی ژیریا چێكری ژی چو جاران نەشێت جهێ‌ هونەرمەندێ‌ مرۆڤ بگریت، چنكو هونەرمەندێ‌ مرۆڤ هەست و داهێنانا خۆ د كەڤالێن خۆ دا د دانیت،

زنار تۆڤی

وێنەگر (نیعمەت مەلۆ) كو خەلكێ‌ باژێرێ‌ كەلارە، د دیدارەكێ‌ دا بۆ رۆژنامەیا ئەڤرۆ گۆت: ئەز د بۆارێ‌ هونەرێ‌ فۆتۆگرافی دا كاردكەم، ب تایبەتی د سروشت و ژیانا كویڤیان ل سالا 2006 ێ‌، ئەڤە بۆ ناساندنا وان گیانەوەرێن كویڤی بوویە، بۆ خەلكی و نیشاندانا جوانی و جۆرێن وان ب مەرەما پاراستنا وان ب تایبەتی ژی، گیانەوەرێن كویڤی یێن گەرمیان، بۆ ڤێ‌ مەرەمێ‌ مە گرۆپەك ب ناڤێ‌ (كێو دۆستانە) دامەزراند، كو هەردو كارێن فۆتۆگرافی، ژیانا كویڤیان و ل هەمان دەمدا پاراستنا ژینگەهێ‌ و گیانەرێن كویڤی پێكڤە كۆم دكەت، كو ژ چار ئەندامێن فۆتۆگرافەر د بیاڤێ‌ ژیانا كویڤیان دا پێكهاتیە، كارێ‌ مە ل سەر دكیۆمێنتكرنێیە ب وێنە و ڤیدیۆ، ل سەر ژیانا كویڤیان، هەروەسا هەوا هشیاركرنا ژینگەهێ‌ ل قوتابخانان، ب تایبەتی ئەو گوندێن گیانەوەرێن كویڤی لێ‌ هەین، ب تایبەتی ئاسكێن گەرمیان، هەر وەسا ڤەكرنا چەندین پێشانگەهان د وی بیاڤی دا ل دەڤەرێن جودا یێن كوردستانێ‌.
هەروەسا گۆت: ل وان سالێن كوردستان و ب تایبەت ژی گەرمیان تووشی هشكەسالییێ‌ بووین مە وەك گرۆپێ‌ كێودۆستان كار ل سەر دابینكرنا ئاڤێ‌ بۆ گیانەوەرێن كویڤی و ب تایبەتی ژی ئاسكێن گەرمیان كریە بۆ پاراستنا وان ژ كۆچكرنێ‌، هەتا نوكە د بەردەوامین، هەروەسا كارێ‌ فۆتۆگرافی پشكەكا مەزن و گرنگ یا هونەرێن دیتنێیە، هەبوونا پێشانگەهان گرنگیا خۆ هەیە، ل گەل هندێ‌ مە فۆتۆگرافەرێن باش ل كوردستانێ‌ هەنە.

رەمەزان زەكەریا

محەمەد گەردی، دەرهێنەرێ فلمی سینەمایی (گۆڕستان) د دیدارەكێ دا بۆ رۆژنامەیا ئەڤرۆ گۆت: ئەڤ فلمە بەرهەمێ سەنتەرێ ڕۆشنبیری یێ شەقلاوەیە، نڤیسین و دەرهێنان یا منە و ئەمین حەیدەری رێڤەبەرێ بەرهەمی یە، هەروەسا هژمارەكا ئەكتەران د پشكداران، ژوانا (دیار سەدیق، جەلال هەیبەتی، ڕامان كەیفی، مازیچین عەزیز، بژار سەعدی، سەنگەر بلباس، برزۆ ڕەسام، نەریمان مەجید، ناز خەلیل، مەندانە محەمەد و زانا خۆشناو).
هەروەسا گۆت: ئەڤ فلمە چیرۆكا دو گەنجێن هەڤال ڤەدگێڕیت ئەوێن كو شتی تووشی ئاریشەیەكێ‌ بووین، دەست ب ڤەكۆلینێ دكەن و ب شێوازەكێ چاڤەڕێ نەكری ڕوو ب ڕوو كۆمەكا نهێنی و ڕاستییێن ڤەشارتی دبن، فلم ب كەشەكێ تاری و نهێنی بینەری دبەتە د ناڤ جیهانەكا تژی ژ ترس گۆمان و دودلیێ دا و دگەل پێشڤەچوونا ڕوودانان ئەو دو هەڤالە هەست دكەن كو ئەوا ئەو لێ دگەریێن بتنێ چارەسەریا ئاریشەیان نینە و دەرگەهێ نهێنیەكا كەڤن و ترسناكە كو پەیوەندی ب ڕابردوویێ دەڤەرێ و گۆڕستانەكا بجهـ هێلایی ڤە هەیە هەر پێنگاڤەكا وان یا زێدەتر نێزیكتری ڕاستیەكێ دكەت كو هەموو تشتێ وان دگوهۆڕیت و ژیانا وان دكەفتە د مەترسیێ دا.

بێوار حەمدی

ژینێ‌ عەبدوللا، دەرهێنەر ل رادیۆیا دهۆك، د دیدارەكێ‌ دا بۆ رۆژنامەیا ئەڤرۆ گۆت: ل سالا 2006 ئەز هاتیمە دناڤ بۆارێ‌ راگەهاندنێ‌ دا و هەتا نوكە من ل هژمارەكا كەنالێن راگەهاندنێ‌ كاركریە، لێ‌ ئەڤە دوسالن وەك دەرهێنەر ل رادیۆیا دهۆك كاردكەم و خۆشحالم گەلەك، ژبەركو ئەڤ رادیۆیە دەنگێ‌ ڕاستەقینەیێ‌ دەڤەرا بەهدینانە.
هەروەسا گۆت: ل سەر مرۆڤی پێدڤیە بەردەوام خۆ پێشڤە ببەت، ژبەركو تەكنیك پێشدكەڤیت و بەردەوام تشتێ‌ نوو دهێتە ئافراندن و ئەز خۆشیێ‌ ژكارێ‌ خۆ دبەم و من ل بەر نینە بگوهۆڕم، لێ‌ هندەك جاران ژی دبینم ئاسایی یە مرۆڤ جهێ‌ خۆ یێ‌ كاری بگوهۆڕیت، ژبەركو ئەڤ سەردەمە وێ‌ چەندێ‌ دخوازیت و پەیوەندیێن مرۆڤی بەرفرەهتر لێ‌ دهێن و ئەزموونەكا دی ل ژیانا مرۆڤی زێدە دبیت.

سندس سالح سلێڤانەیی

ئەرسەلان دۆسكی، ئێك ژ پشكدارێن فیستەڤالا چارێ‌ یا شەلوشەپك و جلكێن كوردی بوو، ئەوا ل حەفتیا بۆری ل ئیدارەیا سەربەخۆیا زاخۆ هاتیە گێڕان، ڤی كەسی خۆ ب دەستەكێ‌ بەرگیزان خۆ راپێچا بوو، هەروەسا خەنجەرەكا گەلەك كەڤن دبەر شیتكا خۆ ڕاكر بوو.
ئەرسەلان دبێژیت: ئەڤە راپێچا دەڤەرا مەیە و هەر هەلكەفتەكا هەبیت ئەم هوسا خۆ رادپێچت و دهێین پشكدار دبین، سەبارەت خەنجەرێ‌ ژی ئەڤە یا باپیرێ‌ من بوو، وی بۆ بابێ‌ من هێلا بوو، بابێ‌ من ژی بۆ من هێلایە و ئەز گەلەك حەزژ ڤێ‌ خەنجەرێ‌ دكەم و ب هەموو مالێ‌ دونیایێ‌ نافرۆشم، چنكو خەنجەر یا كوردی و بەری پتری (100) سالان ل كوردستانێ‌ هاتیە چێكرن.