قەیس وەیس:

فدراسیۆنا ڤۆلی بۆلا ئیراقێ‌ ب فەرمی لیستەیا هەلبژارتیێ تیما خوە ل سەر ئاستێ‌ كچان ڕاگەهاند ئەوا تێدا پڕانییا یاریزانێن وێ‌ ژ هەرێما كوردستانێ‌ نە.
حەبیب عەلی ئەللاوەندی سەرۆكێ‌ فدراسیۆنا ڤۆلی بۆلا ئیراقێ‌ دیار كر هەلبژارتیی ئیراقێ‌ ل سەر ئاستێ‌ كچان دێ‌ دەست ب كەمپەكا ڕاهێنانێ‌ ل باژێرێ‌ هەولێرێ‌ كەت خوە بەرهەڤكرن بۆ قارەمانییا كۆپا ئاسیا بۆ پێشكەڤتییان هەر ژ 20 هەتا 27ێ‌ تەباخا بهێت باژێرێ‌ تیانجین ل وەلاتێ‌ چینێ‌ هێتە كرن، ژبەر ئاست بلندییا یانەیێن، سەنحاریب، ئەكاد، ئەفرۆدێت، قەرقووش و ئەمانەت بەغدا یاریزانێن وان بۆ پێكهاتیێ ئیراقێ‌ هاتینە داخواز كرن، كادرێ‌ ڕاهێنانێ‌ ژی ژ ئەوان یانەیانە.
ژلایەكێ‌ دووڤە ستان بازی هاریكارێ‌ ڕاهێنەرێ‌ یانەیا سەنحاریب دیاركر پێنچ یاریزانێن تیما وان بۆ ناڤ ڕێزێن هەلبژارتیێ ئیراقێ‌ هاتنە داخواز كرن ئەوژی دورین رۆمێل، هەمیشە هشیار، فاتما ڕەعەد، دیا وەلی و هێرۆ ئیبراهیم و گۆت: دڤیابا بۆ ناڤ ڕێزێن كادرێ‌ ڕاهێنانێ‌ ژی ژ یانەیا سەنحاریب با ژبەركو ل وەرزێ‌ بۆری مە ناسناڤ دەستڤە ئینان بوو، هەروەسان وەكو مافەك دزانین، لێ‌ ژ نشكەكێ‌ ڤە هیچ كەسەكێ‌ كادرێ‌ ڕاهێنانێ‌ دناڤ دا نەبوو، ب مخابنیڤە بۆ سالا دویێ ل دووڤ ئێك غەدر ل مە دهێتە كرن.
بۆ زانین ل حەفتێ‌ ڤێ‌ مەهێ‌ دەست ب هەڤڕكیێن قووناغا ئێكێ‌ یا خولا ئیراقێ‌ ل هۆلا گرتییا یانەیا سەنحاریب ب پشكدارییا 10 یانەیان هاتبووكرن ئەوێن هاتبوونە بەلاڤكرن ل سەر دو كۆمان، كۆما ئێكێ‌ یانەیا سەنحاریب ل ڕێزا ئێكێ‌ هاتبوو، قەرەقووش ڕێزا دویێ، د كۆما دویێ دا هەردو یانەیێن ئەكاد و ئەفرۆدێت ڕێزێن ئێكێ‌ و دویێ هاتبوون، هەرچار یانە دەربازبووینە چارگۆشەیا زێڕین.

رەمەزان زەكەریا:

فدراسیۆنا فوتبۆلا كوردستانێ‌ پشككێشان بۆ وەرزێ‌ نوو یا خولا پلا دو یا كوردستانێ‌ ئەنجامدا ئەوا تێدا 24 یانەیێن هەرێمێ‌ پشكدارن و هاتینە بەلاڤكرن ل سەر چار كۆمان ل دووڤ پێگەهێ‌ هەر دەڤەرەكا جۆگرافی كو هەر كۆمەكێ‌ شەش یانە ل سەر هاتینە بەلاڤكرن و بڤی شێوەیی.
كۆما ئێكێ‌: كەلار، باوەرنوور، شەهیدانی هەلەبجە، خورمال، خەلاتی پێنجوین، پیرەمەگروون.
كۆما دویێ: بەختیاری، سەرچنار، دووكان، حاجیاوا، سەنگەسەر، تەق تەق.
كۆما سێیێ: سنۆر، پەروەردە، ڕەواندۆز، چۆمان، سرێشمە، هەلیفان.
كۆما چارێ‌: باتیفا، شێلادزێ‌، بجێل، دینارتە، پیرس، هەریر.
لدۆر ڤێ‌ سەكێ‌ دارەوان حەمەد سەعید بەرپرسێ‌ ڕاگەهاندنا فدراسیۆنا فوتبۆلا كوردستانێ‌ بۆ ئەڤرۆ گۆت: بۆ وەرزێ‌ نوو یێ‌ خولێ‌ بڕیار هاتیە دان هەڤڕكیێن وەرزێ‌ نوو یا خولا پلا دو ل 29ێ‌ مەها بهێت ب شێوەیێ كۆم ئێك قووناغ بهێتە كرن، شێوازێ‌ دەربازبوونا یانەیان بۆ قووناغا دویێ ژ خولێ‌ نە هاتیە كرن لێ‌ بڕیارە د ڤێ‌ حەفتیێ دا هەموو ب شێوەیەكێ‌ فەرمی بهێتە ئێكلا كرن.
ژلایەكێ‌ دووڤە ناڤهاتی دیار كر ل رۆژانێن شەش و حەفتێ‌ مەها بهێت خولا هەلبژارتیێن پارێزگەهـ و ئیدارەیێن سەربەخۆ ل هەرێما كوردستانێ‌ بۆ یاریزانێن دێرین هێتە ئەنجامدان ئەوا دێ‌ ب پشكدارییا 10 تیمان ببیت و یاریێن وان ب شێوەیێ خول ئێك قووناغ هێتە بڕێڤەبرن، تیمێن پشكدار، دهۆك، زاخۆ، هەولێر، سلێمانی، هەلەبچە، سۆران، ڕاپەرین، كەركووك، گەرمیان و زێرەڤانی.

د داخویانیەكێ‌ دا ڕاهێنەرێ‌ تیما باسكێت بۆلا یانەیا زاخۆ دیار كر ب فەرمی گرێبەست دگەل یاریزانەكێ‌ پیشەكار ژ وەلاتێ‌ ئەمریكا ئینایە دناڤ ڕێزێن تیما خوە ژبۆ باشترین بەرهەڤی و ب هێزكرنا ڕێزێن تیمێ‌ بۆ یاریێا مایی ژ خولا ئیراقێ‌ و چاڤ ل دەستكەڤتەكێ‌ نوویە.
زێدەتر جوتیار عەلی بۆ رۆژنامەیا ئەڤرۆ گۆت: ب فەرمی كارگێرییا یانەیێ گرێبەست دگەل یاریزانێ‌ ب ڕەكەز ئەمریكی ئەنتوان سكۆت ئیمزاكریە پێخەمەت بهێزكرنا ڕێزێن تیمێ‌ بۆ یاریێن بهێت ژ خولا پیشەكاری یا ئیراقێ‌، ئینانا یاریزانێ‌ ناڤهاتی پشتی دۆڤچوونەكا تەسەل ل سەر سیڤیێ وی هاتیە كرن كو دیاربوویە سەربۆرەكا باش یا یاریكرنێ‌ هەیە تایبەت د خولێن ئۆرۆپا دكەل یانەیێن شیبینكا یا كرواتی، ئفرۆ یا فرەنسی، كیرافنۆس یا نیۆزلەندی، دیسان چوویە خولا ئەفریقیا دگەل یانەیێن زەمالك یا مسری و ئیتحاد یا لیبیایێ، و دووماهیێ د خولێن ئاسیا ژی دا یاری كریە دگەل یانەیێن هیلال و ئیتحاد یێن سعۆدیێ، هاتنا وی گەشبین كرینە كو دێ‌ هێزەكا دی دەتە تیمێ‌، دگەل یاریزانێن مە یێن كوڕێ‌ باژێرێ‌ زاخۆ بشێن ئەوا پێدڤی ئەنجامبدەن.
ژلایەكێ‌ دووڤە ناڤهاتی گۆت: وەرزێ‌ ئەڤ سالە دەلیڤەیەكا زێڕین ل پێشییا مەیە و ئەم هەموو بزاڤان دكەین ژبۆ ب دەستڤە ئینانا ڕێزا ئێكێ‌، پێنەڤێت ئەركێ مە ب سانەهی نابیت بەرانبەر یانەیا نەفت میسان ئەوا باشترین یاریزان ل تیما خوە كۆمڤەكرین ژوانا یێن هەلبژارتیێ ئیراقێ‌ و پیشەكارەكێ‌ خودان شیان ئینایە، مە ژی وەكو هەر تیمەكێ‌ ل دووڤ شیانێن خوە بەرهەڤیێن باش كرینە و باوەریەكا بێ‌ سنۆر ل شیانێن یاریزانێن خوەیە، ب هیڤییا وێ‌ یەكێ‌ ب شێن یا پێدڤی بۆ تیمێ‌ ئەنجامبدەن و دلێ‌ جەماوەرێ‌ خوە خۆشبكەن
بۆ زانین یاریێن تیما زاخۆ د چارگۆشەیا زێرین دا دێ‌ بڤی شێوەی بن، یارییا ئێكێ‌ ل باژێرێ‌ میسان سوبەهی بەرانبەر یانەیا نەفت میسان خودانا ڕێزا ئێكێ‌ یا كۆما ئێكێ‌ بیت، دووڤدا یارییا دویێ و چوونێ‌ ل 23ێ‌ هەمان مەهـ دێ‌ ل ناڤ ئەرد و یاریگەها خوە دا كو دێ‌ بیتە ڤەبڕ بۆ یارییا فینالێ‌ بەرانبەری نەفت میسان ئەنجامدەین، هەكە د هەردو یارییان دا ئێك تیم ب سەركەڤت ئێكسەر دێ‌ دەربازبینە فینالێ‌، لێ‌ هەكە هەر تیمەك سەركەڤتنە ئینا دێ‌ یارییا سێیێ‌ ل 26ێ‌ هەمان مەهـ ل یاریگەها نەفت میسان ژبۆ ئێكلاكرنا تیما دەربازبوونێ‌ كەن.

جەماوەرێ‌ وەرزشی و ملیۆنان ژ حەزژێكەرێن یارییا فوتبۆلێ‌ چاڤەڕێ‌ دیدارا ئەڤرۆ یا ئاگرین و دیرۆكی نە ئەوا دێ‌ ل یاریگەها میتلایف یا نیوجێرسییا وەلاتێ‌ ئەمریكا دناڤبەرا هەلبژارتیێ ئەرجەنتین هەلگرا ناسناڤێ‌ مۆندیالا بۆری و هەلبژارتیێ ئسپانیا د چارچووڤەیێ یارییا فینالا مۆندیالا 2026ێ‌، ئەڤ فینالە نە بتنێ‌ شەڕەكە بۆ دەستڤە ئینانا كاسا زێری، بەلكو هەڤڕكییەكا تەكتیكی دناڤبەرا نڤشێ‌ ئەرجەنتینی یێ‌ هێزێ‌ ب سەركێشیا لیۆنێل مێسی د سەمایا خوە یا دووماهیێ دا و نڤسێ‌ گەنج و خوون گەرم ب سەركێشییا لامین یامالی دا.
چەوا دەربازبوون
هەلبژارتیێ ئسپانیا د كۆما هەشتێ‌ دا سەرێ‌ لیستێ‌ هاتبوو، د قووناغا 32 دا سەركەڤت بوو ل سەر نەمسا ب(3-چنە)، د قووناغا 16 دا سەركەڤت بوو ل سەر پۆرتۆگال(1-چنە)، د چارێك دووماهێ دا ب سەركەڤت بوو ل سەر بەلجیكا ب(2-1) د یارییا پێش دووماهیێ دا ب سەركەڤت بوو ل سەر فرەنسا (2-چنە) گۆلان، ژلایێ خوەڤە هەلبژارتیێ ئەرجەنتین د كۆما خوە دا سەركێشی پاراست بوو، د قووناغا 32ێ‌ دا سەركەڤت بوو ل سەر كاپ فێردی(3-2) گۆلان، د قووناغا 16ێ‌ سەركەڤت بوو ل سەر مسرێ‌(3-2) گۆلان، د قووناغا چارێك دووماهیێ دا ب سەركەڤت بوو ل سەر سویسرا ب(3-1) گۆلان، د قووناغا پێش دووماهیێ دا ب سەركەڤت بوو ل سەر ئنگلتەرا(2-1) گۆلان.
كلیلكێن تەكنیكی و ڕاستیێن هونەری
ل دووڤ ئامارێن قارەمانیێ دا هێلا بەرەڤانییا ئسپانییا وەكو ب هێزترین هێل هاتیە دەستنیشانكرن كو ب تنێ‌ گۆلەك ل سەر بوویە، د بەرانبەر دا هەلبژارتیێ ئەرجەنتین ب هێزترین هێزا هێرشبەریێ هەیە ب تۆماركرنا 18 گۆلان.
چەكێ‌ خولەكێن دووماهیێ
هەلبژارتیێ ئەرجەنتین د یاریێن قووناغا ئێكلاكەر دا هەر ژ قووناغا 32ێ‌ هەتا قووناغا پێش دووماهیێ گۆلێن وەكهەڤیێ و سەركەڤتنان د چارێكا دووماهیێ و خولەكێن زێدەكری و چارێكێن پشتی نیڤا دویێ تۆماركرینە كو دگەهنە نەهـ گۆلان، ئەڤە ژی دیاردكەت كو ئەرجەنتین هەتا خولەكێن دووماهیێ ژی ب جەستە و تەكتیكەكا مەزن دهێتە دناڤ یاریێ دا ژبۆ مسۆگەركرنا سەركەڤتنێ‌.
فەلسەفەیا گوهۆڕینا تەكتیكی
ل دووڤ شێوازێ‌ یارییا ئسپانیا د مۆندیالێ‌ دا ل دووڤ یارییا بلەز د كاركرن ژ هەردو لایان دا و گڤاشتنێن بەرۆڤاژی دگەل گوهۆڕینا تەكتیكی ددەمێ‌ هێرشێن هەڤدژ دا، بڤی شێوازی شیایە كونترۆلێ‌ ل سەریاریگەهێ‌ بكەن و ب گەهنە یارییا فینالێ‌.
گۆستیركا زێری
فدراسیۆنا فوتبۆلا جیهانی فیفا ڕاگەهاند هەر یاریزانەكێ‌ ل گەل هەلبژارتیێ وەلاتێ‌ خوە ناسناڤێ‌ مۆندیالێ‌ ببەت دێ‌ ب دیارییا گۆستیركا زێری بۆ هێتە دان كو دبیتە جارا ئێكێ‌ د دیرۆكا ئەڤێ‌ مۆندیالێ‌ دا بۆ یاریزانان بهێتە پێشكێشكرن، ئەڤ دەستپێشخەرییە ژلایێ فیفایێ هاتیە لدووڤ ڕێورەسمێن وەرزشا ئەمریكا كو د خولا تەپا پێی یا ئەمریكی NFL و یا باسكێتبۆلێ‌ NBA ێ‌ وەكو ڕێزگرتنەك بۆ ئەمریكا، دێ‌ 30 كۆستیرێن زێری هێنە دروستكرن بۆ هەلبژارتیێ ناسناڤی دبەت، هەروەسان بڕیارە 1996 كۆستیركێن دی ب هەمان شێوە بۆ ناڤ بازاری دا هێنە دانان پێخەمەت جەماوەر ژی بشێت ب كرین ئێكێ‌ وەربگریت.
لدۆرڤێ‌ یاریێ سلێمان زەكی شرۆڤەكارێ‌ وەرزشی بۆ ئەڤرۆ گۆت: بدیتنا من ئەڤرۆ دێ‌ كەرنەڤالەكێ‌ جوان و پری هەڤڕكی دناڤبەرا دو هێزێن ئۆرۆپا و ئەمریكا باشۆر هێتە كرن، دووماهییەكا ئاگرینە و هەردو هەلبژارتی خودان یاریزانێن ستێرین ل سەر ئاستێ‌ جیهانی، لیۆنێل مێسی ئەو ئەفسانەیێ بلندترین ئاست نیشان ددەت و هەموو پشتەڤان شۆكرینە دگەل گیانێ‌ شەڕی یێ هەڤالێن وی شیاینە بگەهنە فینالێ‌، ژلایەكێ‌ دووڤە لامین یامال ئەو گەنجێن بەهرەمەند و گەلەك دوور نینە ژ مێسی ژبلی سالێن شارەزاهیێ و ناسناڤێن كەسۆكی دگەل هەڤالێن خوە ئاستەكێ‌ مەزن نیشان دابووینە و گەهشتینە یارییا دووماهیێ، بزەحمەتە بێژن ئەم هەلبژارتییە دێ‌ بیتە قارەمان لێ‌ ل دووڤ ئاست و تەكتیكا هەردو هەلبژارتیان دبیت ئەرجەنتین نێزیكترە، لێ‌ ئەم بەرسڤا دووماهیێ نەشێن بدەین ژبەر هێزا هەردو تیمان.
تۆمارا قارەمانان
د 22 چاپێن بۆری یێن مۆندیالێ‌ دا هەشت هەلبژارتیێن جیهانی شیاینە ناسناڤی ب دەستخوە ڤەبینن، هەلبژارتیێ بەرازیل پترترین تیمە ناسناڤ دەستڤە ئینایە و دووماهی هەلبژارتی ئەرجەنتین بوویە قارەمان، ل دووڤ خشتەیێ خوارێ‌ قارەمانێن مۆندیالێ‌ بڤی شێوەیی نە.
– بەرازیل پێنج ناسناڤ،
1958- 1962- 1970- 1994- 2002.
– ئەلمانیا چار ناسناڤ،
1954- 1974- 1990 – 2014.
– ئیتالیا چار ناسناڤ،
1934- 1938- 1982- 2006.
– ئەرجەنتین سێ‌ ناسناڤ،
1978- 1986- 2022.
– فرەنسا دو ناسناڤ، 1998- 2018.
– ئۆرۆگۆایی دو ناسناڤ، 1930- 1950.
– ئنگلتەرا ئێك ناسناڤ، 1966.
– ئیسپانیا ئێك ناسناڤ، 2010.