دهۆك، دلۆڤان ئاكرەیی:

رێڤەبەرێ ناوچەداریا قەسرۆكێ‌ دیاركر، سێڕیانا گوندێ مەلا بروان، كو دكەڤیتە سەر ڕێیا گشتی یا هەولێر بۆ دهۆكێ‌ ل ناوچەداریا قەسرۆكێ، د ئەڤ سالە دا پتر ژ 100 ڕوودانێن هاتنوچوونێ تێدا چێبووینە و ئەڤان ڕوودانان زیانێن گیانی و ماددی یێن مەزن ل پاش خۆ هێلاینە و دبێژیت: ب بڕیارا سەرۆكێ حكومەتا هەرێما كوردستانێ دێ ڕێكا قەسرۆكێ هەتا دگەهیتە سێڕیانا گوندێ مەلا بروان ب درێژاهیا حەفت كیلۆمەتران دێ‌ هێتە جۆتساید.
مەهران لوقمان نێروەیی، رێڤەبەرێ ناوچەداریا قەسرۆكێ بۆ رۆژنامەیا ئەڤرۆ گۆت: «ئەڤ پڕۆژەیێ‌ جۆتسایدكرنا د ڕێكا مەلا بروان بۆ قەسرۆكێ و چێكرنا ئۆڤەرپاسێ هەمی پێكڤە وەكو ئێك پاكێج و ئێك پڕۆژە دێ هێتە دروستكرن و ب تەمامبوونا ڤی پڕۆژەی دێ ڕوودانێن هاتنوچوونێ گەلەك كێم بن و ژیانا وەلاتیان پاراستیتر لێ هێت و هاتنوچوونا خەلكێ دەڤەرا قەسرۆكێ گەلەك ب ساناهیتر لێ هێت و ب ڕێیا سەرەكی ڤە هێنە گرێدان».

رەمەزان زەكەریا:

ئەڤ سالە هەتا نوكە چو ڕوودانێن مەزن یێن سۆتنا دارستانان روو نەداینە، كو ببنە ئاڕێشە و بچنە دادگەهێ نەهاتینە تۆماركرن، ب تنێ حالەتەكێ گەلەك سادە ل ناڤ دارستانان دا چێبوو، بەلێ نەگەهشتە وێ چەندێ بچیتە دادگەهێ.
ئەندازیار محەمەد ئەحمەد چۆلی، بەرپرسێ هۆبا دارستان و پاوانان ل ئاكرێ بۆ ئەڤرۆ گۆت: «هەر جۆرە سەرپێچییەك د ناڤ دارستانێن چێكری یان سروشتی دا بهێتە ئەنجامدان، وەكو: بڕین یان زێدەگاڤی ئەم ب هەماهنگی ل گەل پۆلیسێن دارستانێ تاوانباران ددەینە دادگەهێ، بەری چەند ڕۆژان ژی، حالەتەكێ بڕین و فرۆتنا داران ل گوندەكێ دەڤەرێ هەبوو، كەسەكی دار فرۆتبوونە ئێكی، مە هەردو لایەن دانە دادگەهێ».
ناڤبری گۆت: «د سالێن بۆری دا حالەتێن جودا یێن بڕین و فرۆتنا داران دا هەبوون، تێدا سەر پێچیكار ژ ملیۆنەك و 700 هزار دیناران هەتا سێ ملیۆن دیناران هاتینە غرامەكرن، حالەتەك هەبوو، لۆریەكا داران هاتبوو فرۆتن، مە ئەو ب گوژمێ 12 ملیۆن و 250 هزار دیناران سزادا».

رەمەزان زەكەریا:

د چارچۆڤێ بزاڤێن بەردەوام یێن پاراستنا ژینگەهێ و گەشەپێدانا سیمایێ جوان و شارستانی یێ باژێڕی دا، ب سەرپەرشتیا د. دلاوەر بوزۆ میكائیل، دەڤەردارێ ئاكرێ كۆمبوونەك ل دیوانا دەڤەرداریێ هاتە ئەنجامدان.
د كۆمبوونێ دا دانوستاندن ل سەر ڕەوشا ژینگەهێ و گرێبەستا پاقژكرنا دەڤەرداریێن ئاكرێ، بەردەڕەشێ‌ و شێخان هاتە كرن، پشتی دانوستاندن ل سەر ئاریشە و ڕێكارێن پاقژكرنێ هاتیە كرن، ئالیێن پەیوەندیدار بڕیار دان لاندفیلەكێ نوو و تایبەت بۆ هەر ئێك ژ دەڤەرداریێن ئاكرێ، بەردەڕەشێ‌ و شێخان بهێتە دروستكرن. ل دووڤ گرێبەستا نوو، گلێش و بەرمایكێن دەڤەرداریێن بەردەڕەش و شێخان بۆ كارگەها ژێكجوداكرنا گلێشی ل ئاكرێ ناهێنە ڤەگوهاستن، ئەڤە ژی دێ بارگرانیێ‌ ل سەر كارگەهێ سڤك كەت.

دهۆك، دلۆڤان ئاكرەیی:

رێڤەبەرێ گشتی یێ شوونوار و كەلەپووری ل پارێزگەها دهۆكێ دیاركر، پارێزگەها دهۆكێ خودان گەلەك جهێن گەشتیاری یێن گرنگە، كو دبنە ئەگەرێ هاتنا گەشتیاران و دبێژیت: د دەمێ بۆری دا گرنگیەكا كێم ب نووژەنكرنا جهێن شوونواری دهاتە دان، لێ د دەهـ سالێن دووماهیێ دا پێنگاڤێن مەزن و بەرچاڤ د ڤی بیاڤی دا هاتینە هاڤێتن.
دكتۆر بێكەس بریفكانی، رێڤەبەرێ گشتی یێ شوونوار و كەلەپووری ل پارێزگەها دهۆكێ بۆ رۆژنامەیا ئەڤرۆ گۆت: «ل سنۆرێ پارێزگەها دهۆكێ گەلەك جهێن شوونواری هەنە، مە د پێنج سالێن بۆری دا پتر ژ 100 پڕۆژەیێن نووژەنكرن و پاراستنێ ل پارێزگەها دهۆكێ ئەنجام داینە، د شەش مەهێن بۆری دا ب تنێ زێدەتر ژ 18 گەشتیاران سەرەدانا شكەفتا چوارستین ل دهۆكێ كرینە، ئەڤە ژی داهاتەكێ باش بۆ حكومەتا هەرێما كوردستانێ دابینكریە».
گۆت ژی: «كار و بزاڤێن مە د بەردەوامن بۆ نووژەنكرنا هەمی جهێن شوونواری، داكو هەم وەك كەلەپوور بهێنە پاراستن و هەم ژی وەكو جهێن گەشتیاری ب كاربهێن».

ئامێدیێ، مەحمود نهێلی:

ئەندازیار ستار خۆرشید، بەرپرسێ شیرەتكاریا چاندنێ ل دێرەلۆكێ بۆ ئەڤرۆ دیار كر، نەخۆشیەكا ڤایرۆسی تووشی هژیرێن دەڤەرێ‌ بوویە و دبێژیت: ئەڤ سالە ئەڤە نەخۆشیە دێ‌ كارتێكرنێ ل سەر بەرهەمێ هژیران دەڤەرێ هەبیت.
ناڤهاتی گۆت: «د پشكنینێن مە یێن مەیدانی دا ل گوندێ هاریك شێخا بۆ مە دیار بوویەن كو نیشانێن ڤایرۆسی ل سەر بیستانێن هژیران ب ئاشكرایی دەركەفتینە، ئەڤ چەندە ژی دبیتە ئەگەرێ كێمبوونا بەرهەمی و لاوازبوونا دارێن هژیران».
گۆت ژی: «ئەڤ نەخۆشیە پێدڤی ب ڕێكارێن توند یێن تەكنیكی و چاڤدێریا بەردەوام هەیە، دیسا مە د كۆمبوونێن خوە دا ل گەل جۆتیاران، شیرەت ل وان كریە كو پێدڤیە ب زووترین دەم ڕێكارێن پێدڤی بۆ كۆنترۆلكرنا ڤان نیشانان بهێنە وەرگرتن، داكو نەخۆشی بۆ بیستانێن دی نەهێتە ڤەگوهاستن و بەرهەمێ ئەڤ سالە یێ هژیریان بهێتە پاراستن».

زاخۆ، دلۆڤان هالۆ:

یونس محەمەد، سەرۆكێ باژێڕڤانیا ئیدارەیا سەربخوە یا زاخۆ بۆ ڕۆژناما ئەڤرۆ دیاركر كو ب درێژاهیا 12 هزار و 500 كیلۆمەتران و ب گوژمێ چار ملیار و 200 ملیۆن دیناران، جاددە و كۆلانێن تاخێ بارزان ل ئیدارەیا سەربخوە یا زاخۆ دێ هێنە چێكرن و قێركرن.
سەرۆكێ باژێڕڤانیا زاخۆ گۆت: «زێدەباری چێكرن و قێركرنا جاددە و كۆلانان، مە ژێرخانەیەكا بهێز یا سۆلینێن ئاڤڕێژ بۆ هەموو جاددە و كۆلانێن تاخێ بارزان دابینكریە، كو ب درێژاهیا شەش كیلۆمەتران سۆلینێن ئاڤڕێژ لێ دهێنە دروستكرن».
گۆت ژی: «د ڤی پڕۆژەیی دا كاركرن ل سەر چار قووناغان هاتیە بەلاڤكرن، سێ قووناغ ب دووماهی هاتینە و د نوكە دا كار د قووناغا چارێ دا دهێتە كرن، ل دەمەكێ نێزیك دێ كەڤیتە د خزمەتا وەلاتیێن دەڤەرێ دا، ئەڤ كارێ ئەم وەكو باژێڕڤانیا زاخۆ بەردەوام بۆ خەلكێ خوە ئەنجام ددەین، ئەركێ مەیە و نە مننەتە».