جێگرێ سەرۆکێ پارتا بزاڤا نەتەوەپەرست یا تورکیا دیار دکەت پرسا کوردی پرسەکا گەلەک مەزنە و تنێ ب راگرتنا شەڕی ناهێتە چارەسەرکرن و دڤێت د گەلەک بیاڤێن جودا جودا دا هەموو هێزێن سیاسی پێکڤە کار بکەن دا پرسا کوردی ب تەمامی بهێتە چارەسەرکرن.

فەتی یلدز جێگرێ سەرۆکێ پارتا بزاڤا نەتەوەپەرست یا تورکیا دیار کر، پرسا کوردی پرسەک گەلەک مەزنە و بابەت تنێ راگرتنا شەڕی نینە، بەلکو دڤێت د بیاڤێن سیاسی، ئابووری، جڤاکی و هەتا دەروونی دا کار بهێتە کرن، چونکی شەڕێ چەندین سالان کاریگەریێن خوە یێن جودا جودا ل سەر جڤاکێ تورکیا کریە و گۆت: (نها قووناغا ئاشتیێ ب رەنگەکێ باش بەردەوام دکەت و پرۆژە یاسایەک ژی ب ناڤێ ئاشتیێ دهێتە بەرهەڤکرن، بێگومان دڤێت پرۆژە ل پەرلەمانێ تورکیا بهێتە پەسەند کرن و وی دەمی دێ ب کریاری ژی هندەک تشت هێنە کرن، بێگومان راگرتنا شەڕی کارەک گەلەک باش بوو و جڤاکێ تورکیا ئاشتی و ئارامی و پێکڤەژیان دڤێت).
جێگرێ سەرۆکێ مەهەپێ ئەو یەک ژی دیار کر، دڤێت هەموو هێز و ئالیێن سیاسی ل تورکیا کار بۆ چارەسەرکرنا پرسا کوردی بکەن، بابەت تنێ ژ بۆ کوردان نینە، بەلکو دەمێ پرسا کوردی بهێتە چارەسەرکرن دێ ئەو یەک کاریگەریا خوە یا گەلەک باش ل سەر هەموو تورکیا هەبیت، ژ بەر ڤێ یەکێ ژی نها تورکیا د قووناغەکا گەلەک هەستیار دایە و نابیت چو ئالیێن سیاسی ژ بەر بەرژەوەندیێن خوە یێن تەنگ سەرەدەریەکا جودا ل گەل قووناغا ئاشتیێ بکەن و گۆت: (ب چارەسەرکرنا پرسا کوردی دێ تورکیا بهێز کەڤیت، ئانکو دڤێت چو ئالیەک ل دژی چارەسەرکرنا پرسا کوردی نەبیت، یا هەتا نها هاتیە کرن گەلەک باش بوویە و بێگومان کارێن دی ژی ماینە و دڤێت ئەم پێکڤە ئەنجام بدەین).
ناڤهاتی د بەردەوامیا ئاخڤتنا خوە دا بەحسێ کارێ کۆمسیۆنا ئاشتیێ یا ل پەرلەمانێ تورکیا ژی کر و دیار کر، کۆمسیۆن هەتا نها کارەک باش کریە، لێ کارێ کۆمسیۆنێ تنێ بابەتێ شەڕی نینە، چونکی بابەت گەلەک مەزنترە و دڤێت کۆمسیۆن پرۆژەیێن جوداتر ژی ئامادە بکەت، دڤێت بابەتێ ئاشتیێ تنێ راگرتنا شەڕی نەبیت، مە دڤێت جڤاکێ تورکیا ب گشتی ئێدی بکەڤیتە قوونا‌غەکا نوو دا، پێدڤیە کوردان و تورکان ب ئاشتیێ و هەڤدو قەبوول کرنێ هەیە و ژ بەر ڤێ یەکێ ژی گرنگە هێزێن سیاسی ل تورکیا هەست ب بەرپرسیاریا خوە یا دیرۆکی بکەن و گۆت: (ئەڤرۆکە پەرلەمانێ تورکیا وەکو سازیەکا مەزن کو نوونەراتیا هەموو گەلێ تورکیا دکەت دەست ب کارەکێ مەزن کریە، مە دڤێت پرسەکا مەزن کو پتر ژ سەد سالانە ل تورکیا هەیە ب تەمامی چارەسەر بکەین و بێگومان ئەو یەک ژی کارەک گەلەک مەزنە و پێدڤیا مە ب پشتەڤانیا هەموو تەخ و چینێن جڤاکێ تورکیا هەیە).
فەتی یلدز د پشکەکا دی یا ئاخڤتنا خوە دا ئاماژە ب ڤێ یەکێ ژی کر، نها هندەک ماددە هاتینە بەرهەڤکرن دبیت د دەمەکێ نێزیک دا بۆ رایا گشتی بهێنە ئاشکرا کرن، لێ بابەت تنێ ئەو نینە، چونکی دڤێت یاسایێن مەزنتر بهێنە ئامادەکرن، مە دڤێت چو کەسەک ل تورکیا هەست ب ڤێ یەکێ نەکەت کو زۆرداری لێ هاتیە کرن، ئانکۆ بابەتێ قووناغا ئاشتیێ دڤێت ب دلێ هەموو وەلاتیێن تورکیا بیت و گۆت: (ئاشکرایە کو گوهۆڕینێن گەلەک مەزن ل رۆژهەلاتا ناڤین روو ددەن، هەر گوهۆڕینەک ژی روو بدەت دێ کاریگەریا خوە ل سەر تورکیا هەبیت و ئەم نەچارین یا پێدڤی بکەین دا تورکیا تووشی چو زیانێن مەزن نەبیت، ئەم نەچارین وەکو تورکیا هەموو پرسێن هەی د ناڤبەرا خوە دا چارەسەر بکەین و نها یا دهێتە کرن ژی بۆ ڤێ یەکێ یە).
جێگرێ سەرۆکێ گشتی یێ پارتا بزاڤا نەتەوەپەرست یا تورکیا د دووماهیا ئاخڤتنا خوە دا ئەو یەک ژی دیار کر، کار بۆ دستوورەکێ نوو ل تورکیا ژی دهێتە کرن، بێگومان دستوورێ نها نەشێت ببیتە ژێدەرەک بۆ چارەسەرکرنا هەموو پرسێن تورکیا، ژ بەر ڤێ یەکێ ژی پێدڤیا تورکیا ب دستوورەک نوو و دیموکراتی هەیە و هەموو هێزێن سیاسی ل تورکیا ژی بەحسێ دستوورەک نوو دکەن، لێ نابیت بابەتێ دستوورێ نوو ژ ئالیێ هندەک هێزێن سیاسی بۆ بەرژەوەندیێن خوە بهێتە بکارئینان و گۆت: (مە دڤێت دستوورێ نوو بۆ هەموو خەلکێ تورکیا بیت، دستوورەک دیموکراتی بیت و کەس ئێدی ل تورکیا هەست نەکەت وەلاتیێ پلە دو یە، ئانکۆ مە دڤێت ب رێیا دستوورەک نوو و دیموکراتی ئەم پێکڤە بشێین هەموو پرسێن هەی ب تایبەتی ژی پرسا کوردی چارەسەر بکەین و ژ بەر ڤێ یەکێ ژی گرنگە د زووترین دەم دا هەموو ئالیێن سیاسی پرۆژەیێن خوە بۆ دستوورێ نوو رادەستی سەرۆکاتیا پەرلەمانی بکەن).

رۆژنامەیا واشنتۆن پۆست د راپۆرتەکێ دا ئاماژە ب ڤێ یەکێ کریە کو رێبەرێ نوو یێ ئیرانێ موجتەبا خامنەیی یێ دەست ب پیلانەکا مەترسیدار ل دژی ئەمریکا و ئسرائیلێ کریە و رێبەرێ نوو یێ ئیرانێ کار بۆ ئاڤاکرنا بەرەیەکێ نوو ل دژی ئەمریکا ل رۆژهەلاتا ناڤین دکەت و دخوازیت ب هەڤکاری ل گەل هندەک وەلاتێن عەرەبی ئاستەنگان ل هەمبەر بەرنامەیێ ئەمریکا ل رۆژهەلاتا ناڤین دروست بکەت.
هەمان رۆژنامەیێ ئەو یەک ژی دیار کریە، ئیران یێ جارەکا دی کار بۆ بهێزکرنا پێگەهێ خوە ل سووریێ دکەت و گرۆپێن چەکدار یێن سەر ب ئیرانێ کار دکەن دا بشێن ئالۆزیان ل سووریێ دروست بکەن، ئیران باش دزانیت هەتا گرۆپێن چەکدار ل سووریێ ل دژی دەستهەلاتا نها هندەک تشتان نەکەن بەرنامەیێ وان ل سووریێ سەرکەفتی نابیت و هەروەسا دێ فشارێن ل سەر حزبوللاهێ ژی بەردەوام بن.
د پشکەکا دی یا راپۆرتێ دا بەحسێ ڤێ یەکێ ژی هاتیە کرن ئیرانێ دڤێت دەمێ دانوستاندنان ل گەل ئەمریکا درێژتر لێ بهێت، ئانکۆ ئیرانێ دڤێت دەمی بۆ بەرژەوەندیێن خوە بکار بینیت و ژ بەر ڤێ یەکێ ژی هەتا نها چو رێککەفتن د ناڤبەرا ئیرانێ و ئەمریکا دا نەهاتینە کرن.