دەولەتا ئیتالیایێ د رێورەسمەكێ تایبەت دا ل باژێڕێ هەولێرێ، مەزنترین پلەیا رێزلێنانا فەرمی یا خۆ ددەتە نێچیرڤان بارزانی، سەرۆكێ هەرێما كوردستانێ. د ڤی رێورەسمی دا، نیكۆلۆ فۆنتانا، بالیۆزێ ئیتالیایێ ل ئیراقێ، ب نوونەرییا سێرگیۆ ماتەرێلا، سەرۆككۆمارێ ئیتالیایێ، «میدالیا ئەستێرا ئیتالیایێ» پێشكێشی سەرۆكێ هەرێما كوردستانێ دكەت، كو ئەڤ میدالیا مەزنترین خەلاتە ئیتالیا ددەتە كەسێن د ژیانێ دا ماین.
سۆران یاسین، سەرۆكێ ئینستیتیوتا كوردی ل رۆما بۆ گۆت: «خەلاتكرنا نێچیرڤان بارزانی ب مەزنترین میدالیا یا ئیتالیایێ، دەستكەفتەكێ دیرۆكی یە بۆ گەلێ كورد و دێ بیتە ئەگەر كو هەرێما كوردستانێ ل سەر ئاستێ جیهانێ پتر بهێتە نیاسین».
سەرۆكێ ئینستیتیوتا كوردی ئاماژە ب وێ ژی كر كو ئەڤ هەلبژارتنە پشتی وێ هەماهەنگییا بهێز دهێت یا د شەڕێ دژی داعشێ دا دروست بووی، چونكە داعش مەترسییەكا مەزن بوو ل سەر وەلاتێن ئۆرۆپا و ئیتالیایێ.
سۆران یاسین رۆهنكر كو ئەڤ خەلاتە ژ سالا 2011 ێ ڤە دهێتە دان بۆ كەسایەتیێن كارتێكەرێن جیهانێ و سێ تایبەتمەندیێن گرنگ هەنە:
-وەك ناسنامەیەكا فەرمییە كو ئیتالیا وەك دۆستەكێ نێزیك سەرەدەریێ ل گەل دكەت.
– ژ روویێ ئەكادیمی ڤە هەڤشێوەی باوەرنامەیا دكتۆرایێ یە.
-خودانێ وێ دشێت ل دەمێ پێشوازییێن ناڤنەتەوەیی دا ب ملێ خۆڤە بكەت.
یاسین گۆت: «ئەڤە جارا ئێكێ یە كوردەك ڤی خەلاتی وەردگریت و وەك ڤەكرنا دەرگەهێ مالا ئیتالیایێ یە ل سەر پرسا كوردان».
ژ ئالیێ خۆڤە دلشاد شەهاب، پەیڤدارێ سەرۆكاتییا هەرێما كوردستانێ راگەهاند: «ئاگاهداركرنا مە ل سەر ڤی خەلاتی بێ چاڤەڕێكرن بوو. پەیوەندیێن هەرێما كوردستانێ و ئیتالیایێ دەرگەهەك بوون بۆ تێكهەلییا ئیتالیایێ د ژیانا سیاسی و ئابۆری یا هەرێمێ دا».
ناڤبری دیار كر كو پیڤەرێن ڤی خەلاتی پێكڤەژیان، گرنگیدان ب ئافرەتان، و سیاسەتا دروست یا سەرۆكێ هەرێمێ نە، كو ب زمانەكێ سیاسی یێ قەبوولكری كار دكەت و هەموو پێنگاڤێن وی د چارچوڤەیێ دەستووری دا نە.
شۆڕش عەزیز سورمێ، شرۆڤەكارێ سیاسی، گۆت: «ئەڤ خەلاتە ب وان كەسێن ئیتالی و نەیێن ئیتالی دهێتە دان یێن رۆلەكێ مەزن د پەیوەندیێن دۆستانە یێن ناڤنەتەوەیی دا هەین. ڤاتیكان ژی ب رێیا ڤان پەیوەندییان دانپێدانێ ب پێكڤەژیانا ئایینی ل هەرێما كوردستانێ دكەت».
نیكۆلۆ فۆنتانا، بالیۆزێ گشتی یێ ئیتاڵیایێ ل بەغدایێ، هۆكارێن پێشكێشكرنا مەزنترین میدالیا یا دەولەتا ئیتالیایێ ب ناڤێ «سوارچاكێ خاچێ مەزن» بۆ نێچیرڤان بارزانی، سەرۆكێ هەرێما كوردستانێ ئاشكرا كر. ناڤبری راگەهاند، ئەڤ خەلاتە ژ ئالیێ سەرۆككۆمارێ ئیتالیایێ ڤە دهێتە دان ب وان كەسایەتیێن دیار یێن كو رۆلەكێ مەزن د بهێزكرنا پەیوەندیان دگەل ئیتالیایێ دا گێڕاین.
سەبارەت ب رۆلێ نێچیرڤان بارزانی د ڤان پەیوەندیان دا، فۆنتانا گۆت: «نێچیرڤان بارزانی دۆستەكێ زۆر باشێ ئیتالیایێ یە و هەڤپەیمانەكێ جهێ باوەریێ یە».
هەروەسا ئاماژە ب وێ ژی كر كو سەرۆكێ هەرێما كوردستانێ «كەسایەتییەكا سەرەكی بوو د بڕیارا مە دا بۆ دامەزراندنا قونسلخانەیێ ل هەولێرێ و بلندكرنا ئاستێ وێ بۆ قونسلخانەیا گشتی».
باڵیۆزێ ئیتالیایێ رۆلێ نێچیرڤان بارزانی وەك «ناڤەندگیرەكێ جهێ باوەریێ و سەركردەیەكێ پراگماتیك» ناڤكر و دوپاتكر كر كو ژ ئەگەرێ شیانێن وی یێن دەربازكرنا ناكۆكیان، نێچیرڤان بارزانی ل ئۆرۆپا رێزەكا مەزن لێ دهێتە گرتن. فۆنتانا ئاماژە ب وێ ژی دا كو د دووماهی سەرەدانا نێچیرڤان بارزانی بۆ ئیتالیایێ دا ل مەها گولانا 2026 دانوستاندنێن «گەلەك ئەرێنی» ل گەل سەرۆك ماتارێلا ئەنجام داینە، كو ئەڤە ژی وەرچەرخانەیەكا دی یە د بهێزكرنا پەیوەندیێن سیاسی و ئابۆری یێن د ناڤبەرا هەردو ئالییان دا.