د داخویانیەکێ دا سەرۆکێ یانەیا سەنحاریب گەشبینە د وەرزێ ئەڤ سالە دا تیما وان یا ڤۆلی بۆلێ ل سەر ئاستێ کچان هەڤڕکیێ ل سەر ڕێزێن پێشیێ بکەت و پلان بۆ پاراستنا ناسناڤێ خولێ هاتینە دانان و بەرهەڤیێن پێشوەخت هاتینە کرن وەکو نوونەرا پارێزگەهێ ب سەرفەرازی پشکداربیت.
زێدەتر داود رەبەن گۆت: فدراسیۆنا ڤۆلی بۆلا ئیراقێ بەری ماوەیەکی ئەم ئاگەهدارکرین کو دبیت د دەستپێکا مەها بهێت دا هەڤڕکیێن وەرزێ نوو یا خولێ ل سەر ئاستێ کچان بهێتە ئەنجامدان ب شێوەیێ خرڤەبوون بێ دیارکرنا باژێرەکی، هەرچەندە ئەڤ بڕیارە یا ئاشکەرا نینە وەکو دەم و جهێ دروست لێ دوپاتی ل سەر هەبوونا خولێ کر، لەوما ژی وەکو کارگێرییا یانەیێ مە باشتر دیت ئەم دەست ب لڤینان بکەین هێشتا زوو وەکو ئاگەهییەک بۆ هەر بریارەکا دی، ئێکەم پێنگاڤ مە باوەری دایە کادرێ ڕاهێنانێ ب سەرپەرشتییا ڕاهێنەرێ شارەزا د. هەکار دووڤدا مە داخواز ژێکر پێکهاتییەکێ ب هێز بۆ تیمێ پەیدابکەت.
هەروەسان ناڤهاتی گۆت: ژبەرکو یانەیا سەنحاریب نوونەرا ئێکانە یا پارێزگەهێ یە و قارەمانا وەرزێ بۆری یە، لەوما ژی ل دووڤ پلانێن هاتینە دانان دگەل دەستەیا ڕاهێنەران بەرهەڤیێن پێشوەخت هاتنە کرن و ئینانا چار یاریزانێن نوو کو ژ باشترینانە ل سەر ئاستێ کوردستانێ وئیراقێ ئەڤە ژی بۆ وێ ئارمانجێ یە ئەم بزاڤێن پاراستنا ناسناڤێ خوە یێ وەرزێ بۆری بکەین و هزر د پشکدارییەکا دەرڤە بهێتە کرن.
داود رەبەن ئەوچەندە ژی نە ڤەشارت کو وەرزێ ئەڤ سالە دێ بزەحمەتر بیت و گۆت: هەر سال ئاستێ خولێ بهێز دبیت ژبەر بەرهەڤیێن پرانییا یانەیان و ئینانا یاریزانان ژ دەرڤەیی ئیراقێ، لەوما ژی بۆ وەرزێ ئەڤ سالە دبینم دێ ئاست و هەڤڕکی ب هێزتربیت و ئەرکێ مە ب ژی ب سانەهی نابیت بۆ وەرزێ ئەڤ سالە ژبەرکو تیمێن دی بەرهەڤیێن خوە باشتر کرینە ژ وەرزێ بۆری.
سەرۆکێ یانەیا سەنحاریب ب سۆپاسیڤە گۆت: هەردەم پاریزگارێ دهۆکێ د. عەلی تەتەری پشتەڤانێ مە بوویە و ئەڤ سالە ژی بەرهەڤییا خوە دیارکرییە کو پشتەڤانبن و حوکمەتا هەرێمێ و پارتا مە پشتەڤانێن سەرەکی نە ئەم شیابوون ل وەرزێ بۆری ناسناڤی بدەستڤەبینن و ئەڤ سالە ژی هەمان شێوە پشتەڤانن، ب هیڤییا وێ یەکێ و ڕژدین ئەم ناسناڤێ خۆ پارێزین.

یێ‌ ئیتالی فێدرێكۆ كیێزا ستێرێ‌ یانەیا لیڤەرپۆلا ئنگلتەرایێ دیار كر ئەو بڕیارا دایی چوونا خوە ژ یۆڤانتۆس نە یێ‌ پەشێمان سەرباری حەز ژێكرنا وی بۆ وێ‌ یانەیێ و ئەگەرێن چوونا خوە ژی دیاركرن.
د دیدارەكا رۆژنامەڤانی دا كیێزایی گۆت: ڤەگوهاستن و گرێبەستا یاریزانان بۆ هەر یانەیەكێ‌ سرۆشتییە د جیهانا وەرزشی دا، هەرچەندە ئەز گەلەك یێ ب یانەیا یۆڤانتۆس ڤە گرێدایی بووم من پێشبینی نە دكر رۆژەكێ‌ دێ‌ وێ‌ یانەیێ هێلم، لێ‌ گڤاشتنێن بەردەوام تایبەت یێن هەردو كارگێریێن یانەیێ جیۆنتۆلی و تیاگۆ مۆتا ئەز نە چاركرم خوە ژ یانەیێ ڤەكێشم و بچمە یانەیا لیڤەرپۆل، ئەو دەنگۆیێ بەحس ل بلندكرنا گرێبەستێ‌ كری هیچ ڕاستییەك بۆ نینە و من دگەل یانەیێ ئەڤ بەحسە نەكرییە.
هەروەسان گۆت: ئەز یێ دگەل ئێك ژ مەزنترین پێنج یانەیێن جیهانی دا و پەشێمان نینم، نوكە ژی یانەیا یۆڤانتۆس یا ددلێ‌ من دا و حەز ژێدكەم ژبەركو من دیرۆكەكا جوان هەیە، هیڤییا سەركەڤتنێ‌ بۆ وێ‌ یانەیێ دخوازم.

ڕاپۆرتێن رۆژنامەڤانی ل ئەنگلتەرایێ دوباتی ل سەر هەبوونا دانۆستاندان دناڤبەرا یانەیا چێلسی و بریكارا ستێرا سویدی فیلیسیا شرۆدەر ژبۆ ئیمزاكرنا گرێبەستەكا گرانبوها یا دیرۆكی.
رۆژنامەیا The Athletic یا ئەمریكی بەلاڤكرییە یانەیا چێلسی ملیۆنەك و شەش سەد هزار دولار بۆ هەر وەرزەكی پێشكێشی ستێرا یانەیا بی كی هاگن یا سویدی كرییە ژبۆ ئیمزاكرنا گرێبەستا وان كو دهێتە هژمارتن گرانترین گرێبەست د دیرۆكا فوبتۆلا ئافرەتان دا، سەرباری گرێبەستا وێ‌ دگەل یانەیا سویدی هەتا هاڤینا سالا 2029ێ‌ یە، ئەڤ گرێبەستا زێدەترە ژ یێن یانەیێن بەرشەلۆنا و مانچستەر ستی ئەوێن دناڤبەرا 900 بۆ ئێك ملیۆن دۆلار تەرخانكربوون.
لدووڤ پێشهاتەیێن دانۆستاندنان دبیت گرێبەست بهێتە ئیمزاكرن ژبەركو گۆژمەیەكێ‌ مەزنە یانەیا بی كی هاگن پێدڤییە، ژلایەكێ‌ دووڤە دێ‌ بیتە بوهاترین گرێبەست ڕیكۆردا پێشتر یا ستێرا مەكسیكی لیزبێز ئۆفال ئەوا ب ئێك ملیۆن و پێنج سەد هزار دۆلاران گرێبەستا ئۆرلاندۆ براید یا ئەمریكی ئیمازكربوو

قەیس وەیس:

كوڕێ‌ باژێرێ‌ زاخۆ و ڕەڤەندا كوردستانی ل ئۆرۆپا مێرخاس غازی دۆسكی یاریزانێ‌ هەلبژارتیێ ئیراقێ‌ دێ‌ كەڤیتە لبن چاڤدێرییا چەند یانەیێن ئۆرۆپا ژ وانا یێن ئیسپانی و ئیتالی و ئەنگلتەرایێ، پشتی د یارییا بۆری دا یا هەڤالینی بەرانبەر هەلبژارتیێ ئیسپانیا ئاستەكێ‌ نایاب و گۆلەكا سەرنجراكێشی یا وەكهەڤیێ بۆ هەلبژارتیێ ئیراقێ‌ ئینایی و یاری ب گۆلەكێ‌ ب دووماهی ئینایی، ژ چارچووڤەیێ بەرهەڤیێن وان بۆ مۆندیالا جیهانی 2026ێ‌، ئەوا بڕیارە ل هەرسێ‌ وەلاتێن ئەمریكا، مەكسیك و كەنەدا بهێنە كرن.
لدووڤ ژێدەرێن ڕۆژنامەڤان یێن ئیراقی پشتی گۆلا وەكهەڤیێ یا مێرخاس دۆسكی ل سەر هەلبژارتیێ ئیسپانیا كو بشێوەیەكێ‌ جوان هاتیە تۆماركرن، بوو ئەگەر چەند یانەیەكێن ئۆرۆپایێ ژ ئسپانیا، ئیتالیا و ئنگلتەرایێ داخواز ژ لژنەیێن لێگەریانا یاریزانان چاڤدێرییا مێرخاس دۆسكی بكەن د دەمێ‌ یاریێن وان د مۆندیالا جیهانی دا و دوور نینە هەرزوو دەست ب دانۆستاندنان ژ ل گەل یاریزانێ‌ كوردستانی بهێتە كرن، سەرباری گرێبەستا وی دگەل یانەیا فیكتۆریا بلزن یا چێكی هەتا هاڤینا 2027ێ‌ یە، لێ‌ هەكە گرێبەستەكا گرانبوها بۆ هات یانەیا وی دشێت وەكو فرۆتن دەستان ژێ‌ بەردەت.
مێرخاس دۆسكی یێ‌ 27 سالی ل وەلاتێ‌ ئەلمانیا ژ دایكبوویە ب دایكۆبابێن وی خەلكێ‌ باژێرێ‌ زاخۆ نە، ل سالا 2020 ئێكەم یانەیا وی یا پیشەكاریێ دگەل فاكر ئنسبرۆگ یا نەمساوی بوویە، ل سالا 2022 چوویە دناڤ ڕێزێن یانەیا سلۆڤاكۆ یا چیكی، ل سالا 2024ێ‌ گرێبەستا یانەیا فیكتۆریا بلزن یا چیكی ئیمزاكرییە و پشكداری د قارەمانییا چامپیۆنز لیگ یا ئۆرۆپا دا كرییە، ئێكەم پشكدارییا وی دگەل هەلبژارتیێ ئیراقێ‌ یێ‌ ئۆلمپی بوویە ل سالا 2022ێ‌، دووڤدا ل سالا 2023ێ‌ دگەل هەلبژارتیێ ئیكێ‌ یێ‌ ئیراقێ‌ د كۆپا ئاسیا دا پشكداری كرییە.

د داخویانیەكا ڕۆژنامەڤانی دا رسێلڤیۆ بالدینی ڕاهێنەرێ‌ بەروەخت یێ‌ هەلبژارتیێ ئیتالیا گازندە ژ كۆمەكا كارگێریێن یانەیێن وەرزشی ل وی وەلاتی كرن و ئەگەرێ سەرەكی یێ نە دەربازبوونا وەلاتێ‌ وان بۆ مۆندیالێ‌ دا دیاركرن.
بالدینی گۆت: فوتبۆلا ئیتالیا یا د دەستێ‌ كۆمەكا كارگێرییان یانەیان كو ب تنێ‌ هزر د بەرژوەندیێن خوە یێن تایبەت دكەن، چو باشی تێدایە دەمێ‌ یانە گرێبەستا یاریزانێن سەر 35 سالی دا ئیمزابكەت، بەرۆڤاژی هەكە گرنگیێ بدەنە یاریزانێن ئەكادیمیان و گەنجان دناڤ تیمێ‌ دا زێدەكەن، نە پشت گەرمی ب گەنجان ئەگەرێ‌ پاشكەڤتنا هەلبژارتیێ ئیتالیایە ژبلی قازانجا پارەیی ئەوان یانەیان بۆ وان خەم نینە هەلبژارتی ب گەهیتە چو ئاست.