قەیس وەیس:

د داخویانیەكێ‌ دا مەحفۆز ئیبراهیم ئەندامێ‌ فدراسیۆنا كیك بۆكسینگا ئیراقێ‌ دیاركر ئەڤرۆ دێ‌ دەست ب هەڤڕكیێن قارەمانییا سۆپەرا ئیراقێ‌ بۆ یاریزانێن ژێگكرتی ل باژێرێ‌ سلێمانیێ هێنە كرن، 70 یاریزان ژ وانا شەش یاریزان ژ پارێزگەها دهۆكێ‌ بۆ سیستەمێن جودا دێ‌ پشكداربن.
زێدەتر ناڤهاتی گۆت: ل دووڤ بەرنامەیێ وەرزێ‌ ئەڤ سالە دێ‌ قارەمانییا سۆپەرا ئیراقێ‌ دناڤبەرا یاریزانێن سالا بۆری ناسناڤێن كەسكۆكی ل سەر ئاستێ‌ كێشێن جودا ب دەستڤە ئینایی و ئەو یاریزانێن د نوكە دا ل گەل هەلبژارتیێ ئیراقێ‌ پشكدار دێ‌ ل سەر سێ‌ سیستەمێن هەڤڕكیان شەڕی بۆ ناسناڤی كەن ئەوژی(full contact+ k1+ point fighting) ، هەرسیستەمەك ژی ل سەر 12 كێشان یێ‌ شێوزێ‌ جیهانی wako دێ‌ هێتە كرن، سەركەڤتیێ ئێكێ‌ یێ هەر سیستەمەكی دێ‌ بۆ هەلبژارتیێ ئیراقێ‌ یێ سەرەكی هێتە ژێگرتن و خودانێ‌ ڕێزا دویێ وەكو یاریزانێ‌ یەدەك دێ‌ هێتە دەستنیشانكرن، ئەڤ قارەمانیە دێ‌ هەتا شەمبییا بهێت بەردەوام بیت.
ژلایەكێ‌ خوەڤە سالح كەكۆ ڕاهێنەرێ‌ یانەیا دهۆكێ‌ گۆت: ل سەر ئاستێ‌ پارێزگەهێ‌ شەش یاریزان ژ چار یانەیان دێ‌ پشكداربن ئەو ژی ژ دهۆكێ‌ دو یاریزان، زاخۆ دو یاریزان، هەر ئێك ژ ئامێدیێ و گارە ئێك یاریزان دێ‌ پشكدارن و هەموو ژی دێ‌ ل سەر ئاستێ‌ فۆل كۆنتاك و كەی وەن بن، ژبەركو مە یاریزانێ‌ سیستەمێ‌ پۆنیت نینە مە پشكداری تێدا نەكر.
ڕاهێنەرێ‌ ناڤهاتی ئەوچەندە ژی گۆت: یاریزانێن هەرچار یانەیان نێزكیبوونەكا باش ل گەل ئێك هەیە، سەرباری كو بەری قارەمانیێ ب 15 رۆژان بتنێ‌ ئەم هاتینە ئاگەهداركرن ئەڤە ژی بارگرانیەكە و دەم یێ گۆنجایی نەبوو، لێ‌ لدووڤ پلانەكا تایبەت نەچاربووین مە بەرهەڤیێن خوە زێدەتر لێكر، پێخەمەت ب گەهنە ئاستەكێ‌ باش یێ بەرهەڤییان و ئارمانجا هەموو یاریزانان ئەوە هەڤڕكیێ ل سەر دەستڤەئینانا ڕێزێن ئێكێ‌ بكەن.
سالح كەكویی ئەوچەندە نە ڤەشارت هەكە چ ئاستەنگ نە كەڤنە ڕێیا یاریزانێن دەڤەرا بەهدینان دا دیسان هیچ غەدرەك ژلایێ دادڤانان دژی یاریزانێن مە نە هێتە كرن، من ب خوە باوەری یا هەیی دێ‌ شێن ئەنجامێن دلخوەشكەر ئینن، ژبەركو مە سەربۆر هەنە پێتشر دەما قارەمانی ل باژێرێ‌ سلێمانیێ دهاتە كرن غەدرە ل یاریزانان بوو تایبەت هەردو یاریزانێن مە زانا سالح و عەلی محەمەد، ب هیڤی نە هەر شەش یاریزانێن مە بگەنە فینالێ‌ و ناسناڤی ب دەستڤە بینن.

تاهر رێكانی

وه‌كی یا دیار یاریێن قووناغا 16 یا مۆندیالێ ب دووماهیك هاتن و هه‌ڤركی یا به‌رده‌وامه‌، لێ هه‌تا نۆكه‌ حنێر د ئه‌نجاماندا دهێنه‌ دیتن، له‌وا مه‌ ڤیا بۆچوونێن وه‌رزشڤان و شاره‌زایێن فتبولێ وه‌ربگرین و د ئه‌نجامدا ئه‌ڤ راپورته‌ به‌رهه‌ڤبوو.
لده‌ستپێكێ راهێنه‌ر و وه‌رزشڤانێ دێرینێ پارێزگه‌ها دهۆكێ سلێمان ره‌مه‌زان دبێژیت: به‌ری هه‌ر تشته‌كێ پێدڤیه‌ ئه‌م پێشكه‌فتنا نۆكه‌ ل جیهانێ په‌یدابوو لبه‌ر چاڤ وه‌ربگرین له‌ورا ئه‌ڤێ چه‌ندێ هه‌می لایێن ژیانێ ڤه‌گرتیه‌ و ئێك ژ وانا فوتبۆله‌، ئه‌ڤه‌ دبیته‌ ئه‌گه‌ر كو تێگه‌هشتن و عه‌قلییه‌تا یاریزان و ڕاهێنه‌ران بهێته‌ گوهۆڕین و پێدڤیه‌ لسه‌ر شێوازێ گه‌ڤن نه‌چن، نموونه‌ ئه‌گه‌ر هزر د هه‌لبژارتیێن به‌رازیل و ئه‌لمانیا دا بكه‌ین ئه‌و ستێرێن به‌رێ نه‌ماینه‌ و نابیت راهێنه‌ر پشتبه‌ستنێ سه‌ر ناڤوده‌نگیا وان بكه‌ت، هنده‌ك یاریزان یێن هه‌ین كه‌س نزانیت د ناڤ فوتبۆلێ دا ماینه‌ یان نه‌.
هەروەسان ناڤبری گۆت: چونكۆ‌ چار مۆندیاله‌ ئه‌ڤ وه‌لاته‌ نه‌شێن بگه‌هنه‌ یاریێن دووماهیێ، ئه‌ڤه‌ژی وێ دگه‌هینیت كو یاریزانێن باش نه‌ماینه‌ و پێدڤیه‌ پشتبه‌ستنێ لسه‌ر گه‌نجان بكه‌ن‌، به‌رازیل و ئه‌لمانیا هه‌ر ژ ده‌ستپێكێ ئه‌و گیانێ هه‌ڤركیێ لده‌ف وان نه‌بوو، یاریێن وان د به‌ره‌لابوون، له‌وا یا پێدڤیه‌ ئه‌و پێداچوونێ دخۆدا بكه‌ن بۆ سال ومۆندیالێن بهێت و ڤه‌گه‌رنه‌ ئاستێ جاران، بۆچوونا من ئسپانیا ئێكه‌ ژ به‌ربژێران بگه‌هیته‌ یاریا دووماهیێ.
ژلایێ خوەڤە دیندار فه‌یزی راهێنه‌رێ فوتبۆلێ و مامۆستایێ زانكویێ گۆت: براستی چ مۆندیالا تیمێن لاواز تێدا نینن و بتایبه‌ت یێن بگه‌هنه‌ قۆناغا 16 كو هه‌ر تیمه‌كا هاتی چه‌ند فلته‌رێن بۆراندین و گه‌هشتیه‌ ڤێ قووناغێ و مه‌ گه‌له‌ك ناڤێن مه‌زن دگوهلێ بوون لێ ئه‌نجام د به‌رۆڤاژی بوون، ده‌رباره‌ی ئاستێ هه‌لبژارتییان ناڤبری دبێژیت، ئه‌گه‌ر هه‌لبژارتیێن ئه‌فریكایێ خۆدان راهێنه‌رێن ئۆرۆپا بان بێ گۆمان دا ئه‌نجامێن وان گه‌له‌ك باشتر بن، چونكه‌ یاریزانێن بهێزن و شیانێن له‌شی هه‌نه‌، لێ ب مێشكی ناكه‌ن، ئه‌گه‌ر ئه‌م به‌حسێ مه‌غرب بكه‌ین پتریا یاریزانێن وان ل ئورۆپا یاریێ دكه‌ن، له‌وا ئه‌نجامێن وێ گه‌له‌ك د باشن.
ژلایه‌كێ دیڤه‌ دینداری گۆت ئه‌گه‌ر ئه‌ف بهێنڤه‌دانه‌ دهه‌ر گێمه‌كێ دا سێ چار خوله‌ك نه‌بان ئه‌ڤ هه‌لبژارتیێن بچیك ل ڤی سه‌قایی گه‌رم نه‌شیان ئه‌نجامێن باش بده‌ستخۆڤه‌ بینن و به‌رده‌وامیێ بده‌نه‌ ئاستێ خۆ، لدووماهیێ ناڤبری بۆچوونا خۆ دیار دكه‌ت و دبێژیت، راسته‌ تاراده‌كێ هنده‌ك هه‌لبژارتییان سوپرایز ئینان لێ نه‌شێن بگه‌هنه‌ قووناغێن دووماهیێ ئه‌ز دبینم كو هه‌ر ئێك ژ ئسپانیا، فره‌نسا ئه‌رچەنتین و ئنگلتەرا دێ گه‌هنه‌ چارگۆشا زێرین.

جەماوەرێ‌ وەرزشی ل جیهانێ‌ چاڤەڕێ‌ دیدارا ئاگرین یا ئێكێ‌ ژ قووناغا چارێك دووماهییا مۆندیالێ‌ نە ئەوا دێ‌ ئەڤرۆ ل دەمژمێر 11ێ‌ شەڤ ل یاریگەها جیلیت ل ئەمریكا هێتە كرن كو دهێتە هژمارتن یارییەكا ب لایەنێ‌ تەكتیكی و چەستەییا بلند یا هەردو هەلبژارتییان.
هەلبژارتیێ فرنسا ئەوا شیابوو د قووناغا هەشتێ‌ دا خوە ژ ئاستەنگا پاراگۆایی دەربازبكەت ب سەركێشییا گۆلكەرێ‌ خوە كێلیان مباپی، ئوسمان دیمبلی، برادلی باركۆلا، كاماڤینگا، ئیمیری، فۆفانا، وێلیاك سلیبا، ئۆبامیكانۆ وتیو هێرناندز و گۆلپارێز مایك كینان، ڕاهێنەرێ‌ فرەنسی دیدێ دیشامب پشتگەرمە ب ئەڤان یاریزانان كو كلیلكا سەركەڤتنێ‌ یە و پشتبەستن ل سەر هێلا ناڤین دكەت ژبۆ كۆنترۆلكرنا نیڤا یاریگەهێ‌، دیسان شارەزاهییا یاریزانێن وان هێزەكا دییە.
ژلایێ خوەڤە هەلبژارتیێ مەغرب ب سێ‌ گۆلێن پاقژ سەركەڤتن ل سەر كەنەدا ئنابوو و دەربازبوویە ڤێ‌ قووناغێ‌، هەلبژارتیێ مەغرب ژی خودان یاریزانێن شارەزا و شیان هەنە ژوانا ئەشرەف حەكیمی، نائیف ئەكرد، شادی ریاز، گۆلپارێز یاسین بۆنۆ، سوفیان ئمرابت، عزەدین ئوناحی، بیلال ئەلخنۆش، حەكیم زیاش، ئیبراهیم دیاز، سوفیان رەحیمی و یوسف ئەلنەسیر، ئەڤ هەموو یاریزانە سەربۆرەكا درێژ د خولێن ئۆرۆپایێ دا هەنە ژوانا یا فرەنسا، لەوما دهێتە چاڤەرێكرن یارییەكا ئاگرین بیت.

بڕیارە یارییا دویێ ژ چارچووڤەیێ قووناغا چارێك دووماهییا مۆندیالێ‌ سوبەهی ئەینی ل دەمژمێر 10ی شەڤ دناڤبەرا هەلبژارتیێ ئسپانیا و هەلبژارتیێ بەلجیكا ل یاریگەها سوفی ل ئەمریكا بهێتە كرن.
دەربازبوونا هەلبژارتیێ ئسپانیا بۆ ڤێ‌ قووناغێ‌ یا بزەحمەت بوو بەرانبەر هەلبژارتیێ پۆرتۆگال د خولەكا دووماهیێ دا گۆلا ئێكێ‌ و سەركەڤتنێ‌ ئینابوو، د بەرانبەر دا هەلبژارتیێ بەلجیكا ب سەركەڤتنەكا مەزن بەرانبەر خودانێن ئەردی هەلبژارتیێ ئەمریكا 4-1 گۆلان و دەربازبوویە ڤێ‌ قووناغێ‌، دیدارێن دناڤبەرا واندا پێشتر 23 یاری بووینە دگەل یێن هەڤالینی، 12 سەركەڤتن ئسپانیا، پێنج بۆ بەلجیكا و شەش وەكهەڤی هاتینە.
هەلبژارتیێ ماتادۆر خودان پێكهاتییەكێ‌ باشە ژ گرنگترین یاریزانێن وێ‌، لامین یامال، رۆدرێ‌، میشێل میرینۆ، پێدرێ‌، گافی، نیكۆ وێلیامز، ئونای سیمۆن یێ گۆلپارێز، ژلایێ خوەڤە هەلبژارتیێ بەلجیكا ب سەركێشیا كێڤێن دی برۆین و گۆلپارێز تیبۆ كۆرتوا، شارل دی كێتیلیر، جێرمی دۆكۆ، یۆری تیلیمانس، ڤیتسل و رۆمێلۆ لۆكاكۆ.

بڕیارە ل شەڤا ئێكشەمبییا بهێت ل دەمژمێر 12ێ‌ شەڤ یاریگەها هارد رۆك ل ئەمریكا دیدارەكا دی یا ئاگرین ژ قووناغا چارێك دووماهیێ دناڤبەرا هەلبژارتیێ ئنگلتەرا و نەرویج مێڤان بكەت، هەلبژارتیێ ئنگلتەرا-سێ‌ شێران- ب زەحمەت دەربازبوو ڤێ‌ قووناغێ‌ پشتی بەرانبەر مەكسیك ب3-2 سەركەڤتن ئینایی، ژلایێ خوە هەلبژارتیێ نەرۆیج ئێك ژ هەلبژارتیێن بووینە سوپرایز پشتی سەركەڤتنەكا دیرۆكی ل سەر هەلبژارتیێ بەرازیل-هەلگرا پێنج ناسناڤا- بنیت ب 2-1 گۆلان.
گرنگترین یاریزانێن دناڤا هەلبژارتیێ نەرۆیج دا، ئیرلینگ هالاند گۆلكەرێ‌ تیمێ‌، مارتن ئۆدیگارد، ئۆسكار بۆب، ئەنتۆنیۆ نۆسا و ساندر بیریج، ژلایەكێ‌ دووڤە ئنگلتەرا دێ‌ پشت بەستنێ‌ ل سەر كۆمەكا یاریزانان كەت ژوانا هاری كین، جۆد بیلینگهام، یۆكایۆ ساكا، فێل فۆدین، دیكلاس رایس و جۆردان بیكفۆرد، لێ‌ ژبەر كارتا سۆر گابریێل كوانسا ناكەت.

مێسی ل سەر تۆماركرنا دیرۆكێ‌ بەردەوامە
لیۆنێل مێسی ستیرێ‌ هەلبژارتیێ ئەرچەنتین بەردەوامە ل سەر تۆماركرنا ڕیكۆردان دناڤا مۆندیالێ‌ دا و بەردەوامە ل سەر پێشەنگییا خوە وەكو گۆلكەرێ‌ دیرۆكی یێ مۆندیالێ‌ ب 21 گۆلان، مێسی د نەهـ یارییێن ل دووڤ ئێك گۆل تۆماركرینە، هەروەسان پترترین یاریزانە د مۆندیالێ‌ دا گۆلان تۆماربكەت وگەهاندینە هەشت گۆلان د ئێك مۆندیال دا كو ئەڤ ڕیكۆردە یا سالا 1930ێ‌ یا ستابیلی یاریزانێ‌ ئۆرۆگوایی بوو، هەروەسان ئێك ژ پترترین یاریزانێن پشكداریێ د مۆندیالێ‌ دابكەت بگەهیتە یێ پۆرتۆگالی كرستیانۆ رۆنالدۆ و یێ‌ مەكسیكی گیێرۆ ئۆتچۆ، مێسی ئێكەم یاریزانە د هەموو قووناغێن مۆندیالێ‌ دا گۆلان تۆماربكەت، مێسی چاڤەڕێ‌ شكاندنا ڕیكۆردەكا دییە ئەوژی كو ببیتە ئێكەم یاریزان پترترین خولەكێن یاریێ ئەنجامبدەت د مۆندیالان دا.