ب ئامادەبوونا گوهدار شێخۆ، سەرپەرشتێ ئیدارەیا سەربخوە یا زاخۆ، د. یارا بەرزنجی ڕێڤەبەرا دەزگەهێ كوردستان فاوندەیشن، د ڕێوڕەسمەكێ تایبەت دا ل كۆڕنیشێ پرا دەلال ژ لایێ دەزگەهێ كوردستان فاوندەیشن ڤە 150 سەلکێن ڕیسایكلینگێ ل ئیدارەیا سەربخوە یا زاخۆ هاتنە دانان، مەرەم ژێ‌ كۆمكرنا پتر ژ سێ‌ تەنێن بەرمایكێن ڕیسایكلینگێ یە د مەهەكێ‌ دا.
پشتی ڤی پڕۆژەیی د قووناغا ئێكێ دا ل هەولێر و دهۆكێ سەركەفتن ئینای، قووناغا دویێ ل زاخۆ هاتە بجهئینان، ئارمانج ژێ دانانا بنیاتێ كلتوورێ ژینگەهـپارێزیێ و ب دەستڤەئینانا ژینگەهەكا پاقژ و ساخلەمە.
گوهدار شێخۆ، سەرپەرشتێ ئیدارەیا سەربخوە یا زاخۆ د گۆتارەكێ دا گۆت: «ژ بۆ بەرژەوەندیا گشتی، د خوازین ب هەموو ڕێكێن ئاراستەكری خەلكێ خوە هان بدەین بۆ پاقژ ڕاگرتنا هەموو جهان».
د. یارا بەرزنجی، ڕێڤەبەرا دەزگەهێ كوردستان فاوندەیشن د گۆتارەكێ دا گۆت: «ئەم گەلەك خوەشحالین كو ئەم شیاین قووناغا دویێ یا پڕۆژەیێ ڕیسایكلینگێ ل ئیدارەیا سەربخوە یا زاخۆ بجهبینین، ل گۆرەی بۆچوونا ئارین بارزانی، دامەزرێنەرێ كوردستان فاوندەیشن، هەردەم گۆتیە: كوردستان وەلاتێ مەیە و بەرپرسیارەتی و پاشەڕۆژا مەیە، لێ ئەم ب تنێ نەشێن ڤی كاری ئەنجام بدەین، بەلكو ئەڤ كارە ئەركێ سەر ملێ مە هەموویانە».

دهۆك، دلۆڤان ئاكرەیی:

جێگرێ بەرپرسێ نڤیسینگەها سەرۆكوەزیرێن هەرێما كوردستانێ دیاركر، كێمبوونا كارەبێ پەیوەندی ب كێمبوونا بەرهەمئینانا غازێ ڤە هەیە و د چەندین ڕۆژێن بهێن دا ئەڤ ئاریشەیە دێ هێتە چارەسەركرن.
عەزیز ئەحمەد، جێگرێ بەرپرسێ نڤیسینگەها سەرۆكوەزیرێن هەرێما كوردستانێ بۆ رۆژنامەیا ئەڤرۆ گۆت: «كێمبوونا كارەبێ و بڕینا وێ‌ بۆ هندەك دەمژمێران ل هندەك جهان، پەیوەندی ب كێمیا غازێ ڤە هەیە، ژ بەر ڕەوشا شەڕی ل دەڤەرێ بەرهەمئینانا وێ كێم ببوو، بەلێ د چەندین ڕۆژێن بهێن دا دێ بەرهەمئینان هێتە بلندكرن و كێشەیا كارەبێ ژی دێ هێتە چارەسەركرن».
گۆت ژی: «چو ئاڕێشە د ژێرخانا كارەبێ و پڕۆژەیێ رۆناهی دا پەیدا نەبووینە، رێژەیا بەرهەمئینانا كارەبێ ل هەرێمێ زێدەبوویە، د نوكە دا هەرێمێ هزار و 200 مێگاواتێن كارەبێ فرۆتینە ئیراقێ، بەلێ حكومەتا ئیراقێ داخوازا زێدەكرنا وێ بڕێ بۆ دو هزار مێگاواتان دكەت».

رەمەزان زەكەریا:

ب مەرەما پێشئێخستنا كەرتێ پیشەسازی ل سنۆرێ‌ پارێزگەها دهۆكێ‌، ڕێڤەبەریا گشتی یا وەبەرهێنانێ ل پارێزگەها دهۆكێ ئاگەهداریا هەمی كۆمپانیێن گەشەپێدەر، وەبەرهێنەر و خودان سەرمایەیان دكەت، كو دەلیڤەكا وەبەرهێنانێ بۆ دروستكرنا پڕۆژەیێ باژێڕی پیشەسازی یێ‌ بەردەڕەشێ‌ هەیە.
پڕۆژە ب ڕێكا وەبەرهێنانێ دێ هێتە بجهئینان و تایبەتە ب دانانا كارگەهێن بەرهەمئینانێ د هەمی جۆرێن كەرەستەیێن خوارنێ، ئاڤاهیان و بەرهەمێن پیشەسازی یێن جودا دا.
پڕۆژە ل سەر رووبەرێ‌ 806 دۆنەمێن ئەردی ل دەڤەرداریا بەردەڕەشێ‌ دێ‌ هێتە بجهئینان.

رەمەزان زەكەریا:

د چارچۆڤێ بزاڤێن بەردەوام یێن سەرۆكاتیا باژێرڤانیا ئاكرێ دا بۆ باشتركرنا كەرتێ خزمەتگوزاری و ئاڤادانكرنا دەڤەرێ، ل سەر پێشینەیا مەهانە یا باژێرڤانیێ، هەژمارەكا كارێن خزمەتگوزاری د ناڤا سەنتەرێ باژێری و دەوروبەرێن وی دا كەفتینە د بیاڤێ‌ بجهئینانێ دا.
زێرەڤان تەمۆ، پەیڤدارێ سەرۆكاتیا باژێرڤانیا ئاكرێ بۆ ئەڤرۆ گۆت: «ئەڤ كارە دوپاتیێ ل سەر دابینكرنا باشترین خزمەتگوزاریان بۆ وەلاتیان دكەت د بیاڤێن جودا دا، وەكو: دەستپێكرنا كارێن سەخبێركرن و نووژەنكرنا جادەیێن ناڤخۆیی، كۆنكریتكرنا هەژمارەكا ڕێكێن پیادە بۆ ئاسانكارییا هاتنوچوونا وەلاتیان ل تاخێن كەڤنار یێن ئاكرێ، دیسا دروستكرن و دانانا هەژمارەكا ئاڤڕێژێن نوو ب مەرەما كۆنترۆلكرنا ئاڤا بارانێ و ڕێگریكرن ل دروستبوونا لەهیان د وەرزێن بارانبارینێ دا، دروستكرن و جێگیركرنا پەرژانێن پاراستنێ ل سەر ئاڤەڕۆیان، ئەڤە ژی پێنگاڤەكا گرنگە بۆ پاراستنا سلامەتیا گشتی و پاقژڕاگرتنا ژینگەها دەڤەرێ».
ناڤهاتی گۆت ژی: «ئەڤ پڕۆژە د چارچۆڤێ پلانا مەهانە یا باژێرڤانیێ دا دهێنە بجهئینان ب مەرەما پێشڤەبرنا ژێرخانا باژێڕێ ئاكرێ و چارەسەركرنا ئاریشەیێن خزمەتگوزاری یێن دبنە ئەگەرێ دروستبوونا ئاستەنگان بۆ وەلاتیان».