چاڤەڕێ‌ دهێتە كرن ئەڤرۆ ل دەمژمێر پێنجێ‌ ئێڤاری تیما ڤۆلی بۆلی بۆلا یانەیا سەنحاریب ل هۆلا گرتییا سەلوا هەمبەری یانەیا ئەلعلا یا سعۆدیێ‌ بكەت ژ چارچووڤەیێ‌ قووناغا چارێك دووماهییا قارەمانییا رۆژئاڤا ئاسیا ل سەر ئاستێ‌ كچان ئەوا هەڤڕكیێن وێ‌ ب پشكدارییا 12 یانەیان ل وەلاتێ‌ كوێتێ‌ بەردەوامبن.
كاروانێ‌ دەربازبوونا نوونەرا دهۆكێ‌
كچێن یانەیا سەنحاریب دەست ب هەڤڕكییان كر د كۆما سێیێ‌ دا و شیا سێ‌ سەركەڤتنا ل دووڤ ئێك بینیت و وەكو قارەمانا كۆما خوە دەربازبیتە قووناغا چارێك دووماهیێ‌، پشتی ب سەركەڤتی ل سەر هەر ئێك ژ یانەیێن فەیحا یا سعۆدیێ‌ ب(3-1) گێمان و دگەل قدوس یا فلەستنینی ب(3-چنە) گێمان سەركەڤتن ئینایی و یارییا سێیێ‌ بەرانبەر یانەیا نەسر یا ئوردنی بوو ئەوا ب ڕیمۆنتادا و یارییەكا دراماتیكی سەركەڤتن ئینایی ب سێ‌ گێمان بەرانبەر دو گێمان، د دەمەكی دا تیما سەنحاریب یا پاشكەڤتی بوو ب (2-1) گێمان لێ‌ ب مۆرالەكا بلند شیان پاشكەڤتنا خوە ب سەركەڤتن ڤەگەر، ب(3-2) و دەربازبنە قووناغا چارێك دووماهیێ‌.
ڕاهێنەر ئەركێ‌ تیما خوە ب زەحمەت دبینت
د داخویانیەكێ‌ دا د. هەكار برقی ڕاهێنەرێ‌ ئێكێ‌ یێ‌ تیما ڤۆلی بۆلا یانەیا سەنحاریب ئەركێ‌ تیما خوە بەرانبەر یانەیا ئەلعەلا یا سعۆدیێ‌ ب زەحمەت دبینیت و هەمان دەمدا ڕژدییا تیمێ‌ بۆ سەركەڤتنێ‌ دیار كرییە و گۆت: یارییا ئەڤرۆ ب سانەهی نابیت بەرانبەر تیمەكێ‌ كۆمەكا یاریزانێن وێ‌ پیشەكارن ژ ئۆرۆپا و ئەمریكا باشۆر، دێ‌ یارییەكا ب هێز و ئاگرین بیت، ئەم یێن هاتین دەستكەڤتەكی بینن و نا ڕاوەستیین هەتا بگەهینە هیڤیێن خوە، ب زاخەكا بلند و هەموو شیانێن خوە دێ‌ یاریێ‌ كەین هەتا دووماهی چركە ژبۆ سەركەڤتنێ‌.
بۆ زانین ڤۆلی بۆلا یانەیا سەنحاریب دبیتە جارا ئێكێ‌ یە د دیرۆكا خوە و ئیراقێ‌ دا پشكداریێ‌ د ڤێ‌ قارەمانیێ‌ دا دكەت كو دهێتە هژمارتن قارەمانییەكا پلەداركرن و پەسەندكر ژلایێ‌ فدراسیۆنا نێڤدەولەتی یا یارییا ڤۆلی بۆلێ‌ و هاتیە هژمارتن ئێك ژ قارەمانیێن باوەرپێكری ل سەر ئاستێ‌ جیهانێ‌.

رەمەزان زەكەریا

پشتی بۆرینا شەش گەڕان ژ هەڤڕكیێن خولا پلا نایابا كوردستانێ‌ یا فوتبۆلێ‌ تیما یانەیا ئاكرێ یا وەرزشی هەتا نوكە ئەو ئاستێ‌ پێدڤی نیشان نەدایە ب تنێ‌ ئێك سەركەڤتن و پێنج وەكهەڤییان بینت لێ‌ بێ‌ خوسارەتی، ئەڤە ژی بوویە جهێ‌ دلگرانییا جەماوەرێ‌ یانەیێ‌، ل دوور ئەگەرێن ئەنجامێن لاوان ئەندامەكێ‌ كارگێریێ‌ بڤی شێوەیی بۆ رۆژنامەیا ئەڤرۆ دیاركرییە
سوهەیب عەلی ئەندام و پەیڤدارێ یانەیا ئاكرێ یا وەرزشی ئاشكراكر نە جێگیرییا ئەنجامان ڤەدگەرێتەڤە بۆ هنگافتنا چەند یاریزانێن سەرەكی ئەوێن هاتیە جهێ وان یاریزانێن هنگافتی هێشتا ب تەمامی سەركەفتی نەبووینە كو جهێ وان پڕكەنەڤە، خالەكا دی كو هۆكارە بۆ ئەنجامێن هەتا نوكە هاتیە تۆماركرن دەستەیا ڕاهێنەران دگەل یاریزانان فشارێ دئێخنە سەرخۆ داكو ب سەركەڤن ئەڤە ژی بۆ دەروونێ یاریزانان باش نینە ب گشتی یاریزان دڤێت دەروونێ خۆ ئارام كەن دا بشێن ئەنجامێن باش ب دەستڤە بینن.
ناڤبری گۆتژی: بێ گۆمان یانەیا ئاكرێ هەڤركا ناسناڤییە چونكی خالێن هەموو تیمان زۆر ل ئێك نێزیكن ئەڤە ژی دبیتە هۆكارەك كو پتر خۆ بەرهەڤ بكەین بۆ گۆهرینا ئەنجامان د بەرژوەندیا یانەیێ دا.
ناڤهاتی خویاكر: دەستە كارگێری دگەل دەستەیا ڕاهێنەران كار ل سەر وێ چەندێ دكەن كو تیم دو یاریا ب سەركەڤیت ئەنجام دێ دباش بن تیم یا خۆ بەرهەڤ كەت كو ئەنجامێن باشتر ب دەستڤە بینیت ل یاریێن داهاتی.

چاڤەڕێ‌ دهێتە كرن ئەڤرۆ ل دەمژمێر هەشتی شەڤ هەلبژارتیێ‌ ئیراقێ‌ یێ‌ فوتبۆلێ‌ یارییا خوە یا سێیێ‌ و دووماهیێ‌ ژ چارچووڤەیێ‌ كۆما چارێ‌ ژ قارەمانییا كۆپا عەرەبی بكەت ئەوا نوكە هەڤڕكریێن وێ‌ ل وەلاتێ‌ قەتەر دهێنە كرن.
سەرباری هەلبژارتیێ‌ ئیراقێ‌ دەربازبوویە قووناغا دویێ‌ لێ‌ یارییا سوبەهی دێ‌ بەرانبەر هەلبژارتیێ‌ جەزائیر بیت ل دووڤ سیناریویێن یاریێ‌ هەكە هەلبژارتیێ‌ ئیراقێ‌ خوسارەت بوو دێ‌ د یارییا خوە بەرانبەر ئوردن كەت ئەوا سەرێ‌ لیستا كۆما سێیێ‌ وەرگرتی، هەكە وەكهەڤبوو یان سەركەڤتن ل سەر جەزائیر ئینا دێ‌ بەرانبەر هەلبژارتیێ‌ مسر، یان ئیمارات یان كوێتێ‌ بیت.
ڕاهێنەرێ‌ ئیراقێ‌ ئارنۆلد دیاركر بۆ یارییا جەزائیر هەر ئێك ژ ئەیمەن حسێن موهەنەد میمی دێ‌ بەرهەڤبن د بەرانبەر دا شێركۆ كەریم ژبەر هنگاڤتنێ‌ و مستەفا سەعدۆن ژبەر هەبوونا كارتێن زەر د بەرهەڤ نابن.

چاڤەڕێ‌ دهێتە كرن ئەڤ شەڤە دەست ب هەڤڕكیێن گەڕا شەشێ‌ ژ قارەمانییا یانەیێن ئۆرۆپا قارەمانێن خولا چامپیۆنز لیگ ب ئەنجامدانا نەهـ یاریێن ب هێز ل جودا یاریگەهێن ئۆرۆپایێ‌ بڤی ڕەنگی بهێنە كرن.
كۆپیتگا یاریێن ئەڤ شەڤەیە
یانەیا لیڤەرپۆل یا ئنگلتەرایێ‌ دێ‌ بیتە مێڤانا یانەیا ئنتەر میلان یا ئیتالی ل یاریگەها میاتسا میلانۆ كو دهێتە هژمارتن كۆپیتگا یاریێن ئەڤرۆ دا ئەوا دێ‌ ل دەمژمێر 11ێ‌ شەڤێ‌ هێتە كرن، دیدارێن پێشتر یێن هەردو یانەیان دا شەش جاران بەرانبەری ئێك بووینە، لیڤەرپۆل چار سەركەڤتن و ئینتەر دو سەركەڤتن، یانەیا ئنگلتەرایێ‌ ل رێزا13ێ‌ دهێت ب كۆمكرنا نەهـ خالان و ئینتەر ب 12 خالان ڕێزا چارێ‌ دهێت.
بەرشەلۆنا، بایرن میۆنخ و چێلسی د تاقیكرنێن ب زەحمەت دانە
هەر د چارچووڤەیێن هەڤڕكیێن گەڕا شەشێ‌ دا كۆمەكا یاریێن دی ل یاریگەهێن جودا بڤی ڕەنگی دێ‌ هێنە كرن.
یانەیا بایرن میۆنخ یا ئەلمانی دێ‌ ل یاریگەها خوە مێڤاندارییا یانەیا سپۆرتینگ لەشبۆنا یا پۆرتۆگالی كەت، بایرن دێ‌ بزاڤێن سەركەڤتنێ‌ كەت پێخەمەت وەرگرتنا سەرێ‌ لیستێ‌ ب شێوەیەكێ‌ بەروەخت ئەوا د نوكە دا 12 خال هەین ڕێزا سێیێ‌ دهێت، د بەرانبەر دا لەشبۆنە ژی هیڤیێن ڕێزبەندیەكا باش دڤێت ئەوا 10 خال كۆمكرین ڕێزا هەشتێ‌ دهێت، ئەڤ یارییە دێ‌ ل دەمژمێر 8:45 شەڤ هێتە كرن.
ژلایێ‌ خوەڤە یانەیا بەرشەلۆنا یا ئسپانی دێ‌ ل كامپ نۆ مێڤاندارییا یانەیا ئینتراخت فرانكفۆرت یا ئەلمانی كەت، بۆ ڤێ‌ یاریێ‌ دبیت بەرشەلۆنا هند زەحمەتێ‌ نە بیت لێ‌ پێدڤی ب یێ‌ خالایە بۆ پێشڤەچوونێ‌ ئەوا حەفت خال كۆمكرین رێزا 18ێ‌ دهێت و ئینتراخت بتنێ‌ سێ‌ خال هەنە رێزا 28ێ‌ دهێت.
هەر ژ یاریێن ئەڤرۆ ل دەمژمێر 11ێ‌ شەڤ یانەیا چێلسی یا ئنگلتەرایێ‌ دێ‌ بیتە مێڤانا یانەیا ئەتالانتا یا ئیتالی د یارییەكا ب هێز دا، ڕێزبەندییا چێلس د چامپیۆنزێ‌ دا یا حەفتێ‌ یە ب كۆمكرنا 10 خالان، ب هەمان خال لێ كێمترییا گۆلان ئەتالانتا رێزا 10ێ‌ دهێت.
ئەو یاریێن ل دەمژمێر 11ێ‌ شەڤ دێ‌ هێنە كرن
ژلایەكێ‌ دووڤە یانەیا ئەتلەتیكۆ مەدرید یا ئسپانی دێ‌ بیتە مێڤانا ئایند هۆڤن یا هولەندی، ئەتلەتیكۆ خودانا نەهـ خالانە ل ڕێزا 12ێ‌ دهێت، د بەرانبەر دا ب كێمترییا خالەكێ‌ یانەیا هۆلەندی هەشت خال كۆمكرینە ل رێزا 15ێ‌ دهێت.
یانەیا توتنهام هوتسبێر یا ئنگلتەرایێ‌ دێ‌ ل یاریگەها خوە یانەیا سلاڤیا براج یا چیكی ل دەمژمێر 11ێ‌ شەڤێ‌ مێڤان كەت، تۆتنهامێ‌ هەشت خال كۆمكرینە ل ڕێزا 16ێ‌ دهێت و یانەیا چیكی بتنێ‌ سێ‌ خال هەنە ل رێزا 31ێ‌ دهێت.
هەروەسان مارسیلیا یا فرەنسی دێ‌ بیتە مێڤانا یانەیا یۆنیۆن سانت جێلواز یا بەلجیكی، مارسیلیا ب شەش خالان ڕێزا 21ێ‌ دهێت و سانت جێلواز ب هەمان خالان كێمترییا گۆلان ل ڕێزا 25ێ‌ دهێت.
یانەیا مۆناكۆ یا فرەنسی دێ‌ ل یاریگەها خوە یانەیا گەلاتا سارایی مێڤان كەت، مۆناكۆ ب شەش خالان ل رێزا 23ێ‌ دهێت و گەلاتا سارایی نەهـ خال كۆمكرینە ل رێزا 14ێ‌ دهێت.
ل دەمژمێر 6:30 مەغرەب بتنێ‌ ئێك یاری دێ‌ لڤی دەمی هێتە كرن ئەو ژی یانەیا كایرات ئالماتی یا كازاخستانی دێ‌ یانەیا ئۆلمپیاكۆس یا یۆنانی مێڤان كەت، كایرات ل رێزا 35ێ‌ و بەری دووماهیێ دهێت ب كۆمكرنا ئێك خال ب نمێ‌، ژلایێ‌ خوەڤە ئۆلمپیاكۆس بتنێ‌ دو خال هەنە ل رێزا 33ێ‌ دهێت.

چاڤی ئالۆنسۆ ڕاهێنەرێ‌ تیما یانەیا ڕیال مەدرید یا ئسپانی نەڕازیبوونا خۆ ل سەر خوسارەتییەكا نە چاڤەڕێ‌ كری بەرانبەر سێلتا ڤیگۆ د خولا ئسپانیا دا دیاركرن و هەموو تیم بەرپرس دانا ژ ڤێ‌ ئەنجامی.
د دیدارەكا رۆژنامەڤانی دا بۆ مۆندۆ دیپۆرتیڤۆ ئالۆنسۆیی گۆت: ئەڤە ئەو ئاست نینە یا مە دڤیایی و هەموو بەرپرسن ژ خوسارەتیێ‌، لێ‌ دڤێت ژبیر بكەین ژبەركو بتنێ‌ سێ‌ خال بوون و هێشتا خول یا درێژە، مە یارییەكا گرنگ بەرانبەر مانچستەر ستی ژ چامپیۆنزێ‌ هەیە دڤێت قەرەبوو بكەین، ئەگەرێن خوسارەتیێ‌ ژی هەبوونا هنگاڤتنانە، ئەڤە تەپاپێی هەر ئەنجامەك هەبیت دڤێت قەبول بكەین و خۆ باشتر لێبكەین، بڕیارێن دادڤانان ئەم تۆرەكرین و نە ل دووڤ سەقایێ یاریێ‌ بوون، ئەم یێ‌ د قووناغەكا هەستیار دا دێ‌ دەرباز بین.

ستێرێ‌ ئەمریكی جێمس هاردن یاریزانێ‌ یانەیا لۆس ئەنجلۆس كلیبێرس ڕیكۆردەكا نوو د خولا باسكێت بۆلا ئەمریكا دا MBA تۆماركر پشتی شیایی 34 خالان دگەل تیما خوە دژی یانەیا مینیسۆتا تیمبروولفز بینیت.
ستێرێ‌ ئەمریكی یێ‌36 سالی دبیتە ئێكەم یاریزانێ‌ بڤی ژیی و شیایە سەرجەمێ‌ گشتی 31051 خالان د كاروانێ‌ خوە یێ‌ ڤێ‌ یاریێ‌ دا بینیت كو دبیتە ڕیكۆردەكا نوو، سەرباری چیڤانۆكێ‌ ڤێ‌ یاریێ‌ د ژیێ‌ 41 سالی دا نمرا پیڤای تۆماركرییە ب 42268 خالان، لێ‌ ڕیكۆردا جێمس هاردنی یا نوویە كو د ژیێ خوە دا گەهشتیێ‌، پێشتر ڕیكۆردا باشتر شۆتكەرێ‌ خالان بوویە د سێ‌ وەرزان ل2017-2018-، 2018-2019 و2019-2020 و هەلگرێ‌ پرترین تۆماركەرە د ئێك یاری دا.