قەیس وەیس:

ب شێوەیەكێ‌ فەرمی 18 یاریزان بۆ ناڤ پێكهاتیێ هەلبژارتیێ ئیراقێ‌ یێ‌ باسكێت بۆلێ‌ هاتنە داخوازكرن ژ وانا شەش یاریزانێن كوردستانی نە ل گەل كادرێ‌ ڕاهێنانێ‌ ڕاهێنەرەكێ‌ كوردستانی ژی دناڤ دایە، ئەوێن دێ‌ ئەڤرۆ دەست ب كەمپێ ڕاهێنانێ‌ كەن خوە بەرهەڤكرن بۆ ڤاڤارتنێن مۆندیالا جیهانی 2027ێ‌، ئەوا بڕیارە هەڤڕكیێن وێ‌ ل ناڤەڕاستا سالا بهێت وەلاتێ‌ قەتەر مێڤاندارییا وێ‌ بكەت.
ل دووڤ لیستەیا هاتییە بەلاڤكرن، شەش كەس ژ وانا دگەل تیما یانەیا زاخۆ نە ئەو ژی هەر ئێك ژ جوتیار عەلی ڕاهێنەرێ‌ یانەیا زاخۆ وەكو هاریكارێ‌ ڕاهێنەرێ‌ هەلبژارتیێ ئیراقێ‌ هاتیە دەستنیشانكرن، ژلایەكێ‌ دووڤە پێنچ یاریزانێن یانەیێ ژی هاتنە داخوازكرن ئەو ژی موراد عەلی، فەرید رەعدی، زنار هشیار، محەمەد حەسەن و نەورەس زەرار، یاریزانێ‌ شەشێ‌ یێ‌ هاتیە داخوازكرن ئەوژی محەمەد عەبدولخالق ژ یانەیا سایبس یا هەولێری.
لدۆر ڤێ‌ یەكێ‌ سامر موستەفا ڕاهێنەرێ‌ هەلبژارتیێ ئیراقێ‌ دیاركر ژبۆ باشترین بەرهەڤی بۆ قووناغا ڤاڤارتنێن مۆندیالا ئاسیا بڕیاردایە زووترین دەم دەست ب ڕاهێنانا بهێتە كرن و گۆت: داخوازكرنا 18 باشترین یاریزانێن نوكە د خولێ‌ دا بۆ كەمپێ‌ ڕاهێنانێ‌ دەستپێكرییە، ئەڤەژی ل دووڤ پیڤەر و ستاندەرێن تایبەت ژلایێ‌ لژنەیەكا شارەزا هاتیە دانان، خوە بەرهەڤكرن بۆ ڤاڤارتنێن مۆندیالا جیهانی، هەلبژارتیێ ئیراقێ‌ د كۆما سێیێ یا ڤاڤارتنێن ئاسیایی دایە كو دهێتە هژمارتن ئێك ژ هێزترین كۆم، ل گەل هەلبژارتیێن ئیران، ئوردن و سوریا، ئەڤ كەمپە دێ‌ نافخویی بیت كو دبیتە خرڤەبوونە ژبۆ بلندكرنا ئاست وشیانێن یاریزانان ژلایێ جەستەیی و هونەری ڤە، دیسان زێدەتر گونجاندنەك د ناڤبەرا واندا پەیدابیت و وەرگرتن تەكتیكا كادرێ‌ ڕاهێنانە بەری دەست ب هەڤڕكییان بهێتە كرن.
بۆ زانین ژ كۆما سێیێ‌ هەلبژارتیێ ئیراقێ‌ سێ‌ یاریكرینە ، د دو یاریێن خوە دا بەرانبەر ئیرانێ‌ تووشی خوسارەتیێ بوویە، یارییەكا دی بەرانبەر ئوردن ژی خوسارەت بوویە، ئیراقێ‌ سێ‌ یاری ماینە یێن قووناغا دویێ‌ یا كۆمێ‌ بەرانبەر هەر ئێك ژ هەلبژارتیێن، سوریێ و ئوردن دیسان هەمان هەلبژارتی ژ یاریێن پاشئێخستی مایە.

دۆڤچوون، شاهۆ فەرید:
سێشەمبییا بۆری پەردە لسەر وەرزێ 2025 – 2026ێ یا خولا ستێرێن ئیراقێ هاتە خوارێ ئەوا یانەیا ئەلقوە ئەلجەویە ناسناڤێ‌ خولێ‌ ب دەستڤە ئینایی كو دبیتە ناسناڤێ‌ وێ‌ یێ‌ هەشتێ‌ یێ دیرۆكی پشتی هەڤركیەكا ب هێز شیان ناسناڤێ خولێ بدەستڤەبینیت پشتی پێنچ سالێن ڤە قەتیانێ،
ڕێزبەندییا یانەیێن كوردستانی
ل دووڤ لیستەیا دووماهییێ یا یانەیێن كوردستانی د خولا ستێرێن ئیراقێ‌ دا، یانەیا هەولێر شیا ڕێزا سێیێ‌ بهێت ب كۆمكرنا 79 خالان جوداهییا خالەكێ‌ ژ شورتە ئەوا ل ڕێزا دویێ هاتی و پلێتەكا پشكدارییا دەرڤە یا كۆپا كەنداڤی مسۆگەر كر، ژلایێ خوەڤە هەرسێ‌ یانەیێن دی ب جووداهیێن كێم ڕێزێن هەشتێ‌ هەتا دەهێ‌ ل دووڤ ئێك هاتن، یانەیا نەورۆز ب54 خالان ڕێزا هەشتێ‌ وەرگرت، یانەیا زاخۆ ل ڕێزا نەهێ‌ هات ب كۆمكرنا 53 خالان، كێمترییا سێ خالا یانەیا دهۆك ل ڕێزا دەهێ‌ هات.
شرۆڤەكارێ‌ وەرزشی ب شێوەیێ زانستی بۆچوونا خوە دیاركر
لدۆر ئاست و ڕێزبەندیێن یانەیێن كوردستانی شرۆڤەكارێ دیارێ پارێزگەها دهۆكێ وەحید رەشید ب شێوەیەكێ‌ زانستی و ئەكادیمی بۆچوونا خوە بۆ رۆژنامەیا ئەڤرۆ دیاركر و گۆت: خول سال بۆ سالێ پێشكەفتن و هێزەكا نوو خوەڤە دبینت، پێشكەفتن ژلایێ یاریگەها و ڕێكخستنەكا باش كۆ بنیاتەكێ باش و پلانەكا باش هەبوویە، ئەڤی وەرزی خولێ هێزەكا باش خوەڤە دیتیە كۆ پتر ژ یانەكێ بزاڤا دەستڤەئینانا خولێ دكر، ئەڤ پێشكەفتنە رێكخوەشكەرە بۆ یاریزانان كۆ گرێبەست بۆ یانەیێن دەرڤەیی وەلاتی بهێن و پێشكاری بینن.
ڕێزبەندیێن دهۆك و زاخۆ جهێ‌ ڕاوەستیانێ‌ یە
هەروەسان ناڤهاتی گۆت: ب شێوەیەكێ‌ گشتی ئەنجام و رێزبەندیا هەردو یانەیێن دهۆك و زاخۆ نە ل دووڤ پێشبینییا دهاتە چاڤەرێكرن، سەرەرایی بەرهەڤی و مێركاتویا گرێبەستێن یاریزانان لێ‌ دیاربوو نە سەركەفتی بوون، ئەڤە ژی بۆ كارگێریێن هەردو یانەیا ڤەدگەریت ئینانا یاریزانان بەری ئینانا ڕاهێنەری نە یا گونجاندی بوو ل گەل خولا ستێرێن ئیراقێ، ڕاهێنەر و یاریزانان هەتا رادەكێ بەرپرسیاتێ ستۆیێ خوەڤە دگرن، بەلێ هەمی ڤەدگەریت بۆ كارگێریا هەردو یانەیان و پلان و بزاڤێن وانا دەمێ جیبەجێكرنێ دا، شاشێن وانا دیاربوون كۆ ئەڤ وەرزی هەر یانەیەكێ سێ تا چار راهێنەر گوهۆڕین كۆ ئێك ژوان بۆ یاریێن مایی راهێنەری كر شێوەكێ باش، دیاربوو راهێنەران كارتێكرن هەبوو ئەو یاریزانێن یانێ ئیناین ئاست و رازەمەندیا راهینەری نەبوون، تەپاپێ ئەڤی سەردەمی زانستەكێ تژی نەخشە و پێكهاتە، لسەر ئەڤێ خالێ دڤێت هەردو كارگێری لەزێ ئینانا راهێنەران و بەرهەڤیا بكەن كۆ بگونجیت ل گەل پلانا وانا و ئینانا یاریزانان هەلبژارتنا هەردو لایان دابیت، هزرا وێ چەندێ بكەن یاریزانێن خۆمالی سەربێخن بۆ تیمَن خولێ یاریزانێن كورد بینین ناڤا پێكهاتەیی دا، تنێ پشت بەستنێ نە دانە لسەر یاریزانێن پێشەكار.
كاروانێ‌ هەولێرێ یا سەركەڤتی بوو
وەحید رەشید گۆت: ل دەستپێكێ‌ یانەیێن كوردستانێ هەڤڕكیەكا باش ئەنجامدان تایبەت هەكە بەحسی یانەیا هەولێرێ بكەین، سەرەرایی كێشەێن دارایی بەلێ هەڤركی بەردەوامی دایێ و شیان ڕێزبەندیا سیێ دەستڤەبینن، ئەو ئارمانجا گارگێریا یانەیێ دارێشتی هەتا ڕادەكێ باش یا سەركەفتی بوو، دەرئەنجام ژی شیان پلێتەكا دەرڤە ئەو ژی كۆپا كەنداڤی بۆ یانەیان ب دەستڤەبینن، كارگێریا وێ هەلبژارتنا راهێنەری خوە باسم قاسمی یا سەركەفتی بووك و هەر ژ دەستپێكێ‌ باوەری دابوویی و شیان ئەنجام و ئاستێن باش دەستڤەبینن.
ئاستێ‌ نەورۆز خوەجهـ نەبوو
دووماهیێ ل دۆر یانەیا نەورۆز ناڤهاتی گۆت: ئاستێ‌ تیما نەورۆز یا خوەجهـ نەبوو، دەستپێكەكا خراب هاتبوو د خولێ‌ دا و كەڤتنە د باردوخەكێ‌ خراب دا ئەنجامێن خوسارەتییان و وەكهەڤییان دەستپێكا خولێ‌ گەهشتنە ئاستەكێ‌ بلند بوو ئەگەر نەچاربن ڕاهێنەرێ‌ خوە ب گوهۆڕن، دگەل گوهۆڕینا ڕاهێنەری ئاستێ‌ وان بەر ب باش چوو لێ‌ هێشتا خوەجهـ نەبوو، وەلی كەریمی ئەو ڕاهێنەرێ‌ هاتی شیان گوهۆڕینێن باش دمێركاتویێ دا بكەن، ئەگەر ژی راهێنەر شیایە كارتێكرنێ ل كارگێریێ و یاریزانان بكەن بۆ تێگەهشتنێ و پێكڤەگرێدانێ، خوە باش ئینان و تیما خوە ژ دابەزینێ ڕزگاركر.

د داخویانیەكێ‌ دا باسم قاسم ڕاهێنەرێ‌ یانەیا هەولێر دەستخوەشییا هەموو یاریزانێن خوە كر كو شیان ڕێزا سێیێ‌ ب دەستڤە بینن و دوباتكر هەكە شاشیێن دادڤانان دژی تیما وی نەبا د نوكە دا دا ئاهنگا ب دەستڤە ئینانا ناسناڤی كەن.
هەروەسان ناڤهاتی گۆت: وەرزەكێ‌ ب زەحمەت و پری شاشیێن دادڤانان تایبەت بەرانبەر یانەیا مە، ڕاستە مە ڕێزا سێیێ‌ ب دەستڤە ئینا و پلێـتەكا دەرڤە ژی وەرگرتیە، لێ‌ هەكە ئەڤ ڤەگەڕینە هەڤڕكیێن خولێ‌ و ئەو یاریێن مە ئەنجامداین، دێ‌ بینی زێدەتری 15 خالێن ئەم ژ هەژی ژبەر بڕیارێن نە دروست و شاش یێن دادڤانان بوو ئەگەر ڕێزا ئێكێ‌ ژ دەست بدەین و ناسناڤی بێ‌ بەهر كرین، سەرباری ئەوان ئاستنەگان ئەم بەردەوام بووین ل سەر هەڤڕكیێ ب پشتەڤانییا پارێزگارێ‌ هەولێرێ و سەرۆك یانەیێ كو هەردەم هەڤكار بوون بۆ پێشكەڤتنا تیمێ‌.
ژلایەكێ‌ دووڤە باسم قاسم گۆت: هێشتا من چو بڕیارێن دووماهیێ دگەل یانەیێ نەداینە بۆ مانا من، رۆژێن بهێت دێ‌ كۆمبوون هەبن و ئەز چو داخوازیێن مەزن ناكەم، بۆ من گرنگە دگەل تیمەكا وەكو هەولێرێ بم و پشكدارییەكا دەرڤە بكەین.