سەرۆك بارزانی ل گەل قونسلێ گشتیێ فرەنسا ل هەولێرێ، پێشهات و ئاستەنگێن دەڤەرێ گەنگەشەكرن و دوپاتی ل هەڤبەندیێن دۆستانەیێن د ناڤبەرا گەلێ كوردستانێ و گەلێ فرەنسا كر.
دوهی سێشەمبی 29/7/2025، ل سەلاحەدین سەرۆك مەسعود بارزانی پێشوازی ل یان برێیم، قونسلێ گشتیێ فرەنسا ل هەولێرێ كر.
بارەگەهێ بارزانی بەلاڤكر» د دیدارەكێدا باس ل پێشهات و ئاستەنگێن دەڤەرێ ب گشتی و هەروەسا بیر و بۆچوون ل دۆر رەوشا سیاسییا ئیراقێ و هەڤبەندیێن د ناڤبەرا حوكمەتا هەرێما كوردستانێ و حوكمتا فیدرالییا ئیراقێ هاتنە لێكگۆهارتن».
هەر د وێ دیدارێدا دوپاتی ل هەڤبەندیێن دۆستانەیێن د ناڤبەرا گەلێ كوردستانێ و گەلێ فرەنسا هاتە كرن.

سەرۆكێ هەرێما كوردستانێ ل هەولێرێ پێشوازی ل نوونەرێ تایبەت یێ سكرتێرێ گشتیێ نەتەوەیێن ئێكگرتی و سەرۆكێ تێما(یونامی) ل ئیراقێ كر و راگەهاند: گرنگە هنارتنا مووچە و شایستەیێن دارایی یێن هەرێما كوردستانێ بهێتە مسۆگەركرن.
دوهی سێشەمبی 29/7/2025، سەرۆكایەتییا هەرێما كوردستانێ بەلاڤكر» نێچیرڤان بارزانی، سەرۆكێ هەرێما كوردستانێ ل گەل محەمەد ئەلحەسان، نوونەرێ تایبەت یێ سكرتێرێ گشتیێ نەتەوەیێن ئێكگرتی و سەرۆكێ تیما (یونامی) ل ئیراقێ كر».
سەرۆكایەتییا هەرێما كوردستانێ دیاركر ژی» نێچیرڤان بارزانی، سەرەرای بلند هەلسەنگاندنا بەرهەڤی و رۆلێ نەتەوەیێن ئێكگرتی ل ئیراقی، دوپاتی ل پێدڤی و گرنگییا چارەسەركرنا كێشەیێن هەولێرێ – بەغدایێ ب دانوستاندنا و مسوگەركرنا هنارتنا مووچە و شایستەیێن دارایی یێن هەرێما كوردستانێ ب گۆڕەی رێككەفتنان كر».
د بەیاننامەیێدا هاتیە ژی» سەرۆكێ هەرێما كوردستانێ د كۆمبوونێدا رێگریكرن ل هێرشێن درۆنی ل سەر هەرێما كوردستانێ ب پێدڤییەك بۆ ئارامییا وەلاتی هەژمارت».
ژ ئالیێ خوەڤە محەمەد ئەلحەسان د كۆمبوونێدا دلتەنگییا خوە ژ هێرشێن درۆنی و پێدڤییا رێكگرنێ ل وان هێرشان دیاركر و پشتەڤانییا نەتەوەیێن ئێكگرتی بۆ چارەسەركرنا كێشەیێن هەولێر- بەغدا و هنارتنا شایستەیێن دارایی یێن هەرێما كوردستانێ و پاراستنا ئارامییا وەلاتی، دوپاتكر.
دووماهی پێشهاتێن رەوشا رۆژهەلاتا ناڤین، تەوەرەكێ دی یێ كۆمبوونێ بوو.

نێچیرڤان بارزانی، سەرۆكێ هەرێما كوردستانێ، ل گەل شاندەكێ كۆمارا ئیسلامییا ئیرانێ ب سەرۆكایەتییا رەزا رەحمانی، پارێزگارێ ئازەربایجانا رۆژئاڤا، كۆمبوو.
سەرۆكایەتییا هەرێما كوردستانێ بەلاڤكر» د كۆمبوونەكێدا رەحمانی سلاڤ و رێزێن مەسعود پزیشكیان، سەرۆككۆمارا ئیسلامییا ئیرانێ گەهاندنە سەرۆكێ هەرێما كوردستانێ و خواستا وەلاتێ خوە بۆ پێشڤەبرنا هەڤبەندیێن خوە ل گەل هەرێما كوردستانێ، دوپاتكر».
رەحمانی هەروەسا هەڤبەندی و هاریكارییا هەڤپشك یا پارێزگەها ئازەربایجانا رۆژئاڤا ل گەل پارێزگەها هەولێرێ و و ئەو رێككەفتنا هاتیە كرن بۆ پێشڤەبرنێ ب بازرگانیێ و ئاسانكارییا لڤینا دەرگەهێن سنووری و هاتنوچوونا سەرەدانكەرێن ئایینی بۆ باشوورێ ئیراقێ ب رێكا هەرێما كوردستانێ د ناڤبەرا هەردو ئالییاندا، بلند هەلسەنگاند.
ژ ئالیێ خوەڤە نێچیرڤان بارزانی سەرەرای هنارتنا سلاڤ و رێزان بۆ سەرۆك پزیشكیان، دوپاتكر كو هەرێما كوردستانێ ب گرنگیڤە دنێریتە هەڤبەندیێن خوە یێن دیرۆكی ل گەل كۆمارا ئیسلامییا ئیرانێ و خوازیارە د هەموو واراندا هەڤبەندی و هاریكارییا هەڤپشك زێدەتر بهێتە پێشڤەبرن.
د كۆمبوونێدا كو پارێزگارێ هەولێرێ بەرهەڤ بووی، چەندین هزر و پێشنیاز بۆ چاوانییا باشتركرنا لڤینا بازرگانی و هاتنوچوونێ ل دەرگەهێن سنووری، هاتنە بەرچاڤكرن.

دوهی سێشەمبی 29/7/2025، مەسرور بارزانی، سەرۆكێ حوكمەتا هەرێما كوردستانێ، پێشوازی ل محەمەد ئەلحەسان، نوونەرێ تایبەت یێ سكرتێرێ گشتیێ نەتەوەیێن ئێكگرتی ل ئیراقێ و سەرۆكێ تیما ( یونامی) كر.
حوكمەتا هەرێما كوردستانێ د بەیاننامەیەكێدا بەلاڤكر» د كۆمبوونەكێدا بیر و بۆچوون ل دۆر دووماهی گوهۆڕینێن رەوشا گشتییا ئیراقێ و دەڤەرێ هاتنە لێكگۆهارتن».
باس ل وێ چەندێ ژی هاتە كرن» تەوەرێ سەرەكیێ كۆمبوونێ، دوپاتكرن بوو ل سەر رێزگرتن و گەرەنتیكرنا مافێن دەستووری و شایستەیێن دارایی یێن خەلكێ كوردستانێ و رەفتاركرن ل گەل هەرێما كوردستانێ ب شێوەیەكێ دادپەروەرانە و وەك قەوارەیەكێ دەستووری و فیدرالی. هەروەسا دووماهی ئینان ب هێرشێن تیرۆرستی ل سەر ژێرخانەیا وزەیا هەرێما كوردستانێ و وەرگرتنا پێرابوونێن قانوونی بەرامبەر ئەنجامدەران».
حوكمەتا هەرێما كوردستانێ د بەیاننامەیا خوە دا ئەوژی بەرچاڤكر» د پشكەكا دی یا كۆمبوونێدا، دوپاتی ل گرنگییا بەردەوامبوونا كاركرنا ئاژانسێن نەتەوەیێن ئێكگرتی ل هەرێما كوردستانێ هاتە كرن».

دوهی سێشەمبی 29/7/2025، رێكخراوا (هیومان رایتس ووچ) هۆشداری ل دۆر هێرشێن درۆنی ل سەر هەرێما كوردستانێ دا و د راپۆرتەكێدا ئاماژە ب وێ چەندێ كر كو زەڤیێن پەترۆلی دبنە ئارمانج و ئەو هێرشە زیان ل كەرتێ وزەیێ ل هەرێما كوردستانێ دایە.
د راپۆرتا وێ رێكخراوێدا ئاماژە ب وێ چەندێ ژی هاتیە كرن، هێرشێن ب رێكا درۆنان دهێنە كرن د مەترسیدارن و وەدكەن كێشە د ناڤبەرا هەولێرێ و بەغدایێ ئالۆز ببن و د وێ ململانێدا بەغدایێ هنارتنا مووچەیێ فەرمانبەرێن هەرێما كوردستانێ راگرتییە.
رێكخراوا (هیومان رایتس ووچ) داخواز ژ هەردو ئالیێن پەیوەندیدارێن هەرێما كوردستانێ و ئیراقێ كر ڤەكۆلینێ ل دۆر هێرشێن درۆنی بكەن و رێكێ نەدەن زێدەتر هێرش ل سەر ژێرخانەیا وزەیێ ل هەرێمێ بهێنە كرن و هەروەسا هنارتنا مووچەیێ فەرمانبەرێن هەرێما كوردستانێ بهێتە گرەنتیكرن و ل دەمێ خوە و ب تمامی بهێنە هنارتن.
ئەڤە د دەمەكی دایە كو رۆژا دوشەمبی 28/7/2025، شاندەكێ ئیراقی ب سەرۆكایەتییا قاسم ئەعرەجی، شیرەتكارێ ئاسایشا نیشتمانییا ئیراقێ گەهشتە هەولێرێ و ژ ئالیێ رێبەر ئەحمەد، وەزیرێ ناڤخوە ل حوكمەتا هەرێما كوردستانێ پێشوازی لێ هاتە كرن.
پاشی د كۆنفرانسەكێ رۆژنامەڤانیدا هەردو ئالییان ئاماژە ب وێ چەندێ كر كو لژنەیەكا هەڤپشك پێكئینایە بۆ ڤەكۆلینێ ل دۆر هێرشێن درۆنی و پاشی سەبارەت وێ چەندێ دێ راپۆرتەكێ بەرهەڤ كەن.
وەزیرێ ناڤخوە ل هەرێما كوردستانێ د وی كۆنفرانسێ رۆژنامەڤانیدا ئاماژە كر كو هێرشێن درۆنی كاریگەری ل سەر بەرهەمئینانا پەترۆلێ ل هەرێما كوردستانێ هەبوویە و پێدڤییە ئەو گرۆپێن هێرشان دكەن بهێنە ئاشكراكرن و هنارتن بۆ دادگەهێ.