بەغدا ناخوازیت پەترۆلا كوردستانێ بهێتە هنارتن تاكو بەردەوام مووچەی وەك كارتەكا سیاسی بكار بینیت
بەرپرسەكێ پارتی دیموكراتی كوردستان دبێژیت: حوكمەتا ئیراقا فیدرال حەزناكەت و ناخوازیت هنارتنا پەترۆلا هەرێما كوردستانێ دەست پێ بكەت، تاكو ئەوژی وەك حوكمەت پێگیر نەبیت ب وێ چەندێ مەهانە مووچەی بۆ فەرمانبەرێن هەرێما كوردستانێ ب هنێریت.
د نووترین دیدارا د ناڤبەرا مەسرور بارزانی، سەرۆكێ حوكمەتا هەرێما كوردستانێ و ستیڤ بیتنەر، قونسلێ گشتیێ ئەمریكا ل هەرێما كوردستانێ، هەردو ئالی هەڤڕابوون ل سەر پێدڤییا دەستپێكرنا هنارتنا پەترۆلا هەرێما كوردستانێ. د دەمەكیدا چەند حەفتییەكە هەولێر و بەغدا تێكگەهشتن سەبارەت ڤێ چەندێ كریە، بەلێ هێشتا پرۆسەیا هنارتنا پەترۆلێ دەست پێ نەكریە.
ل دۆر ڤی بابەتی، سەنگەر كانەبی، بەرپرسێ لقێ 23 یێ پارتی دیمەوكراتی كوردستان گوت» حوكمەتا ئیراقا فیدرال ناخوازیت دەست ب هنارتنا پەترۆلا هەرێما كوردستانێ بهێتە كرن، لەوما میلیشیا زەڤیێن پەترۆلی ل هەرێمێ درۆنبارانكرن. نوكە ژی بەغدا ناخوازیت زەڤیێن پەترۆلی بكەڤنە كاری، ژ بەر ئەگەرەكێ سادە، ئەوژی ئەوە هەكە پەترۆلا هەرێما كوردستانێ ب وێ رێژەیا دیاركری بهێتە بەرهەمئینان و بهێتە هنارتن بۆ دەرڤە، دێ ئیراق نەچار بیت مەهانە مووچەیێ فەرمانبەرێن كوردستانێ و هەقدەستێ كۆمپانیێن پەترۆلی ب هنێریت، د دەمەكیدا ئیراقێ پێ نەخوەشە پارە و داهاتێ خوە بۆ كوردستانێ ب هنێریت و وەسا دبینیت كو پارەی ددەتە ئالییەكێ نەیارێ خوە. ژ بلی وێ چەندێ ئیراق ناخوازیت بهێتە بن بارێ وێ خەرجیێ، چونكە هەڤوەلاتیێن هەرێما كوردستانێ ب هەڤوەلاتیێن خوە نزانیت، وێ ب خوە ژی كورتئینان د بودجەیدا هەیە».
گوت ژی» ل ئیراقێ سالانە سەدان هزار كەس ب هەرەمەكی هاتینە دامەزراندن، دەهان میلیشیا ب ناڤێن جودا جودا مووچەی ژ حوكمەتافیدرالی وەردگرن كو پشكەك ژوان سەر ب وەلاتێن دی نە، لەوما پارەیێ پەترۆلێ تێرا ئیراقێ ب خوە ناكەت، ژبەر وێ چەندێ بەغدا ناخوازیت پەترۆلا هەرێما كوردستانێ بهێتە هنارتن، تاكو پێگیر نەبیت ب هنارتنا مووچەی، چونكە هەكە پەترۆل بهێتە هنارتن ڤێجارێ نەشێت خوە ژ هنارتنا مووچەی ڤەدزیت، لەوما دخوازن هەرچ بیت بكەنت تاكو رێكێ ل هنارتنا پەترۆلا هەرێما كوردستانێ بگرن».
دیاركر ژی» راستە دەستهەلاتدارێن بەغدایێ شیان خوە ژ وێ چەندێ ڤەدزن كو دەستووری بجهبینن، هەروەسا خوە ژ وێ چەندێ ڤەدزی كو بڕیارا دادگەها بلند یا فیدرالی بجهبینن و مەهانە مووچەی بۆ فەرمانبەرێن هەرێما كوردستانێ ب هنێرن، بەلێ هنارتنا پەترۆلێ یا جودایە و وی دەمی نە بەغدایێ هیچ ئاخڤتن و بەهانە نامینیت، لەوما هەرچەندە حوكمەتا هەرێما كوردستانێ بەرهەڤە كو هنارتنا پەترۆلێ ب وێ رێژەیا دهێتە بەرهەمئینان بەردەوام بیت، بەلێ حوكمەتا فیدرالی ناخوازیت و بۆ ڤێ مەبەستێ ناهێتە پێش».
