سندس سالح سلێڤانەیی و هێلین سالم:
خوسرۆ جاف، نڤیسەرێ دیارێ كوردستانێ، بۆ رۆژنامەیا ئەڤرۆ گۆت: دراستی دا ناڤەندا خانی ژ هەژی گەلەك قێستیڤالانە، نە ئێكا بتنێ، لەورا گرنگە ئەڤ فێستیڤالە هەبن و دبەردەوام بن و من حەزدكر بابەتێن ئەدەبی ژی دناڤدا هەبان، ئانكو گرنگی ب لایەنێ ئەدەبی ژی هاتبان دان، نەبەس لایەنێ رۆژنامەڤانیێ بتنێ.
هەلبەستڤان (موئەیەد تەیب) گۆت:
ئەڤە سێ سالن ئەز پشکداریێ د ڤێ فیستەڤالێ دا دکەم، بەری نوکە وەک پەنالێست و شاعر من پشکداری تێدا دکر لێ ژ بەر کو ئەڤ سالە بابەت گرێدای ژیریا چێکری و راگەهاندنێ یە ب تنێ وەک گوهدار ئەز د فیستەڤالێ دا پشکدارم و ئەز دبینم فەرە ئەڤ فیستەڤالە سالانە بهێنە کرن بەرنامێن بەرفرەهـ تر بۆ بهێنە دانان
فاخر عەلی، رێڤەبەرێ دەزگەهێ هەرمان ل دەڤەرا بارزان ل دۆر فێستیڤالا خانی 3 بۆ رۆژنامەیا ئەڤرۆ گۆت: ناڤەندا خانی هەردەم ڤیایە ل گەل كەتواری خوە بگونجینیت و ئێك ژ تایبەتمەندیێن ڤێ ناڤەندێ ئەوە شیایە پەیوەندیان دناڤبەرا نڤشێ بەرێ ل گەل یێ نوو ئاڤا بكەت، هەروەسا بەردەوام بزاڤ كرینە ل گەل ڤێ رەوشێ و تەكنەلۆژیا نوو خوە بگونجینیت، زێدەباری مفا وەرگرتنێ ژ تەكنیكێن نوو لێ شیایە رەسەنایەتیا خوە ژی ب پارێزیت، هەروەسا پووتەكێ زۆر ب لایەنێ كلتۆری ژی دایە.
رزگار ئەژی گۆران، نڤیسەر و هەلبەستڤان گۆت: ئەڤ قێستیڤالە د دەمێ خوە دا هاتە گێڕان، چنكو نوكە رێكێن بلەز یێن گەهاندنێ هەنە و دناڤ بەریكا هەر كەسەكی ژمە مۆبایلەك هەیە جهێ كەنالەكی دگریت، لەورا دڤێت ب شارەزای بكاربینین، چكو مەدیا نە دروست پەیدا بوویە، لەورا هیڤیا من ئەوە دڤێ قێستیڤالێ دا پێنگاڤێن باش بۆ چاوانیا بكارئینانا مەدیایێ بهێنە هاڤێتن، هەروەسا ئەو راسپاردەیێن دهێنە راگەهاندن بشێت خزمەتا راگەهاندنا كوردی بكەن.
شەعبان سلێمان (هەلبەستڤان و ئاوازدانەر) گۆت: وەك پێشنیاز دبێژم بۆ جارێن بهێت پێدڤیە سرودەكا تایبەت ب فێستیڤالێ ڤە هەبیت، هەروەسا ئەو كەسێن سترانان دبێژن د ئاستێ پێدڤی دابن، نەكەسێن نۆرمال بن، هەروەسا پێدڤیە پتر دەم ب پەنەلێستان بهێتە دان چنكو دەه خولەك یان پازدە خۆلەك بۆ پێشكێشكرنا سمینارێ دكێمن، هەروەسا پتر ب دەلیڤە ب بەرهەڤبوویان بهێتە دان پرسیارێن خوە ئاراستە بكەن و هەكە بێژن چار سمینارن گەلەكن، بلا بۆ سالا بهێت د هەر پەنەلەكی دا دو سمینار هەبن دا پەنەلێست بشێت پتر سمینارا خوە رۆن بكەت، هەروەسا دا دەلیڤەیا پرسیاركرنێ ژی زێدەتر لێ بهێت.
ڤیان عەباس، بەرپرسا سەندیكا رۆژنامەڤانێن كوردستانێ/ لقێ دهۆك گۆت: ئەڤە سێ سالن ئەز پشكداریێ دڤێ فێستیڤالێ دا دكەم، چنكو فێستیڤال روودانەكا وەسایە مرۆڤ نەشێت ژێ دەرباز ببیت، ئەڤ فێستیڤالە وەكو منبەرەكێ یە بۆ هندەك دانوستاندنێن گەرم كو ئەڤ سالە پەنەلێست بابەتێن وان گەلەك دگرنگ بوون، چنكو د هەموو بیاڤان دا راگەهاندن یا گرنگە، لەورا فەرە ئەم كاری ل سەر ئەنجامان ئانكو راسپاردەیێن فێستیڤالێ بكەین دا مفا و ئەنجامێن باشتر هەبن.
نيشاندان