سەرۆکێ پارتا کۆماریا گەل دیار کر هەتا نها یا پێدڤی بۆ پێشڤەبرنا قووناغا ئاشتیێ نەهاتیە کرن، دڤێت دەستهەلات بشێت ب رێیا پرۆژەیەکێ هەم نەتەوەپەرستێن تورک و هەم ژی کوردان رازی بکەت، لێ هەتا نها دەستهەلاتێ کارەک وەسا نەکریە.

ئۆزگور ئۆزەل سەرۆکێ پارتا کۆماریا گەل یا تورکیا د داخویانیەکێ دا دیار کر، هەتا نها دەستهەلاتا ئاکپارتیێ یا پێدڤی بۆ پێشڤەبرنا قووناغا ئاشتیێ نەکریە، هەتا نها ب کریاری تشتەک نەهاتیە کرن کو ببیتە جهێ دلخوەشیا کوردان، کورد چاڤەرێ بوون د پێنگاڤا ئێکێ دا وەکو نیەتا پاک یا دەستهەلاتێ دەمیرتاش و هندەک ژ گرتیێن دی یێن سیاسی بهێنە ئازاد کرن، لێ هەتا نها تشتەک وەسا نەهاتیە کرن، چەندین جاران دادگەها مافێن مرۆڤی یا ئێکەتیا ئۆرۆپا ژی دیار کر دڤێت دەمیرتاش بهێتە ئازاد کرن، لێ دەستهەلاتێ هەتا نها بریارەکا دلخوەشکەر نەدایە و ئەو یەک ژی بوویە جهێ دلگرانیا کوردان و نها باوەری ب قووناغا ئاشتیێ کێم بوویە و ئەو یەک ژی جهێ مەترسیێ یە.
سەرۆکێ پارتا کۆماریا گەل ئەو یەک ژی دیار کر، کۆمبوونێن کۆمسیۆنا ئاشتیێ بەردەوام دکەن لێ هەتا نها بەحسێ وان بابەتان نەهاتینە کرن یێن گرنگ و چارەنڤیسسازن و دڤێت هندەک پرۆژە یاسا بهێنە ئامادەکرن و رەوانەی پەرلەمانی بهێنە کرن، چونکی ژ بۆ پێشڤەبرنا قووناغا ئاشتیێ دڤێت جڤاک بهێتە رازیکرن، دڤێت پرۆژەیەک وەسا بهێتە ئامادەکرن کو ب دلێ نەتەوەپەرستێن تورک و کوردان بیت، چونکی هەکە پشکەک ژ جڤاکێ تورکیا ل دژی قووناغا ئاشتیێ بیت وی دەمی سەرکەفتنا وێ دێ گەلەک یا ب زەحمەت بیت، ژ بەر ڤێ یەکێ‌ ژی دڤێت کارێن گەلەک مەزن بهێنە کرن، لێ تشتێ هەتا نها دیارە دەستهەلاتێ یا پێدڤی نەکریە و ئەو یەک ژی جهێ گومانێ یە، دیارە دەستهەلاتا ئاکپارتیێ دیسان ل گۆر بەرژەوەندیێن خوە یێن تەنگ سەرەدەریێ ل گەل قووناغا ئاشتیێ دکەت.
ناڤهاتی د پشکەکا دی یا داخویانیا خوە دا ئاماژە ب ڤێ یەکێ ژی کر، کو وەکو پارتا کۆماری وان پشتەڤانیا خوە بۆ قووناغا ئاشتیێ دیار کرینە و نها ژی ئەو پشتەڤانیێ لێ دکەن دا پرسا کوردی ل تورکیا بهێتە چارەسەرکرن، ژ بۆ ڤێ یەکێ ژی گرنگە ئاکپارتی د ئاستێ پێدڤی دا کار بکەت، دڤێت چو ئاستەنگی ل هەمبەر پێشڤەبرنا قووناغا ئاشتیێ نەهێنە دروست کرن، پارتا کۆماری چو دەمەکێ نەبوویە ئاستەنگ و هەردەم ژی پشتەڤانە و گۆت: (دڤێت ئاکپارتی ب رەنگەکێ راست سەرەدەریێ ل گەل قووناغا ئاشتیێ بکەت، نابیت قووناغا ئاشتیێ ببیتە قوربانیا ناکۆکیێن هندەک هێزێن سیاسی، ئەو یەک دێ کاریگەریا خوە یا گەلەک خراب ل پاشەرۆژا تورکیا کەت و وەکو پارتا کۆماری مە بەری نها ژی هۆشداری دایە ئاکپارتیێ).

بەرپرسا کۆمسیۆنا ئێکەتیا ئۆرۆپا دیار کر، پلانا ترامپی یا بۆ راگرتنا شەڕی ل غەزە گەلەک گرنگە و چو رێیێن دی نینن و دڤێت حەماس ژی پلانا ترامپی قەبوول بکەت، چونکی راگرتنا شەڕی د بەرژەوەندیا هەموو خەلکێ غەزە دایە و گرنگە.
ل ئالیێ دی سعوودیێ، ئیمارات، مسر و چەندین وەلاتێن دی یێن عەرەبی ژی پشتەڤانیا خوە بۆ پلانا ترامپی یا بۆ دووماهی هاتنا شەڕی ل غەزە دیار کرن و داخواز کرن هەموو ئالی یا پێدڤی بۆ راگرتنا شەڕی بکەن.
سەرۆکێ فرەنسا ئیمانوئێل ماکرۆن ژی دیار کر، حەماسێ چو رێیێن دی نەماینە و دڤێت ب پلانا ترامپی رازی بیت، چونکی جڤاکێ نێڤدەولەتی پشتەڤانیێ ل حەماسێ و کریارێن وێ ناکەت و دڤێت ئێدی حەماس نەبیتە ئەگەرێ شەڕی و ئالۆزیێن نوو، دڤێت حەماس بێی مەرج پلانا ترامپی قەبوول بکەت، چونکی پلانەک گەلەک باشە و د بەرژەوەندیا هەموو خەلکێ غەزە دایە و دێ بیتە دەستپێکەکا گرنگ بۆ ئاشتیێ و ئارامیێ.

ب، سه‌رجان:

ئیلهام ئەحمەد بەرپرسا پەیوەندیێن دەرڤە یا رێڤەبەریا خوەسەر یا رۆژئاڤایێ کوردستانێ دیار کر، وەکو رێڤەبەریا خوەسەر و تورکیا ئەو رێککەفتینە کو د دەمەکێ نێزیک دا دەرگەهێ سنوری یێ قامشلۆ و نسێبینێ بهێتە ڤەکرن و بەری نها ژی چەندین دانوستاندن ل گەل تورکیا هاتینە کرن دا دەرگەهێ سنوری بهێتە ڤەکرن.
ناڤهاتیێ دیار کر، بەری نها چەندین بازرگان و سەرمایەدارێن تورکیا ژی هەمان داخوازی ژ حوکمەتا تورکیا کربوون، چونکی دەرگەهێ سنوری یێ قامشلۆ و نسێبینێ دەرگەهەک مەزنە و دێ کاریگەریا خوە ل سەر ژیانا ب هزاران کەسان کەت، پشتی چەندین دانوستاندنان نها تورکیا ژی رازی بوویە و هەکە چو ئاستەنگی دروست نەبن د دەمەکێ نێزیک دا دەرگەه دێ هێتە ڤەکرن و دێ کەڤیتە د خزمەتا وەلاتیان دا و ئەو یەک ژی پێنگاڤەک گرنگە ژ بۆ پێشڤەبرنا رەوشا ئابووری یا رۆژئاڤایێ کوردستانێ.