سالڤەگەڕا وەغەركرنا هونەرمەند سەعید گاباری ل دهۆكێ هاتە گێڕان
زنار تۆڤی
ب چاڤدێریا د. عەلی تەتەر پارێزگارێ دهۆكێ، سەندیكا هونەرمەندێن كوردستانێ، لقێ دهۆك، دوهی رابوو ب بیرئانینا سالیادا وەغەركرنا هونەرمەند و شۆرەشگێڕ (سەعید گاباری) ل هۆلا خانی ل كۆلیژا هونەرێن جوان ل دهۆكێ، دوێ چالاكیێ دا فلمەكێ دكیۆمێنتاری ل سەر ژیانا وی هاتە پێكێشكرن، ل گەل خواندنا چەندین هەلبەستان ژلایێ هەلبەستڤان (شەعبان سلێمان) ڤە.
ئەڤین حسێن، سەرۆكا سەندیكا هونەرمەندان لقێ دهۆكێ گۆت: ئەڤە بیرەوەریەكا گرنگە ئەڤرۆ دهێتە گێران، ژبەركو هونەرمەند سەعید گاباری خزمەتەكا مەزن و بەرچاڤ بۆ هونەرێ كوردی كریە و هندی ئەم بەحسێ هونەرێ وی بكەین هێشتا كێمە، چنكو د قووناغا خۆ یا پێشمەرگایەتیێ ژی دا هونەرمەند سەعید گاباری، ب تڤەنگ و ستران و سرۆدێن خۆ خزمەتا كوردستانێ كریە، هەروەسا شیایە ب دەنگێ خۆ سێ هزار و 500 سترانێن فولكلۆری ب پارێزیت.
ماجد سەید سالح، جێگرێ پارێزگارێ دهۆكێ، د پەیڤەكێ دا بەحسێ چەندین قووناغێن ژیانا هونەرمەندێ ناڤبری كرن و گۆت: سەعید گابــــــــــاری ژبلی هندێ كو هونەرمەند بوو، كەسەكێ كۆمەلایەتی بوو، چەندین بەرهەم بەلاڤكرینە و ب رێیا هونەرێ خۆ رەخنێن ئاڤاكەر ژی ئیناینە سەر زمان.
