هه‌ولێر، قائید میرۆ:

پارێزه‌رەکی دازانین کو رێژه‌یا ته‌لاقێ زێده‌بوویه‌ و ئه‌گه‌رێن سه‌ره‌كی یێن ته‌لاقێ خیانه‌تا هه‌ڤژینان و تۆڕێن جڤاکی نە بتایبه‌تی سناپ و گۆت؛ نوكه‌ دیارده‌یه‌كا دی به‌ر ب زێده‌بوونێ یە ئه‌وژی ته‌لاقدانا ژنێ ل ده‌رڤه‌ی دادگه‌هێ و نه‌دانا مافێن وێ ب ڕەنگەکێ شەرعی و قانوونی‌

پارێزه‌ر رێبین شێخ سمایل، د دیدارەکێ دا بۆ رۆژنامەیا ئه‌ڤرۆ دیار كر، ڕێژەیا تەلاقێ ب هه‌ڤبه‌ركرن دگه‌ل سالێن بۆری زێده‌بوویه‌ ل هه‌رێما كوردستانێ، ئه‌گه‌رێن ته‌لاقێ ژی زۆرن، به‌لێ یێن سه‌ره‌كی خیانه‌تا هه‌ڤژینایه‌ بتایبه‌تی ب رێیا سناپ چات و تۆڕێن جڤاکی، هه‌روه‌سا ره‌وشا ئابوری ژی كاریگه‌ری لسه‌ر رێژه‌یا ته‌لاقێ هه‌یه‌ و گۆت؛ مه‌ كه‌یس هه‌بوو ژبەرکو زه‌لام نه‌شیایه‌ بۆ جه‌ژنێ جلكا بۆ هه‌ڤژینا خۆ بكڕیت گه‌هشتیه‌ ته‌لاقێ، ئانکو بارێ ئابوری كاریگه‌ریه‌كا راسته‌وخۆ لسه‌ر هه‌ڕفاندنا خێزانێ هه‌یه‌ و چه‌ندین خێزان جودابووینه‌ و ئه‌گه‌ر ژی بۆ نه‌بوونا ژێده‌رێ دارایی و پاره‌ی ڤه‌دگه‌ڕیت.
پارێزەری گۆتژی؛ ژلایه‌كێ دیڤه‌ نه‌بوونا مالا سه‌ربخۆ ژی هۆكاره‌ بۆ جودابوونا هه‌ڤژینان و مایتێکرنا كه‌سێن ده‌وروبه‌ر ژی رۆل هه‌یه‌، چونكه‌ ئه‌گه‌ر ئاریشه‌یه‌ك دناڤبه‌را هه‌ڤژینان هه‌بیت نابیت كه‌س و كارێن هەردو لایا مایتێکرنێ بكه‌ن، ژبه‌ركو مایتێکرن نوكه‌ بوویه‌ ئه‌گه‌ر خێزان ب هەڕفیت و هه‌ڤژین جودا ببن.
ڕێبین شێخ سمایل دیار کر ژی کو ل سالێن به‌رێ ئه‌گه‌ر ئاریشه‌ ژی دناڤبه‌را هه‌ڤژینان هه‌بان چاره‌سه‌ری هه‌بوو، زۆر جاران ئاریشه‌ گه‌هشتیه‌ دادگه‌هێ ژی به‌لێ پێكهاتینه‌ و ئاریشه‌ چاره‌سه‌ربوویه‌، مخابن نوكه‌ گیانێ لێبۆرین و لێكتێگه‌هشتنێ كێم بوویه‌ و زۆربه‌یا داخوازیێن دهێنه‌ پێشكهێش كرن بۆ دادگه‌هێ دووماهیێ دگه‌هیته‌ حاله‌تێ ته‌لاقێ و ژن و زه‌لام ژێك جودا دبن و گۆت؛ ئه‌و داخوازیێن ته‌لاقێ یێن ئه‌ز دبینم هه‌موو ته‌مه‌ن تێدا هه‌نه‌.
پارێزه‌ر رێبین شێخ سمایل د بەردەوامیا ئاخفتنێن خۆدا دیار کر کو دیارده‌یه‌كا دی نوكه‌ به‌ر ب زێده‌بوونێ یه‌ ئه‌وژی ته‌لاقا ده‌رڤه‌ی دادگه‌هێ، ئەڤە جهێ دلگرانیێ یه‌، چونكه‌ ته‌لاق د ده‌ستێ زه‌لامی دایە، لەورا دشێت ژده‌رڤه‌ی دادگه‌هێ ژی هه‌ڤژینا خۆ ته‌لاق ده‌ت و ژلایێ قانوونیڤە ژی ژنێ ئه‌و مافه‌ هەیە ته‌لاقێ ره‌ت بكه‌ت، بەلێ مافێ ژنێ وه‌ك پێدڤی ناهێته‌ دان و دادگه‌هـ ژی نه‌شێت ئه‌ڤی مافی بۆ ڤه‌گه‌ڕینیت.
پارێزەری زێدەتر گۆت؛ قانوونا ده‌زگه‌هێ ته‌نفیزی زۆر یا هاریكار نینه‌، لەورا پێدڤیه‌ قانوونا ته‌نفیزێ بهێته‌ راستڤه‌كرن و ئه‌و ئاریشه‌ بهێنه‌ چاره‌سه‌ركرن، هه‌م ژن ل ده‌رڤه‌ی دادگه‌هێ نه‌هێته‌ ته‌لاقدان هه‌مژی ده‌مێ دهێته‌ ته‌لاقدان ب ته‌مامی بگه‌هیته‌ مافێن خۆ.

هه‌رهین محه‌مه‌د:

د سالێ‌ دا دو داشكاندنێن مه‌زن دهێنه‌ دانان ئه‌و ژی ل دوماهیا وه‌رزێ‌ زڤستانێ‌ و دوماهیا وه‌رزێ‌ هاڤینێ‌، ئه‌ڤ داشكاندنه‌ ژی ب رێیا ستێره‌كا به‌رنیاس ل سوشیال میدیایێ‌ دهێنه‌ به‌لاڤكرن و ژن ژی ئێكه‌مین كه‌سن باوه‌ریا خوه‌ ب ئه‌وان داشكاندنان دئینن و قه‌ستا ئه‌وی جهی دكه‌ن ژ بۆ كرینا كه‌لوپه‌لێن ئه‌رزان.
ڕۆژنامه‌ڤان جه‌گه‌ر به‌لو دیار كر ده‌مێ‌ داشكاندن دهێنه‌ دانان، ژن به‌ری هه‌ر كه‌سه‌كی ئه‌ڤان داشكاندنان دزانن و باوه‌ر دكه‌ن و ئه‌ڤه‌ خالا لاوازا ژنێ‌ یه‌ و گۆت: بازرگان ب رێیا به‌رنیاسێن سوشیالێ‌ داشكاندنان به‌لاڤ دكه‌ن و دبێژن تشت بوینه‌ نیڤا بهای و نه‌ وه‌سا، یان پارچه‌یه‌كێ‌ بكڕه‌ و ئێك دیاریه‌ و د راستی دا مرۆڤ بهایێ‌ هه‌ردو پارچه‌یان دده‌ت، لێ‌ بكڕ هه‌ست ب ئه‌وێ‌ چه‌ندێ‌ ناكه‌ن.
مه‌ریه‌م محه‌مه‌د كچه‌كه‌، سه‌باره‌ت هه‌مان بابه‌ت دیار كر كو د ڤان سالێن دووماهیێ‌ دا و ل گه‌ل بهێزبوونا سوشیال مه‌دیایێ‌ د جڤاكی دا، داشكاندن بوویه‌ خاله‌كا گرنگ، هه‌تا د په‌یچێن سوشیال مه‌دیایێ‌ دا ژی داشكاندن هه‌نه‌ و گۆت: نزا ئه‌ڤ داشكاندنه‌ د به‌رژه‌وه‌ندیا فرۆشیاران دایه‌، یان د به‌رژه‌وه‌ندیا خه‌لكی دایه‌؟، چونكه‌ رۆژانه‌ بێ‌ سنور داشكاندن دهێنه‌ دانان د بازاری دا، بتایبه‌ت ل مول و ماركێت و پیشانگه‌هان و ئه‌ڤ چه‌نده‌ ژی بوویه‌ هه‌ڤركی د سوشیالێ‌ دا .
مه‌ریه‌مێ‌ دیار كر كو ئه‌و داشكاندنێن نوكه‌ دهێنه‌ دانان بازرگانیه‌، نه‌ك هاریكاریه‌ بۆ خه‌لكی، ژبه‌ركو هنده‌ك داشكاندن بو ئستغلالكرنا خه‌لكی دهێنه‌ دانان بو نمونه‌ كه‌لوپه‌لێن خوارنێ‌ ڕه‌نگه‌ ده‌مێ‌ وان نێزیكه‌ دێ‌ ب سه‌رڤه‌ چیت، یان جلكن دێ‌ وه‌رزێ‌ وان ب دووماهیك هێت، لڤێره‌ دیار دبیت كو مه‌ره‌ما وان بازرگانیه‌، داكو تشتێن وان بله‌ز بهێنه‌ فرۆتن و باشتره‌ ژ هندێ‌ كو بهاڤێژن، یان بمینن و كه‌س نه‌كڕیت.
ژلایێ‌ حڤاكی ڤه‌، ژیان بامه‌رنی، ڤه‌كوله‌را جڤاكی و ده‌روونی دیار كر كو ژن هه‌ست ب خۆشیێ‌ دكه‌ت ده‌مێ‌ دبینیت ل جهه‌كی بوویه‌ داشكاندن و ئه‌و دچیت بۆ كڕینا كه‌ل و په‌لان و ل گه‌ل ئه‌وێ‌ چه‌ندێ‌ ژی ئارامیێ‌ و هێزه‌كا نوی وه‌ردگریت، ژبه‌ركو دبیت به‌ری هینگێ‌ وێ‌ ڤیابیت وان تشتا بكڕیت، به‌لس د شیاندا نه‌بۆ، به‌لێ‌ پشتی دبیته‌ داشكاندن ئه‌و دشێت پتر تشتا بكڕیت و ب بهایه‌كێ‌ ئه‌رزانتر، ئه‌ڤه‌ ژی هاریكاریه‌كه‌ بۆ مالا وێ‌.
ژیانێ‌ گۆتژی: ئه‌ڤ داشكاندنه‌ نه‌ك بتنێ‌ مفا وه‌رگرتنه‌، به‌لكو روودانه‌كا جوانه‌ یا جڤاكی و ئابوری و خه‌لك لێك كوم دبن و خۆشیێ‌ ژێ‌ دبینن و ب دیتنا من سه‌رنجا ژنێ‌ پتر ژ زه‌لامی بۆ داشكاندنان دهێته‌ كێشان.

رەمەزان دەشتمری

2- 2

هەر دیسان ئەز ودگەل دایكا خواە برایێ‌ خوە ئەحمەدی و خویشكا خوە بۆ زیندانا ئەبو غرێب چوین و ئەو دەمێ‌ ئەم گەهشتینە بەر دەرێ‌ زیندانا ئەبو غەرێب مە دیت بابێ‌ من دگەل كومەكا زیندانیان یێ‌ ل بەر دەرگەهێ‌ زیندانێ‌ چاڤەرێنە مەكەت . دەمێ‌ چاڤێ‌ بابێ‌ من ب مە كەفتی د جهدا بەردا گری و پشتا خوە دامە و ڕوندك باراندن و گوت: هەما بزڤرن ئەز هەر دێ‌ چم من نەڤێت هەوە ببینم و هەر ئەم بەر ب بابێ‌ من چوین و هەر بابێ‌ مە چوو و لخوە نەزڤڕی و نەشیا مە ببینت . ب هەر حالێ‌ هەیی ب ئەوان سەر و دلێن شكەستی و مەلویل جارەكادیتر ئەم بۆ مالێ‌ زڤڕین زڤرین. پشتی بورینا دوو حەفتیان جارەكادیتر ب ڕیكا موختارێ‌ تاخێ‌ سێمالكا ئەم هاتین ئاگەهدار كرن كو بۆ سەرەدانا زێندانا ئەبو غرێب بكین دا ئەم بابێ‌ خۆە ببینن و كا چ قەویاتی هەنە ب گەهینن ئێك و دوو و ژبەركو بریارا هاتی دبێژن ژ ئەوان سەرجەمێ‌ خەفتێ‌ دوو كەسان دێ‌ حەفت كەسان ل زیندانا ئەبو غەرێب حكومەتا ئیراقێ‌ دێ‌ سێدارەدین. هەر ل سپێدێ‌ زویكا ئەز و دگەل دایكا خوە و برایێ‌ خوە یێ‌ ژخوە بچویكتر ئەحمەك و خویشكا خۆە و مەتا خوە فاتما مە ترومبێلەكا تەكسی گرت و ئەم بەرەف باژیڕێ‌ بەغدا ڤە چووین و هەتا ئەم گەهشتین و ل دەمژمێر دوو پشتی نیڤرو گەهشتین بەر ددەرێ‌ زیندانا ئەبو عرێب و چووین بەردەرێ‌ زیندانێ‌ ئەوان زێرەڤانێن ل بەر دەرێ‌ زیندانێ‌ گوت نمە هەما هەرن و ب زڤڕن هوین درەنگ گەهشتن و ئەڤە بەرێ‌ دوو دەمژمێرە حەفت كەس یێن هاتین سێدارەدان و ناڤێن ئەوان هەر حەفت كەسان بمە خواندن و ئێك ژ ئەوان ناڤان ناڤێ‌ بابێ‌ من بوو كو هاتی سێدارەدان. ل ڤێرێ‌ كەلەخێ‌ ئەوان ژی نیشا مە نەدان و هەتا نوكە ئەم نزانین كەلەخێن ئەڤان هەر حەفت زیندانیێن كو ل رۆژا 27/7/1977ی هاتین سێدارەدان نیشا مە نەدان و دبەرزەنە و دبێ‌ سەر و شوینن. دایكا من و مەتا من فاتما گەلەك گرین و كرنە قێڕی و هاوار و گری و دەینانە خوە بەلێ‌ یا بێ‌ مفابوو و ئەسكەر و پولیس ل دور مە زڤرین و ئەم دەرێخستن ئەم ب ئەوان سەر و دلان ڤە بۆ مالێ‌ زڤرین و مە ئەم ب رێكا موختارێ‌ تاخێ‌ سێمالكا و ئەمنا زاخۆ هاتن ئاگەهدار كرن كو ب هیچ شێوەیەكێ‌ نابت بەهی و شینی ل مالێ‌ بێت دەینان. ل ڤێرێ‌ ئەم بوونە ئێتیم ونە هێلان ئەم بەهیێ‌ ژی ب دانین. وەكی مە زانی جەنازێ‌ وان حەفت كەسان برنە دەڤەرا باژێڕێ‌ ناسریێ‌ ل وێرێ‌ یێن بن ئاخ كرن و ل مە بەرزە كرین. ل ڤێرێ‌ زیندانیێ‌ سیاسی سالح حەمید سادق ب ڕوندك و كەلەگری ڤە دبێژیت: ئەز نەچار بووم خواندنێ‌ ب هێلم و ل دویف ژیانا رۆژانە ب كەڤم هەتا وەكو بشێم دایكا خوە و خویشك و برایێن خوە ب خودان بكەم. وەكی نوكە دئێت بیرا من دایكا من دا هەرۆژ ل دانێ‌ سپێدێ‌ ل دەمێ‌ خواندنێ‌ دا قازانكەك سا باقلك و لەبلەبی چێدكرن و من ل بەر دەرێ‌ قوتابخانا پێشكەتن د فروتن و هەر وەسا مە چێلەكا ژ ڕەنگێ‌ رەش بەلەك هەبی دایكا من ژ نەچارییا خوە دا فڕەكا ماستی بۆ تێشتێ‌ دەتە مە و ماستێ‌ دی دكرە مەنجەلوكەكێ‌ دا داب ۆ دكەانێ‌ بت و دا فروشیت هەتا پچەكێ‌ شیابا دەبارا ژیارا مە هاتبا كرن. ئەوبی پاشی من دەست نانێ‌ سەمونان كر دا ل سپێدەهیان تەلیسەكێ‌ سەمونا دەمە پشتا خوە ول كولانێن تاخێ‌ سێمالكا و مەهمدیكێ‌ و شەعبانیكێ‌ گەرم و فروشم كو هەتا ئەم مەزن بووین و بوونە حەمال و من كارێ‌ پالەتی و كاسبكاریێ‌ دكر. ئەو بوو هەتا ل شەڤا 14/5/1989ی دگەل هەشتێ‌ و ئێك كەسان ژ لایێ‌ ئەمنا باژێرێ‌ زاخۆڤە هاتم گرتن و هەر ئێكسەر ئەم برن بۆ دایرا ئەمنا زاخۆ و هەر وەسا بۆ ژۆرا ئەشكەنجێ‌ برین. بۆ ماوێ‌ پینج رۆژان مامە د بن ئەشكەنجێ‌ و كارەبكرنێ‌ ڤە. ل ڤێرێ‌ میلازم عومەر ل بەر سینگێ‌ مودیر عامی راوەستا و گوت: بابێ‌ ئەڤی موخەرب و عەسات بوو ژ بەر هندێ‌ هاتبی سێدارەدان. گوتە من: بابێ‌ تە ئەوە تو ژی كورێ‌ وی.(یاول كلب أبوك معدوم) و هەر ئەز ددامە بەر كێڤلا. بۆ ماوێ‌ یازدە هەیڤان ئەم ماینە د زیندانێ‌ ڤە پاشی بۆ ل زیندانا دهوكێ‌ و رەوانەیی زیندانا ئەمنا گشتی ل بەغدا كرین ئەوبی ل دادگەها گشتی یا شۆڕشێ‌ ل بەغدا ل رۆژا 19/6/1990ی ب لێبورینەكا گشتی هاتین ئازادكرن. دەمێ‌ ئەم بەرداین ئەم ل ترومبێلێن پاس بۆ دایرا ئەمنا زاخۆ ڤەگوهاستین و ل دگەل رۆژئاڤا ئەم بۆ باژێرێ‌ دهوكێ‌ گەهشتین و ل دایرا ئەمنا دهوكێ‌ گوت نمە نها دێ‌ بۆ هەوە سەرترشا ئینن و سەر و رهێن خۆە چێكن و پاشی بۆ مالێ‌ هەرن. بەلێ‌ من سەر و رهێن خۆە چێنەكرن و ئەوبی مە پێن كەسان بۆخوە ترومبێلەكا تەكسی ل دهومێ‌ گرت و بۆب ۆ باژێرێ‌ زاخۆ هاتین و ل دەمژمێر ئێكێ‌ شەڤێ‌ ئەز هاتم بەر دەمێ‌ مالێ‌ و من زەنگا مالێ‌ لێدا و دایكا من گازی كر ئەو كیە . من گوت: دایێ‌ ئەڤە ئەزم كا دەرگەهی ڤەكە. دەمێ‌ دەنگی من چوویە گوهێن دایكا من و هەر ئێكسەر دایكا من هات و دەرگەهێ‌ حەوشێ‌ ل من ڤەكر و خوە هاڤێت من و هەر ئێكسەر دلگرتبی و كەتە سەر ئاخێ‌ و ڤێجا نەدزانی ب كەتەگری یان ژی كەیفێ‌ بكەت و هەما وەكی بەهتییا لێهات. هەر وەسا هەر دئەوێ‌ شەڤێ‌ دا جیران و مروڤ و كەس و كار و جیرانێن مە هاتن مالامە و گەلەك كەیفا وان هات كو ئەز پشتی سالەك و هەیڤەكێ‌ هاتیم زیندانكرن و بێ‌ سەر و شوینكرن و هەر د ئەوێ‌ شەڤێ‌ دا ب دیتنا خێزان و كەس و كارێن خۆە شادبیم. بەلێ‌ پا ب مخابنیڤە نوكە كورێن رەفیق و ئەمن و ئیستخبارات ئەوێن ل ئەوی دەمی دژاتییا مە دكرن و ئەڤرو بوونە خودان باوەرنامە و جهـ و مەنسب ل دام و دەزگەهان گرتن و ئەم كەفتنە دەری كولانان. بۆ ماوێ‌ شەش سالان ب كرێداری ل بن خانیێ‌ توتیایێ‌ و شڕكا بارانێ‌ ب سەرێ‌ زارۆكێن من و زاڕوكێن مندا دهاتە خوار. ب هەر حالێ‌ هەیی ب هێز و شیانێن خوە هاتمە دامەزراندن ل رێڤەبەریا پەروەردا زاخۆ وەك باخچەڤان. ئەڤرو ژی كارێ‌ مە یێ‌ ل بەر دەستێ‌ وان جورە كەسانە كو هەتا كارەكێ‌ بوومە دكەن. و نها ژی ئەم بووینە لێبوكێن ژیانێ‌ مە خزمەت و خەبات و بەرخوەدان و زیندانی دیت و مە كر و ئەوان خوار. بەلێ‌ راستە ئەم د ئازادین، بەلێ‌ خواندن و باوەرنامە چوون، بەلێ‌ بلا ئەڤێ‌ ماندیبوونێ‌ و رەزالەتێ‌ وەك باوەرنامە ل سەر خزمەتا مە بێتە هەژمارتن یان قوتابخانەیێن تایبەت بۆ مە بێن ڤەكەن دا ئەم ژی ل بەر چاڤێن وان ب باوەرناما ب خوڕین و شانازیێ‌ ب خزكەت و خەبات و ماندیبوونا خۆە ببەین. ل دوماهیا ئەڤێ‌ دیدارێ‌ دێ‌ هەر بێژم: ئاخ دایكێ‌ بۆ وێ‌ رەزالەتا تە ب مەڤە بری و ژ بەر كول و كەسەران بوویە قورمك ل قورنەتێ‌ و تە هەمی ژیانا خوە ب هەژاری و دەردەسەری ب مەڤە بوراند. ژبەر ئەڤێ‌ چەندێ‌ ژ كول و قەهر و كەسەر و دەردا ئەز گەلەك جاران ڤەدرولینم و سترانا لێ‌ لێ‌ دایكێ‌ و خوخێ‌ یارێ‌ و میرانا مەلا خەلیل ڤەدرسترم و دبێژم و دبەر ئەڤان ستراناندا روندكا دبارینم و خەمێن خوە پێ‌ شڤك دكەم و درەڤینم. و ئەوێن رەفیق و ئەمن و یوینە ئەگەر ئەمن داینە گرتن و ئەڤرو كەیفێ‌ و خوەشیێ‌ ب ئەڤێ‌ ئازادیێ‌ دكەن. ئەگەر جارەكێ‌ ئەم گوتنەكێ‌ یان ئاخفتنەكێ‌ بكەن. دێ‌ بەرسڤا مە دەن و بێژن: مادەم هەوە باوەرنامە نینە دێ‌ ل جهێ‌ خوەبی و خوە مت بكە ڤێجا ئەم ژی د حالێ‌ خوەدا گرین و ئوفینكا راهێلین و بۆ حالێ‌ خوە د گرین كا كەنگی دێ‌ بنە خودان باوەرنامە و نانێ‌ خواندنا خوە خوین. بەلێ‌ كێ‌ ها ژمە هەیە و كی دێ‌ گوهێ‌ خوە دەتە مە. ل دوماهیێ‌ سوپاس بۆ رۆژنامەیا ئەڤرو كو خوە ل ئەڤان جورە بابەتان دكەتە خودان و ئەڤ دیدارە دگەل من سازكری . ئەم ژی ب روندك و كەلە گری مە خاترێ‌ خوە خواست و ل دەڤ زڤرین.