د. سالار عوسمان، بەرپرسێ بەشێ ڕەوشەنبیری و ڕاگەهاندنا پارتی دیموكراتی كوردستان ل باژێڕێ‌ سلێمانیێ‌ سەرەدانا دو كەسایەتیێن ڕەوشەنبیری و دەزگەهێن ڕاگەهاندنا سلێمانیێ‌ كر.
د. سالار عوسمان، بەرپرسێ بەشێ ڕەوشەنبیری و ڕاگەهاندنێ‌ ل دەستپێكێ‌ سەرەدانا مالا نڤیسەر و ڤەكۆلەر (د. عەبدولوەهاب چرۆستانی) كر و ڕۆل و خزمەتێن وی د بیاڤێن زانست و ئەدەب و ڤەكۆلینان دا بلند هەلسەنگاندن.
هەر ل باژێڕێ‌ سلێمانیێ‌ بەرپرسێ بەشێ ڕەوشەنبیری و ڕاگەهاندنێ‌، سەرەدانا هونەرمەندێ پەیكەرساز و بناڤودەنگ (دارا حەمەسەعی) كر و ڕۆل و كاریگەریا وی د خزمەتكرنا هونەری ب گشتی و ب تایبەت هونەرێ پەیكەرسازی بلند هەلسەنگاند، كو داڕێژەرێ پتر ژ (15) پەیكەرانە ل وەلاتێ ئیتالیا و ل باژێڕێن (هەولێر، سلێمانی، هەلەبجە، پیرمام، بەغدا و بابل).
دیسا هەر د چارچوڤێ‌ سەرەدانا خۆ دا بۆ باژێڕێ‌ سلێمانیێ‌ د. سالار عوسمان، بەرپرسێ بەشێ ڕەوشەنبیری و ڕاگەهاندنا پارتی سەردانا دو دامەزراوەیێن ڕاگەهاندنێ‌ ل پارێزگەها سلێمانیێ‌ كر.
د. سالار عوسمان ل گەل ستافێ‌ گۆڤارا هەردەم كۆمبوو و باس ل گرنگی ڕۆلێ ڕۆژنامەڤانی و ڕاگەهاندنێ‌ د گەشەپێدانا جڤاكی دا كر، دیسا سەرەدانا نڤێسینگەها كەنالێ كوردستان 24 ل سلێمانیێ‌ كر.

ب ئامادەبوونا ماجد سەید سالح ، جێگرێ پارێزگارێ دهۆكێ و سیروان رۆژبەیانی، جێگرێ پارێزگارێ نەینەوا و سەردار شێخ یەحیا، دەڤەردارێ شێخان و بروا فاروق سەعید، دەڤەردارێ بەردەڕەشێ‌ و چەند سازیێن پەیوەندیدار دوهی 2/6/2025 ل دیوانا دەڤەرداریا شێخان كۆمبوونەكا هەڤپشك د ناڤبەرا شاندێ ئیدارا پارێزگەها دهۆكێ و ئیدارا پارێزگەها نەینەوا دا ل دۆر دەستپێكرن و چاوانیا پرۆسەیا دروین و وەرگرتنا گەنمێ جۆتیاران ل دەڤەرداریێن شێخان و بەردەڕەشێ‌ و ناوچەداریا ئەلقۆش و ناوچەداریێن جودا هاتە ئەنجامدان.
جێگرێ پارێزگرێ دهۆكێ د كۆنگرەكێ ڕۆژنامەڤانی دا دیاركر، ل رۆژا ئێكشەمبی دەرگەهێ سایلۆیا ڕوڤیا دێ هێتە ڤەكرن و هەمی سازیێن هەردو ئیدارا یێن پەیوەندیدار هاتینە راسپاردن ل دووڤ رێنمایێن سالانە ب باشترین شێوە خزمەتا پرۆسەیا وەرگرتنا گەنمێ جۆتیاران بكەن، هەروەسا ئامادەكاری دهێنە كرن بۆ ڤەكرنا دەرگەهێ سایلۆیێن دی یێن دەڤەرێ و پشتەڤانیا ئیدارا پارێزگەها دهۆكێ بۆ جۆتیاران و پرۆسەیا ناڤبری دوپاتكر.

ناڤێ نۆشدارێ كورد پروفیسۆر د. غازی زێبازی ئەوێ ئاكنجی ل ویلایەتێن ئێكگرتی ژ سالێن حەفتێیان ژ چەرخێ بۆری د ناڤ لیستا «باشترین نۆشدارێن سالا 2025 ل ئەمریكا» دایە، ئەو لیستا ژ ئەمریكا دەركەفتی، كو تێدا رۆناهیێ ددەتە سەر گرنگترین شیانێن نۆشداری ل سەرانسەری ویلایەتێن ئێكگرتی.
د. غازی زێباری د پۆستەكێ ئەكاوەنتێ خۆ یێ فێسبووكی دا دبێژیت: «یا ب زەحمەت نینە ل ویلایەتێن ئێكگرتی، تو كەسەكێ نایاب بی، ئەڤە بۆ مامۆستا و سەرپەرشت و خێزان و نەخۆش و هەڤال و نەخۆشێن من، ئەوێن باوەری دایە من، چاڤدێریا وان بكەم، ڤەدگەڕیت».
لیستا «باشترین نۆشداران» ئێك ژ بەرچاڤترین ئالاڤێن هەلسەنگاندنا نۆشداری یە ل ویلایەتێن ئێكگرتی و پشتبەستنێ‌ ل سەر هەلبژارتن و سەرەدان و دەستكەفتێن پیشەیی د نۆشداریێ دا دكەت.

د رێورسمەكێ دا ل فەرمانگەها هۆبا ئاڤدێری ل ئاكرێ ب بەرهەڤبوونا دكتۆر دلاوەر بۆزۆ میكائیل، دەڤەردارێ ئاكرێ رێورەسمێن دەست ب كاربوونا رێڤەبەرێ نوو یێ ئاڤا ئاكرێ هاتنە ئەنجامدان.
ئەندازیار محەمەد هاشم وەكو رێڤەبەرێ نوو یێ هۆبا ئاڤدێری ل ئاكرێ ل جهێ ئەندازیارێ خانەنشین رەمەزان شەریف هاتە دانان، دەڤەردارێ ئاكرێ پیرۆزباهی ل رێڤەبەرێ نوو كر و هیڤیا سەركەفتنێ بۆ خواست و پشتەڤانیا خۆ بۆ دیاركر.

زنار تۆڤی:

رێڤەبەرێ گشتییێ بازرگانی ل وەزارەتا بازرگانی و پیشەسازییا حكومەتا هەرێما كوردستانێ دیار كر، ئەوێ كارتا نیشتمانی نەبیت و خۆ تۆمار نەكەت و زانیاریێن خۆ نوو نەكەت، ئەرزاقێ وی یێ مەهانە دێ هێتە راگرتن، بۆ دەمێ مەهەكێ‌ ئەو ئەپلیكەیشنە دێ ل بەردەست بیت بۆ خۆ تۆماركرنێ.
نەوزاد شێخ كامل، زێدەتر بۆ رۆژناما ئەڤرۆ گۆت: «ئەڤرۆ 3/6/2025، ل رێڤەبەرییا گشتییا بازرگانی ب فەرمی هووركاریێن نووكرنا زانیاریێن كارتا ئەرزاقی و ئەپلیكەیشنێ (پلێتا ئاهێن خوارنێ‌) بۆ وەلاتیێن هەرێما كوردستانێ دێ راگەهینین و نوكە ئەو ئەپلیكەیشنە ل هەرسێ پارێزگەهێن هەولێر و دهۆك و سلێمانیێ هاتییە كاراكرن و پێشتر ل پارێزگەها هەلەبجە ژی هاتییە كارا كرن».
گۆتژی: «ئەوێن كارتا ئەرزاقی هەی، ئەڤ پڕۆسە ژ وان دگریت و دڤێت زانیاریێن خۆ ب تەمامی تۆمار بكەن، د قووناغا ئێكێ دا ب تنێ نووكرنا زانیارییان دێ هێتە تۆماركرن، ل قووناغا دویێ ژی زێدەكرن و كێمكرنا ئەندامێن خێزانێ و ڤەگوهاستنا كارتا ئەرزاقی دێ دەستپێكەت».
نەوزاد شێخ كامل زێدەتر گۆت: «بۆ دەمێ مەهەكێ‌ ئەو ئەپلیكەیشنە دێ‌ ل بەردەست بیت بۆ خۆ تۆماركرنێ، هەكە هەموو وەلاتی نەگەهشتن، خۆ تۆمار بكەن، بۆ دەمێ چەند رۆژان دێ هێتە درێژكرن، هەروەسا ئەوێن كارتا نیشتمانی نەچێكرین، دڤێت كارتا نیشتمانی دەربێخن، چونكی ئەوێن زانیاریێن خۆ تۆمار نەكەن، دێ ئەرزاقێ وان هێتە راگرتن».