دهۆك، لەزگین جۆقی:

رێڤەبەریا چاڤدێریا بازرگانی ل پارێزگەها دهۆكێ راگەهاند، پێنج نانپێژی ژبەر گرانكرنا بهایێ نانی هاتنە سزادان و نابیت بهایێ سەمۆن و نانی بهێتە گرانكرن و دڤێت هەر ل دووڤ بهایێ بەری نوكە نان بهێتە فرۆتن.
شوكری شەفیق، بەرپرسێ راگەهاندنا رێڤەبەریا چاڤدێریا بازرگانی ل پارێزگەها دهۆكێ بۆ ئەڤرۆ گۆت: «ئەو نانپێژیێن بهایێ ئێك نانی ژ 250 دیناران كرینە 500 دینار، هاتنە سزادان، كو پێنج نانپێژی بوون بهایێ نانی گران كری».
گۆت ژی: «ئەم داخوازێ‌ ژ خودانێن نانپێژیان و سەمۆنخانەیان دكەین د هاریكاربن ل گەل خەلكی، هەتا ئەڤ رەوشە چارەسەر دبیت و نابیت نانی گران بكەن».

زاخۆ، دلۆڤان هالۆ:

یونس محەمەد، سەرۆكێ باژێڕڤانیا زاخۆ بۆ ڕۆژناما ئەڤرۆ دیاركر كو ژ پێخەمەت خزمەتكرنا وەلاتیان، سەرۆكاتیا باژێڕڤانیا زاخۆ دەست ب بجهئینانا پڕۆژەكێ گرنگ كریە ژ بۆ ڕێگریكرن و نەهێلانا ئاریشەیا كۆمبوونا ئاڤێ و لەهیان ل هندەك دەڤەرێن جودا یێن باژێرێ زاخۆ.
ناڤهاتی گۆت: «ئەڤ پڕۆژە دكەڤیتە نێزیك بانكا زاخۆ ل پشت پانزینخانەیا قودوس، پێشتر ئەڤ دەڤەرە د وەرزێ زڤستانێ دا تووشی ئاریشەیا لەهی و كۆمبوونا ئاڤا زێدە دبوو، ڤێ چەندێ ژی كارتێكرن ل هاتنوچوونا وەلاتیان دكر».
گۆت ژی:»ئارمانج ژ ڤی پڕۆژەی چارەسەركرنا لەهیان و ڕێگریكرنە ل كۆمبوونا ئاڤا بارانێ د ناڤ كۆلان و جاددەیان دا».

سندس سالح سلێڤانەیی:

ڕێڤەبەرێ ئاهێن خوارنێ ل پارێزگەها دهۆكێ راگەهاند، ل ڕۆژێن بۆری بەهرا دویێ یا ئاهێن خوارنێ كو ژ (شەكر، برنج، نیسك، ئالینۆك، دوشاڤا تەماتێ) پێك دهات، گەهشتیە عمبارێن وان و دبێژیت: دەست ب بەلاڤكرنێ دێ‌ هێتە كرن و د دەمێ 15 ڕۆژان دا دێ گەهیتە هەموو بریكاران و داخوازێ ژ وەلاتیێن خۆشتڤی دكەین، بچن بەهرە خۆ وەربگرن.
هەجەر عەبدوللا، رێڤەبەرێ ئاهێن خوارنێ ل پارێزگەها دهۆكێ ل دۆر زەیتێ ژی گۆت: « زەیت هەتا نوكە نەگەهشتیە، لێ هەردەمێ هات، دەملدەست ئەو ژی ل سەر بریكاران دێ هێتە بەلاڤكرن، لێ داخوازێ ژ خەلكێ مە دكەم ئەو كەرەستەیێن هاتین، بچن وەربگرن».
جهێ ئاماژەپێكرنێ یە كو گیرۆبوون و نەهاتنا زەیتێ د چەند مەهێن بۆری دا، كارتێكرن ل سەر ڕەوشا خەلكی كریە و زەیتا بازرگانی ژی ب شێوەیەكێ بەرچاڤ گران بوویە.

رەمەزان زەكەریا:

سەرباری هەبوونا ژینگەكا گونجایی بۆ خودانكرنا ماسیان ل دەڤەرا ئاكرێ، كەرتێ سامانێ ئاژەلی ل دەڤەرێ رووبرووی چەندین ئاستەنگان بوویە كو بووینە ئەگەرێ كێمبوونا بەرهەمێ ناڤخۆ.
ئەندازیار عیماد ئەحمەد، بەرپرسێ پشكا سامانێ ئاژەلی ل رێڤەبەریا چاندنا ئاكرێ بۆ ئەڤرۆ گۆت: «ل دەڤەرا ئاكرێ چار پڕۆژەیێن ماسیان هەنە، بەلێ ب تنێ‌ دو پرۆژە ب تەمامی ب دووماهی هاتینە و مۆلەتا دووماهیێ وەرگرتیە و نوكە كار دكەن، ئەو دو پڕۆژەیێن دی ژ بەر قەیرانا ئابووری و چەندین ئەگەرێن دی كارێن وان نەهاتینە تەمامكرن و راوەستیاینە».
ناڤهاتی گۆت ژی: «بەرهەمێ ناڤخۆ تێرا پێدڤیێن دەڤەرێ ناكەت، لەو ماسی ژ دەرڤە دهێن، ئەگەرێن سەرەكی یێن ڤێ چەندێ ژی بەردەوامیا قەیرانا دارایی و گرانبوونا بهایێ گازێ و ئالفێ ماسیان و بلندبوونا بهایێ دۆلاری یە، لەو خودانێن پڕۆژەیان نەشێن وەكو پێدڤی كار بكەن و بەرهەمێ وان ل بازارێن دەڤەرێ كێم ببیت».

زاخۆ، دلۆڤان هالۆ:

نوونەرێ پێكهاتەیا ئەرمەنان ل ئیدارەیا سەربخوە یا زاخۆ دیار كر، بەهرا پتر یا پێكهاتەیا ئەرمەنێن هەرێما كوردستانێ ل سنۆرێ ئیدارەیا سەربخوە یا زاخۆ دژین و گۆت ژی:»ئەم وەكو پێكهاتەیا ئەرمەنان ل زاخۆ سۆپاسیا هەرێما كوردستانێ دكەین كو بێی جیاوازی بوویە جهێ ڤەحەواندنا هەموو پێكهاتەیان نەكو بۆ ئێك پێكهاتە ب تنێ».

داود هۆهان، نوونەرێ پێكهاتەیا ئەرمەنان ل ئیدارەیا سەربخوە یا زاخۆ بۆ ڕۆژناما ئەڤرۆ دیار كر، نێزیكی هزار و 450 كەس كو دبنە نێزیكی 250 خێزانان ژ پێكهاتەیا ئەرمەنێن هەرێما كوردستانێ ل سەرجەم گۆند و ناحیە و كۆمەلگەهێن سەر ب سنۆرێ ئیدارەیا سەربخوە یا زاخۆ ڤە دژین، و مە كەنیسەك ژی ل زاخۆ هەیە كو ل سالا 1923 هاتیە ئاڤاكرن.
ناڤهاتی ئاماژە ب وێ چەندێ ژی كر كو پشتی سالا 2003 هەتا نوكە ڕۆژ بۆ ڕۆژێ ڕێژا پێكهاتەیا ئەرمەنان ل هەرێما كوردستانێ زێدەبوویە، ئەڤ چەندە ژی ب سایا حوكمەتا هەرێما كوردستانێ بوویە كو هاریكار و ڕێك خوەشكەرێ پێكڤە ژیانا هەموو پێكهاتەیانە».
زێدەتر ژی گۆت:»ئەم هیڤیدارین بەردەوام ئەڤ ڤیان و پێكڤە ژیانا هەموو پێكهاتەیان ل هەرێما كوردستانێ و ب تایبەت ل ئیدارەیا سەربخوە یا زاخۆ د گەشەكرنێ دا بیت».

ئاكرێ‌، رەمەزان زەكەریا

ب فەرمانا سەرۆكوەزیران مەسرور بارزانی ئاكرێ بوویە پایتەختێ نەورۆزێ و سالانە گەشتیارێن زۆر سەردانا ئاكرێ دكەن ب نووژەنكرنا خانیێن كەڤن ئاكرێ، هاتنا گەشتیاران بۆ دەڤەرێ دێ بلند تر بیت.

هیوا شەمال، رێڤەبەرێ شوونەوارو كەلەپۆرێن ئاكرێ بۆ ئەڤرۆ گۆت: ب مەبەستا گرنگیدانا زێدەتر ب لایەنێ گەشتیاری یێ ئاكرێ ڕێڤەبەریا شوێنەوارێن ئاكرێ ب هەماهەنگی دگەل دەستەیا گشتی یا شووێنەوارێن هەرێما كوردستانێ گفتوگۆیا نووژەنكرنا 50 خانیێن گەڕەكێن كەڤنێن ئاكرێ كریە كو شێوازەكێ بیناسازی یێ سەرنجڕاكێش یێ هەی بەلێ ژبەر كەڤناتیا خانیان پێدڤی ب نووژەنكرنێ هەیە.
ناڤبری گۆتژی: تاخێن كەڤنێن ئاكرێ دیرۆكەكا درێژ یا هەی و پێدڤی ب نووژەنكرنێ هەیە، لەورا بڕیار هاتیە دان 50 خانی ل سەر شێوازێ كەڤن ب هەمان كەرەستەیێن بكارهاتی نووژەن بكەن و ببیتە جهەكێ گەشتیاری یێ شووێنەواری و خەلك سەرەدانا وان بكەن.
سەلیم هەرنی، رێڤەبەرێ گەشت و گوزارا ئاكرێ بۆ ئەڤرۆ گۆت: ڕێڤەبەریا ناڤبری ل ئاكرێ د بزاڤان دایە دەرفەتا كاری بۆ دەرچوویێن پشكێن گەشت و گوزار و هونەرێن جوان د ناڤ خانیێن كەڤنارێن ئاكرێ دا بڕەخسینیت ڕێكا شارەزاكرنا وان ب دروستكرن و نیشادانا كارێ دەستی و كەرەستەیێن جوانكاریێ ل جهێن دێرین ب ئارمانجا ڕاكێشانا سەرنجا گەشتیاران.
ناڤبری گۆتژی: بۆ ڤێ مەبەستێ ژی ب هەماهەنگی دگەل دەستەیا گەشتوگوزارا هەرێما كوردستانێ و ڕێكخراوا نەتەوەیێن یەكگرتی بۆ گەشەپێدان و ب هەڤكاریا دارایی یا ڕێكخراوا USAID خولا ڕاهێنانا پیشەیی یا كارێ دەستی د بوارێ بەرهەمێن خۆمالی و كەلتووری دا ڕێكدئێخیت.