رەمەزان زەكەریا:
فوتۆ: سەرکەڤت فۆتوگرفەر

چاڤەڕێ‌ دهێتە كرن ئەڤرۆ ل دەمژمێر 3:30 ئێڤاری تیما فوتبۆلا یانەیا ئاكرێ‌ یارییا خوە ژ گەڕا پێنجێ‌ بیتە مێڤانا یانەیا شێروانە ل باژێرێ‌ سلێمانیێ‌، ژ چارچووڤەیێ‌ كۆما ئێكێ‌ یا خولا پلا سێ یا ئیراقێ‌ دەربازبوو بەر ب خولا پلا دو ل یاریگەها ڕزگاری هێتە كرن.
نوونەرا ئێكانە یا پارێزگەهێ‌ دكۆمێ‌ دا نمرەیێن تەمام یێن خالان ب دەستڤە ئیناینە ئەوا شیایی ژ چار یاریێن بۆری سەركەڤتن دەربازبكەت ب كۆمكرنا 12 خالان سەرێ‌ لیستێ‌ بهێت، هەروەسان یانەیا ئێكانەیە د كۆمێ‌ دا 16 گۆل تۆماركرینە و هیچ گۆلكەر ل سەر نە هاتییە تۆمار كرن، ژلایێ‌ خوەڤە یانەیا شێروانە ل ڕێزا دویێ‌ دهێت ب كۆمكرنا شەش خالان ژ دو سەركەڤتن، ئێك خوسارەتی و یارییەكێ‌ دا چاڤەڕێ‌ كری بوو.
د دیدارەكێ‌ دا سەردار خانۆ سكرتێرێ‌ یانەیا ئاكرێ‌ ڕژدییا كادرێ‌ ڕاهێنانێ‌ و یاریزانان و كارگێرییا یانەیێ‌ دیاركر كو ئەو بەردەوامن ل سەر سەركەڤتنان هەتا دگەهنە ئارمانجا خوە و گۆت: هەرچەندە ل سەرێ‌ لیستێ‌ دهێن و تا ڕادەیەكێ‌ باش دەربازبوون مسۆگەر كرییە لێ‌ هێشتا پێنج یاری ماینە و نزانین كاودان و روودان دێ‌ د چەوابن، لەوما ژی بۆ هەر یارییەكێ‌ ئەم بەرهەڤین و هزر د سەركەڤتنان دا دكەین.
هەروەسان ناڤهاتی گۆت ژی: هەر یارییەك بۆ مە ب ڕێزا فینالێ‌ یە و دڤێت سەرەدەرییا یاریێن بهێز بۆ بكەین هەتا ب گەهینە ئارمانجا خوە و پێنگاڤا ئێكێ‌ ئەو ژی دەربازبوون بۆ پلا دو یا ئیراقێ‌ یە، دیسان هزر د پلانێن دووڤدا بكەین هەتا بگەهینە خولا ستێرێن ئیراقێ‌، ئەڤە ژی هیڤییەكا مەزن یا جەماوەری و كارگێرییا یانەیێ‌ یە و چو موستەحیل نینە هەكە پشتەڤانی بەردەوامبیت و كارەكێ‌ ڕێكخستی و گیانێ‌ كۆم هەبیت.
ژ یاریێن دی یێن ڤێ‌ كۆمێ‌، حەلەبچەیا شەهید- حەبانیە، ئارارات- زەعفەرانیە، ئەلمەیمۆنە- ئەلدێر، ئەلسیاحە- ئەلدیوانیە، حللە- ئەلهندییە، ئەلەحرار- ئەلسەلمان، سۆلاڤ- شەهرەبان.
بۆ زانین 18 یانە پشكدارن د خولا پلا سێ‌ یا ئیراقێ‌ دا و هاتینە بەلاڤكرن ل سەر دو كۆمان ل دووڤ دەڤەرێن جودا یاریێن وان ب شێوەیێ‌ خول ئێك قووناغ دهێنە كرن سەركەڤتیێ‌ ئێكێ‌ و دویێ‌ دێ‌ ئێكسەر دەربازبیتە خولا پلا دو یا ئیراقێ‌، هەردو یانەیێن ڕێزێن دویێ‌ یێن هەر كۆمەكێ‌ دێ‌ یارییەكا ڤەبر بۆ پلێتا سێیێ‌ یا دەربازبوونێ‌ كەن.

ب شێوەیەكێ‌ فەرمی فدراسیۆنا باسكێت بۆلا ئیراقێ‌ بڕیاردا ب ئەنجامدانا هەڤڕكیێن وەرزێ‌ نوو یا خولا پلا نایابا ئەوا دهێتە چاڤەڕێ‌ كرن ب پشكدارییا 12 یانەیان ل دەمەكێ‌ نیزیك دا ژڤانێ‌ وێ‌ بهێتە ڕاگەهاندن.
د. عەلی محەمەد ئەندامێ‌ فدراسیۆنا باسكێت بۆلا ئیراقێ‌ دیار كر د دووماهی كۆمبوونا فدراسیۆنێ‌ دگەل 12 یانەیێن ل سەرجەمێ‌ 14 بەرهەڤبووین، گەنگەشە ل سەر چاوانییا بڕێڤەبرنا وەرزێ‌ نوو یا خولا نایاب و چەند چالاكیێن دی ل سەر ئاستێ‌ لاوان و كچان هاتە بەحسكرن، دیسان بۆچوونێن یانەیێن پشكدار د كۆمبوونێ‌ دا هاتنە وەرگرتن، پێخەمەت ڕێكخستنەكا سەركەڤتی یا هەر قارەمانییەكێ‌ بۆ وەرزێ‌ ئەڤ سالە.
ژلایەكێ‌ دووڤە ناڤهاتی گۆت: ل دووڤ داخوازیێن پرانییا یانەیان و ژ بەر كاودانێن نووكە یێن دەڤەرا رۆژهەلات و ئیراق تێدا دەرباز دكەت بڕیار هاتە دان بۆ وەرزێ‌ ئەڤ سالە هیچ یاریزانەكێ‌ پیشەكار نە هێتە دناڤ خولێ‌ دا و گرێبەست دگەل نا هێتە كرن بتنێ‌ دێ‌ پشت بەستنێ‌ ل سەر یاریزانێ‌ نافخۆ هێتە كرن.
ل گۆرەیی پێزانین مە بڕیارا نە پشكدارییا پیشەكاران دناڤ خولێ‌ دا دێ‌ پتر خزمەتا یانەیا زاخۆ كەت ژبەركو پرانییا یاریزانێن نافخوە هەنە و ب ئاست بلند و شیانن.

د دیدارەكێ‌ دا كەسكین مەسعۆد سەرۆكا یانەیا ئافرەتێن دهۆكێ‌ بۆ رۆژنامەیا ئەڤرۆ دیاركر ئەوان تیما خوە یا فوتسالێ‌ بۆ وەرزێ‌ نوو یا خولا كوردستانێ‌ بەرهەڤكربوو و گرێبەست دگەل هەموو یاریزانان هاتبوو ئیمزاكرن، لێ‌ ژ نشكەكێ‌ ڤە فدراسیۆنا فوتبۆلا كوردستانێ‌ ژبەر كاودانێن نوكە یێن دەڤەرێ‌ و شەڕێ‌ دناڤبەرا ئەمریكا، ئیسرائیل و ئیرانێ‌ نە چاربوو ژڤانێ‌ خولێ‌ بۆ دەمەكێ‌ دی بهێتە پاشئێخستن، ئەوا بریاربوو ل 25ێ‌ ڤێ‌ ئادارا بووری ب پشكدارییا 10 یانەیێن هەرێمێ‌ هاتبا كرن.
زێدەتر ناڤهاتی گۆت: تیما ئافرەتێن دهۆكێ‌ قارەمانا وەرزێ‌ بۆری و یا هەلگرا سێ‌ ناسناڤێن خولا كوردستانێ‌ یە بۆ وەرزێ‌ ئەڤ سالە ژی ب جوانترین شێوە دەست ب دانانا پلانان كربوو ژبۆ هەڤڕكیێ بۆ وەرزێ‌ نوو و پاراستنا ناسناڤێ‌ خوە، لەوما ژی هەرزوو كارگێرییا یانەیێ‌ دەست ب دانۆستاندنان دگەل یاریزانێن خوە یێن وەرزێ‌ بۆری كرن، دیسان چەند یاریزانێن نوو ژبۆ باشترین بەرهەڤی بۆ خولێ‌، لێ‌ كاودانێن نوكە وەكر ب نەچاری فدراسیۆنا فوتبۆلا كوردستانێ‌ بڕیارا پاشئێخستنا ژڤانێ‌ خولێ‌ بۆ دەمەكێ‌ نە دیار بدەت.
هەروەسان سەرۆكا یانەیا ئافرەتێن دهۆكێ‌ گۆت: وەكو پێگەهەكێ‌ ئێكانە و تایبەت یا وەرزشا كچان مە هەموو بزاڤكرن نە بتنێ‌ یارییا فوتسالێ‌ بەلكو هەكەر چو یاریێن دی مە كچێن وەرزشڤان هەبن پشكداریێ‌ بكەین، لێ‌ مە گەلەك ئاریشە هەنە كو كارتیكرن ل سەر وەرزشا كچان دكەن ژ وانا نەبوونا هۆل و جهێن تایبەت ب یانەیێ‌ ڤە، دیسان نەبوونا داهاتەكێ‌ بەردەوام و هەروەسان هیچ لایەنەكێ‌ كۆمپانییەكێ‌ سپۆنسەریا مە ناكەت سەرباری مە بەری دو مەهان چەندین بزاڤ دكرن لێ‌ بێ‌ مفا بوو، یا گرنگ د نوكە دا پارێزگارێ‌ دهۆكێ‌ بەردەوام پشتەڤانیا مە دكەت، هەروەسان ڕێكخستنا پارتا مە و لەقا ئێك گرنگیێ و پشتەڤاتیێ‌ ل مەدكەن.
ل دووماهیێ‌ كەسكین مەسعۆد گۆت: ئێك ژ پێشكەڤتنا وەرزشا باژێر و وەلاتان ژلایێ‌ وەرزشڤانێن كچ ڤە دهێتە دیتن ئەوێن خودان شیان و شارەزا كو شیاینە بۆ وەلات و باژێرێ‌ خوە دەستكەڤتان بینن، بەری دو مەهان ئەم شیانین ناسناڤەكێ‌ ئیراقێ‌ بینن، هیڤییا مە ئەوە پارێزگارێ‌ دهۆكێ‌ ل سەر پشتەڤانیێ بۆ یانەیا مە بەردەوامبیت و گەشبینین مە كچێن باژێری یێن وەرزشڤان خودان شیان هەنە.
بۆ زانین تیما یانەیا ئافرەتێن دهۆك قارەمانا وەرزێ‌ بۆری یە و وەرزێ‌ پێشتر ژی ئانكو ل 2023-2024 و 2024-2025ێ‌ ل دووڤ ئێك دەستڤەئینایە دگەل ناسناڤێ‌ 2019-2020ێ‌ كو دبیتە سێیەم ناسناڤێ‌ خولا فوتسالا كوردستانێ‌ ب دەستڤە ئینایە.

شاهۆ فەرید:

حەز ژێكەرێن فوتبۆلا ئۆرۆپا ئەڤرۆ ل دەمژمێر دەهی شەڤێ‌ دێ‌ چاڤەرێ دو یاریێن ب هێز و ئاگرین بن ژ چارچووڤەیی قووناغا هەشتی ژ خولا چامپیونز لیگا قارەمانێن خولێن ئۆرۆپا ژ یاریێن چوونێ كو دهێتە هژمارتن قووناغا شەڕی و ڤەبر بۆ جەمسەرێن هەڤڕكێن ناسناڤی، هەردو یاریێن ئەڤ شەڤە دێ‌ بڤی ڕەنگی بن.
ریال مەدرید – بایرن میونخ
یانەیا ریال مەدرید یا ئسپانی دێ‌ د تاقیكرنەكا ب زەحمەت و هەستیار دایە بەرامبەر مێڤانا خوە یانەیا بایرن میونخ یا ئەلمانی ل سانتایگۆ بێرنابیۆ، هەرچەندە د دیدارێن پێشتر یێن فەرمی دا ب تنێ‌ 28 یارییان بەرانبەری ئێك بووینە، ڕیالێ‌ 13 سەركەڤتن بەرانبەر 11 سەركەڤتن بۆ بایرنێ‌ و چار وەكهەڤی هاتینە، لێ‌ یارییا ئەڤ شەڤە دێ‌ پێشبینییا وێ‌ گەلەك یا بزەحمەت بیت.
ریالێ‌ ئاریشە هەنە
لدووڤ ژێدەرێن جودا یێن رۆژنامەڤانی كو شەش یاریزانێن ڕیال مەدرید ئەگەر هات و كارتێن زەر وەربگرن دێ یاریا هاتنێ بی بەهربن ئەو ژی هەرئێك ژ ڤێنیسوس، ئێمپاپێ، چاومینی، بێلنگهام ل گەل هویسین و كاریراسی لەوما ژی ئەربێلوا راهێنەرێ تیمێ كەڤتیە لبن گڤاشتنان كو بشێت یاریا دناڤا سانتیاگۆ ئیكلابكەت، بەلێ دزانیت هەڤركاوی یاب سناهی نابیت بەلێ داخویانیەكا رۆژنامەڤانی دا دیاركر مەترسی لسەر تیما وی نینن ئەو هەمی هێز دێ یاریێ كەن و بشێن ئەنجامەكێ جێوازیەكا باش بخوە ببەن ئەگەر یاریا هاتنێ ژی بی بەرهەڤبوونا چەند یاریزانان و دا دیاركرن ئەوی دڤێت بۆ یانەیا خوە ناسناڤەكی دەستڤەبینیت چونكۆ ئەو شیایە تیمێ ئاستەكێ باش بهینتە پێشتی ئەركێ تیمی چوونا چاڤی ئەلونسوی وەرگرتی و چ ئاستەنگا بەرامبەری خوە نابینیت و هەمان شێوەی یارێن بۆری یاریا خوە ئەنجامدەتن.
بایرن د گۆپیتكا هێزا خوە دایە
ژلایەكێ دوویڤە یانەیا باڤاری ب سەر پەرشتیا راهێنەرێ خوە یێ بەلجیكی كۆمپانی بۆ چەندین یاریە تام نەكریە خوسارەتیان و د گۆپیتكا هێزا خوە دایە، د خولا ئەلمانیا سەرێ‌ لیستێ‌ دهێت ب جووداهییا نەهـ خالان، د چامپیۆنزێ‌ دا باشترین ئاست و ئەنجامان بدەستڤە دئینیت، هەمی هیڤێن خوە داناینە كۆ بشێت د هەردو یاریێن بەرامبەری ریال مەدرید دا ب ئاست و ئەنجامەكی باش سەركەفتنێ ب دەستڤەبینیت و بەر خەونا خوە یا دەستڤەئینانا ناسناڤێ‌ حەفتێ‌ بكەتە ڕاست.
كۆمپانی باوەری هەیە
ڕاهێنەرێ‌ بایرن میۆنخێ‌ كۆمپانی باوەری ب تیما خوە هەیە ئەگەر ئەنجام چەوابیت ئەوان شیانێن گوهۆڕینێ بۆ بەرژەوەندیا خوە دا هەیە كلاسیكویا ئۆرۆپا بخوە دەلڤەبینیت كۆ هێزا خوە یا ڤەشارتی دیاربكەت، یانەیا ئەلمانی دۆپاتكرییە كو ستێرا وێ‌ هاری كین دێ‌ بەرهەڤبن، سەرباری دەنگۆباسێن هنگاڤتنا وی.
سپۆرتینگ- ئەرسنال
ژلایەكێ‌ دووڤە هەر د چارچووڤەیێ‌ یاریێن چارێك دووماهیێ بڕیارە ئەڤ شەڤە یانەیا سپۆرتینگ لەشبونا یا پۆرتۆگالی دناڤ ئەرد و جەماوەرێ‌ خوە دا یانەیا ئارسنال یا ئنگلتەرایێ‌ مێڤان بكە تكو دهێتە هژمارتن ئێك ژ یاریێن دی یێن بهێز و ئاگرین، هەرچەندە یانەیا سپۆرتین وەكو هەسپا چامپیۆنزێ‌ خوە دیاركرییە و بوویە هژمارەكا بزەحمەت و شێوازێ‌ یارییا خوە یا گرتی ئەنجامددەت كو دەلڤەیەكا كێم ددەتە هەڤركا خوە ب ڕیمۆنتادا گەهشتیە ڤێ‌ قووناغێ‌، دیدارێن پێشتر د بەرژوەندیا یانەیا ئنگلتەرایێ‌ دایە ئەوا سەركەڤتنەك و دو وەكهەڤی هەنە.
ئارسنال خوە پێشەنگ دبینیت
ژلایێ‌ خوەڤە تۆپهاڤێژا لەندەنی ب مورالەكا بلند دێ‌ هێتە دناڤ یاریگەهێ‌ دا سەرباری دووری پشتەڤان و یاریگەها خوەیە، لێ‌ ژبەركو سەركێشا خولا ئینگلیزی و ئێك ژ بەربژێرێن ب هێزە بۆ ناسناڤی چامپیونزێ بێ دودلی دێ بۆ سەركەفتنێ شەڕی كەت و چ مەترسیا بەر سینگێ خوە نابیت، رۆژنامەیێن ئۆرۆپایێ وەسا دەنە دیاركرن كۆ یانەیا ئەرسنال باشرین دەمێن خوە دایە ژلایێ ئاست و ئەنجامان ڤە ل گەل راهێنەری خوە ئارتێتایی و چ مەترسی ل سەر نابیت و دێ شێوەكێ ب هێز هێتە د مەیدانێ‌ دا بەرگری و هێرشێن دژوار كەت بشێت سەركەفتنەكا ب ئەنجامێ جێوازی كو ژ یاریا چوونێ خوە ئێكلابكەت بۆ قووناغا پێش دووماهیێ، بەلێ ئەركێ خوە زەحمەت تا رادەكێ بینن بەرامبەری لەشبونا ئەوا دهێتە هژمارتن هەسپێ‌ قارەمانیێ‌.