د ناڤ كەشوهەوایەكێ سارێ زڤستانێ دا ب سەرپەرشتیا فەریق سیهاد بارزانی، فەرماندێ فەرماندەییا هێزێن پشتەڤنیا ئێك و ب ئامادەبوونا فەریق روكن عیسا عوزێر، سەرۆكێ ئەركانێ وەزارەتا پێشمەرگەی و كۆلونێل  فیتزجیرالد، بەرپرسێ هەڤپەیمانان ل هەرێما كوردستانێ  ب وەكالەت و كۆلونێل دیك، بەرپرسێ نڤیسینگەها هەماهەنگیا ئێمناهیێ ل قونسلخانەیا ئەمریكا ل كوردستانێ و كۆلونێل سێباستییەن، فەرماندێ هێزێن سەربازی یا ئەلمانی ل هەرێما كوردستانێ، فەرماندەییا هێزێن پشتەڤانیا ئێك رەمیا سالانەیا فەرماندەییا خوە ب بكارئینانا چەكێن گران ئەنجام دا.

هەولێر، قائید میرۆ:

بریكارا وەزارەتا كار و كاروبارێن جڤاكی ل حكومەتا هەرێما كوردستانێ‌ ئاشكرا كر، سالانە هەژمارەكا دەلیڤەیێن كاری بۆ وەلاتیان دهێنە پەیداكرن و دبێژیت: وەلاتی ژی ب رێیا ئونلاین دەلیڤەیێن كاری پەیدا دكەن و چەندین وەلاتی سالانە دبنە خودان كار.
زەكیا سەید سالح، بریكارا وەزارەتا كار و كاروبارێن جڤاكی بۆ رۆژناما ئەڤرۆ دیاركر، شێوازێ پەیداكرنا كاری ل جیهانێ هاتیە گوهۆڕین و هەرێما كوردستانێ ژی یا بێ بەهر نینە ژ پەیداكرنا دەلیڤەیێن كاری ب رێیا ئونلاین و ئەلكترۆنی و گۆت: «سالانە هەژمارەكا زۆرا وەلاتیان ب رێیا ئونلاین دەلیڤەیا كاری بۆ خۆ پەیدا دكەن».
زەكیا سەید سالح زێدەتر گۆت: «وەزارەتا كار و كاروبارێن جڤاكی ژی سالانە هەژمارەكا دەلیڤەیێن كاری ب رێیا كۆمپانیا ژ بۆ وەلاتیان پەیدا دكەت، وەزارەتا مە پەیوەندی ل گەل كۆمپانیان هەنە و كەسێن بێكار ناڤێن خوە تۆمار دكەن، دیسا ب رێیا سەنتەرێن راهێنانێن پیشەیی ژی خۆلێن راهێنانێ بۆ وەلاتیان دهێنە ڤەكرن، هەتا فێری پیشەیەكی ببن و د دووڤ دا ل بازاڕێ كاری بشێن كاری ب دەستخۆڤە بینن».

زاخۆ، دلۆڤان هالۆ:

كۆڤان ئاڤدەل، ڕێڤەبەرێ چاڤدێریا بازرگانی ل ئیدارەیا سەربخوە یا زاخۆ بۆ ڕۆژناما ئەڤرۆ دیاركر كو وان بڕیار دا ل ئیدارەیا سەربخوە یا زاخۆ فرۆتنا كەلوپەلێن جوانكاریێ ل جوانكاریان بهێتە قەدەغەكرن.
ڕێڤەبەرێ چاڤدێریا بازرگانی ل زاخۆ ئاماژە ب وێ چەندێ ژی كر كو ل سەر وی بنەمایی مۆلەت بۆ وان جوانكاریان هاتیەدان، كو كارێ جوانكاریێ بكەن، نەكو كەلوپەلێن جوانكاریێ بفرۆشن و گۆت: «هەر جوانكاریەكا كەلوپەلێن جوانكاریێ بفڕۆشیت دێ هێتە سزادان».
گۆتژی: «ئەگەر جوانكاریەكێ بڤێت كەلوپەلێن جوانكاریێ بفرۆشیت، دڤێت مۆلەتەكا دی یا فەرمی یا فرۆتنا كەلوپەلێن جوانكاریێ بۆ جهێ خوە وەربگریت».

ڕۆژا ئێکشەبی 11ـی 1ـی 2026 د. سالار عوسمان، بەرپرسێ پشکا ڕەوشنبیری و ڕاگەیاندنێ یا پ.د.ک ب هەڤالینیا هەڤالێن پشکێ سەرەدانا سەندیکایا ڕۆژنامەنڤیسێن کوردستانێ کر و ژلایێ نەقیب و ئەنجوومەنێ سەندیکایێ ڤە پێشوازی ڵێهاتە کرن.
د ڤێ سەرەدانێ دا بەحسێ دۆخێ میدیا و ڕۆژنامەنڤیسان و گرفت و ئاستەنگێن د ڕێکا سەندیکایێ دا کر، و د. سالار عوسمان ڕۆل و هەلوەستێ ڕۆژنامەنڤیسێن کوردستانێ بلند هەلسەنگاند بەرانبەری کێشەیێن نیشتمانی و کولتووریی و جڤاکی و پشتەڤانیا بشکا ڕەوشنبیری و ڕاگەهاندنا پارتی دیموکراتی کوردستانێ بۆ ڕۆژنامەنڤیسان و سەندیکایا ڕۆژنامەنڤیسێن کوردستان دوپات کر..

دهۆك، لەزگین جۆقی:

ئەندامەكێ جڤاتا پارێزگەها نەینەوا راگەهاند، دەمێ سوودانی سەرەدانا شنگالێ كری، ل وی دەمی گۆتبوو: دێ خزمەتگوزارییان ل شنگالێ ئەنجام دەین، مخابن هەتا نوكە چو خزمەتگوزاری نەهاتینە ئەنجامدان.
جەمال خدر شەشۆ، ئەندامێ جڤاتا پارێزگەها نەینەوا بۆ رۆژناما ئەڤرۆ گۆت: «سوودانی گوتبوو: دێ نەخۆشخانەیێ‌ ل ناحیا سنوونێ و قەزا شنگالێ ئاڤا كەین، هەروەسا دێ زانكۆیەكێ ل شنگالێ ئاڤا كەین و ئیدارا شەرعی شنگالێ دێ زڤڕیتە شنگالێ، لێ‌ مخابن هەتا نوكە چو تشتەك ژ ڤان بۆ شنگالێ نەهاتیە كرن، ئەڤە ژی وێ دگەهینیت، كو حكومەتا ئیراقێ ل سەر بڕیارێن خۆ یا رژد نینە بۆ خزمەتكرنا خەلكێ شنگالێ».

دهۆك، دلۆڤان ئاكرەیی:

جێگرێ رێڤەبەرێ گشتی یێ كارەبا پارێزگەها دهۆكێ دیاركر، ل سنۆرێ پارێزگەها دهۆكێ زێدەتر ژ 530 پشكدارێن كارەبێ سیستەمێ سۆلار بۆ خۆ دامەزراندینە، كو ئەو سیستەمێن هاتینە دانان، نێزیكی 6.8 مێگاواتێن كارەبێ بەرهەم دئینن و ب گشتی ل پارێزگەهێ نێزیكی حەفت مێگاواتێن كارەبێ ژ تێهنا رۆژێ بەرهەم دهێن.
حازم مەحەمەد، جێگرێ رێڤەبەرێ گشتی یێ كارەبا دهۆكێ بۆ رۆژنامەیا ئەڤرۆ گۆت: «ئەگەر ئەڤ حەفت مێگاواتێن كارەبێ‌ ب رێیا دیزل یان گازێ هاتبا بەرهەمئینان، سالانە دبوو ئەگەرێ دەركەڤتنا نێزیكی پێنج هزار تەنێن گازا دووەم ئۆكسیدێ كاربۆنێ، لەورا ئەڤ سیستەمە فاكتەرەكێ گرنگە بۆ پاراستنا ژینگەهێ».