قەیس وەیس:

پشتی ڤەبوونا دەرگەهێ ڤەگوهاستنێن زڤستانێ‌ هژمارەیەكا یانەیێن خولا ستێرێن ئیراقێ‌ یا فوتبۆلێ‌ لیڤێن زێدە كرینە ژبۆ ب هێزكرنا ڕێزێن تیما خوە و دوورئێخستنا ئەوان یاریزانێن نە پێدڤی تایبەت ب ئینانا یاریزانێن پیشەكار بۆ یاریێن مایی ژ خولێ‌.

فدراسیۆنا فوتبۆلا ئیراقێ‌ ئۆفەرەك دایە یانەیان
پشتی بڕیار هاتیە دان یاریێن خولێ‌ هەر چار رۆژان گەڕەك بهێتە كرن و بێ‌ فدراسیۆنا فوتبۆلا ئیراقێ‌ ئۆفەرەك دایە هەر یانەیەكێ‌ كو دشێن هەتا پێنچ یاریزانان ل سەر پێكهاتیێ‌ تیما خوە زێدەكەت ژ 25 یاریزانان بكەنە 30 یاریزان ژ وانا دو یێن پیشەكار بن و مافێ‌ هەی گۆلپارێز ژی پیشەكار بیت، هەروەسان دەرگەهێ‌ ڤەگوهاستنێ‌ ڤەكرییە كو ئەو یاریزانێ‌ یانەیەكێ‌ نەڤێت یان بینت دشێت ڕێكارێن خوە بجهبینت ئەڤچەندە ژی هات وەكو بارسڤكییەك ل سەر تیمێ‌ و خوە دووركرن ژ هنگاڤتنێن زێدە، پرۆسێسا ڤەگۆهاستنێن زڤستانێ‌ ژ پێنجێ‌ ڤێ‌ مەهێ‌ دەستپێكرییە و بڕیارە ل پێنجێ‌ شۆباتا بهێت ب دووماهی بهێت.

دهۆكێ‌ ڕێزێن خوە ب هێزتر لێكر
ژبۆ ب هێزكرنا ڕێزێن تیما خوە و چارسەركرنا كێماسیێن دناڤ پێكهاتیێ‌ خوە دا كارگێرییا یانەیا دهۆك ب فەرمی گرێبەست دگەل عەلا عەباس یاریزانێ‌ پێشتر یێ‌ یانەیا یانەیا نەجەف ئیمزاكر، دیسان دگەل هێرشبەرێ‌ توونسی و پێشتر یانەیا ریفاع یا بەحرێنی یوسف بن سۆدە ئیمزاكر، هەروەسان گرێبەست دگەل یاریزانێ‌ هێلا بەرەڤانیێ‌ یێ‌ یانەیا جەوییە حەمود مشعان ئیمزاكر، ژلایەكێ‌ دووڤە ژێدەرێن رۆژنامەڤانی دیاركرییە كو دبیت گرێبەستێ‌ دگەل یاریزانێ‌ زەورا رەسۆل فازل ئیمزابكەن.

زاخۆ ژی یا تیما خوە ب ڕێكدئێخیت
ژلایێ‌ خوەڤە كارگێرییا یانەیا زاخۆ بەردەوامە ل سەر دانۆستاندن دگەل یاریزانێن نوو ژبۆ ئیمزاكرنا گرێبەستێ‌، هەرچەندە پشتی هاتییە راگەهاندن پیشەكارێ‌ وان یێ‌ یەمەنی ناسر محەمەدو نەمایە دگەل تیمێ‌ لێ‌ بزاڤێن زاخۆییان بۆ یاریزانێن نوو بەردەوامن و دبیت هەتا شەش یاریزانان بینن، هەتا نوكە ب شێوەیەكێ‌ فەرمی یانەیا زاخۆ گرێبەست دگەل پیشەكارێ‌ ئەلبانی ئەندرێ‌ چەكیچی ژ یانەیا شەباب بلۆزداد یا تونسی ئیمزاكرییە و دیسان پیشكارێ‌ بەرازیلی ماتیۆس لۆكاس ئینایە دناڤ ڕێزێن تیما خوە دا، ل دووڤ ژێدەرێن نێزیك ژ یانەیێ‌ هەتا چار یاریزانێن دی گرێبەست دگەل وان هێتە ئیمزاكر و دبیت دڤێ‌ حەفتیێ‌ دا یاریزانەكێ‌ دی بگەهیتە دناڤ ڕێزێن تیمێ‌ دا.

هەولێر چاڤ ل ناسناڤی یە
كارگێرییا یانەیا هەولێر ئەوا تیما وان هەتا نوكە سەرێ‌ لیستا خولێ‌ دهێت چاڤێ‌ وان ل دەستڤەئینانا ناسناڤی یە لەوما ژی بۆ بهێزكرنا رێزێن تیمێ‌ و چارەسەكرنا كێماسیان، ئێكەم یاریزان گرێبەست دگەل ئیمزاكری یێ‌ كازاخستانی مارلن چۆبانۆڤ ژ یانەیا ئیستیقلۆل دوشانبێ‌ یا ئیرانی، دبیت درۆژێن بهێت دا دو یاریزانێن دی ژی ل سەر تیما خوە زێدەكەت.

نەورۆزێ‌ 10 یاریزان د حەفتیەكێ‌ دا ئینان
ژلایێ‌ خوەڤە یانەیا نەورۆز د ئێك حەفتی دا گرێبەست دگەل دەهـ یاریزانان ئیمزاكر، پشتی دوورئێخستنا چار یاریزانان، نەورۆزێ‌ گرێبەست دگەل هەر ئێك یێ‌ بەرازیلی جێفرسۆن باهیا و ئەحمەد عیسا و چۆسێ‌ ڤیتۆر ترێنداد، ئەمیر نەدیم، عەباس بەدیع، عەلی خەلیل، حوسام مالك، گۆلپارێز عەبدولكەریم جاسم جەدعان، باكۆ عومەر و عەلی ریاز ئیمزاكرن.

یانەیێن ئیراقی ژی گرێبەست ئیمزاكرینە
هەر ژ دەستپێكا ڤەكرنا ڤەگوهاستنێن زڤستانێ‌ یانەیێن ئیراقی ژی دەست ب لڤینێن خوە كرییە، هەرچەندە پرانییا یانەیان پێشتر ڤەكرنا دەرگەهێ‌ ڤەگوهاستنێ‌ دانۆستاندن و رازیبوونێن خوە وەرگرتبوو لێ‌ دگەل ڤەبوونا دەرگەهی یانەیا شورتە گرێبەستا پیشەكارێ‌ خوە یێ‌ جەزائیری تارق ئاغۆن ڕاگەهاند ئەوێ‌ ژ خولا رۆمانی هاتی، ژلایێ‌ خوەڤە یانەیا زەورا و هێرشبەرێ‌ هەلبژارتیێ‌ ئیراقێ‌ و ئەلگەرمە ئەیمەن حسێن نێزیكی ئێكن و دبیت گرێبەستا وان ژی ئیمزابكەت، ژلایەكێ‌ دووڤە یانەیا ئەلغراف گرێبەستا هێرشبەرێ‌ كۆتیڤواری موستەفا كۆناتی ئیمزاكر، یانەیا ئەلقاسم گرێبەست دگەل هەردو یاریزانێن یەمەنی یۆف ئەلحیمی و ئەحمەد زەبعان ئیمزاكرن دبەرانبەر دا هەشت یاریزانێن وان دەست بەردانا خوە ژ یانەیێ‌ ڕاگەهاندن.

یاریزانێ‌ كوردستانی و ڕەڤەندا كورد ل ئەلمانیا عەگید كابایێل ب ئالایێ‌ كوردستانێ‌ و دناڤا سەدەهان جەماوەرێ بەرهەڤبووی شیا ببیتە قارەمانێ‌ جیهانی بۆ یارییا بۆكسانێ‌ یا كێشا گران WBC پشتی د یارییا فینالێ‌ دا ب سەركەڤتی ل سەر هەڤڕكێ‌ خوە یێ‌ پۆلەندی دامیان كنایبا د یارییەكا ب هێز دا ئەوا ل وەلاتێ‌ ئەلمانیا هاتییە كرن.
عەگید كابایێل ڕەڤەندا كورد ل وەلاتێ‌ ئەلمانیا و خەلكێ‌ كوردستانا باكۆرە شیا د قارەمانییا جیهانی دا بێ‌ خوسارەتی سەرجەمێ‌ 27 یارییان سەركەڤتنان بینت ئێكەم ناسناڤێ‌ خوە یێ‌ سالا 2026ێ‌ بینت.
د دیدارەكا رۆژنامەڤانی دا ناڤهاتی كەیفخوەشیا خوە دیار كر و گۆت: پشتی وەستیانەكا درێژ ئەز گەهشتمە ئارمانجا خوە و ناسناڤێ‌ ئێكێ‌ یێ‌ سالا نوو، دێ‌ بەردەوامبن ل سەر هەڤڕكییان و دەستڤە ئینانا ناسناڤان، ب مورالا كوردایەتی گەهشتمە ناسناڤی، من دزانی هەموو كوردستانی پشتەڤانێن منن و سۆپاس بۆ گەنجێ‌ سەركردە ئارین بارزانی كو بەرهەڤبووی و پشتەڤانییا من كر، بژیت كوردستان، بژیت رۆژئاڤا بۆ یاریێن بهێت ئامادەمە.
ژلایەكێ‌ دووڤە عەگیدی گۆت: بەری دەستپێكرنا یارییا مە ب رۆژەكێ‌ دامیان نیبایی گۆت من هێزا پۆلەندا دگەل خوە ئینایە و دناڤا یاریێ‌ دا دێ‌ بینی، من ژی گۆتێ‌ دیارە تۆن زانی هێزا كوردستانییا چییە، ب پشتەڤانییا خەلكێ‌ گوردستانێ‌ دێ‌ هێزا كوردان نیشان دەم.
بۆ زانین ل وەرزێ‌ بۆری 2025ێ‌ عەگید كاییل شیابوو دەستكەڤتەكێ‌ دی یێ‌ جیهانی وەكو هەولاتیەكێ‌ ئەلمانی بنیت كو ئەوی وەلاتی ئەڤە نیزیكی 100 سالە نە ئینایە، ئەوژی پشتی ب سەركەڤتی ل سەر یێ‌ چینی چانگ چیلی ئینایی ل وەلاتێ‌ سعۆدیێ‌ ئینایی دووڤدا سەركەڤتن د یارییا فینالێ‌ دا ل سەر یێ‌ كرواتی ئۆلكساندەر ئۆزیك ئینایی و بوویە قارەمانێ‌ جیهانی.

رمەزان زەكەریا

د داخویانیەكێ دا پەیڤدارێ یانەیا ئاكرێ یا وەرزشی دیار كر چو راستیەك بۆ وی بابەتی نینە كو یانەیا ئاكرێ ڕێككەفتن دگەل یانەیا گارە هەبیت بۆ خوە ڤەكێشانێ‌ ژ یارییا خوە بەرانبەر پیرس، ئەوا د چارچووڤەیێ‌ خولا پلا سێ یا كۆما پارێزگەها دهۆكێ‌ دەربازبوون بۆ پلا دو یا ئیراقێ‌.
هەروەسان سوهەیب عەلی بۆ رۆژنامەیا ئەڤرۆ گۆت: مە وەكو هەر یانەیەكێ‌ بەرهەڤیێن خوە بۆ خولێ‌ كرینە و هیچ هزر ژی د چو پیلان دا نا هاتییە كرن، یا جوان نینن ئەڤ پێ،گاڤە بهێنە هاڤێژتن و ئەم دوورین ژ هەر پێنگاڤەكا بڤی شێوەیی، ل دووڤ ڕێنمایان مە یاریێن خوە ئەنجامداینە، ژلایەكێ‌ دووڤە هەردو یانەیێن گارە و پیرس ل ئێك باژێرن ئەگەر پەیوەندییا یانەیا ئاكرێ دگەل یانەیا گارە یا باش بیت دگەل یانەیا پیرس ژی پەیوەندیێن زۆر باش هەنە دوبارەكەین چ ڕێككەفتن نەبووینە.
هەروەسان ناڤهاتی ئەوچەندە ژی گۆت: ئەگەر یانەیا پیرس گومان هەبن دڤێت ب بەڵگەیا ئاشكرا بكەت وی دەمی هەموو تشت دێ پشت راست بن، لێ‌ ب هەبوونا توومەتان ئەو باش نینە و مە یارییا خوە یا كری و هیچ ڕەنگەكی ل سەر بابەتێ‌ توومەتانێ‌ دگەل یانەیا گارە نە هاتیە ڤەكرن.
ل دووماهیێ‌ سوبەهی بۆ قووناغا بهێت یا هەڤڕكییان گۆت: چ دەمەكێ دیاركری نینە كو یاریێن قووناغا دویێ بهێنە ئەنجام دان و وەكی بەرهەڤی دێ هەمان تیم بیت ئەڤا خولا كوردستانێ ئەنجام ددەت ب تنێ هندەك یاریزانێن كێم دێ ئینینە رێزێن تیمێ بۆ یاریێن قووناغا دوێ،پشتەڤانێن یانەیێ پشت راست دكەین كو دێ ئاستەكێ زۆر باش پێشكێش كەین ل خولا ئیراقێ دا، وەك چەوا ل خولا نایابا كوردستانێ نوكە ئاستێ یانەیا ئاكرێ زۆرێ باشە.

ستێرا ئوكراینا و پلەدارا پێشتر یا جیهانی ئیلینا سڤیتۆلینا ڤەگەڕیا ناسناڤێن خوە یێن جیهانی بۆ یارییا تێنسا ئەردی، پشتی شیایی د یارییا فینالا كۆپا ئۆكلاند سەركەڤتنێ‌ ل سەر یا چینی وانچ چینیۆ ب دو كۆمان بێ‌ بەرانبەر 6-3 و 7-3 خالان كو دبیتە ناسناڤێ‌ 19ێ‌ د كاروانێ‌ خوە یێ‌ یاریێ‌ دا.
دداخویانییا خوە دا بۆ دەزگەهێن ڕاگەهاندنێ‌ دا ناڤهاتی گۆت: پێخوەشحالم ڤەگەڕیایمە سەركەڤتنان و دەستڤەئینانا ناسناڤان، ئارمانجامن ڤەگەریانە بۆ پێشەنگیێ‌ و پلەداریێ‌، دەستپێكا سالێ‌ یە و هێشتا قارەمانیێن مەزنتر ماینە، من پلان داناینە ب هەڤكارییا راهێنەرێن خوە، دەمێ‌ بۆری هنگاڤتن بوو ئاستەنگ دووربكەڤن، د نوكە دا ئاستەكێ‌ باش دامە ژ ڕێزبەندیا 22 پێشڤەهاتیمە یا 12 ئەركێ‌ من سانەهی نینە.

ب فەرمی ریك كارلایل ڕاهێنەرێ‌ تیما باسكێت بۆلا یانەیا ئیندیانا بایسەرز یا ئەمریكی ڕیكۆردا خولا ئەمریكا nba شكاند پشتی د كاروانێ‌ خوە دا شیایی سەركەڤتنا هزارێ‌ د خولێ‌ دا بینیت ئەوا بۆ ماوەیێ‌ 25 سالان وەكو ڕاهێنەر بەردەوام بووی.
كارلایل یێ‌ 66 سالی پێنگاڤا وی یا ئێكێ‌ وەكو هاریكارێ‌ ڕاهێنەری ل سالا 1989ێ‌ هەتا 200ێ‌ بەردەوام بوو، ئێكەم جار بوویە ڕاهێنەر ل سالا 2001ێ‌ و شیان ببیتە باشترین ڕاهێنەر د خولێ‌ دا ل سالا 2002ێ‌ سەرجەمێ‌ سەركەڤتنێن وی دگەل یانەیێن دایترۆیت بیستۆنز، بۆستن سلتیكس، بایسەرز، دالاس مافرێكس و مینابۆلیس و ل دووماهیێ‌ دگەل ئیندیانا بایسەرز.