شیان مهدی کانیسارکی
چ جاران تە دلێ کەسێ نە دهێلا، دوژمنێن تە ژی د دلێ خوە دا تو دڤیایی. ل دیوانان… ل هەر جهێ تو لێ ڕوینشتبایی ئەو دبوو سەرێ دیوانێ، نە چونکی کەسەکێ دانعەمر و پیربوویی. من هزرا خوە دکر، ئەڤ حەزژێرکرن و ڕێزگرتنا خەلکی ژ چ تشتی یە؟
هەردەم تە دگۆتە من: عیسایێ کوڕێ مەریەمێ سلاڤ لێ بن دبێژیت” حەزژ دوژمنێن خوە بکەن” و بەردەوام ئەڤ رستە ل سەر ئەزمانێ تە بوو.
ئەڤە تو چ مرۆڤ بوویی؟ نزا بۆچی کەربێن تە ژ کەسێ نە ڤەدبوون؟ پانێ ئەز دبێژم ئەم چ جاران نەشێین وەک تە هزر و سەرەدەریێ بکەین؛ چونکی خەلک هەمی ل بەر چاڤێن من د دارگران و زنخن. من دڤێت ب تنێ ئەز بژیم و هەمی بمرن و ل جیهانا دی ژی کەس ژ بلی من بەهەشتێ ب چاڤ نەبینیت! ڕاستی ژی کەسێ وەكی تە پێ چێنابیت، دەمێ ئەز و تو پێکڤە دچووینە مزگەفتێ و ب ڕەخ ئێک ڤە مە نڤێژ دکر، من گوهـ لێ دبوو دەمێ تە لاڤە ب دەنگەکێ نیڤ بلند دکرن، تە داخوازا ساخ و سلامەتییێ و بەختێ سپی بۆ هەمی جیهانێ و دەوروبەران دکر، ب تنێ تە ناڤێ خوە ژبیر دکر.
یا ژ من ڤە، ئەو هێزا لەشی و هزری ژبەر وێ دل ساخییا تە خودێ کربوو رزقێ تە؛ چونکی ل گوندی دەمێ کۆلانا ڕەزێ تری ئەو زەلام هەمی ب جۆت مەڕانێ نە دشیان ب تە ڕا بگەهن. ئەڤ هەمی سالۆخەتێن تە یێن جهێ ڕاوەستیانێ نوکە ژی ب شەڤ و ڕۆژ هزرا من مژیل دکەن. هەردەم مرادا من ئەو بوو بزانم ژمارەیا وان کەسان یێن ژ دل و بێ بەرژەوەندی حەز ژ تە دکەن چەندە، کەسێ بەرسڤ بۆ من نەدگۆت و تە ب خوە ژی بۆ ڤێ پرسیارێ ب من دکرە کەنی. هەتا ئێڤارییا ڕۆژەکێ ژ ڕۆژێن گەرم یێن هاڤینێ من ئەو هەمی مرۆڤ دیتن، لێ ژبەر تۆزا د چاڤێن مندا نە دشیام ب هژمێرم.
نيشاندان