ل رۆژا سێشەمبی 23/12/2025، مەسرور بارزانی، سەرۆكێ حوكمەتا هەرێما كوردستانێ، پێشوازی ل محەمەد ئەلحەسان، نوونەرێ تایبەتێ سكرتێرێ گشتیێ نەتەوەیێن ئێكگرتی ل ئیراقێ و سەرۆكێ تیما (یۆنامی) ل ئیراقێ كر ب هەلكەفتا ب دووماهیهاتنا ئەركێ وی.
ب گۆرەی بەیاننامەیەكا حوكمەتا هەرێما كوردستانێ» سەرۆكێ حوكمەتا هەرێمێ سوپاسییا نوونەرێ تایبەتێ سكرتێرێ گشتیێ نەتەوەیێن ئێكگرتی ل ئیراقێ كر بۆ رۆلێ وی یێ ئەرێنی د هاریكاریكرنا پرۆسەیا سیاسی ل ئیراقێ و هەرێما كوردستانێ دا و كاركرنا وی ژ پێخەمەت ئارامییا ئیراقێ و هەرێما كوردستانێ».
نوونەرێ تایبەتێ سكرتێرێ گشتیێ نەتەوەیێن ئێكگرتی ل ئیراقێ، رێز و سوپاسیێن خوە بۆ هاریكاری و هەماهەنگییا باش یا حوكمەتا هەرێما كوردستانێ ل گەل ئاژانسێن نەتەوەیێن ئێكگرتی دیاركرن.
هەروەسا دووماهی پێشهات و گوهۆڕینێن رەوشا گشتییا ئیراقێ و دەڤەرێ، پشكەكا دی یا دانوستاندنێن دیدارێ بوو.

ل ئێڤارییا رۆژا دوشەمبی 22/12/2025، شاندەكێ بلند یێ دانوستاندكارێ پارتی دیموكراتی كوردستان ب سەرۆكایەتییا فازل میرانی، بەرپرسێ دەستەیا كارگێرییا مەكتەبا سیاسی ل بەغدایە، ب مەبەستا دانوستاندنێ ل گەل ئالیێن سیاسی یێن ئیراقی بۆ پێكئینانا حوكمەتا نوو یا ئیراقێ.
ل رۆژا سێشەمبی 23/12/2025، شاندێ دانوستاندكارێ پارتی دیموكراتی كوردستان وەك ئێكەم وێستگەه، سەرەدانا كۆچكا (سەلام) ل بەغدا كر و ژ ئالیێ لەتیف رەشید، سەرۆككۆمارێ ئیراقێ پێشوازی لێهاتە كرن.
هەر ل هەمان رۆژ، نوری مالكی، سەرۆكێ هەڤپەیمانییا دولەتا قانوونێ، ل نڤیسینگەها تایبەت یا خوە ل بەغدا، پێشوازی ل شاندێ بلند یێ پارتی دیموكراتی كوردستان ب سەرۆكایەتییا فازل میرانی كر.
د كۆمبوونەكێدا، ب هووری باس ل دووماهی پێشهاتێن سیاسی و دانوستاندنێن تایبەت ب پێكئینانا حوكمەتا نوو یا ئیراقێ هاتە كرن. هەردو ئالی هەڤڕابوون ل سەر پێدڤییا ب لەزكرنا پێنگاڤان و پێگیریبوون ب ژڤانێن دەستووری بۆ تمامكرنا پێڕابوونێن پێكئینانا كابینەیا نوو یا حوكمەتا ئیراقێ.
تەوەرەكێ سەرەكیێ كۆمبوونێ، گەنگەشەكرنا میكانیزمێن پراكتیكی بوو بۆ ئێكلاكرنا پۆستێن سێ سەرۆكایەتییان ( كۆمار، جڤاتا نوونەران و جڤاتا وەزیران) د چارچۆڤەیێ شایستەیێن دەستووریدا.
ل دووماهییێ دووپاتی هاتە كرن كو پێدڤییە حوكمەتا داهاتییا ئیراقێ ل ئاستێ داخوازیێن گەلێ ئیراقێ بیت و هەماهەنگی و كارێ هەڤپشك د ناڤبەرا ئالیێن سیاسی ببیتە بنەمایەك بۆ ب هێزكرنا ئارامیێ و خزمەتگوزاریێ ل وەلاتی.
هەر د بەردەوامییا كۆمبوونێن خوەدا ل بەغدا بۆ پێكئینانا حوكمەتا نوو یا ئیراقێ، شاندێ دانوستاندكارێ پارتی دیموكراتی كوردستان ب سەرۆكایەتییا فازل میرانی، سكرتێرێ دەستەیا كارگێرییا مەكتەبا سیاسی، جودا ل گەل عەمار ئەلحەكیم، سەرۆكێ باسكێ حیكمە یێ نیشتمانی و موسەننا سامەرائی، سەرۆكێ هەڤپەیمانییا عەزم كۆمبوو.
بەری سەرەدانا خوە بۆ بەغدا، فازل میرانی، بەرپرسێ دەستەیا كارگێرییا مەكتەبا سیاسی یا پارتی و سەرۆكێ شاندێ دانوستاندكارێ د داخۆیانییەكێدا راگەهاندبوو» دانوستاندنێن سەركەفتییانە پێدڤی ب بەرهەڤییەكا راستەقینەیە بۆ گوهدارییا هەڤدو د ناڤبەرا ئالییاندا».
میرانی گوتبوو ژی» دانوستاندنان پێدڤی ب هەلوەستكرنا ئالیێن كاریگەرە ل سەر پرسێن دیار، بۆ وێ چەندێ كاریگەرییا راستەقینە ل سەر بڕیاردانێ هەبیت و دانوستاندن تنێ پێڕابوونەكا پرۆتۆكۆلی نینە، بەلكو پێدڤی ب سەقایەكێ گونجای، كو شیانان بدەتە ئالییان ئاستەنگان دەربازبكەن، ئەڤە ژی ب رێكا دەستنیشانكرنا ئارمانجان دبیت، بۆ وێ چەندێ هەموو پێڕابوون ل سەر رێكا راست بهێنە ئەنجامدان».
بەرپرسێ دەستەیا كارگێرییا مەكتەبا سیاسی یا پارتی و سەرۆكێ شاندێ دانوستاندكارێ پارتی ل بەغدا دووپاتكر ژی» ناسنامەیا نەتەوەیی، هێزا رایا گشتی و هەلسەنگاندنێن نێڤدەولەتی هەموو هۆكارن بۆ سەرئێخستنا دانوستاندنان».
دهێتە زانین شاندێ دانوستاندكارێ پارتی دیموكراتی كوردستان پێك دهێت ژ ف
-فازل میرانی، بەرپرسێ دەستەیا كارگێرییا مەكتەبا سیاسی.
-فوئاد حسێن، ئەندامێ مەكتەبا سیاسی.
-نەوزاد هادی، ئەندامێ مەكتەبا سیاسی.
-ئومێد سەباح، ئەندامێ كۆمیتەیا ناڤین.
-فارس عیسا، سەرۆكێ نوونەرایەتییا حوكمەتا هەرێما كوردستانێ ل بەغدا.

دیدار/ دلۆڤان ئاكرەیی

بەربژارەكا سەركەفتییا پارتی دیموكراتی كوردستان بۆ خولا شەشێ یا جڤاتا نوونەرێن ئیراقێ دیاركر، ل دووڤ دەستووری و فەرمانا سەرۆكایەتییا كۆمارا ئیراقێ، بەرهەڤیێن سەرۆكایەتییا جڤاتا بلند یا دادوەری ل ئیراقێ بۆ رۆژا 29 ێ كانوونا ئێكێ 2025 تمام بووینە و بڕیارە ل رۆژا دووشەمبییا حەفتییا بهێت روونشتنا ئێكێ یا خولا نوو یا جڤاتا نوونەرێن ئیراقێ بهێتە ئەنجامدان و چاڤەڕێ ناهێتە كرن ئەو روونشتن بهێتە پاشئێخستن.
د. ئەشواق جاف، بەربژارا سەركەفتییا پارتی دیموكراتی كوردستان بۆ خولا شەشێ یا جڤاتا نوونەرێن ئیراقێ ژ پارێزگەها سلێمانیێ بۆ رۆژنامەیا (ئەڤرۆ) گوت» رۆژا دووشەمبییا داهاتی روونشتنا ئێكێ یا خۆلا شەشێ یا جڤاتا نوونەران دێ بڕێڤەچیت، پشتی كو دادگەها فیدرالی ئەنجامێن هەلبژارتنێن جڤاتا نوونەرێن ئیراقێ پەسەندكرین و سەرۆكایەتییا كۆمارێ داخواز كریە كو ل 29 ێ ڤێ مەهێ روونشتنا ئێكێ یا جڤاتا نوونەران بهێتە كرن و سەرۆكێ جڤاتا بلند یا دادوەری ل ئیراقێ، فایەق زێدان، دوپات كریە كو هەموو بەرهەڤیێن قانوونی بۆ روونشتنێ هاتینە كرن، و ل دووڤ دەستووری، روونشتنا ئێكێ یا جڤاتا نوونەران دێ ب سەرۆكایەتییا ب تەمەنترین ئەندامێ جڤاتا نوونەران روونشتنا ئێكێ یا جڤاتێ دێ دەست پێ كەت، كو تێدا دێ دەستەیا سەرۆكایەتییا جڤاتا نوونەران (سەرۆك و هەردو جێگر) هێنە هەلبژارتن».
د. ئەشواق جاف دیاركر ژی» هەتا نوكە ئالیێن سیاسی ل سەر بەربژارەكێ دیار یێ پێكهاتەیا سوننی بۆ پۆستێ سەرۆكێ جڤاتا نوونەران رێكنەكەفتینە، كو زێدەتر ژ 70 پەرلەمانتارێن سوننە د ناڤ جڤاتا نوونەراندا ل سەر دو بەربژارێن جودا بۆ پۆستێ سەرۆكێ جڤاتا نوونەران بەلاڤبووینە ول دووڤ عورف و قانوونا سیاسییا ئیراقێ، دێ پۆستێ سەرۆكێ جڤاتا نوونەران بۆ پێكهاتەیا سوننی بیت، بەلێ هەتا نوكە، هەڤپەیمانییا تەقەدووم ب سەرۆكایەتییا محەمەد حەلبووسی و هەڤپەیمانییا عەزم ب سەرۆكایەتییا موسەننا سامەڕائی، هەر ئێك ژوان بەربژارێ خوە یێ هەی و ململانێ ل سەر پۆستێ سەرۆكێ جڤاتا نوونەران د ناڤبەرا بەربژارێن هەردوو ئالییاندا یە، حەلبووسی چەندین جاران ئاماژە ب وێ چەندێ كریە هەكە ئالیێ سامەڕائی بەربژارێ خوە یێ پۆستێ سەرۆكێ جڤاتا نوونەران ڤەكێشیت، دێ پرۆسە ب ساناهیتر بیت و ژئالییەكێ دی ڤە ، ئالیێن سیاسی یێن شیعی د جڤاتا نیشتمانیدا كوۆم بووینە دا كو ناڤێ بەربژارەكێ سوننی یێ ب هێز بۆ پۆستێ سەرۆكێ جڤاتا نوونەرێن ئیراقێ ئێكلا بكەن ود وەختێ رێكنەكەفتنێدا، دێ پەرلەمانتار ب دەنگدانێ ئێك ژ بەربژاران بۆ وی پۆستی هەلبژێرن».
ناڤبری گوت ژی» پێشتر وەك عورفەكێ سیاسی، دەستوور و قانوون د رێكا روونشتنا ئێكێ یا جڤاتا نوونەران دا د هاتنە پەیڕەوكرن، كو دێ جێگرێن سەرۆكێ جڤاتا نوونەران ژی هێنە هەلبژارتن، بەلێ ب باوەرییا من كو د روونشتنا كانوونا ئێكێ دا زێدەتر دێ دانوستاندن ل سەر پۆستێن سیاسی یێن گرنگ هێنە كرن و پێدڤییە سەرۆكێن بەربژاركری یێن هەر سێ ئالییان (پارتی، ئێكەتی، وئالیێن شیعی و سوننی) رێكنەكەفتنەكا بهێز بكەن دا كو د رونشتنا ئێكێدا دەستەیا سەرۆكایەتییا جڤاتا نوونەران بهێتە دیاركرن و پاشان ل دووڤ دەستووری پێنگاڤێن دی یێن حوكمەتێ بهێنە هاڤێتن».

بەرپرسەکێ رێڤەبەریا خوەسەر دیار کر، پشتی ئێرشا چەکدارێن سووریێ بۆ سەر هەر دو تاخێن کوردان ل حەلەبێ ئەمریکا  هەر زوو هاتە سەرخت و بۆ شامێ دیار کریە شەرەک وەسا دێ بیتە ئەگەرێ ئالۆزیێن زێدەتر و ئەو یەک د بەرژەوەندیا سووریێ دا نینە.

بەرپرسەکێ رێڤەبەریا خوەسەر یا رۆژئاڤایێ کوردستانێ دیار کر، ئێرشا ل سەر هەر دو تاخێن کوردان پشتی سەرەدانا شاندێ تورکیا بۆ شامێ هات، ئانکو ب کورتی مرۆڤ دشێت بێژیت ئێرشا ل سەر هەر دو تاخێن کوردان ل سەر داخوازیا تورکیا بوویە و د ئەنجاما ئێرشێ دا وەلاتیەکێ سڤیل شەهید کەفت و پتر ژ بیست کەسان ژی بریندار بوون، لێ هێزێن ئاسایشێ هەر زوو بەرسڤا ئێرشێ دان و چەندین چەکدارێن سەر ب وەزارەتا بەرگریێ یا سووریێ هاتنە کوشتن و زیانێن مەزن گەهشتینە چەکدارێن سووریێ.
هەمان بەرپرسی ئەو یەک ژی دیار کر، ل گۆر رێککەفتنا کو بەری نها د ناڤبەرا هەسەدێ و شامێ دا هاتیە کرن، دڤێت رێڤەبرنا هەر دو تاخان د دەستێ هێزێن ئاسایشێ دا بن و نابیت هێزێن سووریێ دەستێوەردانێ بکەن، مخابن هەتا نها چەندین جاران هێزێن سووریێ رێککەفتن بنپێکرینە و ئێرشی هەر دو تاخێن کوردان کرینە، لێ ئێرشا ڤێجارێ پتر ل سەر داخوازیا تورکیا بوو و ژ بەر ڤێ یەکێ ژی ئەمریکی گەلەک توورە بوون و هەر زوو ئەمریکا هاتە سەرخت و فشارێن مەزن ل شامێ کرن.
ل ئالیێ دی فەرماندارەکێ هەسەدێ ژی دیار کر، جهێ داخێ یە چەندین جاران چەکدارێن سەر ب وەزارەتا بەرگریێ ئێرشی تاخێن کوردان کرن و مخابن هێشتا ژی مەترسی هەیە، نها ژی هەر دو تاخێن کوردان ل حەلەبێ ژ ئالیێ چەکدارێن سەر ب وەزارەتا بەرگریێ یا سووریێ ڤە هاتینە دۆرپێچ کرن، مخابن سەرەرای کو شەر هاتیە راگرتن لێ دیسان ژی مەترسیا شەڕی هەیە، ئەمریکی ژ رەوشا نها گەلەک دلگرانن و ئەمریکا هۆشداری ژی دایە سووریێ هەکە جارەکا دی ئێرشی کوردان و پێکهاتەیێن دی بهێتە کرن دێ سزایێن کو بەری نها ل سەر سووریێ هەبوون جارەکا دی هەمان سزا دێ هێنە ڤەگەراندن، چونکی ئەمریکا پاراستنا نەتەوەیێن ل سووریێ وەکو مەرجێ سەرەکی یێ راکرنا سزایان دیار کریە و گرنگە بەرپرسێن نها یێن شامێ ژی پێگیریێ ب سۆزێن خوە بکەن.
چاڤدێرێن سیاسی ژی دیار دکەن، هەتا دەستهەلاتا شامێ هەبوونا کوردان ب فەرمی ل سووریێ قەبوول نەکەت و رێککەفتنەکا نوو نەهێتە کرن و هەموو مافێن گەلێ کورد د دستوورێ نوو یێ سووریێ دا نەهێنە گەرەنتیکرن، مەترسیا ئێرشێن وەسا ل سەر کوردان دێ بەردەوام بیت، چونکی تورکیا فشارێن مەزن ل شامێ دکەت دا رێ نەدەت کورد ل سووریێ بگەهنە مافێن خوە یێن رەوا.