بێوار حەمدی:
سینەماکار(ڤیان مایی) د دیدارەکێ دا بۆ ڕۆژناما ئەڤرۆ دیارکر کو وێ دەرهێنەریا حەفت فلمان کریە و حەفت خەلات ژی وەرگرتینە، ئەڤە ژی بۆ وێ شانازیەکا گەلەک مەزنە کو تێدا خزمەتا وەڵاتێ خوە کری.
دبەردەوامیا ئاخفتنا خوە دا ڤیانێ گۆت ژی، دەمێ ئەز ل گوندی من گەلەک حەز ژ چیڕۆکان دکر لەوما ژی ئەو چیڕۆکە من دسەرێ خوە دا کرنە فلم ژبەری کو ئەز فلما وسینەمایێ ببینم وگۆت: هەکە ئەز عاشقا وەڵاتێ خوە نەبام ئەز نەدبوومە سینەماکار، ژ بەر کو ڤیانا وەڵاتی گەلەک هێزی ددەتەمن لەوما من گرێدانەک و ڤیانەکا مەزن دگەل کوردستانێ هەیە.
ناڤهاتیێ گۆت: دەمێ کو من دیتی دیرۆکا مە نەهاتیە نڤیسان و هەمی د ناڤ سترانان داهەیە من ب فەر دیت وان سترانا بکەمە فلم و بەردەوامیێ بدەینێ داکو خەلک هەمی دیرۆکا مە ببینن، بشێوەیەکێ گشتی کارکرن د ناڤ سینەمایێ دا یاب ساناهی نینە بۆ هەر دوو رەگەزا لێ بۆ من وەکو ئافرەتەک و دناڤا جەرگێ باشوورێ کوردستانێ دا یاب زەحمەت نەبوو، ژ بەر کو د کەلتورێ مە دا هاریکایا ئافرەتێ گەلەک یا هەی و ڕێزەکا مەزن لێ دهێتە گرتن.
ل دووماهیێ ڤیانێ گۆت: نوکە من یا دەست ب دوکیومێنتاریا کری و ئەز پتر کار لسەروان دکەم، دیسان بۆ وان کەسێن ژنوی حەز ژ سینەمایی دکەن ئەز ب ڕێیا ئونلاین گەلەک هاریکاریا وان دکەم بۆ دیتنا ئەکتەرا و خواندنا سیناریویێن وان و بووچوونێن خوە ل سەر دبێژم، بۆ داهاتی ژی ل نێزیک کارێن من یێن نوی دێ کەڤنە بەرچاڤێن هەموو تاکێن کورد.
نيشاندان