ب پشتەڤانی و ئامادەبوونا د. عەلی تەتەر، پارێزگارێ دهۆكێ و زەعیم عەلی، ئەندامێ مەكتەبا سیاسی یا پارتی و خانم دكتۆرە ڤیان سلێمان، هاریكارا بەرپرسێ مەكتەبا ڕێكخستنا پارتی ل دهۆكێ و هەژمارەكا پێشمەرگە و تێكۆشەڕ و شۆڕەشگێڕێن قەهرەمانێن دەڤەرێ و بەرپرسێن دام و دەزگەهێن حزبی و حكومی و لەشكری و ریهـسپی و كەسایەتیێن دەڤەرێ، ل رۆژا 20/12/2025 ل هۆلا كۆنفرانسان ڕێۆڕەسمێن دانەنیاسین و ئیمزاكرنا پرتووكا «هیڤیا چیا» یا بیرەوەریێن پێشمەرگەیێ دێرین»حسنی كانیا باسكی « ژ نڤیسینا ڕۆژنامەڤان «سەفین جەودەت» و ژ وەشانا چاپخانا پارێزگەها دهۆكێ هاتنە گێڕان.
پارێزگارێ دهۆكێ د پەیڤەكێ دا بەحسێ خەباتا سەرجەم پێشمەرگەیێن قەهرەمان د شۆڕەشێن ئێك ل دووڤ ئێك دا، ب تایبەتی ل دەڤەرا بەهدینان كر و خواست بەردەوامی ب نڤیسینا بیرەوەریان بهێتەدان، بۆ هندێ ببنە ژێدەرێن نڤیسینا مێژوویا دەڤەرێ ب گشتی، پاشی بەحسێ خزمەت و خەباتا پێشمەرگەیێ ناڤبری و ئەو سەختیێن د شۆڕەشان دا دەربازكرین كر و دەستخوشی ل نڤیسەرێ پرتووكێ كر و پشتەڤانیا ئیدارا پارێزگەهێ بۆ هەمی بەرهەمێن نیشتیمانی دووپاتكر و ل دووماهیێ پرتووكا ناڤبری هاتە ئیمزاكرن و بەلاڤكرن.

دهۆك، لەزگین جۆقی:

پارێزگارێ نەینەوا راگەهاند، كار ل سەر ئاڤاكرنا نەخۆشخانەكا 100 تەختی ل دەڤەرداریا شنگالێ دهێتە كرن و كار بەردەوامە.
عەبدولقادر دەخیل، پارێزگارێ نەینەوا راگەهاند، بۆ بلندكرنا ئاستێ خزمەتێن ساخلەمیێ ل دەڤەرداریا شنگالێ نەخۆشخانەكا 100 تەختی د قووناغێن چێكرنێ دایە، ئەڤ نەخۆشخانە دێ گەلەك خزمەتا خەلكی كەت.
دەڤەرداریا شنگالێ تووشێ زیانەكا مەزن بوویە ل سالا 2014ێ ل سەر دەستێن تیرۆرستێن داعشێ‌، هەتا نوكە ئاوارەیێن شنگالێ، ژ بەر نەبوونا خزمەتگوزارییا و تەناهیێ‌ نەشیاینە ڤەگەڕن.

ئامێدیێ، مەحمود نهێلی:

ژ ئەگەرێ هەبوونا چەندین كێماسیان و نەبوونا پڕۆژەیێن خزمەتگوزاری و كێمیا كارەبا نیشتیمانی، هەژمارەكا گەنجێن كۆمەلگەها قەدشێ‌ یا سەر ب ناوچەدارییا سەرسنكێ ڤە خرڤەبوونەك ئەنجام دا و تێدا داخوازیێن خوە گەهاندنە جهێن پەیوەندیدار، دوهی 21/12/2025 نوونەرێن كۆمەلگەهێ ل گەل پارێزگارێ دهۆكێ كۆمبوون و ئاریشەیێن وان دێ هێنە چارەسەركرن.
ئێك ژ رێكخەرێن وێ خرڤەبوونێ بۆ ئەڤرۆ دیار كر، كۆمەلگەها وان گەلەك هاتیە پشتگوههاڤێتن و گەلەك كێماسی تێدا هەنە و گۆت: كێمیا كارەبا نیشتیمانی و خراببوونا موەلیدەیێن كارەبێ و نەبوونا جادە و خزمەتگوزاریێن دی، ب تایبەت ژی بەرتەنگیا جادا سەرەكی ژ وان ئاریشەیانە یێن رۆژانە خەلك دگەهیننە لایەنێن پەیوەندیدار و هەتا نوكە نەهاتینە چارەسەركرن، ژ بەر وێ یەكێ ژی گەهشتە رادەیێ خوەنیشادانێ و گۆت: «دوهی نوونەرێن كۆمەلگەهێ ل گەل پارێزگارێ دهۆكێ كۆمبوون و پارێزگارێ دهۆكێ سۆزدایە، ئەو ئاریشەیێن د شیان دا بیت، بهێنە چارەسەركرن، ب تایبەتی ژی كارەب و جادە».
ل سەر ڤێ یەكێ ئەلند ئەمیر، رێڤەبەرێ ناوچەدارییا سەرسنكێ بۆ ئەڤرۆ گۆت: «ئێكسەر ئەم وەكو رێڤەبەرێ ناوچەدارییا سەرسنكێ و وارشین سەلمان، دەڤەردارێ ئامێدیێ هاتینە سەرخەت و مە خەلكێ نەرازی دیتن و مە ئاریشەیێن وان زانین و ل گەل لایەنێن پەیوەندیدار دێ بزاڤێن رژد كەین ژ بۆ چارەسەركرنا ئاریشەیێن وان، ب تایبەتی ژی كارەبا 24 دەمژمێری و هەموو ئاریشە و داخوازیێن وان دێ ل بەر چاڤ هێنە وەرگرتن و ل دووڤ شیانان دێ هێنە چارەسەركرن».

زاخۆ، دلۆڤان هالۆ:

محەمەد سەدیق، سكرتێرێ نڤیسینگەها زاخۆ یا سەندیكا رۆژنامەنڤیسێن كوردستانێ دیاركر كو ب بڕیارا جڤاتا سەندیكا رۆژنامەنڤیسێن كوردستانێ، رێنومایێن نوو بۆ نووكرنا ناسنامەیا ئەندامەتیێ بۆ سالا نوو 2026 دەركەفتینە و بۆ هەموو ئەندامان دێ هێنە زەلالكرن.
سكرتێرێ نڤیسینگەها زاخۆ ئاماژە ب وێ چەندێ ژی كر كو ل دووڤ هندەك رێنومایان ئەگەر ئەندامێ سەندیكایێ پێگیریێ ب نووكرنا ئەندامەتیا خۆ نەكەت، سزایێن دارایی یان ژی لادان ژ ئەندامەتیێ دێ ل سەر هێنە بجهئینان.

دهۆك، دلۆڤان ئاكرەیی:

بەرپرسێ پشكا چالاكیان ل ڕێڤەبەریا كاروبارێن مینان ل پارێزگەها دهۆكێ دیاركر، ژ سەرجەمێ 779 كیلۆمەترێن چارگۆشە یێن ئەردێ مینڕێژكری ل هەرێما كوردستانێ، هەتا نوكە 576 كیلۆمەترێن چارگۆشە هاتینە پاقژكرن و 13 هزار و 600 وەلاتی بووینە قوربانیێن تەقەمەنییان.
عەبدولعەزیز مەحەمەد سالح، بەرپرسێ پشكا چالاكیان ل ڕێڤەبەریا كاروبارێن مینان ل پارێزگەها دهۆكێ بۆ رۆژنامەیا ئەڤرۆ گۆت: «ل دووڤ ڕێككەفتنا ئۆتاوا یا نێڤدەولەتی پێدڤی بوو ل سالا 2018 وەرە ئیراق و هەرێما كوردستانێ هەمی ژ مینان هاتبا پاقژكرن، لێ نەهاتە بجهئینان، لەوڕا ماوەیێ 10 سالان هاتە درێژكرن».
ناڤبری گۆت: «مین دوژمنەكێ ڤەشارتییە، كارمەندێن مە رۆژانە، ب گیانفیدایی كارێن خۆ دكەن و ب بەردەوامی تیمێن وان ئەردێن مینڕێژكری پاقژ دكەین».

رەمەزان زەكەریا:

ل سنۆرێ دەڤەرداریێن ئاكرێ و بەردەڕەشێ هەژمارەكا رێكێن سەرەكی و گوندان دهێنە سەخبێركرن و ئەڤ پرۆسە دێ بەردەوام بیت ل هەرجهەكێ پێدڤی بیت ئێكسەر تیمێن رێڤەبەریا رێك و پران دێ‌ دەست ب كاری كەن.
ئەندازیار محسن میرانی، رێڤەبەرێ سەخبێركرنا رێك و پران ل ئاكرێ بۆ ئەڤرۆ گۆت: «ب پشتەڤانیا كابینەیا نەهێ یا حكومەتا هەرێما كوردستانێ، كارێ سەخبێركرن و نووژەنكرنا رێكان ل سنۆرێ هەردو دەڤەرداریێن ئاكرێ و بەردەڕەشێ بەردەوامە».
ناڤبری گۆتژی: «كارێ سەخبێركرنا بلەز بۆ ڕێكا گوندێن دازین ئێك و دازین دو ل سنۆرێ ناوچەداریا بجیلێ‌ دهێتە كرن، ڕاستەوخۆ ژ لایێ ڕێڤەبەریا مە ڤە دهێتە ئەنجامدان، هەروەسا كارێ سەخبێركرنا بلەز بۆ ڕێكا سەرەكیا ئامیان بۆ بەردەڕەشێ و رۆڤیا بۆ بەردەڕەشێ و رۆڤیا بۆ ئاكرێ دهێتە كرن».