شاندێ ئیمرالیێ یێ دەمپارتی دێ ڤێ حەفتیێ سەرەدانا هێزێن سیاسی یێن تورکیا کەت و سەرۆکێ پەرلەمانێ تورکیا ژی داخواز ژ هەموو هێزێن سیاسی کریە ئەندامێن خوە بۆ پێکئینانا لیژنەیێ دیار بکەن دا لیژنەیا پەرلەمانی دووڤچوونا قووناغا ئاشتیێ بکەت.
پەروین بولدان ئەنداما شاندێ ئیمرالیێ و هاریکارا سەرۆکێ پەرلەمانێ تورکیا بۆ دەزگەهێن راگەهاندنێ دیار کر، پشتی گرۆپەک ژ چەکدارێن پەکەکێ چەکێن خوە ژناڤبرن نها قووناغەکا نوو و گرنگ دەستپێکریە و د ڤێ چارچۆڤەیێ دا وەکو شاندێ ئیمرالیێ ئەو دێ سەرەدانا هەموو پارتێن سیاسی یێن تورکیا کەن ب تایبەتی ژی ئەو پارتێن ل پەرلەنێ تورکیا دا هەنە و گۆت: (ئەڤرۆ دێ سەرەدانا پارتا پاشەرۆژێ یا ب سەرۆکاتیا ئەحمەد داوود ئۆغلۆی کەین و هەروەسا ئێڤارێ ژی دێ سەرەدانا پارتا بزاڤا نەتەوەپەرست یا تورکیا کەین و رۆژێن دی دا ژی دێ سەرەدانا ئاکپارتی و پارتا کۆماری و پارتێن دی یێن تورکیا ژی کەین و مە دڤێت سەبارەت ب پێشڤەبرنا قووناغا ئاشتیێ هەموو هێزێن سیاسی یێن تورکیا هاریکار بن).
ناڤهاتیێ ئەو یەک ژی دیار کر، پەکەکێ سەلماند وان گوهداریا ئۆجەلانی کرن و نیەتا خوە یا پاک ژ بۆ ئاشتیێ دیار کرن، نها دڤێت دەولەتا تورکیا ژی ب کریاری هندەک تشتان بکەت، ئەم چاڤەرێ نە هندەک ژ گرتیێن سیاسی بهێنە ئازاد کرن، هەروەسا دڤێت لیژنەیا پەرلەمانی ژی یا بۆ دووڤچوونا قووناغا ئاشتیێ ژی بلەز دەست ب کارێ خوە بکەت و گۆت: (سوباهی دێ سەرۆکێ پەرلەمانێ تورکیا ب فەرمی داخواز ژ فراکسیۆنێن پەرلەمانی کەت، کو ئەندامێن خوە یێن بۆ لیژنا دووڤچوونا قووناغا ئاشتیێ دیار بکەن و پەرلەمانی دڤێت بلەز لیژنە دەست ب کارێ خوە بکەت، بێگومان ئەو یەک ژی گەلەک یا گرنگە، چونکی کوردان دڤێت دەولەتا تورکیا و پەرلەمان ژی نیەتا خوە یا پاک بۆ ئاشتیێ و چارەسەرکرنا پرسا کوردی دیار بکەن، ژ بەر ڤێ یەکێ ژی دهێتە چاڤەرێکرن ل ڤێ حەفتیێ گەلەک تشتێن گرنگ روو بدەن).
ل ئالیێ دی بەرپرسەکێ ئاکپارتیێ ژی، کو ناڤێ خوە ئاشکرا نەکریە بۆ ئاژانسا ئاناتۆلی دیار کریە، وەکو ئاکپارتی ئەو دێ ب هەموو رەنگەکێ ژ بۆ پێشڤەبرنا قووناغا ئاشتیێ کار کەن و ئەردۆغانی ژی د کۆمبوونا بەری دو رۆژان ل گەل بەرپرسێن ئاکپارتیێ دیار کریە، دڤێت هەموو بەرپرسێن ئاکپارتیێ زمانەکێ نەرم بکار بینن، نابیت ب داخویانیێن خوە یێن توند ببنە ئەگەرێ ئالۆزیێن نوو، چونکی هندەک هێز کار دکەن دا قووناغا ئاشتیێ ل تورکیا سەر نەگریت، لێ ئاکپارتی دێ یا پێدڤی بۆ سەرکەفتنا قووناغا ئاشتیێ کەت و دەم پارتی ژی ژ بۆ سەرکەفتنا قووناغا ئاشتیێ یا پێدڤی دکەت.
نيشاندان