رەمەزان زەكەریا:

حكومەتا هەرێما كوردستانێ بڕیار دایە بەنداڤەكا مەزن ل ناوچەداریا مەزنێ ل دەڤەرا بارزان دروست بكەت، بۆ وێ چەندێ جۆتیار و خودانێن تەرش و كەوالی ل دەمێ كیمئاڤیێ مفای ژێ ببینن.
بەنداڤ دێ كەڤیتە گوندێ دێرانە ل سنوورێ ناوچەداریا مەزنێ ل دەڤەرداریا مێرگەسۆر ل دەڤەرا بارزان و ژ لایێ حكومەتا هەرێما كوردستانێ ڤە دێ‌ هێتە دروستكرن.
بەنداڤ یا مەزنە و دێ‌ شیانێن كۆمكرنا دو بۆ سێ ملیار مەترێن سێجار یێن ئاڤێ هەبن، پشتی تەمامبوونا بەنداڤێ جۆتیار و خودانێن تەرش و كەوالی یێن دەڤەرێ دێ مفای ژێ بینن.

دهۆك، لەزگین جۆقی:

بەرپرسێ راگەهاندنا رێڤەبەریا رێكخستنا پلێتێن ئاهێن خوارنێ ل پارێزگەها دهۆكێ بۆ ئەڤرۆ دیار كر، هەتا نوكە ب رێژەیا 60% خەلكێ دهۆكێ فۆرمێن ئەلیكترۆنی یێن ئاهێن خوارنێ پڕكرینە و بەردەوام خەلك فۆرمێن خۆ پڕ دكەن.
قەیس وەیس، بەرپرسێ راگەهاندنا رێڤەبەریا رێكخستنا پلێتێن ئاهێن خوارنێ ل پارێزگەها دهۆكێ خویا كر، پڕكرنا فۆرمێن ئەلیكترۆنی یێن ئاهێن خوارنێ ل دهۆكێ یا بەردەوامە و گۆت: «هەتا نوكە ب فەرمی تشتەك نەگەهشتیە مە بۆ درێژكرنا دەمێ پڕكرنا فۆرمێن ئەلیكترۆنی یێن ئاهێن خوارنێ».
گۆتژی: «هەتا نوكە ب رێژەیا 60% ژ خێزانێن پارێزگەها دهۆكێ فۆرما خۆ پڕكرینە و چو ئاریشە بۆ خەلكی پەیدا نەبووینە، ب تنێ ئەو كەسێن ژ دەرڤەی وەلاتی بن، دەمێ فۆرما خۆ پڕ دكەن، وەكو گەشتیار دێ هێنە هژمارتن».

زاخۆ، دلۆڤان هالۆ:

جەهوەر محەمەد، ڕێڤەبەرێ ناوچەداریا دەركارێ بۆ ڕۆژناما ئەڤرۆ دیار كر كو شەڤا دی ل دەمژمێر 12:30 درۆنەك ب باخچەیێ قوتابخانەیا كەمپا دەركارێ كەفت و د ئەنجام دا ئاگر بەربوو بەشەكێ قوتابخانەیێ و دو پۆل هاتنە سۆتن، لێ ب زووترین دەم ئەو ئاگرە هاتە كۆنتڕۆلكرن.
ڕێڤەبەرێ ناوچەداریا دەركارێ، ئاماژە ب وێ چەندێ ژی كر كو د ڤێ ڕوودانێ دا چو زیانێن گیانی نەبوون، ب تنێ هندەك ساجمە ب تەنشتا سنێلەكی كەفتبوون، لێ ڕەوشا وی یا باش و جێگیرە و گۆت: «ژ لایێ هێزێن ئێمناهیێ ڤە ڤەكۆلین ل سەر ڕوودانێ هاتینە كرن، لێ هەتا نوكە چو دیار نەبوویە».

هەولێر، قائید میرۆ:

پەیڤدارێ وەزارەتا ئەوقاف و كاروبارێن ئایینی دیاركر، پێدڤیە گرێبەستا هەڤژینیێ ژ لایێ دادگەهێ ڤە بهێتە تۆماركرن و دبێژیت: نابیت مامۆستایێن ئایینی بەری دادگەهێ پرۆسەیا مەهركرنێ بڕێڤەببەن.
نەبەز ئیسماعیل، پەیڤدارێ وەزارەتا ئەوقافێ‌ بۆ رۆژناما ئەڤرۆ دیاركر، ل گورەی رێنمایێن وەزارەتا ئەوقاف و كاروبارێن ئاینی پرۆسەیا مەهركرنێ و گرێبەستا هەڤژینیێ پێدڤیە ب رێیا دادگەهێ بیت، ئانكو لیژنا ساخلەمی و ئەو پكشنینێن بەری پرۆسەیا هەڤژینیێ بهێنە تەمامكرن و د دووڤ دا ژ لایێ مامۆستایێ ئاینی ڤە بهێتە مەهركرن و گۆت: «هەر مامۆستایەكێ ئاینی پێگیریێ‌ ب رێنما و بڕیارا ئەوقافێ‌ نەكەت، لێپرسین د گەل دا دێ هێتە كرن».
نەبەز ئیسماعیل گوتژی: «ب مەرەما نەهێلانا ئاریشەیان و ئەنجامدانا پرۆسەكا قانوونی و شەرعی یا هەڤژینیێ، پێدڤیە گرێبەستا هەڤژینیێ ل دادگەهێ بهێتە تۆماركرن و د دووڤ دا وەلاتی دشێن ل دەف مامۆستایێ ئاینی ژی پرۆسەیا مەهركرنێ بڕێڤەببەن، بڕیار و رێنمایێن وەزارەتێ بۆ بەرژەوەندیا وەلاتیانن، داكو چو ئاریشە پەیدا نەبن و كەس ژ دەرڤەی قانوونێ گرێبەستا هەڤژینیێ ئەنجام نەدەت».

دهوك، لەزگین جوقی

ئەندامەكا پەرلەمانێ ئیراقێ‌ راگەهاند، هەتا 70 هزار خێزانان كۆ پرانیا وان كورد بووینە ل نەینەوا تووشی تەعریبێ بووینە، مە داخواز ژ پارێزگارێ نەینەوا كریە پارچێن ئەردی بۆ قەرەبوویا خەلكێ زەرەرمەند دابین بكەن و بریارا رازەمەندیێ‌ دەرچوویە.

كاڤین شێخ سەعید، ئەنداما پەرلەمانێ ئیراقێ‌ بۆ رۆژناما ئەڤرۆ گۆت: ئەو خێزانێن هاتینە تەعریب كرن دێ‌ ب گوژمێ 10 ملیۆن دیناران و پارچەكا ئەردی هێنە قەرەبووكرن، ب تایبەت بۆ خێزانێن كورد گرێدایێ مادا 140 كۆ بەری نوكە هندەك خێزانان گوژمێ 10 ملیون دینار وەرگرتینە، لێ پارچە ئەرد پێ نەهاتیە دان، مە داخواز ژ پارێزگارێ نەینەوا كریە پارچێن ئەردی بۆ قەرەبووكرنا خەلكێ زەرەرمەند دابین بكەن.
گۆتژی: خەلكێ قەزا شێخان و ناحیا فەیدیێ و ناحیا زیلكان و ناحیا ئەلقوش یێن زەرەرمەند بووین و نەهاتینە قەرەبوو كرن، دشێن بچن ل نەینەوا كاروبارێن خۆ برێڤە ببەن بۆ وەرگرتنا قەرەبووكرنێ.
كاڤین شێخ سەعید تەكەز كر، نە ب تنێ خەلك ل نەینەوا تووشێ تەعریبكرنێ بووینە، بەلكۆ ل هەموو پارێزگەهێن ئیراقێ‌ خەلك هاتینە تەعریب كرن و حوكمەتا ئیراقێ‌ ژی گوژمێ 200 ملیار دیناران بۆ قەرەبوویا خەلكی دانابوون، مە ب فەر دیت كار بكەین خەلكێ مە یێ كورد ل نەینەوا ژی بهێنە قەرەبووكرن و پارچە ئەردا وەربگرن. بۆ ڤێ مەبەستێ مە داخواز ژ پارێزگارێ نەینەوا كریە پارچێن ئەردی تەرخان بكەت بۆ قەرەبووكرنا خەلكێ زەرەرمەند ل نەینەوا.
ئەنداما پەرلەمانێ ئیراقێ‌ ئاشكرا ژی كر، ب تنێ ل مەخموور هەتا سێ هزار پارچێن ئەردی بۆ خەلكێ زەرەرمەند هاتینە تەرخانكرن، پتریا خەلكێ هاتینە تەعریبكرن ل نەینەوا و دەشتا نەینەوا كوردبوونو هەتا نوكە ژی خەلكێ مە یێ كورد ماینە و ب پارچەكا ئەردی نەهاتینە قەرەبووكرن.
زێدەتر گۆت: نە ب تنێ خەلكێ زیلكان و ئەلقوش و شێخان و فەیدیێ دشێن مامەلێن خۆ یێن قەرەبووكرنێ پێشكێشێ لیژنا مادا 140ێ بكەن، بەلكۆ ئەو كوردێن مالێن خۆ ئیناینە دهۆكێ و هەولێر ژی دشێن مامەلێن خۆ برێڤەببەن، ب تایبەت ئەو خێزانێن هاتینە تەعریبكرن هەموو دشێن داخوازا مافێن خۆ بكەن و ژ وەرگرتنا پارچێن ئەردی مفاداربن.