د داخویانیەكێ‌ دا ڕاهێنەرێ‌ بەرنیاس یێ‌ پارێزگەهێ‌ و تیما فوتبۆلا یانەیا دهۆكێ‌ دیار كر ئەو نەچارە دەست ژ كاركێشانا خوە ژ كارێ‌ ڕاهێنەراتیێ‌ بكێشیت، ئەڤچەندە ژی نەساخییا من بوویە ئەگەر ئەز ڤێ‌ بڕیارێ‌ بدەم
زێدەتر ناڤهاتی بۆ رۆژنامەیا ئەڤرۆ گۆت: لڤێ‌ دووماهیێ‌ تەندروستیا من تێكچبوو، ئەز نەچاربووم هندەك پشكنینان بكەم، بمخابنی ڤە ئەنجام د باش نەبوون و نەچاركریمە د ڤێ‌ حەفتیێ‌ دا نەشتەرگەرییەكێ‌ بۆ گۆلچیسكێن خوە بكەم و دێ‌ چاڤەڕێ‌ بەرسڤا دووماهیێ‌ یا نۆژداری ژی بین، ئەڤچەندە ژی ئەگەر ئەز بڕیارا دەست ژ كار كێشانا خوە بدەم، ژبەركو دبیت هەستا سێ‌ بۆ چار مەهان ژ وەرزشی و یاریگەهان دووربكەڤم، ئەڤە ژی بڕیارەكا نەخوش بوویە لێ‌ چو ڕێ نینن و نەچارم.
ژلایەكێ‌ دووڤە سلێمان رەمەزانی گۆت: ل سەر داخوازا كارگێرییا یانەیێ‌ ئەز دێ‌ بەردەوامبن هەتا ڕاهێنەرەكێ‌ نوو بهێتە دەستنیشان كرن، بڕێیا هەوە ئەز سۆپاسییا كارگێریێ‌ دكەم كو بەردەوام دگەل من هاریكاربووینە، من حەز دكر بەردەوامبن لێ‌ ئەڤ نەساخییە بۆ ئەگەر دوور بكەڤم.
هەروەسان ل دۆر یاریێن بۆری و ئاستێ‌ تیمێ‌ ناڤهاتی گۆت: ب مخابنی ڤە د چار یاریێن بۆری دا ئەم نەشیان سەركەڤتنان بینن ئەڤە ژی بۆ كێم بەرهەڤبوونا بەری دەستپێكرنا وەرزێ‌ نوو بوو، لێ‌ گەشبینم د دەمەكێ‌ نیزك دا تیما مە ب هێز ڤەگەڕیت، مە یاریزانێن خودان شیان هەنە و پشتەڤانییا كارگێرییا یانەیێ‌ یا بهێز و جەماوەرێ‌ یانەیێ‌ دێ‌ بیتە ئەگەر كو دهۆك هێزا خوە ڤەگەڕینیت.
بۆ زانین ژێدەرەكێ‌ تایبەت بۆ رۆژنامەیا ئەڤرۆ دیاركر بابەتێ‌ ئیمزاكرنا گرێبەستێ‌ دگەل ڕاهێنەر ئەحمەد سەلاح مایە هەلاویستی ژبەركو ئەو گرێدایی هەلبژاتیێ‌ ئیراقێ‌ یە و دبیت ئەڤرۆ فدراسیۆنا فوتبۆلا ئیراقێ‌ چارەنڤیسێ‌ وی ئێكلا بكەت و دهێتە پێشبینیكرن دێ‌ گەردەن ئازاكرنێ‌ ب نڤێسارەكێ‌ بۆ ڕاهێنەر فرێكەت ژبۆ ئیمزاكرنا گرێبەستا یانەیا دهۆكێ‌.

ستێرێ‌ یانەیا سەنحاریب و كچا پارێزگەها دهۆكێ‌ دورین رۆمێل شمۆ خەلاتێ‌ باشترین یاریزان د قارەمانییا رۆژئاڤا ئاسیا یا ڤۆلی بۆلێ‌ وەرگرت، پشتی شیایی دگەل هەلبژارتیێ‌ ئیراقێ‌ ڕێزا ئێكێ‌ د لیستەیا یاریزانێن سەنتر یێن قارەمانیێ‌ هاتی، د هەڤڕكیێن واندا ئەوا ب پشكدارییا شەش هەلبژارتیێن عەرەبی ل وەلاتێ‌ ئوردنێ‌ هاتییە كرن و هەلبژارتیێ‌ ئیراقێ‌ ڕێزا سێیێ‌ هات.
ل دۆر ڤێ‌ یەكێ‌ داود ڕەبەن سەرۆكێ‌ یانەیا سەنحاریب كەیفخوەشیا خوە دیار كر بۆ رۆژنامەیا ئەڤرۆ گۆت: پیرۆزباهیێ‌ ل یاریزانا خوە كچا پارێزگەها دهۆكێ‌ دۆرین رۆمێل دكەین كو شیایی ل سەر ئاستێ‌ قارەمانییا رۆژئاڤا ئاسیا وەكو باشترین یاریزان سەنتەر ناسناڤ ب دەستڤە ئینایی، كەیفخوەشم بڤێ‌ دەستكەڤتی یا كچا یانەیا سەنحاریب و پارێزگەهێ‌، ژبەركو د بیتە جارا ئێكێ‌ د ڤێ‌ قارەمانیێ‌ دا و ژییەكێ‌ بچووك پشكداریێ‌ بكەت و ئەڤێ‌ ناسناڤێ‌ ب زەحمەت بدەستڤە بینت كو بتنێ‌ یاریزانێن زێدەت شارەزاهی هەیی ل سەر ئاستێ‌ عەرەبی و نێڤدەولەتی ب دەستڤە دئینن.
هەروەسان ناڤهاتی گۆت: وەكو یانەیا سەنحاریب ل دووڤ پلانا سالانە تا ڕادەیەكێ‌ باش مە شیاییە یارییا ڤۆلی بۆلا كچان ب هێز ڤەگەڕینن و بەلگە ژی بەری مەهەكێ‌ ئەم شیایین ناسناڤێ‌ خولا ئیراقێ‌ ب دەستڤە بینن، بۆ مە گرنگ ئەم یێ‌ كار ل سەر دكەین ئەو ژی سەرهلدانا نڤشەكێ‌ نوو یێ‌ كچێن مە بۆ یارییا ڤۆلی بولێ‌ یە و دێ‌ بەردەوامبین كو نە بتنێ‌ ل سەر ئاستێ‌ ئیراقێ‌ بەلكو دەرڤە ژی بگەهینە گۆپیتكێ‌ و دەستكەڤتان ب دەستڤە بینن، دۆرین رۆمێل نموونەیا كچێن پارێزگەهێ‌ و یانەیا سەنحاریبە كو دێ‌ رۆلەكێ‌ مەزن هەبیت بۆ ئەنجامێن باشتر.

بەری دەستپێكرنا وەرزێ‌ نوو یێ‌ خولا پلا نایابا كوردستانێ‌ یا فوتبۆلێ‌ هەتا نوكە دو یانەیێن هەرێمێ‌ ڤەكێشانا خوە ژ خولێ‌ بۆ وەرزێ‌ 2025-2026ێ‌ ڕاگەهاند و ئەگەرێن سەرەكی بوو قەیرانا دارای ڤەگەڕاند.
پشتی هەر ئێك ژ یانەیا برایەتی و هەلۆ ب فەرمی خوەڤەكێشانا خوە ژ خولا پلا نایابا كوردستانێ‌ بۆ وەرزێ‌ نوو ڕاگەهاندی و ئەگەرێن ڤێ‌ بڕیارێ‌ ژبەر كاودانێن نە خۆش یێن دارایی دا د نڤێسارێن فەرمی بۆ فدراسیۆنێ‌ دیاركربوون.
ب شێوەیەكێ‌ فەرمی فدراسیۆنا فوتبۆلا كوردستانێ‌ بەلاڤكرییە كو پشتی خوە ڤەكێشانا هەردو یانەیێن برایەتی و هەلۆ ژ خولا نایاب بۆ وەرزێ‌ نوو دێ‌ 12 یانە پشكدارن پشتی یانەیا پیشەسازی ژی ژ بڕیارا خوە لێڤەبووی و ڤەگەریایە خولی و دیار كر بۆ وەرزێ‌ 2025-2026 دو یانە دێ‌ پاشڤە چنە پلا ئێكا كوردستانێ‌، یارییا پلەی ئۆف دێ‌ دناڤبەرا تیما خودانا 10ێ‌ یا خولا نایاب تیما خودانا ڕێزا پێنجێ‌ یا خولا پلا ئێكا كوردستان نا هێتە كرن، بەلكو بڕیار هاتییە دان چار یانە ژ پلا ئێك دەربازبنە پلا نایابا كوردستانێ‌.

پشتی ب دووماهی هاتنا هەڤڕكیێن قارەمانییا رۆژئاڤا ئاسیا یا ڤۆلی بۆلێ‌ ل سەر ئاستێ‌ كچان ئەوا ل وەلاتێ‌ ئوردن هاتیە كرن، هەلبژارتیێ‌ ئیراقێ‌ ل ڕێزا سێیێ‌ هات، كۆمەكا یاریزانێن كوردستانی ئاهنگ دناڤا هۆلێ‌ دا گێڕا ب بلندكرنا ئالایێ‌ كوردستانێ‌، ئەڤێ‌ چەندێ‌ سەرۆكێ‌ فدراسیۆنێ‌ حەبیب ئەللاوەندی تۆڕەكرییە و گەڤێن دوورئێخستنێ‌ و سزایان ل سەر كرییە.
پشتی ب دووماهی هاتنا قارەمانیێ‌ و دەستڤەئینانا ڕێزا سێیێ‌ ل سەر ئاستێ‌ رۆژئاڤا ئاسیا، حەفت یاریزانێن كوردستانێ‌ ب كەیفخوەشیی ئالایێ‌ كوردستانێ‌ بلند كرینە و وێنەیەكێ‌ یادگاری گرتینە ئەو ژی هەر ئێك ژ دەشنێ‌ قاسم، كاژین جەلال، بەهرە حامد، دیە وەلید، هێلین عونەر، هەمیشە هوشیار و پریڤە ڕزگا، ئەڤچەندە بوویە ئەگەر حەبیب ئەللاوەندی سەرۆكێ‌ فدراسیۆنا ڤۆلی بۆلا ئیراقێ‌ داخواز ژ شاندێ‌ هەلبژارتیێ‌ خوە كرییە ڕاپۆرتەكا تەسەل بۆ فرێكەن و دووڤدا گەڤ كرینە كو دێ‌ سزایێن توند دژی ئەوا یاریزانان هێتە كرن.
ژلایێ‌ خوەڤە ئێك ژ یاریزانێن پشكدار دگەل هەلبژارتێ وێنەیەكێ‌ خوە دگەل ئالایێ‌ كوردستانێ‌ بەلاڤكرییە و تێدا دیار كرییە كو ئالایێ‌ كوردستانێ‌ هێمایێ‌ گەلێ‌ مەیە و ل دووڤ دستۆرێ‌ ئیراقێ‌ مافێ‌ مەیە بهێتە بلند كرن.
ل دووڤ ژێدەرێن نێزیك ئەڤرۆ دێ‌ فدراسیۆنا ڤۆلی بۆلا ئیراقێ‌ كۆم بیت ژبۆ گەنگەشە ل سەر ڤی بابەتی و دهێتە پێشبینیكرن بڕیار بهێنە دان، ل دووڤ پێزانینان دبی تتنێ‌ سزایێن كارگێری بن دوورئێخستنا چەند یاریزانان، لێ‌ یێن دارایی نا هێنە دەركرن.

خوە بەرهەڤكرن بۆ وەرزێ‌ نوو یێ‌ خولێن فوتبۆلا ئیراقێ‌ و كوردستانێ‌ 2025-2026 هەردو یانەیێن دهۆك و زاخۆ ب شێوەیەكێ‌ فەرمی ستاڤێن ڕاهێنانێ‌ یێن پێن تیمێن خوە د ئاستێن جودا دا ڕاگەهاندینە و بڤی شێوەیی.
كادرێن ڕاهێنانێ‌ یێن یانەیا دهۆك
بۆ ئاستێ‌ ل بن 21 سالی دا هەر ئێك ژ، د. ڕابین هاشم، راهێنەرێ‌ تیمێ‌، د. دیار رەمەزان هاریكارێ‌ ڕأهێنەری و دلۆڤان تیجر ڕاهێنەرێ‌ گۆلپارێزان، بۆ تیما ژیێ‌ ل بن 19 سالی دا پێكهاتینە ژ، روباد خەلیل ڕاهێنەر، ئاری شەفیق هاریكارێ‌ وی و زیاد عەبدولرەحیم ڕاهێنەرێ‌ گۆلپارێزان، بۆ تیما ل بن ژیێ‌ 17 سالی دا نەشوان عەلی ڕاهێنەر و هەر ئێك ژ بەیار عەبدولعەزیز هاریكارێ‌ وی و كاوە دینو ڕاهێنەرێ‌ گۆلپارێزان، بۆ تیما ل بن 16 سالی دا محەمەد سەعەد ڕاهێنەر، بیلال ئەمین هاریكارێ‌ وی و ئازاد محیەددین ڕأهێنەرێ‌ گۆلپارێزان، بۆ تیما ل بن 14 سالی دا، شڤان محەمەد ڕاهێنەر، هەوار عەبدولجلیل هاریكارێ‌ وی و ئەحمەد ماجد ڕاهێنەرێ‌ گۆلپارێزان، هەروەسان هەر ئێك ژ یوسف رەشید جێگرێ‌ سەرۆك یانە و ئەمیر عەبدولعەزیز ڕاهێنەرێ‌ بەرنیاس یێ‌ پارێزگەهێ‌ وەكو لژنەیا سەرپەرشت بۆ تیمێن خوە دانان.
كادرێن ڕاهێنانێ‌ یێن یانەیا زاخۆ
بۆ تیمێن ل بن ژیێ‌ 21 سالی دا، تارق زیاد ڕاهێنەری و نەوازد عەلی هاریكارێ‌ وی، بۆ ژیێن 17 سالی دا، بەهدین عەلی ڕاهێنەرێ‌ تیمێ‌ و سیهاد محەمەد هاریكارێ‌ وی، بۆ ژیێ‌ ل بن 16 سالی دا وار رەمەزان ڕاهێنەر، ئەحمەد یاسین هاریكارێ‌ وی و بێوار سالم سەرپەرشتێ‌ تیمێ‌، بۆ تیمێ، ل بن 14 سالی دا، دیار حسێن ڕاهێنەرێ‌ تیمێ‌ و محەمەد سەبری هاریكارێ‌ وی، هەروەسان عەندنان خەیروللا وەكو سەرپەرشتێ‌ گشتی یێ‌ تیمان هاتە دانان