ب، سه‌رجان مەحمود:

ئەندامەکێ پەرلەمانێ تورکیا دیار کر، هەڤپەیمانیا جمهور نها پرۆژە یاسایەکێ بەرهەڤ دکەت و دێ د دەمەکێ نێزیک دا هێتە پەرلەمانی و بێگومان ب پەسەندکرنا وێ یاسایێ دێ دووماهی ب سیاسەتا قەیوومان ل تورکیا هێت.

ساروهان ئۆلوچ ئەندامێ پەرلەمانێ تورکیا سەر ب فراکسیۆنا دەم پارتی د داخویانیەکێ دا بۆ دەزگەهێن راگەهاندنا تورکیا دیار کر، سیاسەتا قەیوومان یا چەند سالێن بۆری زیانێن خوە یێن گەلەک مەزن بۆ تورکیا هەبووینە، ناڤودەنگێ تورکیا د ئاستێ جیهانی و هەرێمی دا گەلەک خراب بوو، چونکی دانانا قەیوومان ب جهێ کەسێن هەلبژارتی ب دەنگێ خەلکی کارەک گەلەک خرابە و ب تەمامی ل دژی هەلبژارتنانە، ل دژی دیموکراسیێ یە، ژ بەر ڤێ یەکێ ژی پشتی فشارێن زێدە ژ ئالیێ دەم پارتی و پارتا کۆماری ل دەستهەلاتێ هاتنە کرن، نها پرۆژە یاسایەک دهێتە بەرهەڤ کرن و گۆت: (سەردەمێ سیاسەتا قەیوومان ل تورکیا دێ ب دووماهی هێت، د ناڤ ئاکپارتیێ دا ژی گەلەک کەس ل دژی دانانا قەیوومان بوون، چونکی نابیت کەسەک ب دەنگێ خەلکی بهێتە هەلبژارتن و پاشی ژی ژ ئالیێ دەستهەلاتێ ڤە ب بەهانەیێن جودا جودا ژ کاری بهێتە دوورخستن و کەسەک ب جهێ وی وەکو قەیووم بهێتە دانان، ئەو یەک کارەک گەلەک شاشە و دڤێت دووماهی ب سیاسەتا قەیوومان ل تورکیا بهێت).
ئەندامێ پەرلەمانێ تورکیا ئەو یەک ژی دیار کر، هەتا نها گەلەک جاران پەرلەمانێ ئۆرۆپا و سازیێن مافێن مرۆڤی دژبەریا خوە ل هەمبەر سیاسەتا قەیوومان ل تورکیا دیار کرینە، براستی ژی دانانا قەیوومان کاریگەریا خوە یا گەلەک خراب بۆ تورکیا هەبوو، رەنگە بەری نها هندەک ژ بەرپرسێن ئاکپارتیێ و دەستهەلاتێ ب گشتی وەسا هزر دکرن دێ شێن وەسا دەم پارتی یان ژی هێزێن دی یێن ئۆپۆزسیۆنێ لاواز کەن، لێ سیاسەتا قەیوومان زیانەکا گەلەک مەزن گەهاندە تورکیا و گۆت: (ل چ وەلاتەکێ دیموکراتی ل جیهانێ تشتەک وەسا نینە، مخابن مە بەری نها وەکو هەدەپە و ڤێ دووماهیێ ژی وەکو دەم پارتی گەلەکە جاران مە داخواز ژ دەستهەلاتێ کربوو دووماهیێ ب سیاسەتا قەیوومان بینن، کو کارەک گەلەک خرابە و ل دژی دیموکراسیێ یە، لێ وی دەمی هەڤپەیمانیا جمهور ب بەهانەیا شەڕێ ل دژی تیرۆرێ چو نەکر، لێ نها رەوش ب تەمامی ل تورکیا هاتیە گوهۆڕین و گرنگە ئێدی سیاسەتا قەیوومان ژی نەمینیت).
هەژی ئاماژەپێدانێ یە کو هەتا نها ب دەهان هەڤسەرۆکێن باژێرڤانیان یێن سەر ب دەم پارتی ژ ئالیێ دەستهەلاتێ ڤە ب بەهانەیا کو هاریکاریا رێکخستنەکا تیرۆرستی دکەن ژ کاری هاتینە دوورخستن و ب جهێ وان دەولەتا تورکیا کەسەک وەکو قەیووم دانایە و بەری دەمەکێ دەولەت باخچەلی ژی دیار کربوو دڤێت ئێدی سیاسەتا قەیوومان ل تورکیا نەمینیت.

وەزیرەکێ ئسرائیلێ دیار دکەت هەکە پەیوەندیێن ئسرائیلێ ل گەل عەرەبستانا سعوودیێ ئاسایی ببن ئەو یەک دێ بیتە ئەگەر پاشەرۆژا رۆژهەلاتا ناڤین بهێتە گوهۆڕین و نها ئاماژەیێن باش ژ ئالیێ عەرەبستانێ ڤە هەنە و هەکە چو ئاستەنگی دروست نەبن دبیت د ناڤ سالەکێ دا پەیوەندیێن ئسرائیلێ و عەرەبستانا سعوودیێ ئاسایی ببن، هەکە تشتەک وەسا روو بدەت بێگومان دێ پاشەرۆژا رۆژهەلاتا ناڤین هێتە گوهۆڕین.
میکی زوهار وەزیرێ رەوشەنبیری یێ ئسرائیلێ ئەو یەک ژی دیار کر، ئەمریکا دەست ب بزاڤەکا مەزن یا کری دا کو قووناغەکا نوو د پەیوەندیێن ئیسرائیلێ و عەرەبستانێ دا دەستپێ بکەت، بێگومان هەکە تشتەک وەسا روو بدەت دێ بۆ هەموو وەلاتێن عەرەبی ژی باش بیت.
ئەو یەک د دەمەکێ دایە کو بەری چەند رۆژان بەرپرسەکێ وەزارەتا دەرڤە یا ئەمریکا ژی دیار کربوو هەکە عەرەبستان پەیوەندیێن خوە ل گەل ئسرائیلێ ئاسایی بکەت ئەمریکا ژی بەرهەڤە فرۆکەیێن F35 بدەتە عەرەبستانێ.

محەمەد عەلی مەردیلی فەرماندارێ هێزێن ناڤخوەیی یێ حەلەبێ بۆ دەزگەهێن راگەهاندنێ دیار کر، دەمەک بوو ژ ئالیێ هندەک گرۆپێن چەکدار ڤە دۆرپێچ ل سەر هەر دو تاخێن کوردان هاتبوو دانان، لێ نها رەوش ئارام بوویە و دۆرپێچا ل سەر هەر دو تاخێن کوردان ل حەلەبێ هاتە راکرن. ئەو یەک ژی ژ ب ئاشتیا ناڤخوەیی یا ل سووریێ گەلەک گرنگە.
فەرماندارێ هێزێن ناڤخوەیی یێ حەلەبێ ئەو یەک ژی دیار کر، بەری نها رێککەفتنا ئێکێ نیسانێ د ناڤبەرا وان و هێزێن سەر ب شامێ دا هاتیە ئیمزا کرن، وەکوە هێزێن کوردی یێن ل حەلەبێ وان دڤێت چو ئالۆزی د ناڤبەرا وان و شامێ دا روو نەدەن، لێ مخابن هندەک گرۆپێن چەکدار ب پشتەڤانیا هندەک هێزێن دەرەکی بزاڤا دروستکرنا ئالۆزیان ل حەلەبێ کرن، لێ نها رەوش باشترە و دۆرپێچا ل سەر هەر دو تاخێن شێخ مەقسود و ئەشرەفیە هاتە راکرن.