هەولێر، قائید میرۆ:
رێڤەبەرێ گشتیێ بازرگانی ل وەزارەتا بازرگانیا هەرێما كوردستانێ ئاشكرا كر، پێدڤیە وەلاتی لەزێ د تژیكرنا فۆرما ئەلكترۆنی یا ئاهێن خوارنێ دا بكەن، بەروڤاژی پشتی دەم ب دوماهی دهێت، بۆ هەر كەسەكی 10 هزار دێ هێنە وەرگرتن هەتا بشێت فۆرمێ تژی بكەت.
نەوزاد شێخ كامل، رێڤبەرێ گشتیێ بازرگانی بۆ رۆژناما ئەڤرۆ دیاركر، دوماهی ژڤان بۆ تژیكرنا فۆرما ئەلكترۆنی یا ئاهێن خوارنێ 5/7/2025 یە، بەلێ دێ بزاڤان كەین هێشتا دەم بهێتە درێژكرن و حەفتیەكا دی دەلیڤە ب وەلاتیان بهێتەدان، بەروڤاژی وەلاتی ماف نامینیت و چو كەسەك بێبەهر نابیت ژ فۆرما ئەلكترۆنی، بەلێ وی دەمی دێ بیتە ب پارە و بێی پارە كەس نەشێت پشكداریێ بكەت و گۆت: «پشتی ژڤانێ تۆماركرنێ ب دوماهی دهێت، هەر وەلاتیەكێ، ب هەر ئەگەرەكی نەشیای فۆرما ئەلكترۆنی تژی بكەت و پشكداربیت، ل هەمبەر تژیكرنا فۆرمێ دێ پارەی دەتە حوكمەتێ».
نەوزاد شێخ كامل گۆتژی: «وەلاتیێن پشتی دەمێ تژیكرنا فۆرما ئاهێن خوارنێ دڤێت هەژمارەكا بانكی هەبیت و ب رێیا ڤێ هەژمارا بانكی بۆ هەر كەسەكی 10 هزار دینارێن ئیراقی هەمبەر پشكداریكرنێ د فۆرما نوو یا ئاهێن خوارنێ دا، دێ دەتە حوكمەتێ، لەوڕا داخوازێ ژ وەلاتیان دكەین، لەزێ بكەن، هێشتا ژڤان یێ مای و پشكداریێ د فۆرما ئەلكترۆنی دا بكەن و ناڤێن خۆ تۆمار بكەن، بەروڤاژی ماف نامینیت و دێ بیتە ب پارە».
نيشاندان