لەزگین جۆقی:

سەرپەرشتێ ئیدارەیا سەربخۆ یا زاخۆ راگەهاند، چار سال ل سەر ئیدارەیا سەربخۆ یا زاخۆ دەرباز بوون و دبێژیت: ب پشتەڤانیا مەسرور بارزانی، سەرۆكێ حكومەتا هەرێما كوردستانێ، كار و خزمەتەكا مەزن ل زاخۆ هاتیە كرن و ئاڤەدانی یا بەردەوامە.
گوهدار شێخۆ، سەرپەرشتێ ئیدارەیا سەربخۆ یا زاخۆ گۆت: «ئەم خزمەتكرنا خەلكێ زاخۆ، ب ئەركێ خوە دزانین و چ منەتا ژی ناكەین، خەلكێ مە ژ هەژی خزمەتگوزاریێن بەردەوامن ل باژێرێ زاخۆ، د ڤان چار سالێن دەربازبووی دا، 378 پڕۆژەیێن جودا كەفتینە د خزمەتا خەلكێ سنۆرێ ئیدارەیا سەربخۆ یا زاخۆ دا».
گۆتژی: «شۆڕشەكا مەزن یا ئاڤەدانیێ ل زاخۆ هاتیە كرن، ئەڤ كار و خزمەتا هاتیە پێشكێشكرن د ڤان سالێن بۆری دا، دێ دەستپێكەكا نوو یا خزمەتگوزاریان بیت بۆ خەلكێ زاخۆ، راستی ژی بێ ویژدانییە ئەگەر بێژین چو بۆ زاخۆ نەهاتیە كرن، بەلكو زاخۆ د پێشڤەچوونەكا مەزن دایە و دێ بەردەوام كاركەین بۆ خزمەتكرنا خەلكێ زاخۆ».
سەرپەرشتێ ئیدارەیا سەربخۆ یا زاخۆ زێدەتر گۆت: «نوكە زاخۆ بوویە پاقژترین باژێڕ ل هەرێما كوردستانێ و ئێراقێ و ئەم شانازیێ ب پاقژیا زاخۆ دبەین».

رەمەزان زەكەریا:

ل دووڤ راسپاردەیێن مەسرور بارزانی، سەرۆكێ حكومەتا هەرێما كوردستانێ بۆ پاراستنا ژینگەهێ و پاقژڕاگرتنا جهێن گشتی ب سەرپەرشتیا د. دلاوەر بۆزۆ میكائیل، دەڤەردارێ ئاكرێ كۆمبوونەكا تایبەت ل گەل رێڤەبەرێن ناوچەداریان و هەژمارەكا سازیێن پەیوەندیدار ئەنجام دا.
دەڤەردارێ ئاكرێ د كۆمبوونێ دا ئاماژە دا گرنگیا پاراستنا ژینگەهێ و پاكژڕاگرتنا جادە و كۆلانێن ناڤ باژێڕ و گوندان و جهێن گشتی و گۆت: «ل دووڤ راسپاردەیێن مەسرور بارزانی، سەرۆكێ حكومەتا هەرێما كوردستانێ، دڤێت ئەڤ بابەتە ب گرنگی بهێتە وەرگرتن و پێدڤیە هەموو رێڤەبەریێن پەیوەندیدار رۆلەكێ مەزن هەبیت د پاراستنا ژینگەهێ و پاقژڕاگرتنا جهێن گشتی، دیسا خەلكێ مە ژی ب هشیاری سەرەدەریێ‌ ل گەل پاراستنا ژینگەهێ بكەت».

رەمەزان زەكەریا:

ل سەر پڕۆژەیێ دروستكرنا جۆتسایدێ رێكا دەڤەرداریا بەردەڕەشێ‌ بۆ كەلەكێ‌ هەشت ئۆڤەرپاس دێ هێنە چیكرن.
ئەندازیار ئەحمەد تاهر زەینەل، سەرپەرشتێ پڕۆژەیێ جۆتسایدێ‌ بەردەڕەشێ‌ بۆ كەلەكێ‌ گۆت: «بۆ پتر ب ساناهیكرنا كارێ وەلاتیان، هەشت ئۆڤەرپاس بۆ وان گوندان دهێنە چێكرن، یێن دكەڤنە سەر رێكێ، بەلێ هەتا نوكە دیزاینێ وان تەمام نەبوویە».
گۆتژی: «پڕۆژەیێ رێكا بەردەڕەشێ‌ بۆ كەلەكێ‌، ب ڕەنگەكێ مودێرن دهێتە چێكرن و خز‌مەتگوزاریێن وەكو چێكرنا پاركێن بچووك ل سەر رێكێ بۆ راوەستاندنا ترۆمبێلان ل دەمێ شوفێر پێدڤی ب راوەستیانێ هەبیت ل سەر رێكێ و رێكا تایبەت بۆ دەربازبوونا تەرش و كەوالی ژی د ناڤ پڕۆژەی دا هەنە».
رێكا د ناڤبەرا بەردەڕەشێ‌ بۆ كەلەكێ‌ دا ب گوژمێ 218 ملیار دیناران ب دەسـتێ ئەندازیار و كریكارێن ناڤخۆیی ب دریژاهیا 35 كیلۆمەتران دهێتە چێكرن.

دهۆك، دلۆڤان ئاكرەیی:

بەرپرسەكێ بەلاڤكرنا سۆتەمەنییێ ل حوكمەتا هەرێما كوردستانێ دیاركر، دەست ب دابینكرنا گازاسپی هاتیە كرن و بزاڤ دهێنە كرن، بەری هاتنا وەرزێ سەرمایێ ل سەر وەلاتیان ب بهایێ‌ پشتەڤانیكری بهێتە بەلاڤكرن.
ئاری كاكەشین، بەرپرسێ بەلاڤكرنا سۆتەمەنییێ ل هەرێما كوردستانێ بۆ رۆژنامەیا ئەڤرۆ گۆت: «د نوكە دا ب بەردەوامی گازاسپی دگەهیتە مە و ئەم ل هیڤیێینە رێنمایی بۆ مە بهێن، دا كو بەری دوماهیا ڤێ مەهێ‌ یان دەستپێكا مەها بهیت دەست ب بەلاڤكرنا گازاسپی بهێتە كرن، هەروەكی سالا بۆری دێ ژ دەڤەرێن چیایی دەست پێ كەین، حوكمەتا هەرێما كوردستانێ دێ پشتەڤانیا بهای كەت و ب بهایەكێ‌ گونجای گازاسپی ل سەر وەلاتیان دێ هیتە بەلاڤكرن».
ئاری كاكەشین ئاشكرا ژی كر، هەر خێزانەك دێ بەرمیلەكا گازاسپی وەرگریت، ئەڤ چەندە دێ كارتێكرنێ ل سەر ئەرزانبوونا بهایێ‌ گازاسپی ل بازاڕی ژی كەت و گۆت: «هەرچەندە هەتا نوكە بەغدا بۆ ئەڤ سالە گازاسپی بۆ مە دابین نەكریە و مە داخواز كریە و هەر دەمێ هاتە دابین كرن، كو دبیت پشكەكا كێم ژی بیت، بەلێ وەكو سالا بۆری ل سەر دەڤەرێن چیایی دێ هێتە بەلاڤكرن».

زاخۆ، دلۆڤان هالۆ:

ڕێڤەبەرییا گشتی یا گەشتوگوزارا زاخۆ دیاركر كو ل دەمەكێ نێزیك فەستیڤالا بالۆنێن ئاگری ل ئیدارا سەربخوە یا زاخۆ دێ هێتە ئەنجامدان.
ڕێڤەبەرییا گشتی یا گەشتوگوزارا زاخۆ، ئاماژە ب وێ چەندێ ژی كر كو د پلان دایە نێزیكی 25 هزار بالۆنان د ڤێ فەستیڤالێ دا ل ئەسمانێ زاخۆ بهێنە بلندكرن.
ڕێڤەبەرییا ناڤهاتی ئاشكرا ژی كر، هندەك پەیجان پێزانینێن نە دروست ل سەر قەبارە و ڕەنگێ بالۆنێن ڤێ فەستیڤالێ بەلاڤكرینە، یا دروست ئەڤەیە، كو ئەو بالۆنێن دێ‌ هێنە بلندكرن وەكو بالۆنێن د ڤی وێنەی دانە.

دهۆك، لەزگین جۆقی:

ل كۆمەلگەها سیباشێخدری ل دەڤەرداریا شنگالێ ڤەكرنا گۆڕێن ب كۆم دەستپێكر، كو ڕوفاتێن كچ و ژن و زارۆك و زەلامێن هەژمارەكا كەسێن ئێزدی د ناڤ دانە، كو ل سالا 2014 ژ لایێ تێرۆرستێن داعشێ‌ ڤە هاتبوونە گوللەبارانكرن.
شاكر میرانی، ئەفسەرێ دەستەیا ڤەكۆلین و كۆمكرنا بەلگەنامەیان ل پارێزگەها دهۆكێ راگەهاند، 129 گۆڕێن ب كۆم و تاكە كەسی ل دەستەیا ڤەكۆلین و كۆمكرنا بەلگەنامەیان هاتینە تۆماركرن و هێشتا هەمی گۆڕێن ب كۆم نەهاتینە ڤەكرن.
ژ كۆما پتر ژ 850 روفات و هەستیێ قوربانیێن جینۆسایدا شنگالێ، هەتا نوكە ناسنامەیا 293 كەسان ئاشكرا بوویە و پتریا روفات و هەستیێن قوربانیێن جینۆسایدا شنگالێ ل نۆشداریا داد ل بەغدانە.