پشتی شاندەكێ‌ فدراسیۆنا فوتبۆلا كەنداڤی ب سەرۆكاتییا جاسم ئەلرمێحی ئەمیندارێ‌ گشتی یێ‌ فدراسیۆنێ‌ سەرەدانا هەرێما كوردستانێ‌ و باژێرێ‌ زاخۆ كری ژبۆ وەرگرتنا پێزانێن مەیدانی یێن ژێرخانەیا وەرزشی یا یانەیا زاخۆ خوە بەرهەڤكرن بۆ كۆپا كەنداڤی یا وەرزێ‌ 2025- 2026ێ‌ ئەوا بڕیارە ل 30ێ‌ ڤێ‌ مەهێ‌ یانەیا زاخۆ وەكو نوونەراتییا ئیراقێ‌ و كوردستانێ‌ ئێكەم یارییا خوە بەرانبەر یانەیا ئەلقادسیە یا كوێتی بكەت.
ل دۆر ڤێ‌ سەرەدانێ‌ جاسم ئەلرمێحێ‌ بۆ دەزگەهێن ڕاگەهاندنێ‌ هاتنا خوە بۆ زاخۆ و بووچوونا خوە دیار كر و گۆت: ل دووڤ ڕێنمایێن قارەمانیێ‌ بەری دەستپێبكەت لژنەیەك ژ فدراسیۆنا كەنداڤی سەرەدانا ئەوان یانەیێن پشكدار د قارەمانیێ‌ دا دكەت ژبۆ وەرگرتنا هەموو پێزانینان ژلایێ‌ تەكنیكی و ڕێكخستی و یاریگەهـ و جهێ‌ وێ‌، دووڤدا دێ‌ بۆ فدراسیۆنا كەنداڤی هێتە بلندكرن و بڕیارا ئێكلاكەر ل سەر یاریگەهێ‌ و جهێ‌ وێ‌ هێتە دانان، یاریگەها زاخۆ و باژێرێ‌ وێ‌ یێ‌ گونجایە، هوسا دیارە دێ‌ فریزەیێ‌ یاریگەهێ‌ هێتە گوهۆڕین ئەڤە ژی خالەكا گەلەك باشە، دێ‌ جوانتر یاریگەه دیاربین، پێنەڤێت جەماوەرێ‌ زاخۆ ژی ئێك ژ جەوهەرێ‌ قارەمانیێ‌ بیت.
هەروەسان ناڤهات گۆت: ب گشتی پشكدارییا یانەیێن ئیراقی و كوردستانی د قارەمانیێ‌ دا فاكتەرێن پێشچاڤن بۆ سەركەڤتنا بڕێڤەچوونا قارەمانیێ‌، هەروەكو یا قارەمانییا وەرزێ‌ بۆری مە دیتی پشكدارییا یانەیا دهۆك و ئەو فەستیڤالێن جوان و بەرهەڤبوونا جەماوەرەكێ‌ ئێكجار زوور كو بڤی شێوەیی لدووماهیێ‌ ژی ب سەرفەرازی بوونە قارەمانێن كۆپا دبیتە جارا ئێكێ‌ د قارەمانیێ‌ دا دهێتە دیتن، پێشبینی دكەم پشكدارییا یانەیا زاخۆ د وەرزێ‌ ئەڤ سالە دا دێ‌ هێز و جوانیەكا دی ژی دەتە قارەمانیێ‌ و جەماوەرەكێ‌ ئێكجار زوور هەیە، ب هیڤی نە قارەمانییا ئەڤ سالە جودابیت و مە پێنگاڤێن باشتر ژ سالا بۆری هەنە بۆ سەركەڤتنا كاروانێ‌ قارەمانیێ‌.
بۆ زانین ل وەرزێ‌ بۆری بۆ جارا ئێكێ‌ د دیرۆكا فوتبۆلا ئیراقێ‌ و كوردستانێ‌ دا یانەیا دهۆك ناسناڤێ‌ قارەمانیێ‌ ب دەستڤە ئینابوو، پشتی د یارییا دویێ‌ یا هاتنووچوونێ‌ یا دووماهیێ‌ و ئێكلا كەر دا ب سەركەڤتی ل سەر ئەلقادسیە یا كوێتی ب گۆلەكێ‌ بێ‌ بەرانبەر.
یانەیا زاخۆ د كۆما ئێكێ‌ دا یە ئەوا پێكهاتییە ژ یانەیێن، قادسییە یا كوێتی، سترە یا بەحرێنی و عەین یا ئیماراتی، كۆما دویێ‌ پێكهاتینە ژ، ڕەیان یا قەتری، شەباب یا سعۆدیێ‌، نەهزە یا عومانی و تەزامن حەزرموت یا یەمەنی، یاریێن وان ب شێوەیێ‌ خول دو قۆناغ هێنە كرن، هەر كۆمەكێ‌ دو یانە دێ‌ دەربازبنە قۆناغا پێش دووماهیێ‌.

ل دووماهیێ‌ یێ‌ فرەنسی ئوسمان دیمبێلێ‌ ستێرێ‌ یانەیا پاریس سانجێرمان خەلاتێ‌ بالندۆر وەكو باشترین یاریزانێ‌ جیهانێ‌ بۆ سالا 2025ێ‌ وەرگرت، پێشكەڤت ل سەر هەموو ستێرێن جیهانێ‌، پشتی كاروانەكێ‌ ژووردانی و ژێهەلی د ناڤا فوتبۆلێ‌ دا دەربازكری.
دیمبێلێ ئەگەرەكێ‌ سەرەكی بوو د وەرزێ‌ 2024-2025 دا شیایی تیما وی ناسناڤێن خول و كۆپا فرەنسا و چامپیۆنز لیگ بدەستڤە بینیت كو دبینە جارا ئێكێ‌ د دیرۆكا یانەیا وی دا ئەوێ‌ شیایی 33 گۆلان و 13 ئەسیست دا تۆماربكەت و ڤەگەڕیتە ئاستێ‌ خوە یێ‌ جاران پشتی ل وەرزێ‌ پێشتر دگەل بەرشەلۆنا تووشی كۆمەكا هنگاڤتنا بوویی تا ڕادەیەكی گەهشتییە وێ‌ هزرێ‌ ئەو كاروانێ‌ خوە ب دووماهی بینیت.
هەرچەندە ل وەرزێ‌ بۆری دەستپێكا وی یا باش نەبوو لێ‌ هیدی ئاستێ‌ وی بەر ب بلندبوونێ‌ چوو، ل دەستپێكا 2025ێ‌ شیا ببیتە ئێك ژ ستێرێن بەرچاڤ 25 گۆل تۆماركرن دگەل هەشت ئەسیسێت، ژبلی گۆلێن دووماهییا وەرزێ‌ 2024ێ‌ كو هەموو دگەهنە 33گۆل دگەل 13 ئەسیست، لێ‌ ب گشتی د سالا 2025ێ‌ دا 46 ئەسیست هەتا نوكە هەنە.
پێشكەڤتنا ئوسمان دیمبێلێ بەرانبەر هەڤڕكێن خوە یێن بالندۆر تایبەت ستێرێ‌ بەرشەلۆنا لامین یامالی و هەڤالێ خوە فیتینیا و محەمەد سەلاحی هات دەرئەنجامێ‌ ئەسێست گۆلان، دیسان ئەگەرێ‌ سەرەكی یێ‌ تیما وی ناسناڤێ‌ چامپیۆنزێ‌ دەستڤەئینایی.
باشترینێن 2025ێ‌ د هەموو ئاستان دا
ل سەر ئاستێ‌ كچان یا ئسپانی ئیتانا بۆنامتی ستێرا بەرشەلۆنا بۆ باشترین یاریزان.
خەلاتێ‌ كۆپا بۆ باشترین یاریزانێ‌ گەنج گەشتە لامین یامالی ستێرێ‌ بەرشەلۆنا، خەلاتێ‌ باشترین یاریزانا كچ گەهشتە یا ئسپانی فیكی لۆپێز ژ یانەیا بەرشەلۆنا.
خەلاتێ‌ یاشین بۆ باشترین گۆلپارێزێ‌ جیهانێ‌ یێ‌ ئیتالی جیانلۆیجی دۆنارۆما یێ‌ یانەیا پاریس سانجێرمان، ل سەر ئاستێ‌ كچان گۆلپارێزا چێلسی یا ئنگلتەرایێ‌ هانا هامبتۆن خەلاتێ‌ وێ‌ وەرگرت.
خەلاتێ‌ یۆهان كرۆیف بۆ باشترین ڕاهێنەر یێ‌ ئسپانی لویس ئەنرێكی ژ یانەیا پاریس سانجێرمان، ل سەر ئاستێ‌ كچان گەهشتە ڕاهێنەرا ئنگلتەرا سارینا فیگمانێ‌.
خەلاتێ‌ جێرد مۆلەر وەكو باشترین گۆلكەر بۆ یێ‌ سویدی فیكتۆر جیۆكێرێس ژ یانەیا سپۆرتینگ لەشبۆنە یا پۆرتۆگالی، ژلایێ‌ خوەڤە ل سەر ئاستێ‌ كچان یا پۆلەندی ئیڤا بایۆر گۆلكەرا یانەیا بەرشەلۆنا خەلات وەرگرت.
یانەیا پاریس سانجێرمان خەلاتێ‌ باشترین یانە وەرگرت، ژلایێ‌ خوەڤە ل سەر ئاستێ‌ كچان یانەیا ئارسنال بوو باشترین یانە.

چاڤەڕێ‌ دهێتە كرن ئەڤرۆ ل دەمژمێر 10ی ئێكەم هەلبژارتن بۆ وەرزێ‌ نوو یێ‌ چار سالێن داهاتی بۆ دەستەیا نوو یا كارگێرییا یانەیا دهۆكێ‌ بهێنە كرن ئەوا 10 كەس خۆ بەربژاكرینە و بڕیارە ل دووڤ خشتەیەكێ‌ دیاركری ل مەها بهێت دێ‌ هەلبژارتنێن هەموو یانەیێن ل سنۆرێ‌ پارێزگەها دهۆكێ‌ هێنە كرن.
ل دۆر ڤێ‌ یەكێ‌ جەمال سلێمان ڕێڤەبەرێ‌ وەرزشی ل پارێزگەها دهۆكێ‌ بۆ رۆژنامەیا ئەڤرۆ گۆت: بڕیارە ئەڤرۆ ب بەرهەڤبوونا بەرێزان د. عەلی تەتەر پارێزگارێ‌ دهۆكێ‌ و د. نەوزاد عەبدوللا بەرپرسێ‌ لەقێ‌ ئێك یا پارتی دیموكراتی كوردستان وەكو دەستەیا گشتی پشكداریێ‌ د دەنگدانێ‌ دا بكەن ژ بۆ دەستەیا نوو یا كارگێرییا یانەیا دهۆكێ‌ بكەن ئەوا دێ‌ نێزیكی 241 كەسێن مافێن دەنگانێ‌ هەین پشكداربن كو دێ‌ ل هۆلا ڕەوشەنبیری ل باژێرێ‌ سێمێلێ‌ هێنە ئەنجامدان، دڤێ‌ پرۆسێسێ‌ دا 10 كەسان خوە بەربژاركرینە هەشت كەس یێن كارگێرییا نوكە نە و هەردو بەربژارێن نوو دلین كەمال وەكو ئەنداما كچ و عەلی موستەفا، ئەو كەسێن ب دەركەڤن ژ پێنچ ئەندامان كێمتر نەبیت و نەهـ ئەنداما زێدەتر نابیت، دووڤدا دێ‌ كارگێرییا نوو دكۆمبوونا خوە یا ئێكێ‌ دا سەرۆك، جێكر، سكرتێر و ڕێڤەبەرێ‌ دارایی دەستنیشانكەن ب شێوەیێ‌ دەنگدان و دێ‌ بۆ ب نڤێسارەكا فەرمی هێتە هنارتن.
هەرەسان ناڤهاتی گۆت: هەلبژارتنێن هەموو یانەیێن وەرزشی ل سنۆرێ‌ پارێزگەها دهۆكێ‌ دێ‌ هێنە كرن ل دووڤ خشتەیەكێ‌ تایبەت كو دێ‌ رۆژ و ژڤان رۆژانە بۆ هندەك یانەیان هێنە دەستنیشانكرن ئەوا هژمارەیا وان دگەیتە 17 یانەیان، بڕیارە مەها بهێت هەموو یانە هەلبژارتنێن خوە بكەن، پشتی هەموو یانەیان دەستەیا گشتی بۆ مە هنارتی و ژلایێ‌ ڕێڤەبەرییا گشتی یا وەرزشی هاتییە پەسەندكرن.
ل دووماهیێ‌ ناڤهاتی گۆت: بۆ هەلبژارتنێن ئەڤرۆ یێن یانەیا دهۆكێ‌ هەموو بەرهەڤی هاتینە كرن ل دووڤ ڕێنما و یاسایێ‌ دێ‌ كار هێتە بڕێڤەبرن، گەشبینن دێ‌ ب ئاوەیەكێ‌ ئازادانە و دیموكراسی هەلبژارتن ب ڕێڤەچن.
بۆ زانین ئەو 17 یانەیێن پارێزگەهێ‌ دێ‌ هەلبژارتنان كەن هەر ئێك ژ، دهۆك، ئاكرێ‌، ئافرەتێن دهۆك، گارە، شێلادزێ‌، سێمێل، تەناهی، سەنحاریب، ئامێدیێ‌، شێخان، بەردەرەش، دینارتێ‌، پۆلیتەكنیك، فرۆكەڤانی- بەرەگلاید-، میدیا یا خودان پێدڤیێن تایبەت، پیرس، بجێل.

ب شێوەیەكێ‌ فەرمی كارگێرییا یانەیا دهۆك یا وەرزشی ڕاهێنەرێ‌ خوە یێ‌ بەرازیلی سێرجیۆ ڤاریاس ژ ئەركێ‌ ڕاهێنەراتییا تیما خوە یا فوتبۆلێ‌ دوورئێخست، پشتی ئەوان ئەنجامێن لاواز و ڕژدییا وی ل سەر بڕیارەكێ‌ و ڕاهێنەرێ‌ پارێزگەهێ‌ سلێمان رەمەزان دێ‌ ب شێوەیێ‌ بەروەخت ئەركێ‌ ڕاهێنەراتیێ‌ وەرگریت، ئەڤچەندە هات پشتی دەربازبوونا دو یاریێن تیمێ‌ د خولا ستێرێن ئیراقێ‌ دا و تووشی خوسارەتیێ‌ بووی.
ل دووڤ ژێدەرێن رۆژنامەڤانی یانەیا دهۆكێ‌ ب نەچاری دەست ژ ڕاهێنەرێ‌ خوە یێ‌ بەرازیلی سێرجیۆ ڤاراس بەردا ژبەر دو ئەگەرێن جودا و نە گەهشتینە ڕێكەڤتنێ‌، ئێك ژوانا ژبەر ئاست و ئەنجامێن لاواز یێن تیمێ‌ د خولا ستێرێن ئیراقێ‌ دا دگەل هەر ئێك ژ ئەلگەرمە ب گۆلەكێ‌ تووشی خوسارەتیێ‌ بووی و دگەل یانەیا شورتە ب دو گۆلان تووشی خوسارەتیێ‌ بووی، ئەگەرێ‌ دویێ‌ پشتی یانەیا دهۆكێ‌ داخواز ژ ڕاهێنەری كری پشت گەرمیێ‌ ب هندەك یاریزانێن دی بكەت ئەوێن د وەرزێ‌ بۆری دا باشترین ئاست هەبوویە ژ وانا پیتەر گۆرگیس، ئەحمەد عەلی، لێ‌ ڕاهێنەر یێ‌ ڕژد بوو ل سەر بڕیارا خوە، ئەڤ چەندە بوو ئەگەر هەردو لا نە گەهنە چو ڕێكەڤتنان دەرئەنجام یانە بڕیارا دوورئێخستنا وی بدەت.
بۆ زانین تیما یانەیا دهۆك قارەمانا وەرزێ‌ بۆری یا كۆپا كەنداڤی بوو دیسان ناسناڤێ‌ كۆپا ئیراقێ‌ ژی ب دەستڤە ئینابوو، ل وەرزێ‌ ئەڤ سالە ب گوهۆڕینێن بەرچاڤ دناڤ ڕێزێن تیما خوە دا كرییە، بڕیارا یارییا سێیێ‌ ژ خولا ستێرێن ئیراقێ‌ ل شەمبییا بهێت مێڤاندارییا یانەیا كەرخ یا بەغدایی بكەت.