ئەندامەكێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان راگەهاند: ژ ئەگەرێ وێ رەوشا ل دەڤەرێ روودای، هنارتنا پەترۆلێ ب رێكا باشوورێ ئیراقێ دێ ئەستەم بیت.
مەریوان قەرەنی، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان و ئەندامێ لژنەیا ئاسایش و بەرگریێ ل جڤاتا ناڤبری ل پێگەهێ خوە ل سەر تۆرا جڤاكییا فەیسبووكی گوت» ئەو شەڕێ كو پێشبینی دهاتە كرن د ناڤبەرا ئەمریكا و ئیسرائیلێ ژ ئالییەكی و ئیرانێ ژ ئالییەكی دی ڤە روو بدەت، دەستپێكێن وی یێن دیار دبن».
قەرەنی گوت ژی» كەس ناخوازیت شەڕ و ئالۆزی هەبیت، چونكە هیچ ئالییەك د شەڕی دا مفادار و سەركەفتی نابیت. بەلێ نوكە رەوش یێ روودای، هەروەك شارەزایێن سیاسی باس ل وێ چەندێ دكەن كو ئەڤ شەڕە هەر د ناڤبەرا ئیسرائیلێ و ئیرانێ دا نابیت و چریسكێن شەڕی دێ گەهنە ئیراقێ ژی (كو هیڤیدارین ئەڤە روونەدەت). بەلێ هەكە شەڕ بەربەلاڤ ببیت، د دەمەكێ نێزیكدا لڤینێن گەشتان ل كەنداڤێ عەرەبی و ب تایبەتی ژی ب رێكا بەندەرێ فاو دێ گەلەك ب زەحمەت بیت، ئەڤە ژی دێ بیتە ئەگەرێ وێ چەندێ ئیراق نەشێت پەترۆلا خوە ب رێكا باشوورێ ئیراقێ ب هنێریت، لەوما ب نەچاری ئێك رێك دمینیت تاكو پەترۆلا خوە تێدا ب هنێریت، ئەوژی بۆرییا ڤەگوهاستنا پەترۆلا هەرێما كوردستانێیە بۆ بەندەرێ جەیهان یێ توركی» .
باس ل وێ چەندێ ژی كركو ل سالێن بۆری د چارچۆڤەیێ سیاسەتا دژایەتیكرنا ئابۆرێ هەرێما كوردستانێ، حوكمەتا فیدرالی بۆرییا پەترۆلا هەرێما كوردستانێ ژ كارئێخست، بەلێ دیارە رەوش بەر ب ئالۆزبوونێ دچیت و ب ڤی جۆری ژی ئیراق ب نەچاری دێ پەنایێ بۆ بۆرییا پەترۆلا هەرێما كوردستانێ بەت و دێ دەتە كاری، چونكە هەكە ڤێ چەندێ نەكەت، دێ ژێدەرێ سەرەكیێ داهاتێ وێ كەڤیتە مەترسیێ».
دیاركر ژی» ب پشتڕاستیڤە باشترین چارەسەری بۆ ئیراقێ ئەوە كو دەست ژ سیاسەتا دژایەتیكرنا ئابۆرێ هەرێما كوردستانێ بینیت و د وێ چەندێ بگەهیت كو پێشكەفتنا هەرێما كوردستانێ ب رامانا پێشكەفتنا ئیراقێیە، نەك شكەستنا وێیە».

ب، سه‌رجان مەحمود:

بەرپرسەکێ عەرەبستانێ دیار کریە، شەڕێ نها د ناڤبەرا ئسرائیلێ و ئیرانێ دێ کاریگەریا خوە ل هەموو رۆژهەلاتا ناڤین کەت و ژ بەر ڤێ یەکێ ژی ل گەل هەر یەک ژ وەلاتێن عومان، ئیتالیا و فرەنسا کار دکەین دا شەڕێ نها ب دووماهی بهێت.

بەرپرسەکێ وەزارەتا دەرڤە یا عەرەبستانا سعوودیێ بۆ ئاژانسا رویترز یا نووچەیان دیار کریە، شازادە محەمەد بن سەلمان ل گەل سەرۆک کۆمارێ فرەنسا، سەرۆک وەزیرا ئیتالیا و بەرپرسێن عومانێ د پەیوەندیێ دایە و داخواز ژ وان وەلاتان کریە کو ب هەموو شیانێن خوە کار بۆ راگرتنا شەڕێ نها د ناڤبەرا ئیرانێ و ئسرائیلێ دا بکەن، چونکی مەترسیا ڤێ یەکێ هەیە کو هندەک وەلاتێن دی ژی پشکداری دا شەڕی دا بکەن و وی دەمی دێ رۆژهەلاتا ناڤین تووشی کارەساتەکا گەلەک مەزن بیت.
ل ئالیێ دی پەیڤدارێ وەزارەتا دەرڤە یا ئیرانێ ئیسماعیل بەقایی دیار کر، ئسرائیلێ ل بەر چاڤێ هەموو جیهانێ قانوونێن نێڤدەولەتی بنپێکرن و ئێرشی ئیرانێ کر و د ئەنجاما ئێرشا ئسرائیلێ دا هەتا نها ٩ زانایێن ئەتۆمی، پتر ژ بیست فەرماندارێن ئیرانێ و گەلەک وەلاتیێن سڤیل هاتینە کوشتن و ئیرانێ ژی بەرسڤا ئێرشا ئسرائیلێ دایە و زیانێن گەلەک مەزن ژی گەهاندینە ئسرائیلێ و د دەمەکێ وەسا دا دانوستاندنێن ل گەل ئەمریکا چو رامانا خوە نینن.
چاڤدێرێن سیاسی ژی دیار دکەن، هەتا نها ئەمریکا ب رەنگەکێ ئەکتیف پشکدری د شەڕی دا نەکریە، لێ هەکە ئێرشێن ئیرانێ ل سەر ئسرائیلێ بەردەوام بیت ئەمریکا و فرەنسا دێ بەرگریێ ل ئسرائیلێ کەن و ئەو یەک دشێت ببیتە ئەگەرێ بەرفرەهبوونا شەڕی، چونکی ل ئالیێ دی پاکستانێ ژی پشتەڤانیا خوە بۆ ئیرانێ دیار کر و راگەهاند هەکە پشتەڤانیێ ل ئیرانێ نەکەن دێ ئسرائیل ئێرشی هەموو وەلاتێن ئیسلامی کەت و دڤێت سنورەک بۆ ئێرشێن ئیرانێ بهێتە دانان.
ل ئالیێ دی هەر پشتی ئێرشا ئسرائیلێ یا ل سەر ئیرانێ رەجەب تەیب ئەردۆغانێ سەرۆک کۆمارێ تورکیا ژی راگەهاند، ئسرائیل دێ هەموو رۆژهەلاتا ناڤین تووشی کارەساتەکا مەزن کەت و دڤێت رێگری ل ئسرائیلێ بهێتە کرن و د هەمان دەمی دا دەولەت باخچەلی سەرۆکێ پارتا بزاڤا نەتەوەپەرست یا تورکیا ژی دیار کر، یا نها روو ددەت دەمەک درێژە کار بۆ هاتیە کرن و پشتی ئیرانێ دێ ئیسرائیلێ ئێرشی تورکیا ژی کەت، چونکی ئسرائیلێ دڤێت ب پشتەڤانیا ئەمریکا و وەلاتێن دی نەخشێ رۆژهەلاتا ناڤین ب تەمامی بگوهۆڕیت و ژ بەر ڤێ یەکێ ژی گرنگە تورکیا خوە بۆ هەر ئەگەرەکێ بەرهەڤ بکەت، چونکی یا نها روو ددەت گەلەک مەترسیدارە و هەکە بەرهەڤی نەهێنە کرن دێ تورکیا تووشی کارەساتەکا مەزن بیت.

ئەمیر عەزیمی بسپۆرێ کاروبارێن سیاسی و سەرنڤیسەرێ پشکا فارسی یا ئاژانسا بی بی سی دیار دکەت، ئارمانجا ئسرائیلێ گوهۆڕینا دەستهەلاتا سیاسی یا ئیرانێ یە، ئسرائیل دەمەک درێژە کار بۆ ژناڤبرنا بنگەهێن ئەتۆمی و سەربازی یێ ئیرانێ دکەت و شیا د دەمەکێ کورت دا زیانێن گەلەک مەزن بگەهینتە ئیرانێ، سەرۆک وەزیرێن ئسرائیلێ پشتی ئێرشا ل سەر ئیرانێ د دو پەیامێن جودا جودا دا داخواز ژ خەلکێ ئیرانێ دکەت ل دژی دەستهەلاتێ رابن، ئەو یەک ژی نیشا ددەت ئارمانجا ئێرشا ڤێجارێ یا ئسرائیلێ گوهۆڕینا دەستهەلاتا ئیرانێ یە.
ناڤهاتی ئەو یەک ژی دیار کریە، ژ بەر ڤێ یەکێ ژی پێشبینی دهێتە کرن شەر بۆ دەمەکێ ڤەکێشیت و ئیرانێ ژی شیان هەنە زیانێن مەزن بگەهینتە ئسرائیلێ و دبیت شەڕێ نها هەموو رۆژهەلاتا ناڤین ژی ڤەگریت، چونکی دەستهەلاتا نها یا ئیرانێ دێ ب هەموو شیانێن خوە شەڕی بۆ مانا خوە کەت.

تونجەر باکرهان هەڤسەرۆکێ دەم پارتی دوهی ل باژێرێ ئامەدێ یێ باکورێ کوردستانێ سەرەدانا هژمارەک ژ پارتێن کوردستانێ کر و پشتی هەڤدیتنێ ژی ژ بۆ دەزگەهێن راگەهاندنێ دیار کر، نها قووناغەکا نوو دەستپێکریە و گەلەک گرنگە کورد د ناڤا خوە دا ئێکگرتی بن، ژ بۆ ڤێ یەکێ ژی وەکو دەم پارتی ئەو داخوازا پشتەڤانیێ ل هەموو پارتێن کوردستانی یێن ل تورکیا و پارچەیێن دی یێن کوردستانێ دکەن.
سەبارەت ب داخوازا ئۆجەلانی یا بۆ هەڤدیتنا ل گەل سەرۆک بارزانی ژی ناڤهاتی راگەهاند، ئۆجەلان کار بۆ ئێکەتیا ناڤمالیا کوردی دکەت و ژ بەر ڤێ یەکێ ژی گەلەک ئاسایی یە هەڤدیتنەک د ناڤبەرا ئۆجەلانی و سەرۆک بارزانی دا دروست ببیت، ئەو یەک ژ بۆ پێشڤەبرنا قووناغا ئاشتیێ ژی گەلەک گرنگە، چونکی نها پێدڤیا تورکیا و کوردان ب ئاشتیێ هەیە و بێگومان سەرۆک بارزانی ژی دشێت ژ بۆ پێشڤەبرنا قووناغا ئاشتیێ هاریکار بیت.