سالار محەمەد

عەگید نێروەیی بەربژارێ‌ ژمارە 18 ل سەر لیستا 275 یا پارتی دیموكراتی كوردستان دیار كر، جڤاتا نوینەرێن ئیراقێ‌ بلندترین دەەستهەلاتا یاسادانانێ‌ یە د ئیراقێ‌ دا و فەرە ئەو قانوون ل بن چەترێ‌ جڤاتا نوینەرێن ئیراقێ‌ دەركەڤن و بكەڤنە د خزمەتا خەلكی و وەلاتیان دا، لەوما پلانا مە ئەوە پرۆژە قانوونێن خزمەتگوزاری بهێنە پەسەندكرن و ب ڤی رەنگی خزمەتا راستەوخو یا وەلاتیێن ئیراقێ‌ ب گشتی و كوردستانێ‌ ب تایبەتی بهێتەكرن.

عەگید نێروەیی د دیدارەكێدا ل گەل رۆژناما ئەڤرۆ دیار كر، گرنگە ل ئاستێ‌ بلند یێ‌ سیاسەتكرنێ‌ دا پەیوەندی دنافبەرا هەولێر و بەغدا دا ل سەر بنیاتێ‌ شەنگستێن پارتی بهێنە ئاڤاكرن و ئەگەر لهەڤهاتن ل سەر پتریا خالێن ناكوك هەبیت، وی دەمی جڤاتا نوینەرێن ئیراقێ‌ دێ‌ بیتە چەترا هەرە بهێز بۆ چارەسەركرنا هەمی كێشەیێن هەلاویستی دناڤبەرا هەولێر و بەغدا دا.
بەربژارێ‌ هەژمارە 18 ئەو ژی گۆت: پارتی دیموكراتی كوردستان ب هەمی كادرێن خوە ڤە یا ب سەنگ و دەولەمەندە و هەر كەسەكێ‌ بهێتە بەربژێركرن ل ژێر سەركردایەتی یا سەرۆك بارزانی و پارتی دیموكراتی كوردستان، دێ‌ شەڤ و رۆژێن خوە كەتە ئێك بۆ خزمەتكرنا وەلاتیان و خەلكێ‌ كوردستانێ‌ و گۆت: ئێكرێزی و ئێگرتنا ناف مالا كوردی خەونا هەمی كوردەكی یە، بێ‌ گومان ئێكرێزی و ئێكدەنگیا كوردان ل بەغدا هێزەكا زێدەتر ددەتە كێشا كوردی ل گەل بەغدا.
بەربژارێ‌ پارتی عەگید نێروەیی گۆتژی: ئەگەر نوكە سەحكەینە ژێرخانا ئابووری یا هەرێما كوردستانێ‌ و ئەو پێشڤەچوونا د رێك و بانان دا چێبووی، هەروەسا دیجیتەلكرنا رێڤەبەریێن حوكمەتێ‌ و پرۆژێ‌ هەژماری من و چێكرنا ب دەهان جادە و ئەندەرپاس و ئوڤەرپاسان دا، ژلایەكێ‌ دی ڤە ئاڤاكرنا چەندین بەنداڤان و چەندین پرۆژێن گەشتیاری د ئەڤان چەند سالێن بوری دا، ئەو بەلگەنە كو پارتی دیموكراتی كوردستان ل هەر جهێ‌ هەبیت دێ‌ كاركەت بۆ بەرقەراركرنا ئارامیێ‌ و ل دووف دا پێشكێشكرنا پرۆژە و خزمەتگوزاریێن جودا د هەمی سەكتەرێن ژیانێ‌ دا، لەورا دروشمێن پارتی رەنگڤەدانا راستەوخو ل سەر كادرێن پارتی هەیە و ب هێزبوونا پارتی ل بەغدا كەواتە پتر خزمەتكرنا وەلاتیان و ئاڤاكرنا ژێرخانا ئابووری و پێشكێشكرنا پرۆژێن خزمەت گوزاری یە بۆ وەلاتیان.
عەگید محەمەد سەلیم نێروەیی ناڤدار ب عەگید نێروەیی ژ دایك بوویێ‌ سالا 1961 یە هەلگرێ‌ باوەرنامێن دبلوم و بەكالوریوسە، ل سالا 1960 بابێ‌ وی محەمەد سەلیم نێروەیی سەرا بیروباوەرێن وی ب پارتی و مەلا مستەفا بارزانی بۆ ماوێ‌ پێنچ سال و پێنچ هەیڤان هاتیە زیندانكرن ژلایێ‌ حوكمەتا ئیراقێ‌ یا وی سەردەمی ڤە، عەگید نێروەیی ل سالا 1975 بوویە ئەندامێ‌ پارتی دیموكراتی كوردستان، هەمان سال بوویە ئەندامێ‌ لژنا قوتابیان ل بامەرنێ‌، ل سالا 1979 بوویە مامۆستا ل شێلادزێ‌، ل سالا 1987 بوویە پێشمەرگە ل سنورێ‌ لقێ‌ ئێك ل رێكخراوا ئەزمر، ل سالا 1988ێ‌ ئاوارەیی توركیا بوویە، ل سالا 1991 بوویە كادرێ‌ پارتی ل سنورێ‌ لژنا ناوچا ئامێدیێ‌، ل سالا 1993 بوویە ئەندامێ‌ لژنا ناوچا ئامێدیێ‌، ل سالا 1996 بوویە جێگرێ‌ بەرپرسێ‌ لژنا ناوچا ئامێدیێ‌، ل سالا 1997 ل شەرێ‌ بەرگریكرن ژ پاراستنا ئەزموونا هەرێما كوردستانێ‌ دا بریندار بوویە، ل سالا 1999 بوویە بەرپرسێ‌ لژنا ناوچا ئامێدیێ‌ و ل كونفرانسێن نافخوە دەنگێن ئێكێ‌ ل سەر ئاستێ‌ قەزا ئامێدیێ‌ ب دەست ڤەئینان، بەرپرسایەتیا هەشت ناوچەیێن پارتی ل سنورێ‌ پارێزگەها دهۆك كریە، پشكداری چوار كونگرێن پارتی بوویە، ل سالا 2019 كارگێریا لقا ئێك وەرگرتیە، عەگید نێروەیی خێزاندارە و بابێ‌ پێنچ زارۆكانە، سێ‌ كور و دو كچ.

لەزگین جوقی

سەعدی دەروێش خەتاری، بەربژارێ‌ ژمارە 3 ل سەر لیستا 275 بازنێ نەینەوا دیاركر، چ جاران پارتی و ئێزدی ژ هەڤدوو جۆدا نابن، بۆ هەلبژارتنێن پەرلەمانێ ئیراقێ كوردێن ئێزدی ل شنگالێ و دەشتا نەینەوا دێ دەنگێ خۆ دەنە لیستا پارتی دیموكراتی كوردستان و هەردەم پارتی دیموكراتی كوردستان پشتەڤانیا دۆزا ئێزدیان دكەت.

سەعدی دەروێش، بەربژارێ‌ ژمارە 3 ل بازنێ نەینەوا سەر ب لیستا 275 یا پارتی دیموكراتی كوردستانی بۆ رۆژناما ئەڤرۆ دیار كر، پارتی دیموكراتی كوردستان ل بەغدا هەردەم داكۆكی ژ مافێن خەلكێ هەرێما كوردستانێ كریە، ئەڤ هەلبژارتنە د چارەنڤیسسازن، داخوازێ ژ هەموو جەماوەر و خەلكێ خۆ دكەین ل رۆژا دەنگدانێ دەنگ ب لیستا 275 بدەن، پارتی پشتبەستنێ ب دیرۆكا پڕ سەروەریا خۆ و دەنگێ جەماوەرێ كوردستانێ دكەت و دێ ب هێزەكا مەزن چینە پەرلەمانێ ئیراقێ بۆ بەرەڤانیكرن ژ مافێن خەلكێ خۆ.
گۆتژی، ئارمانجا مە ئەوە دناڤ پەرلەمانێ ئیراقێ دا داكۆكیێ ژ مافێن خەلكێ خۆ بكەین، ب تایبەتی تەخا هەژار و كێمدەرامەت و قوتابی و لاو و گەنجان، دیتنا دەرفەتێن كاری و دامەزراندنێ بۆ دەرچوویێن كولێژ و پەیمانگەهان ببینین و سوزێ ددەم كۆ هەر تشتەكێ دشیاندا هەبیت بۆ خزمەتكرنا خەلكێ خۆ ل پەرلەمانێ ئیراقێ بكەم.
تەكەستكر، ل سەر پاراستنا مافێن خەلكێ خۆ دچارچوڤێ دەستورێ ئیراقێ دێ ب رژدی كار كەین ب تایبەتی بۆ ب دەستڤەئینانا مافێن خەلكێ گرێدایێ مادا 140ێ ب هەمی هێز و شیانێن خۆ دێ بەرەڤانیێ ژ مافێن خەلكێ خۆ كەین.

رەمەزان دەشتمری/ زاخۆ

4- 4

ل ئەوی دەمی ئەز ل سنورێ‌ لیژنا ناوچا زاخۆ پێشمەرگەبیم و هەر وەسا دەمێ‌ بۆ بێهنڤەدانێ‌ بۆ مالێ‌ دهاتم و ئەم دا ب شەڤێ‌ دا قەستا كومەلگەها بێرسڤی و هیزاوا كەین ژبۆ پەیداكرنا چەند ئازوقەیی و گەلەك جاران ب ڕێكێ‌ ڤە ئەم دكەتین بوسەیێن مەفرەزەیێن ئەمن و ئیستخباراتێ‌، بەلێ‌ خوەشبەخانە گیانێ‌ مە هات پاراستن و ب سلامەت بین. دەمێ‌ ئەنفالا رەش ئەو سێ‌ رۆژبین وەك بێهڤەدان ئەز بۆ مالێ‌ هاتبیم و ل سپێدەهیا ڕۆژا 25/8/1988ی دەمێ‌ فروكەیێن حكومەتا ئیراقێ‌ ب ب چەكێ‌ كێمیاوی ل دەڤەرێ‌ ڕەشاندی. ل ئەوی دەمێ‌ ئەڤان فڕۆكەیان جەندین جهـ كێمیا لێ‌ ڕەشاندن وەكی گەلی گسانكا و گوندێ‌ ئەرمشتێ‌ و پیاكێ‌ گوندێ‌ دوبانكێ‌ و گوندێ‌ برجینی ب ئەڤێ‌ كیمیابارنكرنێ‌ هاتن شەهید و برینداركرن. هەر وەسا ئەڤان فروكەیان زیارەتێ‌ بنێ‌ گوندێ‌ تلاكرو كێمیابارانكر. هەر وەسا ل گوندێ‌ تویكا هەژمارا چواردە پێشمەرگەیان و ئەگەرێ‌ كێمیا بارانكرنێ‌ هاتن شەهیدكرن و هەژمارەكا دیتر ژ پێشمەرگەیی و خەلكێ‌ گوندێ‌ تویكا هاتن برینداركرن.  هەر ل ئەوێ‌ سپێدەهیا كێمیابانكرنێ‌ خەلكێ‌ ئەوان گوندێن دەڤەرێ‌ دەست ب باركرنێ‌ كرن و قەستا سەرسنورانكرن. مەژی وەك خەلكێ‌ گوندێ‌ دولا دەستێ‌ زاروك و خێزانێن خۆە گرتن و مە قەستا جادەیا گشتی ئەوا دنافبەرا باژێڕێ‌ زاخۆ و ناحیا باتیفادا كر و ب شەڤێ‌ ل سەمتا گوندێ‌ بەهراڤا ئەم ل جادا گشتی دەربازبین و ل بنێ‌ گوندێ‌ مامیسا و ل پشتا كومەلگەها بێرسڤێ‌ و مە قەستا گوندێ‌ بوسەلێ‌ كر و هەتا ل دەمێ‌ سپێدێ‌ و ڕۆژهەلاتنێ‌ ئەم گوهشتن بۆ گوندێ‌ ئەڤلهێ‌ و پیربلا چوون. هەر وەسا ئەم ڕیكا سەرێ‌ قەرشی چوون و دگەل ڕۆژئاڤا ئەم گەهشتن بۆ دەڤەرا گەلیێ‌ پساغا و ل ئەوێ‌ شەڤێ‌ ئەم ل وێرێ‌ ماین و ل ڕۆژا دیتر ئەم بۆ سەرسنوری چوین و ڕاستا گوندێ‌ زێڤیا ئەم دەربازی سنوری بین.  دەمێ‌ ئەم دەربازی سنوری بین و ئەسكەرێ‌ جەندرمێن توركیا گەلەك بۆ ئەوی خەلكی دەست نەخوەشی پەیداكرن. هەتا ئەوی دەمی من تڤەنگا خۆە یا ژ جورێ‌ (ئار، بی، كەی) ڕادەستی دەولەتا توركیا نەكربی. ل سپێدهیەكێ‌ من كا سەربەست لەزگین دیت كو ل ئەوی دەمی وەك ئەندامێ‌ لیژنا ناوچا زاخۆ و بەرپرسێ‌ ئەوی میحوەری گوتە من: مەلا شین وەرە دگەلمە ئەم دێ‌ بۆ دەڤەرا شردێ‌ ئێكمالێ‌ چین و دا ژ نێزێك سەحا ڕەوشا ئەوی خەلكی بكین. ل ئەوی كاك سەربەست و ئەز و دگەل خەلیل درباز كو ل ئەوی دەمی ئێك ژ چەكدارێن چەتێن توركی ابی و ئەم بۆ ئەوێ‌ دەرێ‌ چوین. ب رێكێ‌ ڤە ئەم توشی ئاریشەیەكا مەز دگەل جەندرمێن توركیا بین و ل دورمە زڤڕین و دڤیان مە دەستەسەربكەن. دەمێ‌ ئەڤ ئەیكەرە بۆ لایێ‌ مە هاتین و دڤیان مە دەستەسەر بكەن. هەما دەملدەست من دەسدا تفەنگا خوە و ل كاشی دا و لب چوو بەر و ب زمانێ‌ كوردی من گوتە ئەوان جەندرمان هین بەلا خۆە ژمە ڤەنەكن ئەز دێ‌ تەقێ‌ ل هەوە كەم. ئەوبی دەرباز خەلو ب زمانێ‌ توركی دگەل ئەوان جەندرمەیان و ئاخفت و گوتێ‌: ئەڤە ژلایێ‌ قەڕەقولێ‌ ڤە دەستویرداینە و بۆ وەكی باوەری ئەز یێ‌ دگەل ئەوان هاتیم. ئەڤان جەندرمەیان بەلا خوە ژمە ڤەكرن و ئەوبی ئەم چوون و مە كارێ‌ خوە ل وێررێ‌ ئەنجامدا. پشتی بورینا چەند ڕۆژەكان دەولەتا توركیا ترومبێلێن ژ جورێ‌ قاموین ئینان و ئەو خەلكە بۆ چادرگەها ئامەدێ‌ ڤەگوهاستن. دەمێ‌ ئەو خەلك ل ناف ئەوان چادراندا ل ئەوی چەمی ئاكنجی بوین و دناڤا چادرگەهێ‌ دا لیژنا سەرپەرشتیكرنا كەمپێ‌ هات پێكئینان و ئەز وەك چاڤدێر(انزبات) هاتم دەینان. ئەوبی دگوتن دێ‌ سەروك وەزێن توریا تورگوت ئەزال دێ‌ سەرەنا چادرگەها ئامەدێ‌ یا پەنابەران كەت. ل ئەوی دەمی و ل دویف ڕەوشت و تیتالێن دەولەتا توركیا دەمێ‌ سەركردەیەك قەستا جهەكێ‌ بكت و خەلك پێشەوازیێ‌ لێ‌ بكن یا فەرە گیانەوەرەكێ‌ وەك پەز یان بزن كەهر و بەرخ ل بەراهیكا ئەوی سەربڕی بكن و داخوازیێن خۆە پێشكێشی ئەوی سەركردەیی بكن. ل ئەوی دەمی لیژنا سەرپەرشتیا چادرگەهێ‌ ئەز ڕاستپاردم كو ئەڤی كاری ئەنجام بدەم. ئەوبی گیسكەك ئینان و ل دەمێ‌ تورگوت ئوزال بۆ ناڤ كەمپێ‌ هاتی و ل بەرچاڤێن هەمی ڕۆژنامەڤانێن توركیا و بیانیا من ئەو كیسك سەرژێكر و تبلا خۆە ل خوینا ئەوی گیسكی دا و ئەو تبلا ب خوین من ل ئەنیا سەروكێ‌ دەولەتا توركیا تورگوت ئەزال دا. هەر ئێكسەر توگوت ئەزال گوتە من كا بێژە تە چ دێت ئەز بۆت ە ئەنجام بدەم. من ب زمانێ‌ كوردی گوتێ‌ سەروك: ب تنێ‌ داخوازیا مە یا ئەڤی خەلكێ‌ پەنابەر ل ناڤ ئەڤێ‌ چادرگەهێ‌ هوین وەك دەولەتا توركیا مە ڕادەستی حكومەتا ئیراقێ‌ نەكن و مە دڤێن ئەم ل ناف ئاخا توركیا بژین. ژبەركو دەولەتا ئیراقێ‌ یا دكتاتور و فاشتە و و ئەڤی خەلكی هەمیێ‌ ئەنفال كەت. تورگوت ئوزال كەنی و دەستێ‌ خوە دەینا سەرنلێ‌ من و گوت: هوین پشتڕاست بن ئەم وەك دەولەتا توركیا هەوە ڕادەستێ‌ حكومەتا ئیراقێ‌ ناكەین و هوین نەوەك مێهڤان بەلكو وەك برا دێ‌ ل ناڤ دەولەتا توركیادا ژین. ئەوبی ل هەیڤا یازدە ل سالا 1988ی ئەو خەلكێ‌ ل ناڤ چادرگەهان بۆ شوقەیێن سەیران دەپە ب تەنشتا ئامەدێ‌ ڤەگوهاستین و مە ڕۆژانێن خۆە ل ناڤ كەمپێ‌ دا بوراندن. ئەوبی دەمێ‌ سەرهلدانا بهارا سالا 1991ی دەستپێكری و كوردستان ئازاد و خەلكێ‌ مە ژبن زولم و زورداریا ڕژێما ئیراقێ‌ یا ئەوی سەردەمی ڕزگاربین و مە قەستا كوردستانێ‌ كرن. هەر ئێكسەر من قەستا گوندێ‌ خۆە دولا كر و ئەز چووم من قەستا گەلیێ‌ گوندی كر. ژبەركو ل دەمێ‌ ئەنفالا من سندوقەكا نهێنیێن پارتی ل ناڤ ئەوێ‌ سندوقێ‌ دا ڤەشارتبین.  ئەو دەمێ‌ من بەرێ‌ خوەدایە جهێ‌ ئەوێ‌ سندوقێ‌ كو هێشتا جهێ‌ وێ‌ وەكی خوەیە و نەهاتیە دەستڤەدان و من ئەو جهە ڤەكولا و ئەو سندوق ژ ئەوی جهی ئینادەر و ژ كەیفاندا پتر ژ دوو دەمژمێران ئەز ل سەر ئەڤێ‌ سندوقێ‌ گریم. ژبەركو هەمی بیرهاتنێن من یێن سالێن هەشتیان دناڤ ئەوێ‌ سندوقێ‌ دابین و حكومەتا ئیراقێ‌ تشتەك ل دەڤەرێ‌ نەهێلاتین و گوند دگەل ئەردی هاتبی ڕاستكرن. ئەوبی مە ئاڤاهی بۆخوە ل گوندی چێكرن و هەر وەسا من دەست ب خزمەتا پێشمەرگایەتیێ‌ كرن. هەتا سالا 2007ی بەردەوامی مامە دئەركێ‌ پێشمەرگایەتیێ‌ دا و ل دویف بریارا وەزارەتا پێشمەرگەیی ب پلەیا(عریف) هاتم خانەنشینكرن. پشتی ئەز ژ ئەركێ‌ پێشمەرگایەتیێ‌ هاتیم خانەنشینكرن نها ئەز كارێ‌ جوتیاریێ‌ ل گوندی دكم و هەر وەسا من هەژمارەكا چێلان ل گوندی هەنە ئەز ب خودان دكم. ل دوماهیێ‌ پێشمەرگەیی شۆڕشا گولانێ‌ مەلا شین ئیبراهیم گوت: ژ هەمی كرت و مالێ‌ دونیایێ‌ من گەلەك كەیف ب ئەڤێ‌ ئەڤێ‌ سندوقێ‌ دئێت ئەوژی دوازدە پوستەیێن نهێنی یێن پارتی دیموكراتی كوردستان د ئەڤێ‌ سندوقێ‌ دا ماینە و هەر وەسا دویربیەیەكا ژ جورێ‌ نیڤ ڕوسی ئەوژی كادرێ‌ پارتی خودێ‌ ژێ‌ ڕازی جاسم جاسم وەك دیاری بۆب ابێ‌ من ئیناتبی. هەر وەسا هەردوو پێپكێن تفەنگا من دناڤا ئەڤێ‌ سندوقێ‌ دا مابوون. جار بۆ جاران ئەز ئەڤێ‌ سندوقێ‌ دەرێ‌ وێ‌ ڤەدكم و ئەز هەڤال و دوست ل بەر ئەڤێ‌ سندوقێ‌ بیراهاتنێن خۆە بۆ ئێك و دوو دبێژین. هەر وەسا سوپاسیەكا بێ‌ سنور بۆ ڕۆژنامەیا ئەڤرو كو قەستا گوندێ‌ دولا كرین و ئەڤ دیدارە دگەلمن سازكرن و هوین گەلەك ب خێر هاتن و سەریەران چاڤان و خوادیێ‌ مەزن خاریكار و پشتەڤانێ‌ مە هەمیان بت و كوردستان هەر ئاڤەدان بت و هەر بەرز و بلند بیت ئالا كوردستانێ‌.