چاڤەڕێ‌ دهێتە كرن دو یاریێن مایی ژ هەڤڕكیێن گەڕا 33ێ‌ یا خولا ستێرێن ئیراقێ‌ یا فوتبۆلێ‌ بهێنە كرن، ل دەمژمێر شەشێ‌ ئێڤارەییەكا درەنگ یانەیا مینا دێ‌ بیتە مێڤانا یانەیا ئەلكەرخ، ژلایێ‌ خوەڤە یانەیا دهۆك دێ‌ مێڤاندارییا هەڤڕكا خوە یانەیا تەلەبە كەت.
دهۆك و تەلەبە د كۆپیتكا یاریێن ڤێ‌ حەفتیێ‌ دا
حەز ژێكەر و جەماوەرێ‌ وەرزشی یێ‌ یانەیا دهۆك چاڤەڕێ‌ شەڤبیرییەكا تایبەتن ژبۆ پشتەڤانییا تیما خوە بەرانبەر یانەیا تەلەبە یا بەغدایی كو دهێتە هژمارتن كۆپیتكا یاریێن ڤێ‌ حەفتیێ‌، ئەوا بڕیارە ل یاریگەها دهۆكێ‌ دەمژمێر 8:30 شەڤ بهێتە كرن كو دبیتە یارییا دویێ‌ ل دووڤ ئێك دناڤبەرا هەردو تیمان دا د ماوەیێ‌ ئێك حەفتی، د یارییا بۆری دا ژ چارچووڤەیێ‌ یارییا پاشئێخستی بوو، ئەلهۆیێن چیا د نوكە دا خودان 48 خالان ب 14 سەركەفتن، شەش وەكهەڤی و حەفت خوسارەتی ل رێزا شەشێ‌ دهێت و پێنچ یاریێن پاشئێخستی ماینە، ژلایێ‌ خوەڤە یانەیا تەلەبە 56 خال كۆمكرینە ل رێزا چارێ‌ دهێت، یارییا ئەڤ شەڤە ئاگرینە بۆ هەردو تیمان، هەرچەندە دیدارێن وان یێن پێشتر ژی هەردەم ئاگرین بووینە كو سەرجەمێ‌ یاریێن خولێ‌ 27 جاران بەرانبەر ئێك بووینە، دهۆكێ‌ نەهـ سەركەفتن ئیناینە و تەلەبە 11 سەركەفتن لێ‌ حەفت یاری ب وەكهەڤی ب دووماهی هاتینە.
پێنچ یاریێن پاشئێخستی دهۆكێ‌ ماینە
ژبەركو تیما فوتبۆلا یانەیا دهۆكێ‌ موژیلی یاریێن كۆپا كەنداڤی بوو و شیابوو ب سەرفەرازی ناسناڤێ‌ كۆپایێ‌ ب دەستڤە بینت، د دەمێ‌ قارەمانیێ‌ دا فدراسیۆنا فوتبۆلا ئیراقێ‌ دەلیڤە دابوو دهۆكێ‌ یاریێن وێ‌ بهێنە پاشئێخستن بوخاترا ئەڤێ‌ قارەمانیێ‌ كو سەرجەمێ‌ و بوونە شەش یاری، دوهی یارییەك بەرانبەر تەلەبە ئەنجامدابوو و یێن مایی بڤی ڕەنگی نە، دگەل شورتە ل یاریگەها دهۆكێ‌، بەرانبەر هەولێرێ‌ ل هەولێرا پایتەخت، دگەل نەفت میسان دناڤ ئەرد و جەماوەرێ‌ دهۆكێ‌ و دێ‌ بیتە مێڤانا یانەیا دیالا و یارییا شەشێ‌ مێڤاندارییا یانەیا مینا یە بەسرایی بكەت.
32 گۆل یاریزانێن دهۆكێ‌ تۆمار كرینە
تیما دهۆكێ‌ خوانا دەهـ یاریزانێن پشكداری د تۆمار كرنا 32 گۆلان دا هەیە سەرجەمێ‌ 33 گۆلان و بڤی ڕەنگی، پیتەر گۆرگیس حەفت گۆل، پاشەنگ عەبدوللا حەفت گۆل، كەریم دەرویش پێنچ گۆل، هەر ئێك ژ و شەرقی ئەلبەحری و مارلۆن دۆسانتۆس، یانیك زاكێری و ئیبراهیم غازی هەر ئێك دو گۆل هەنە، هەروەسان هەر ئێك ژ بەیار ئەبۆ بەكر، كێلبرت كۆمسۆن، سیابەند عەگید، زانا عەلی و لۆكاس هێنریك گۆلەك تۆماركرینە، گۆلەك بۆ یاریزانەكێ‌ یانەیەكا دی هاتییە هژمارتن، پشتی ب شاشی ڤە گۆل ل سەر تیما خوە كر.
گۆلكەرێن خولێ‌ بەری دووماهی هاتنا گەڕا 33ێ‌
موهەنەد عەلی هێرشبەرێ‌ شەرتە ب تۆماركرنا 23 گۆلان سەرێ‌ لیستێ‌ دهێت، پیشەكارێ‌ یانەیا زاخۆ یێ‌ بەرازیلی گۆستاڤۆ هێنریك رێزا دویێ‌ دهێت ب تۆماركرنا 16 گۆلان، ژلایێ‌ خوەڤە مەروان حسێن هێرشبەرێ‌ نەورۆز ب 15 گۆلان رێزا سێیێ‌ دهێت، سەید رەشید گۆلكەرێ‌ ئەلقاسم ب14 گۆلان رێزا چارێ‌ دهێت، ئەمجەمەد عتوان ستێرا یانەیا زاخۆ ب13 گۆلان رێزا پێنجێ‌ دهێت، هەر ئێك ژ سیمۆن مسۆڤا یێ‌ یانەیا تەلەبە، ئەلحارس حاتم یاریزانێ‌ ئەلقاسم و ئێزی كێلڤن یێ‌ یانەیا ئەلكەرخ هەر ئێك 11 گۆل هەنە رێزێن شەشێ‌ هەتا نەهێ‌ دهێن.

د داخویانیەكا تایبەت دا وەهبی سلێمان كوڕێ‌ پارێزگەها دهۆكێ‌ و یاریزانێ‌ هەلبژارتیێ‌ ئیراقێ‌ و یانەیا سیناعە یا بەغدایی بۆ رۆژنامەیا ئەڤرۆ دیار كر ئەڤە بۆ ماوەیێ‌ حەفتییەكە دگەل هەڤالێ‌ خوە مورتەزا حەیدەر ل وەلاتێ‌ چینێ‌ یە د چارچووڤەیێ‌ كەمپەكێ‌ ڕاهێنانێ‌ دا ئەوا دێ‌ بۆ ماوەیێ‌ مەهەكێ‌ ڤەكێشیت خوە بەرهەڤكرن بۆ كۆپا ئاسیا 2026و ڤاڤارتنێن مۆندیالا جیهانی2027ێ.
زێدەتر وەهبی سلێمانی گۆت: ب خوەشحالی ڤە وەكو یاریزانێ‌ ئێكانە دگەل شاندێ‌ هەلبژارتیێ‌ ئیراقێ‌ هاتیمە دەستنیشانكرن بۆ كەمپێ‌ ڕاهێنانێ‌ یێ‌ چینێ‌ ئەوا دێ‌ بۆ ماوەیێ‌ مەهەكێ‌ ڤەكێشیت، وەكو یاریزانێ‌ هەلبژارتیێ‌ ئۆلمپی هاتیمە ژێگرتن و هەڤالێ‌ من مورتەزا حەیدەر بۆ ئاستێ‌ لاوان هاتییە ژێگرتن، كەمپێ‌ مە ل دووڤ پلانەكا ڕێكخستی هاتییە دانان و پووتەدانەكا تایبەت و ب گرنگی ڤە هاتییە وەرگرتن، ژبەركو فدراسیۆنا پایسكلڤانێن ئیراقێ‌ باوەریەكا باش ب مە هەیە كو دێ‌ شێن ئەنجامێن دلخوەشكەر دەستڤە ئینن.
هەروەسان ناڤهاتی گۆت: كەمپێ‌ ڕاهێنانێ‌ بەرهەڤی نە بۆ كۆپا ئاسیا 2026ێ‌ ئەوا دێ‌ ل وەلاتێ‌ سعۆدیێ‌ هێتە كرن و ڤاڤارتنێن مۆندیالا جیهانی 2027 ل چینێ‌ و ڤاڤارتنێن ئۆلمپیادا 2028ێ‌ یە، پێنەڤێت ئەڤە وەكو پرۆژەیەكێ‌ دووم درێژە و گەشبیینە بۆ دەستڤەئینانا ئەنجامێن باش.
ل دووماهیێ‌ وەهبی نامەیەك ئاراستەیی هەموو یاریزانێن پارێزگەهێ‌ كرن و گۆت: هیڤییا من ئەوە هەموو یاریزانێن پارێزگەهێ‌ دەستان ژ هیڤی و ئارمانجێن خوە نە بەردەن و بەردەوام دگەل ڕاهێنەر تارق سەعید بن چنكو ئەو نە بتنێ‌ ڕاهێنەرە بەلكو شارەزا و ماموستا و ڕێ نیشاندەرە، گوهدارییا هەوە دێ‌ وەكو من گەهینە ئاستێن بلند.

قەیس وەیس:

دادڤانێ‌ كورد یێ‌ هەرێما كوردستانێ‌ و یێ‌ نێڤدەولەتی هاوكار سالار وەكو دادڤانێ‌ سەرەكی بوو د یارییا فینالا كۆپا ئیراقێ‌ یا فوتسالێ‌ ئەوا د ناڤبەرا هەردو یانەیێن نەفت یا بەغدایی و ئەلموارد ئەلمائییە ل پایتەختێ‌ ئیراقێ‌ هاتییە كرن، پشتی شیایی د یاریێن كۆپایێ‌ دا پلەیا زوور باش وەربگریت و سەركەفتیانە یاریێن خوە بڕێڤەبرین
عەلی عەبدولحسێن سەرۆكێ‌ لژنەیا فوتسالێ‌ ل فیدراسیۆنا فوتبۆلا ئیراقێ‌ دیار كر هاوكار سالار ئێك ژ ئەوا دادڤانێن نە بتنێ‌ ل سەر ئاستێ‌ ئیراقێ‌ بەلكو ل سەر ئاستێ‌ عەرەبی و ئاسیا و جیهانێ‌ بوویە دادڤانەكێ‌ سەركەفتی و شیاییە چەند یاریێن مەزن ب سەركەفتیانە بڕێڤە ببەت تایبەتی دەمێ‌ ل خولا پرێمەر لیگ یا فوتسالێ‌ دادڤانی كر، لەوما ژی بۆ یاریێن هەستییار وەكو لژنەیا فوتسالێ‌ مە هەموو باوەری دابوویێ‌ و ل دووماهییا فینالێ‌ ژی دا ئەم پشتراست بووین دێ‌ سەركەفتی بڕێڤە چیت
ژلایەكێ‌ دووڤە ناڤهاتی گۆت: ئەم شانازیێ‌ ب دادڤانەكێ‌ پیشەكار و خودانێ‌ شارا نێڤدەولەتی و خەلكێ‌ ئیراقێ‌ و كوردستانێ‌ ب گەهیتە پلەیێن بلند، ئەڤەژی پێنگاڤەكە و پالدەرە بۆ هەموو دادڤانێن مە یێن ئیراقی، هەروەسا ژبیر نەكەیین دگەل دادڤان محەمەد حەسەن ی دێ‌ بۆ وەرزێ‌ نوو یێ‌ قارەمانی و كۆپا ئاسیا ل سەر ئاستێ‌ هەلبژارتییان و یانەیان یارییان بڕێڤەبەن و ب فەرمی ژلایێ‌ فدراسیۆنا فوتبۆلا ئاسیا بۆ یاریێن مەزن هاتییە دەستنیشانكرن.
بۆ زانین هاوكار سالار خەلكێ‌ باژێرێ‌ سلێمانیێ‌ ئێكەم یاریێن نێڤدەولەتی بڕێڤەبەرییە ل سالا 2014ێ‌ دو یاریێن هەڤالینی یێن دناڤبەرا هەلبژارتیێ‌ ئنگلتەرا و لاتیڤییا ب سەركەفتیانە بڕێڤەبرینە، بۆ ماوەیێ‌ چار وەرزان ل دووڤ ئێك دادڤان بوو د خولا پرێمەرلیگ ل وەلاتێ‌ ئنگلتەرا، یاریێن فینالا كۆپا ئنگلتەرا 2015ێ‌، فینالا خولا ئنگلتەرا 2016ێ‌ و فینالا زانكۆیێن بریتانی 2017ێ‌ بڕێڤەبرینە.

د دیدارەكێ‌ دا لیۆنێل مێسی ستێرێ‌ ئەرجەنتینی و یانەیا ئینتەر مەیامی یا ئەمریكی پەسنا ئاست و شیانێن یاریزانێ‌ گەنج یێ‌ ئسپانی و یانەیا بەرشەلۆنا لامین یامالی كر و لڤینێن یامالی ب بیرهاتنێن خوە ڤە گرێدان.
لیۆنێل مێسی د ئاخڤتنا خوە دا بۆ ماركا یا ئسپانی: ئەو ئاستێ‌ لامین یامال پێشكێش دكەت دگەل یانەیا بەرشەلۆنا هەموو جیهان سەرسۆرمان كرییە، هەر ژ رۆژا شیایی دگەل هەلبژارتیێ‌ وەلاتێ‌ خوە ئسپانیا كۆپا یۆرۆیێ‌ ب دەستڤە بینیت ئاستێ‌ وی باشتر و پێشكەفتی ترە، ژیێ‌ وی 17 سالن ئانكۆ پاشەرۆژ و دەستكەفتێن باش ل پێشیێ‌ هەنە، خودان بەهرەمەندە، ئاستێ‌ لامین یامالی بیرهاتنێن من ڤەگەڕاندن ژبەر شیانێن وی.
هەروەسان ستێرێ‌ بەرێ‌ یێ‌ یانەیا بەرشەلۆنا گۆت: یامال شێوازەكێ‌ تایبەت و سەردەمانە یاریێ‌ دكەت، وەرگرتنا تەپێ‌، پاسێن بنەجهـ، ستایلەكێ‌ تایبەت هەیە، بیرا من دئینت وەكو من شێوازەكێ‌ تایبەت هەبوو، بێ‌ دو دلی ئەو باشترین یاریزانێ‌ جیهانێ‌ یە.
ل دووڤ ڕاگەهاندنێن رۆژنامەڤانی ل ئسپانیا لامین یامال بەربژارەكێ‌ ب هێزە بۆ ب دەستڤە ئینانا ناسناڤێ‌ باشترین یاریزانێ‌ جیهانێ‌ چو ل سەر ئاستێ‌ پێشكەفتیان یان ژی لاوان بیت، ئەوێ‌ هەتا نوكە 52 یارییان دگەل تیما خوە پشكداری د خول و كۆپا یێن ئسپانیا و چامپیۆنزێ‌ بوویە، 16 گۆل تۆماركرینە و 24 گۆل ژی بۆ هەڤالێن خوە چێكرییە.