وەزیرێ كارەبا حكومەتا هەرێما كوردستانێ ئاشكراكر، ب پشتەڤانیا مەسرور بارزانی، سەرۆكێ حكومەتا هەرێما كوردستانێ ئەو شیاینە چاكسازیێ‌ د كەرتێ‌ كارەبێ دا بكەن و دبێژیت: مە ب سەدان وەستگەهێن كارەبێ‌ داناینە و راكێشانا تۆڕێن كارەبێ‌ و زێدەكرنا بەرهەمئینانا كارەبێ‌ و كێمكرنا زێدەگاڤیان.
كەمال محەمەد سالح، وەزیرێ كارەبا حكومەتا هەرێما كوردستانێ بۆ ئەڤرۆ گۆت: «ژ ئەگەرێ ژێرخانا كارەبێ‌، مە دەست ب پڕۆژەیێ پیڤەرێن زیرەك و پڕۆژەیێ رۆناهی كر بۆ كارەبا 24 دەمژمێری و ئەڤە وەرچەرخانەكە د كەرتێ‌ كارەبێ دا هاتیە كرن بۆ پێشكەشكرنا خزمەتگوزاریێن بەردەوامێن كارەبێ».
گۆتژی: «مەسرور بارزانی، سەرۆكێ حكومەتا هەرێمێ‌ سۆزا چارەسەركرنا ئاریشەیا كارەبێ دا و كێمتر ژ سالەكێ نیڤەكا ئاكنجیێن كوردستانێ ل سەنتەرێ‌ پارێزگەهێن هەولێر و سلێمانی و دهۆك و هەلەبجە و دەوروبەران بووینە خودان كارەبا 24 دەمژمێری و ئاریشەیا كارەبێ‌ چارەكر».
وەزیرێ كارەبێ ئاشكرا ژی كر، پارێزگەها هەلەبجە وەك ئێكەمین پارێزگەها هەرێمێ ل سەر ئاستێ هەموو ئیراقێ بوو خودان كارەبا 24 دەمژمێری، نوكە چار میلۆن وەلاتی و زێدەتر ژ 115 هزار جهێن بازرگانی، كارەبا 24 دەمژمێری ب رێكا پڕۆژەیێ رۆناهی هەیە و گۆت: «بجهئینانا پڕۆژەیێ‌ رۆناهی، سێ‌ هزار و 222 موەلیدە هاتینە ڤەمراندن و مفایەكێ مەزن بۆ ساخلەمیا وەلاتیان و پاقژیا ژینگەهێ‌ هەبوویە، نوكە 80% پشكدارێن كارەبێ پارەیێ كێمتر ژ جاران ددەن».

زاخۆ، دلۆڤان هالۆ:

لقێ هەشت یێ پارتی دیموكراتی كورستان ل زاخۆ دیاركر كو دوهی 10/9/2025 ب بەرهەڤبوونا عومەر ئۆرەیی، بەرپرسێ لقێ هەشت یێ پارتی ل زاخۆ و كارگێرێن لقێ و پێشمەرگەیێن دێرین یێن هەردو شۆڕەشێن ئیلۆن و گولانا پێشكەفتنخواز، ل بارەگایێ لیژنا ناوچا خابوور یا پارتی بیرەوەریا شۆڕەشا 11ی ئیلۆنێ هاتە ساخكرن.
عومەر ئۆرەیی، بەرپرسێ لقێ هەشت یێ پارتی د پەیڤەكێ دا باس ل ڕۆلێ دەڤەرا زاخۆ د شۆڕەشا ئیلۆنێ دا كر و گۆت: «دو رۆژان بەری دەستپێكرنا شۆڕەشا ئیلۆنا مەزن، باژێڕێ زاخۆ ژ دوژمنی هاتبوو ڕزگاركرن».
گۆتژی:»بارزانیێ نەمر د ئەوێ باوەریێ دا بوو كو ئەو شۆڕەشا دروست ببیت، پێدڤییە پارتەكا مەزن پشتەڤان بیت و یا سەرانسەری بیت، بۆ ڤێ مەرەمێ‌ ژی ل سالا 1946 پارتەكا سیاسی یا ڕێكخستی ب ناڤێ پارتی دیموكراتی كوردستان دامەزراند و ل 11ی ئیلۆنا 1961سەرپەرشتیا شۆڕەشا ئیلۆنێ كر و د دەمەكێ كێم دا ژ زاخۆ هەتا خانەقین ب فیداكاریا پێشمەرگەیان نەخشەیێ شۆڕەشێ هاتە دانان».

دهۆك، دلۆڤان ئاكرەیی:

پەیڤدارێ دەستەیا وەبەرهێنانا هەرێما كوردستانێ دیاركر، شاندەكێ دەستەیا وەبەرهێنانا هەرێما كوردستانێ پشكداری د كۆنفرانسەكێ وەبەرهێنانێ ل وەلاتێ ئیماراتێ دا كر كو یێ‌ تایبەت بوو ب وەبەرهێنانێ ل كوردستانێ، دەستەیا وەبەرهێنانێ ل گەل كۆمپانیێن وەبەرهێنانێ ل جیهانێ و وەلاتێن دەڤەرێ كۆم بوویە.
بەرگەشت ئاكرەیی، پەیڤدارێ دەستەیا وەبەرهێنانا هەرێما كوردستانێ بۆ رۆژنامەیا ئەڤرۆ گۆت: «د ڤێ كونفرانسێ‌ وەبەرهێنانێ دا، سمینارێن تایبەت ب وەبەرهێنانێ ل هەرێما كوردستانێ هاتنە پێشكێشكرن و دیدار و كۆمبوون ژی ل گەل كۆمپانیێن ئیماراتی هاتنە ئەنجامدان، ئارمانج ژ ڤی كۆنفرانسی ئەوە: وەبەرهێنەرێن وەلاتێ ئیماراتێ و یێن پشكداربووی پتر ئاگەهداری دەرفەتێن وەبەرهێنانێ ل كوردستانێ بن و بهێن پڕۆژەیێن پیشەسازی و چاندنێ‌ و گەشتیاری و د بیاڤێن دی دا ل هەرێما كوردستانێ ئەنجام بدەن».
گۆتژی: «ئەڤ جۆرە كۆنفرانسە دێ دبەردەوام بن ل وەلاتێن كەنداڤی و نوكە ب بەردەوامی شاندێن وەلاتێن بیانی ب ئارمانجا ئەنجامدانا وەبەرهێنانێ ل هەرێمێ قەستا هەرێما كوردستانێ دكەن».

دهۆك، دلۆڤان ئاكرەیی:

بەرپرسەكێ كۆمسیۆنا بلندا سەربخۆ یا هەلبژارتنێن ئیراقێ دیاركر، ل گەل نێزیكبوونا ژڤانێ هەلبژارتنێن پەرلەمانێ ئیراقێ، كو بڕیارە ل 11/11/2025 بهێنە كرن، ئامادەكاری بەردەوام دهێنە كرن.
مەروان مەحەمەد، بەرپرسەكێ كۆمسیۆنا بلندا سەربخۆ یا هەلبژارتنێن ئیراقێ بۆ رۆژنامەیا ئەڤرۆ گۆت: «ئامیرێن دەنگدانێ ل رۆژا 14ی ئیلونێ دێ گەهنە بەندەرێ‌ فاو و رۆژا د دووڤ دا دێ گەهنە بەسرا و پشتی تمامبوونا رێكارێن ئەمنی، ئامیر دێ ل سەر تەڤایا پارێزگەهێن ئیراقێ و هەرێمێ دێ هێنە بەلاڤكرن».
ل گۆرەی گۆتنا مەحەمەدی، ئامیر هاتینە نووكرن و كێشەیێن تەكنیكی یێن بەرێ هاتینە چارەسەركرن، ئێك ژ گوهۆڕینێن سەرەكی، دانانا كامیرێ‌ یە بۆ نیاسینا روخسارێ دەنگدەری ل جهێ پەنجە مورا وی، دیسا بڕیارە ل رۆژا ئێكشەمبییا بهێت 14/9/2025 پشككێشان بۆ وەرگرتنا كارمەندێن سەر سندۆقێن دەنگدانێ ل هەرێمێ بهێتە كرن.

لەزگین جۆقی:

دەڤەردارێ‌ شێخان راگەهاند، د كابینەیا نەهێ یا حكومەتا هەرێما كوردستانێ‌ دا باشترین خزمەت بۆ خەلكێ شێخان هاتینە پێشكێشكرن و دبێژیت: ب گوژمێ 260 ملیار دیناران پتر ژ 163 پڕۆژەیێن خزمەتگوزاری هاتینە چێكرن.
سەردار یەحیا، دەڤەردارێ‌ شێخان بۆ رۆژناما ئەڤرۆ گۆت: «دەڤەرداریا شێخان د بەرفرەهبوونێ دایە و حكومەتا هەرێما كوردستانێ باشترین خزمەت بۆ دەڤەرداریا شێخان كرینە، بۆ نموونە: پڕۆژەیێ‌ چێكرنا جۆتسایدێ‌ شێخان بۆ لالشێ‌، كو جهەكێ ئایینی و شوونواری و دیرۆكیێ گرنگە، دیسا كابینەیا نەهی چەندین پڕۆژەیێن دی ل شێخان ئەنجامداینە».