قەیس وەیس:

چاڤەڕێ‌ دهێتە كرن شەمبییا بهێت دەست ب كاروانێ‌ خولا ستێرێن ئیراقێ‌ یا فوتبۆلێ‌ بۆ وەرزێ‌ 2025- 2026 ب ئەنجامدانا دو یاریێن ئاگرین یێن یانەیێن كوردستانی بهێنە كرن. ئەوا بڕیارە هەتا دووماهییا ئەیارا سالا 2026ێ‌ بەردەوامبیت، 20 یانە پشكدارن ژ وانا چار یانەیێن كوردستانی.
دهۆك چاڤەڕێ‌ پشتەڤانیایە بۆ بلندكرنا مۆرالێ‌
جەماوەرێ‌ وەرزشی یێ‌ یانەیا دهۆك دێ‌ ل ئێكشەمبییا بهێت دەمژمێر 8:30 شەڤ بەندا تیما خوە بن ژبۆ پشتەڤانیێ‌ ئەوا دێ‌ ل یاریگەها خوە مێڤاندارییا یانەیا ئەلگەرمە یا باژێرێ‌ ئەنبار كەت د یارییەكا ب هێز و تاقیكرنەكا ب ئاستەنگ دا، هەرچەندە د دیدارێن هەردو تیمان دا بتنێ‌ دو جاران بەرانبەر ئێك بووینە، هەر تیمەكێ‌ سەركەڤتنەك ئینایە، لێ‌ یارییا ڤێ‌ گەرێ‌ دێ‌ ب هێزتر و ئاستەنگتر بیت بۆ هەردو تیمان، ئەلگەرمە د وەرزێ‌ ئەڤ سالەكا هەتا چار یاریزانێن هەلبژارتیێ‌ ئوردن دگەل هێرشبەرێ‌ ئیراقی ئەیمەن حسێن ئیناینە دناڤ ڕێزێن خوەدا، د بەرانبەر دا یانەیا دهۆك گوهۆڕینێن باش كرینە و تیما خوە بهێزتر لێكرییە و خودانا ناسناڤێن كۆپا ئیراقێ‌ و كەنداڤی یە، دهێتە پێشبینیكرن ئەڤ یارییە ببەرهەڤبوونا جەماوەرەكێ‌ ئێكجار زووربیت.
زاخۆ ل بەغدا دێ‌ بزاڤێن سەركەڤتنا ئێكێ‌ كەت
تیما یانەیا زاخۆ ئەوا ب سەرپەرشتییا ڕاهێنەرێ‌ قەتەری ویسام رزق دێ‌ ل شەمبییا بهێت دەمژمێر 8:30 شەڤ ل یاریگەها ئەلمەدینە پایتەختێ‌ ئیراقێ‌ بەغدا بیتە مێڤانا یانەیا تەلەبە د یارییەكا ئاگرین دا، كوڕێن خابوری ئەوێن پێكهاتیێ‌ تیما خوە بۆ وەرزێ‌ ئەڤ سالە ب شێوەیەكێ‌ جودا بەرهەڤكری و كەمپەیەك ل توركیا دانایی چاڤێ‌ وێ‌ ل دو ئەركێن ژێكجوودانە، خولا ستێرێن ئیراقێ‌ و كۆپا كەنداڤی، یارییا دگەل تەلەبە دێ‌ بیتە ئێكەم تاقیكرن بۆ پێكهاتیێ‌ نوو یێ‌ یانەیێ‌، پشتەڤانێن زاخۆ چاڤەڕێ‌ مزگینییەكێ‌ نە ژ بەغدا، دیرۆكا دیدارێن هەردو یانەیان د بەرژوەندییا زاخۆیان دایە ئەوێن سەرجەمێ‌ پێنچ یاریێن ڤێ‌ دووماهیێ‌ چار وەكهەڤی و سەركەڤتن بۆ زاخۆ هاتینە تۆماركرن، دهێتە پێشبینیكرن كۆمەكا پشتەڤانێن زاخۆ گەشتا بەغدا بكەن ژبۆ بلندكرنا مۆرالا یاریزانان.
هەولێر ل دهۆكێ‌ دێ‌ مێڤاندارییا نەجەف كەت
بڕیارە ل دوشەمبییا بهێت ل دەمژمێر 8:30 شەڤ تیما یانەیا هەولێر ل یاریگەها یانەیا دهۆك مێڤاندارییا یانەیا نەجەف بكەت، ئەڤچەندە هات پشتی نە تمامبوونا یاریگەها شەهید فرانسۆ حەریری ئەوا دهێتە سەخبیركرن، یانەیا قەلا ومنارە خودان چار ناسناڤێن خولا ئیراقێ‌ یە لێ‌ كاوانێن وێ‌ یێن ئەڤسالە د جیگیر نینن و بوویە ئەگەر ڕێژەیا مەزن یاریزانێن نافخوەیی بیت ئەوا ب سەرپەرشتییا ڕاهێنەر باسم قاسمی دهێتە بڕێڤەبرن، د دووماهی پێنچ یاریێن هەردو تیمان یانەیا هەولێر شیایە دو سەركەڤتنا بەرانبەر سێ‌ وەكهەڤییان بیت، ئەڤ ئامارە دباشن لێ‌ یارییا ڤێ‌ گەڕێ‌ بەلینەیا سەركەڤتنێ‌ بزەحمەتە.
نەورۆز ژی ل یاریگەها دهۆكێ‌ دێ‌ كارەبا مێڤانكەت
ژلایێ‌ خوەڤە تیما یانەیا نەورۆز یا باژێرێ‌ سلێمانیێ‌ دێ‌ ل شەمبییا بهێت ل دەمژمێر 8:30 شەڤ ل یاریگەها یانەیا دهۆك مێڤاندارییا یانەیا كارەبا یا بەغدایی كەت، لسەر داخوازییا یانەیا نەورۆز یاریگەها دهۆكێ‌ هاتییە دەستنیشانكرن پشتی پارێزگارێ‌ دهۆكێ‌ د. عەلی تەتەر ڕازیبووی، كاودانێن یانەیا نەورۆز د هەستیار و دباش نینن تایبەت پشتی ئەوان روودانێن ڤێ‌ دووماهیێ‌ هاتینە پێش، لێ‌ دیارە بەرهەڤیێن خوە كرینە دبیت دباش ژی نەبن، لێ‌ دێ‌ بزاڤێن كەن ئێكەم سەركەڤتن بینن، دیدارێن هەردو یانەیێن یێن پێنچ یاریێن ڤێ‌ دووماهیێ‌ چار وەكهەڤی و سەركەڤتنەك بۆ كارەبا بوویە.
یاریێن مایی دێ‌ بڤی شێوەیی بن
ل شەمبییا بهێت بەغدا- دیالا ل یاریگەها كەرخ دەمژمێر شەشێ‌ ئێڤاری، ئێكشەمبییا بهێت نەفت میسان- مینا یاریگەها میسان دەمژمێر شەشێ‌ ئێڤاری، ئەلقاسم- نەفت دەمژمێر شەشێ‌ ئێڤاری، دوشەمبییا بهێت ئەلغرف- مووسل دەمژمێر شەشێ‌ ئێڤاری، كەرخ- جەوییە دەمژمێر 8:30 شەڤ، یارییا شورتە و زەورا هاتە پاشئێخستن.
شرۆڤەكارەكێ‌ وەرزشی بۆچوونا خوە هەبوو
ل دۆر یاریێن گەڕا ئێكێ‌ تایبەت یێن یانەیێن كوردستانی وەحید رەشید شرۆڤەكارێ‌ وەرزشی و ڕاهێنەرێ‌ بەرنیاس ل پارێزگەها دهۆكێ‌ بۆ رۆژنامەیا ئەڤرۆ گۆت: دهێتە پێشبینیكرن وەرزێ‌ ئەڤ سالە یاریێن بهێز و پڕی هەڤڕكی بهێنە كرن و دوور نینە سۆپرایز ژی هەبن، ژبەركو پرانییا یانەیان بەرهەڤیێن باش كرینە و گوهۆڕین د دەستەیا ڕاهێنانان و یاریزانان دا كرینە، یاریێن ئێكێ‌ تاقیكرنەكا ب هێزە بۆ یانەیێن كوردستانی لێ‌ هێشتا زوویە بەحس ل هەڤڕكیێ بكەین، ل دووڤ بەرهەڤیێن یانەیا دهۆك دبیت هێشتا پێدڤی ب دەمی هەبیت هەتا تێگەهشتنەكا باش دناڤبەرا یاریزانان پەیدابیت، لێ‌ كادرێ‌ ڕاهێنانێ‌ پێنگاڤێن باش هاڤێژتینە بۆ چارەسەركرنا كێماسییان، تیما دهۆكێ‌ دێ‌ ب هێزا پشتەڤانێن خوە یارییەكا مەزن كەت دبەرانبەردا تیما ئەلگەرمە دبیت هەسپێ ڕەش بیت ژبەر هەبوونا ستێرێن باش دناڤ رێزێن وێ‌ دا.
ل دور یارییا زاخۆ ژی ناڤهاتی گۆت: هەرچەندە من هند پێزانین ل سەر تیما زاخۆ نینن ژبەركو چوبوونە كەمپەكێ‌ ڕاهێنانێ‌ ل دەرڤە، لێ‌ ل دووڤ ئینانا یاریزانان و دەنگۆباسێن وێ‌ یا كارەكێ‌ مەزن دكەت، ئەركێ‌ وێ‌ ب سانەهی نینە بۆ وەرزێ‌ ئەڤ سالە وەكو دهۆكێ‌ ل وەرزێ‌ بۆری دێ‌ د خولا ستێرێن ئیراقێ‌ دا یاریێ‌ كەت و كۆپا كەنداڤی ژی.
ل سەر یانەیێن هەولێر و نەورۆز گۆت: هەردو یانەیێن كوردستانی د قووناغێن هەستیار دا دەربازكرینە ژبەر ئەگەرێن جودا، دبیت بەرهەڤیێن وان ل دووڤ ئاستێ‌ پێدڤی و حەزا جەماوەرێ‌ وان نەبیت، ئینانا یاریزانان ژی نەبووینە سۆپەر یان یێن باش، لێ‌ د فوتبۆلێ‌ دا بتنێ‌ ئەنجام دبنە ئێكلاكەر،ب گشتی و دیتنا وەرزێ‌ ئەڤ سالە خول دێ‌ یا جودا و هێزتر بیت، هوسا هزر دكەم كو دێ‌ مایتكرنێن سیاسی و كەسۆكی ژی هەبیت ژبەركو یانەیێن ناڤەڕاست و باشۆرێ‌ ئیراقێ‌ پتر لایەنێن سیاسی مایتكرنێ‌ تێدادكەن و دێ‌ هەڤڕكییەكا دژوار ژبۆ بدەستڤەئینانا سەركەڤتنان هەبیت و خەما یانەیێن ئیراقێ‌ دێ‌ ئەوبیت نەهێلین یانەیێن كوردستانی چو دەستكەڤتان بینن، لێ‌ یانەیێن دهۆك و زاخۆ خودان جەماوەرەكێ‌ مەزنە و ئەگەرێن هەرە پێشچاڤن بۆ ئاست بلندییا یاریزانان و دێ‌ بنە ڕێكخوەشكەر بۆ ئەنجامێن باش، هیڤییا من ژی ئەوە سەركەڤتن بارا یانەیێن مە یێن كوردستانی بیت.

د داخویانیەکێ دا جەمال سلێمان ڕێڤەبەرێ وەرزشی ل پارێزگەها دهۆکێ دیار کر ب وەرگرتنا پێزانین گشتی و سەرەدانا ژێرخانەیێن وەرزشی و چاوانییا پێشکەفتنێ مە دو خول ل وەلاتێ چینێ ب جلۆبەرگێن کوردی ب دووماهی ئینان.
زێدەتر ناڤهاتی بۆ رۆژنامەیا ئەڤرۆ گۆت: پشتی بۆ ماوەیێ سێ حەفتیان ل وەلاتێ چینێ دو خولێن تایبەت ب زانیاری و ڕاهێنانێ یا ئالۆگۆری و بانگەشەکرنا وەرزشا کەڤنەشۆپی دناڤبەرا وەرزشا چینێ و یێن عەرەبی دا ب دووماهی ئینا و پێخوەشحالین دگەل چەند ڕێڤەبەرێن مە یێن هەرێما کوردستانێ پشکداری دو خولێن گرنگ بووین کو بڕێیا وەزارەتا رەوشەبیری و لاوان یا حوکمەتا هەرێما کوردستانێ هاتبووینە دەستنیشانکرن بۆ پشکداریکرنێ، پشتی باوەرنامە بۆ مە هاتینە دان مە سۆپاسیێن خوە ب ئالایێ کوردستانێ ئاراستەیی ڕێکخەرێن خولێ کر، مە مفایەکێ باش ژێ وەرگرت تایبەت چاوانییا پێشئێخستنا ئاستێ وەرزشێ هەروەسان خالەکا دی هەبوویە کو گرنگییا وان ب ژێرخانەیا وەرزشی ژ هەموو لایەناڤە و بەرهەڤکرنا کادرێ شارەزا و پسپۆر و پشت بەستن ل سەر کرییە.
هەروەسان ناڤهاتی گۆت: ئەڤ هەردو خولە دهێنە هژمارتن ئێک ژ گرنگترین خولێن دهێنە ڕێکخستن و بپشکدارییا ٤٩ کەسان ژ وەلاتێن ئیراق، تونس، فلەستین، مەغرب، سعۆدیە، بەحرین، مسر و ئوردنێ، ژ وانان ١١ کەس خەلکێ کوردستانێ بوون تێدا هەرچار ڕێڤەبەرێن وەرزشی یێن پارێزگەهێن، دهۆک، سلێمانی و ئیدارەیێن سەربەخۆیا ڕاپەرین و سۆران پشکداربوون ئەوا ل ٢٠- ٨ هەتا ٩-٩- ٢٠٢٥ێ یا بەردەوام بوو.
هەروەسان ناڤهاتی گۆت: هەرد چارچووڤەیێ خولێ دا ب شێوەیێ پراکیتیکی مە سەرەدانا هۆل و یاریگەهێن وەرزشی گشت ژێرخانەیا وەرزشی ژی کر دیسان جهێن شینواری و دیرۆکی کربوو و ژلایێ پسپۆرانڤە بۆ مە پێزانین هاتنە گۆتن.
بۆ زانین هەردو خول بڤی شێوەیی بوون، خولا ڕاهێنانێ یا ئالۆگۆری وبانگەشەکرنا وەرزشا کەڤنەشۆپی دناڤبەرا چینێ و وەلاتێن عەرەبی دا (دورە تدریبیە للتبادل و الترویج للریاچات التقلیدیە بین الصین و الدول العربیە) یا دویێ خولا ڕاهێنانێ و ئالۆگۆری و بانگەشەکرنا وەرزشی بۆ گەنجێن عەرەبی ( دورە تدریبیە للتبادل و الترویج الریاچی للشباب العربی)، پشتی خول ب دووماهی هاتی باوەرنامە ژلایێ ڕێکخەرێن خولێ ل سەر پشکداران هاتنە بەلاڤکرن.

شاهۆ فەرید:

د داخویانیەكێ دا ئەحمەد حسێن جێگرێ سەرۆكێ فێدراسیونا فوتبۆلێ‌ ل پارێزگەها دهۆكێ‌ بۆ رۆژنامەیا ئەڤرۆ دیاركر پشتی زێدەبوونا ئەكادیمیێن وەرزشی مە وەكۆ فێدراسیون د كۆمبوونا خوەدا دانۆستاندن لسەر ڤی بابەتی كر، هەموو هاتنە ئاگەهداركرن لدووڤ ئەوان مەرج و یاسایێن ژ فێدراسیونا فوتبۆلا ئیراقێ بۆ مە رەوانەكرن، ئەم ژی دێ پێرابوون و دۆیڤچوونێ بۆ كەین وەكۆ یا بۆمە هاتیە ئاراستەكرن.
ناڤهاتی گۆت ژی: فێدراسیونا فوتبۆلێ‌ هەڤكاری دگەل رێڤەبەرییا وەرزشی ل پارێزگەها دهۆكێ مە لژنەیەكا هەڤپشك پێكئینایە، دەمێن بهێت ئەڤ لژنە دێ كارێ خوە رابیت و سەرەدانا ئەڤان ئەكادێمیان كەن، هەمی لایان ڤە دێ لژنە دوویڤ وان مەرج و یاسایان سەرەدەریێ دگەل وانا كەت، هەر ئەكادێمییەكا مەرج ژێ نەگرن دێ هێتە دائێخستن، چونكۆ گەلەگ ئەكادێمی بۆ مەرەمێن بازرگانی هاتینە ڤەكرن نە بۆ پێشڤەبرنا ئاستێ وەرزشێ و یاریزانان تنێ مەرەمێن كەساتی نە، هەر زێدەگاڤیەكا هەبیت دێ لژنا سەپەرشتیێ ئەویێ ئەكادێمیێ رەوانەیی لژنا یاسایی كەتن كۆ پێرابوون دگەل دا بهێنەكرن.

ڕاهێنەرێ‌ هەلبژارتیێ‌ ئیتالیا جینارۆ گاتۆزۆ هوژدارییەكا توند ل ستێرێن تیما خوە دا پشتی سەركەڤتنەكا ب زەحمەت ل سەر هەلبژارتیێ‌ ئیسرائیلێ‌ ب4-5 گۆلان، د یارییا واندا ئەوا ژ چارچووڤەیێ‌ گەڕا چارێ‌ ژ ڤاڤارتنێن دەربازبوون بۆ مۆندیالا جیهانی 2026ێ‌.
گاتۆزۆی بۆ پەیچێ‌ فوتبۆل ئیتالیا گۆت: ئەم دشێتین ژبەركو د كۆمەكا ب زەحمەت دا نینن و گەلەك گۆلێن ب سانەهی ل سەر مە دهێنە تۆماركرن و هەموو یاریزان ژی دانپێدانێ‌ دكەن، هەرچەندە یاریزان هەرزوو ڤەدگەرن پشتی گۆل ل سەر تیمێ‌ دبیت گۆلا پێشكەڤتنێ‌ دئینن، لێ‌ ئەز ڕازی نینم لسەر ڤێ‌ چەندێ‌، دڤێت نەهێلین گۆل بهێنە تۆماركرن كاروانەكێ‌ درێژ مایە د مۆندیالێ‌ دا، یارییا بەرانبەر ئیسرائیلێ‌ ئەم دشێت بووین و سەرنجراكێش بوو، ئێدی نابیت خەلەتی دوبارەبن ئەم ئیتالیاینە خودان باشترین یاریزانن.
بۆ زانین هەلبژارتیێ‌ ئیتایا د ڕێزا دویێ‌ یا كۆما خوە دهێت ب نەهـ خالان، بڕیارە یارییا بهێت ل 11ێ‌ چریا ئێكێ‌ یا بهێت ببیتە مێڤانا هەلبژارتیێ‌ ئەستۆنیا.