هەولێر، قائید میرۆ:

دەڤەردارێ‌ ئامێدیێ ئاشكرا كر، هەتا نوكە 75%ێ‌ ژ پڕۆژەیێ كۆڕنیشێ شێلادزێ تەمام بوویە و دبێژیت: پشتی ئاسایبوونا سەقایێ دەڤەرێ دێ كاركرن ل سەر پڕۆژەی دەست پێ كەتەڤە و ل هاڤینا ئەڤ سالە دێ تەمام بیت و پێشوازیێ‌ ل گەشتیاران كەت.
وارشین سەلمان، دەڤەردارێ‌ ئامێدیێ بۆ رۆژناما ئەڤرۆ دیاركر، ژ بەر دژواریا سەقایێ دەڤەرێ كاركرن د ناڤا پڕۆژەیێ كۆڕنیشێ شێلادزێ دا هاتیە راگرتن و گۆت: «پشتی ئاسایبوونا سەقایێ دەڤەرێ دوبارە دەست ب كاری دێ هێتە كرن، بڕیارە هاڤینا ئەڤ سالە تەمام ببیت و پێشوازیێ ل گەشتیاران بكەت، چونكی بەری نوكە كارەكێ باش د پڕۆژەیێ كۆڕنیشێ شێلادزێ دا هاتی ەكرن و ب رێژەیا 75%ێ تەمام بوویە».
وارشین سەلمان گۆت ژی: «پڕۆژەیێ كۆڕنیشێ شێلادزێ ژبلی كو دێ جوانیەكا دی دەتە دەڤەرا شێلادزێ و سیریێ دێ كاریگەری ل سەر ژێرخانا گەشتوگوزاری ژی ل دەڤەرا ئامێدیێ هەبیت، گەشتیارێن زۆر دێ‌ سەرەدانا كۆڕنیشێ شێلادزێ كەن، هەروەسا دێ دەلیڤەیێن كاری بۆ خەلكێ دەڤەرا دەشتا زێ و دەڤەرێ پەیدا كەت و خەلكەكێ زۆر دێ بنە خودان كار».

دهۆك، لەزگین جۆقی:

پەیڤدارێ رێڤەبەریا بەرەڤانیا باژێڕی ل پارێزگەها دهۆكێ دیاركر، د ماوەیێ چەند رۆژان دا هەتا نوكە ل پارێزگەها دهۆكێ 14 روودانێن لەهییان چێبووینە و دبێژیت: ب مخابنی ڤە روودانەكا خەندقینێ چێبوویە.
بێوار عەبدولعەزیز، پەیڤدارێ رێڤەبەریا بەرەڤانیا باژێڕی ل پارێزگەها دهۆكێ بۆ رۆژناما ئەڤرۆ گۆت: «ل دەڤەرداریا سێمێلێ ئاڤ چوویە د ناڤ مالەكێ دا، هەروەسا جهەكێ شووشتنا ترۆمبیلان ژی زیان گەهشتینێ‌ ل سێمێلێ و ئاڤ چوویە د ناڤ ترۆمبێلەكێ دا، دیسا ل گوندی میسكا زارۆكەك د ناڤ ئاڤێ دا خەندقییە، پشتی چار رۆژان لاشێ وی زارۆكی ژ ئاڤێ هاتیە دەرئێخستن، ل گەلیێ دهۆكێ ژی كەڤر هاتینە خوار، چەند مالێن دی ژی هەبووینە ئاڤ چوویە د ناڤ دا».

زاخۆ، دلۆڤان هالۆ:

كۆڤان ئاڤدەل، ڕێڤەبەرێ چاڤدێریا بازرگانی ل ئیدارەیا سەربخوە یا زاخۆ بۆ ڕۆژناما ئەڤرۆ دیاركر كو دڤێت داشكاندن د بەرژەوەندیا خەلكی دا بن، نەكو داشكاندن بۆ خاپاندنا خەلكی بن.
ڕێڤەبەرێ چاڤدێریا بازرگانی ل ئیدارەیا سەربخوە یا زاخۆ، ئاماژە ب وێ چەندێ ژی كر كو بێی ئاگەهداریا ڕێڤەبەریا چاڤدێریا بازرگانی نابیت داشكاندن بهێنە دانان و گۆت: «دڤێت بەری داشكاندنێ ب دەهـ ڕۆژان داخوازا داشكاندنێ ژ ڕێڤەبەریا مە بهێتە كرن، كا دێ داشكاندن چەند ژ سەدێ بیت و دێ بۆ كیژ پێدڤی و كەلوپەلان بیت».
گۆت ژی: «چەندین جهـ ژ ئەگەرێ داشكاندنا نە دورست و خاپاندنێ هاتینە دائێخستن، هندەك جهـ ژی هاتینە سزادان، لەوڕا ئەم ڕێكێ ب چو بازرگانان نادەین، سەرپێچیێ د دەرهەقێ وەلاتیان دا بكەن، چونكی ئەم پارێزڤانێن وەلاتیێن خوەینە».

دهۆك، دلۆڤان ئاكرەیی:

ڕێڤەبەرێ گشتی یا ئاڤ و ئاڤڕێژان ل هەرێما كوردستانێ دیاركر، ئەو وەلاتیێن هەتا نوكە پیڤەرێ ئاڤێ گرێ‌ نەدای یان وەكو هەڤپشك خۆ تۆمار نەكرین، ب تنێ 15 رۆژ ل بەر دەستێ وان ماینە، دا كو مفای ژ بڕیارا داشكاندنا كرێیا ئاڤێ وەربگرن، پشتی دەمێ دیاركری ب دووماهی دهێت، رێكارێن یاسایی ل بەرانبەر دێ‌ هێنە وەرگرتن.
ئاری ئەحمەد، ڕێڤەبەرێ گشتی یێ ئاڤ و ئاڤڕێژان ل هەرێما كوردستانێ بۆ رۆژنامەیا ئەڤرۆ گۆت: «ئەو وەلاتیێن پیڤەرێ ئاڤێ گرێ‌ نەدای، پێدڤیە ب زووترین دەم سەرەدانا ڕێڤەبەریێن ئاڤێ یان ئۆفیسێن كۆمپانیان ل باژێڕ و باژێڕۆكان بكەن؛ چونكی ل رۆژا 1/4/2026 دێ‌ ئەو دەمە ب دووماهی هێت و ل دویڤ بڕیارا جڤاتا وەزیران ب چ ڕەنگان ناهێتە درێژكرن ڤە».
بۆ زانین، ب تنێ سێ‌ رۆژ ل بەر دەستێ وەلاتیان ماینە، كو مفای ژ ڤێ‌ دەلیڤێ‌ وەربگرن و پشتی ڤی دەمی داشكاندن دێ هێتە هەلوەشاندن.

رەمەزان زەكەریا:

د روودانەكا ترافیكی دا ل سەر رێكا قایماوە بۆ مەندان، ل نێزیك بەردەڕەشێ ترۆمبێلەك، كو حەفت كەس تێدا بوون، ژ بن كۆنترۆلا شوفێری دەركەفت و كەفتنە د ناڤ رووبارێ خازری دا و د ئەنجام دا سێ‌ ئافرەتان گیانێ‌ خۆ ژ دەست دا.
بەرگریا شارستانی یا ئاكرێ راگەهاند: د ڤێ‌ روودانێ‌ دا، سێ ئافرەتان گیانێ خۆ ژ دەست دا و چار كەس ژی بریندار بوون، ژیێ قوربانیان د ناڤبەرا 17 بۆ 40 سالیێ دا بوو، ژ نەتەوێن كورد و عەرەب پێكهاتبوون، تشتێ هەری دلتەزین ئەوە، كو ئێك ژ وان ئافرەتێن گیانێ خۆ ژ دەست دای بڕیار بوو د هەمان رۆژا دا ئاهەنگا هەڤژینیا خۆ ئەنجام بدەت.
دیسا پشتی سێ رۆژان ژ بەرزەبوونا وی، تەرمێ سنێلەكێ‌ 14 سالی ب ناڤێ جارولا مەحمودی ل بەنداڤا گوندێ میسەكا ل سنۆرێ شێخان هاتە دیتن، ناڤبری ب ڕەگەز عەرەب بوو، وەكو شڤان كار دكر و خەندقی بوو.

رەمەزان زەكەریا:

ڕێڤەبەریا سەخبێری و پاراستنا ڕێك و پران ل دەڤەرداریا ئاكرێ دیاركر كو تیمێن وان كارێن سەخبێركرنا بلەز ئەنجامداینە ژ بۆ چارەسەركرنا وان زیانێن ژ ئەنجامێ بارانێن زۆر و لەهیان ب سەر رێكێن دەڤەرێ دا هاتین.
ئەندازیار محسن میرانی، رێڤەبەرێ سەخبێری و پاراستنا رێك و پران ل ئاكرێ بۆ ئەڤرۆ گۆت: «كارێ سەخبێركرنا بلەز بۆ چارەسەركرنا زیانێن لەهیان ل سەر رێكا چەمەی و كێلە شێخ بزێن و كێلە بسمیران ل گردەسێن هاتە ئەنجامدان، كو بەری نوكە ژ ئەگەرێ بارانێ هاتبوونە گرتن و تیمێن سەخبێركرنێ ئەو رێك ڤەكرن».
ناڤبری گۆتژی: «رێكا دۆڕیانا گردەسێن بۆ نیاوك گردەسێن هاتە پاقژكرن، پشتی بارانێن زۆر كارتێكرن ل لایێن رێكێ كری، تیمێن ڕێڤەبەریێ كارێ سەخبێركرنا بلەز بۆ ڤەكرنا پرا گەشكا یا بەروەخت ل سەر رێكا ئاكرێ و زێراڤ ئەنجامدا، كو ژ ئەگەرێ لەهیان رێكا وێ هاتبوو گرتن و نوكە هاتیە ڤەكرن».