سەرۆك مەسعود بارزانی، ل سەلاحەدین پێشوازی ل پاتریك دورێل، بالیۆزێ فرەنسا ل ئیراقێ كر.
د دیدارەكێدا ب بەرهەڤبوونا (یان برێم) قۆنسلێ گشتیێ فرەنسا ل هەولێرێ، رەوشا گشتییا ئیراقێ و دووماهی پێشهاتێن سیاسی و ئەمنی یێن دەڤەرێ، هەروەسا پرۆسەیا ئاشتیێ ل توركیا و هاتنا مەزلووم عەبدی و شاندێ دەم پارتی بۆ ئالیێ سەرۆك بارزانی هاتنە گەنگەشەكرن.
د پشكەكا دی یا وێ دیدارێدا ئاماژە ب پێنگاڤێن پێكئینانا كابینەیا دەهێ یا حوكمەتا هەرێما كوردستانێ و هەلبژارتنێن داهاتی یێن جڤاتا نوونەرێن ئیراقێ و پرۆسەیا سیاسی ل ئیراقێ هاتە كرن، هەروەسا دوپاتی ژی ل پێشڤەبرنا پەیوەندیین و دۆستایەتییا دیرۆكی د ناڤبەرا گەلێ كوردستانێ و گەلێ فرەنسا دا هاتە كرن.

دوهی سێشەمبی 18/3/2025، سەرۆك مەسعود بارزانی، ل سەلاحەدین پێشوازی ل حەسەن توران، سەرۆكێ بەرەیێ توركمانی ل ئیراقێ كر.
د دیدارەكێدا بۆچوون ل دۆر پرۆسەیا سیاسی ل ئیراقێ و رەوشا پارێزگەها كەركووكێ هاتنە لێكگۆهارتن و دوپاتی ل سەر هەماهەنگیێ و نێزیكبوونێ د ناڤبەرا ئالیێن سیاسی یێن پارێزگەها كەركووكێ هاتە كرن، ئەوژی ژ پێخەمەت ب هێزكرنا پێكڤەژیانێ و ئارامیێ و پێشكێشكرنا خزمەتگوزارییان بۆ ئاكنجیێن پارێزگەها كەركووكێ.

پەیڤدارێ ئێكەتی نیشتمانی كوردستانی راگەهاند: گەلەك د گەشبینین ب وان دانوستاندنێن د ناڤبەرا پارتی دیموكراتی كوردستان و ئێكەتی نیشتمانی كوردستان دهێنە كرن بۆ پێكئینانا كابینەیا دەهێ یا حوكمەتا هەرێمێ ب تایبەت د كۆمبوونا ڤێ دووماهیێ یا لژنەیا دانوستاندكارا د ناڤبەرا پارتی و ئێكەتیێ دا و كۆمبوونا ڤێ دووماهیێ د ناڤبەرا بافل تالەبانی و مەسرور بارزانی دا، كو كۆمبوونێن گەلەك گرنگ و باش بوون و ئەنجامێن باش هەبوون و ئەنجامێ كۆمبوونا مەسرور بارزانی و بافل تالەبانی ئاراستەی لژنەیا دانوستاندكارا پارتی و ئێكەتیێ هاتیە كرن و كۆمبوونا چاڤەڕێكریا پارتی و ئێكەتیێ دێ ل سەر وان ئەنجامان هێتە كرن تاكو بەرنامەیێ پێكڤەكاركرنێ و پێكئینانا كابینەیا نوو یا حوكمەتا هەرێمێ و دەستبكاربوونا پەرلەمانێ كوردستانێ بهێتە دانان.
سەعدی ئەحمەد پیرە، پەیڤدارێ ئێكەتی نیشتمانی كوردستان گۆت» شاندێ دانوستاندكار 90% جوداهیێن د ناڤبەرا پارتی دیموكراتی كوردستان و ئێكەتی نیشتمانی كوردستان هەین، نەهێلاینە. دیاركر ژی كۆمبوونا سەرۆكێ حوكمەتا هەرێما كوردستانێ و سەرۆكێ ئێكەتیێ ژی، رێژەیا 10% یا مای نەهێلا كو ئەنجامێ كۆمبوونێ یێ باش و ئەرێنی بوو.
سەعدی ئەحمەد پیرە زێدەتر گۆت» ب گۆڕەی تێكگەهشتنان، كابینەیا نوو یا حوكمەتا هەرێما كوردستانێ دێ دەستهەلات ل هەموو دەڤەرێن هەرێما كوردستانێ هەبیت، هەروەسا دەرگەهێ پارتی دیموكراتی كوردستان و ئێكەتی نیشتمانی كوردستان یێ ڤەكریە بۆ وێ چەندێ ئالیێن دی ژی پشكداریێ د كابینەیا نوو یا حوكمەتا هەرێما كوردستانێدا بكەن، بەلێ ئالی ب خوە پشكداریێ ناكەن».
پەیڤدارێ ئێكەتیێ رۆهنكر ژی « مەرجێ پارتی ئێك پەرلەمان، ئێك حوكمەت، ئێك هێزا پێشمەرگەیە، ب دیتنا ئێكەتیێ ژی ئەو مەرجێ پارتی یێ گرنگە بۆ پێكئینانا حوكمەتا نوو یا هەرێما كوردستانێ، ب مەرجێ هەڤپشكییا راستەقینە، هەردو ئالی یێن گەهشتینە ئەنجامێن باش، ئەو ئەنجامێن باش ژی دێ بەرچاڤی شاندێ دانوستاندكارێ هەردو ئالییان هێتە كرن بۆ كۆمبوونێن داهاتی ل سەر پرسا پێكئینانا كابینەیا نوو یا حوكمەتێ مفای ژێ وەرگرن و هیچ ئاستەنگەك ل پێشبەری دروستكرنا كابینەیا نوو یا حوكمەتێ نەمینیت».

شیرەتكارێ سەربازی یێ سەرۆكێ هەرێما كوردستانێ راگەهاند:سێ فرقەیێن هێزا پێشمەرگەی یێن دەستبكاربووین و سێ فرقەیێن دی ژی ل دەمەكێ نێزیك دێ دەستبكار بن، هەڤپەیمان ژی ب ڤێ پێنگاڤێ د دلخوەشن ودێ بیتە ئەگەرەك كو زێدەتر هاریكارییا هێزا پێشمەرگەی بكەن، چونكە ئەو هەردەم هاریكار بوون و دێ بەردەوام بن ژی، كو ئارمانج ژ وان پێنگاڤان ئەوە ل هەرێما كوردستانێ ئێك هێزا پێشمەرگەی هەبیت.
بابەكر زێباری، شیرەتكارێ سەربازی یێ سەرۆكێ هەرێما كوردستانێ گۆت» پرۆسەیا ئێكگرتنا هێزا پێشمەرگەی یا بەردەوامە و د نوكە دا سێ فرقەیێن هێزا پێشمەرگەی یێن تمام بووین و دەست ب كاری ژی یا كری، كو پێنگاڤەكا گەلەك باشە و رێكخستن بۆ هاتیە كرن و یێن هاتینە پڕچەككرن و مەشق و راهێنان ژی یێن پێ هاتینە كرن و یێن هاتینە بەرهەڤكرن، نوكە ژی سێ فرقەیێن دی د قۆناغا دووماهیێ دانە و ئەوژی ل دەمەكێ نێزیك دێ دەستبكار بن، لەوما ئەوێن ژ مەشقێ ب دووماهی دهێن دێ هەژمارا وان بیتە شەش فرقە و بڕیارە هەتا دووماهییا سالا 2026 هەژمارا فرقەیێن هێزا پێشمەرگەی ببیتە 11 فرقە».
بابەكر زێباری گۆت ژی» هەڤپەیمان ب وێ پێنگاڤا هێزا پێشمەرگەی گەلەگ د دلخوەشن و هاریكارێن مەنە و ل هەموو پێنگاڤێن ئێكگرتنا هێزا پێشمەرگەی د هاریكار و هەماهەنگن، چونكە دخوازن ئێك هێزا پێشمەرگەی ل هەرێما كوردستانێ هەبیت و ل بن سیبەرا وەزارەتا كاروبارێن پێشمەرگەی دا بیت، لەوما هاریكارییا هەڤپەیمانان بۆ هێزا پێشمەرگەی یا بەردەوامە و دێ بەردەوام ژی بیت، چونكە ئارمانجا وان ژی ئەوە ل هەرێما كوردستانێ ئێك هێزا پێشمەرگەی هەبیت، كو پێنگاڤێن گەلەك باش یێن هاتینە هاڤێتن و ل پاشەڕۆژێ هەرێما كوردستانێ دێ بیتە خودانا ئێك هێزا پێشمەرگەی.

سەرۆكێ دەستەیا وبەرئێنانێ ل هەرێما كوردستانێ راگەهاند: وەكو حوكمەتا هەرێما كوردستانێ مە چەندین رێكێن جۆراوجۆر یێن بكارئیناین بۆ وێ چەندێ بشێین پترییا وەبەرئێنەرێن بیانی بۆ هەرێما كوردستانێ رابكێشین و گەلەك ئاسانكاریێن باش ژی مە یێن بۆ كرین، ب تایبەت بۆ ئەمریكا كو نوكە رۆلەكێ باش د وەبەرئێنانێ ل هەرێما كوردستانێ دا یێ هەی.
د. محەمەد شوكری، سەرۆكێ دەستەیا وەبەرئێنانێ ل هەرێما كوردستانێ گۆت» دەستەیا وەبەرئێنانێ د چارچۆڤەیێ بزاڤێن كابینەیا نەهێ یا حوكمەتا هەرێما كوردستانێ بۆ ب هێزكرن و هەمە جۆركرنا ئابووری چەند دەستپێشخەرییەك كرینە و پێنگاڤێن گرنگ یێن هاڤێتین د ئاسانكاری و هاندانا وەبەرئێنەرێن بیانی ل هەرێما كوردستانێ، ژوان دامەزراندنا یەكەیا راكێشانا وەبەرئێنەرێن بیانی ل سالا 2022 بۆ پێشكێشكرنا خزمەتگوزاریێن تایبەت بۆ وەبەرئێنەرێن بیانی بۆ پێدانا رێنمایی و پێزانین و ئاسانكارییان د كاروبارێن واندا و دروستكرنا براندێ (ئینڤێست كوردستان) و وێبسایت بۆ راگەهاندنا براندەكی بۆ نیشادانا باشتر یا كوردستانێ ب رێكا وێبسایتێ تایبەت ب (invest.gov.krd) بۆ كۆمكرن و بەرچاڤكرنا پێزانینان و دەلیڤەیێن وەبەرئێنانێ ب زمانێ ئنگلیزی و ڤەكرنا رێكەكا راستەوخوە یا بەردەست یا ئۆنلاین بۆ پەیوەندیكرنێ و پشكداری د كۆنفرانس و هەلكەفتێن نێڤدەولەتیدا و پشكدارییا كارا هەبوو د هەلكەفتێن نێڤدەولەتیدا وەكو كۆڕبەندێ ئابووریێ جیهانی ب داڤوس ل سویسرا و كۆڕبەندێ سالانەیێ وەبەرئێنانێ ل ئیماراتێ و هەلكەفتێن نوونەرایەتیێن حوكمەتێ ل دەرڤە بۆ ناساندنا هەرێما كوردستانێ ب وەبەرئێنەرێن بیانی».
د. محەمەد شوكری دیاركر ژی» ئاستێ وەبەرئێنانا ئەمریكا ل هەرێما كوردستانێ ل دەستەیا وەبەرئێنانێ مۆلەت ب دو پڕۆژەیان ب سەرمایێ 100 ملیۆن دۆلاران هاتیە دان، بەلێ ژبلی وێ چەندێ ژی كۆمپانیێن پەترۆلی یێن ئەمریكی ل هەرێما كوردستانێ گەلەك چالاكی هەبوون و نوكە ژی چەند براندێن ناڤدار یێن ئەمریكی تایبەت د كەرتێن خۆراكی و ترۆمبێلان ل بازارێ هەرێما كوردستانێ یێن هەین و دسیاندایە ئەمریكا وەكو مەزنترین ئابوور ل جیهانێ خودانا چەندین كۆمپانیێن مەزن ب قەبارەیێ مەزنتر پشكداریێ د وەبەرئێنانێ ل هەرێما كوردستانێ بكەت و هەژمارا پڕۆژەیان زێدەتر بكەت».
سەرۆكێ دەستەیا وەبەرئێنانێ ل هەرێما كوردستانێ دیاركر ژی» هەرێما كوردستانێ دەلیڤەیێن بەرفرهە پێشكێشی كۆمپانیێن ئەمریكی دكەت د وارێ چاندنێ و خۆراكی و پیشەسازی و گەشتیاری و وزەیا نوو و تەكنەلۆژیا پێزانینان و ساخلەمیێ و پەروەردەیێ، لەوما وەبەرئێنانا ئەمریكی دشێت د ڤان كەرتاندا هاریكار بیت بۆ گەشەكرنا ئابوورێ كوردستانێ و دروستكرنا دەلیڤەیێن كاری و ب هێزكرنا پەیوەندیێن ئابووری و ئەم ژی د بەرهەڤین بۆ وێ چەندێ هەموو جۆرێن هاریكاریێ و ئاسانكاریێ بۆ بكەین».