جێگرێ رێڤەبەرێ گشتیێ كەهرەبا پارێزگەها دهۆكێ بۆ رۆژناما ئەڤرۆ دیار كر، پڕۆژەیێ رۆناهی ل دهۆكێ، ل رۆژا 27/3/2025ێ كەفتیە د كاری دا و هەتا نوكە ب رێژەیا 68% كەهرەبا پڕۆژەیێ رۆناهی ل سەنتەرێ‌ پارێزگەها دهۆكێ تمام بوویە و كارەبا وەلاتیان بوویە 24 دەمژمێری.
حازم محەمەد، جێگرێ رێڤەبەرێ گشتیێ كەهرەبا پارێزگەها دهۆكێ گۆت: «ئەڤ سالە پڕۆژەیێ رۆناهی دێ گەهتە هەمی دەڤەران ل سەرانسەری پارێزگەها دهۆكێ دێ بیتە خۆدان كەهرەبا 24 دەمژمێری د ئەڤسالە دا، دیسا هەتا نوكە 310 موەلیدەیێن كەهرەبێ هاتینە ڤەمراندن، ئەو موەلیدێن ماین ژی ئەڤ سالە دێ هێنە ڤەمراندن و پارێزگەها دهۆكێ دێ بیتە خودان كەهرەبا 24 دەمژمێری».

هەرهین محەمەد:

هێژا عەبدولواحد، رێڤەبەرێ‌ ئاڤدێریێ‌ ل پارێزگەها دهۆكێ‌ بۆ ئەڤرۆ دیار كر، پڕۆژەیێ‌ گەشتیاری یێ‌ كەنالێ‌ ئاڤێ‌ ل گوندێ‌ پیرۆمەرا، پڕۆژەكێ‌ ستراتیژی یێ‌ حكومەتا هەرێما كوردستانێ‌ یە، ئەڤ پڕۆژە ب ناڤێ‌ راكێشانا ئاڤێ‌ بۆ سكری دهۆكێ‌ یە و ژ سێ‌ وەستگەهان پێك دهێت و دبێژیت: پڕۆژە بۆ وێ‌ مەرەمێ‌ دهێتە چێكرن، دەما ئاڤا سكرێ‌ دهۆكێ‌ كێم دبیت، ئەڤ ئاڤە وێ‌ كێمبوونێ‌ قەرەبوو بكەت.
ناڤهاتی گۆت: «پڕۆژەیێ‌ كەنالێ‌ ڤەكری یێ‌ كۆنكرێتی ب شێوەكێ‌ گەشتیاری مە چێكری، ئەو ژ بۆ هندێ‌ بوویە، ئەو رێژەیا ئاڤێ‌ یا ژ رووبارێ‌ دیجلە دهات، ب هەروە نەچیت و دروست بكەهیتە سكرێ‌ دهۆكێ‌ و روویەكێ‌ گەشتیاری بدەتە دەوروبەرێن سكرێ‌ دهۆكێ‌، ئەگەر سكری دهۆكێ‌ ژی ئاڤا وی یا زێدە بیت، ئەم دشێین ڤەكەین».
گۆتژی: «ئەڤ پڕۆژەیێ‌ گەشتیاری هاتیە چێكرن، ب تنێ‌ بۆ وەرزەكی یە، ب تایبەت دەمێ‌ ئاڤا سكرێ‌ دهۆكێ‌ كێم دبیت، مفا ژ وێ‌ ئاڤێ‌ بهێتە وەرگرتن بۆ قەرەبووكرنا ئاڤا سكری».
هێژای زێدەتر گۆت: «ئەڤ پڕۆژە هاتیە چێكرن ژ بۆ قەرەبووكرنا ئاڤا سكری دەما كێم دبیت، ژ بەركو ئاڤا سكرێ‌ دهۆكێ‌ ژ بۆ چاندن و ئاڤا ڤەخوارنێ‌ ب كار دهێت».

هەولێر، قائید میرۆ:

پەیڤدارێ ئێكەتیا زانایێن ئایینێ ئیسلامێ‌ دیار كر، كڕین و فرۆتنا ئەردێن فەرمانبەران دو جۆرن و یێن هەژمارا ئەردی بۆ دەركەفتی و ل سەر نەخشەی دیاربن دشێن مامەلێ پێ بكەن و بەروڤاژی یێن ب تنێ فۆرم پێشكێش كری نابیت كڕین و فرۆتنێ پێ‌ بكەن.
دكتۆر عەبدولا شێركاوەیی، پەیڤدارێ ئێكەتیا زانایێن ئایینێ ئیسلامێ‌ بۆ رۆژناما ئەڤرۆ دیاركر، خەلكەكێ زۆر پرسیار دكەت، مامەلەیا ئەردێ فەرمانبەران دروستە یان ژی بەروڤاژی شەریعەتێ ئیسلامێ یە و گۆت: «ل گورەی شەریعەتێ ئیسلامێ هەر فەرمانبەرەكێ ژ لایێ حوكمەتا هەرێما كوردستانێ ڤە هەژمارا پارچا ئەردی بۆ دەربچیت و ل سەر نەخشەی دیاربیت ئەڤە دشێن كڕین و فرۆتنێ ب ئەردێ خۆ بكەن و چو ئاریشە ل سەر نینە، بەلێ هەگەر ب تنێ فۆرم پێشكێش كربیت و هەژمارا پارچا ئەردی دیار نەبیت و نەخشە نەبیت ئەڤە نابیت كڕین و فرۆتن ب ئەڤی ئەردی بهێتە كرن».
دكتۆرعەبدولا شێركاوەیی گۆتژی: «هەتا نوكە بابەتێ كڕین و فرۆتنا ئەردێ فەرمانبەران یێ خۆیایە و ب ڤی شێوەی دشێن سەرەدەریێ دگەل بكەن، ئەگەر بهێت و پێدڤی ب فتوایەكا گشتی ژی بكەت، ئەڤە دێ جڤاتا بلندا فەتوایێ ل هەرێما كوردستانێ كۆمبیت و فتوایێ ل سەر دەت، بەلێ هێشتا نەگەهشتیە ڤی ئاستی پێدڤی ب كۆمبوونێ بكەت و بابەت یێ ئاشكرایە».

زاخۆ، دلۆڤان هالۆ:

مالپەرێ فەرمی یێ حكومەتا هەرێما كوردستانێ دیاركر كو د كابینەیا نەهێ یا حكومەتا هەرێما كوردستانێ دا زێدەتری دو هزار پڕۆژەیێن دروستكرن و قێركرنا جادەیان ل سنۆرێ ئیدارا سەربخوە یا زاخۆ هاتینە ئەنجامدان.
مالپەرێ فەرمی یێ حكومەتا هەرێما كوردستانێ ئاماژە ب وێ چەندێ ژی كر كو ئەڤ جادە ب شێوەیەكێ جوان و سەردەمیانە هاتینە دروستكرن و دێ بیتە ئەگەرێ پاشەرۆژەكا گەش ل دەڤەرێ و ئیدارا سەربخوە یا زاخۆ هەردەم د نوبوونێ دایە.

رەمەزان زەكەریا:

سماقا دەڤەرا دینارتێ ناڤودەنگیا خۆ هەیە، ژ بەركو سروشتێ سماقێ وەسایە ل بلنداهیێن چیا شین دبیت، چەندین قووناغێن كاری دەرباز دكەت، هەتا سماق دگەهیتە بازاڕی، ل دەڤەرا دینارتە ژێدەرێ سەرەكیێ ئابووریێ پتریا خەلكێ یە.
حامد زرار، جۆتیارەكێ دەڤەرێیە بۆ ئەڤرۆ گۆت: «ئەڤ سالە بەرهەمێ سماقێ گەلەك یێ‌ باشە، هەرچەندە باران دكێم ژی بوون، بەلێ بەرهەمێ‌ سماقا من ل هەمبەر سالا بۆری باشترە».
مەسعود محەمەد بازرگانێ سماقێ بۆ ئەڤرۆ گۆت: «ئەم سماقێ‌ ژ جۆتیاران دكڕین و باش پاقژ و ب سەروبەر دكەین و دبەینە بازاڕی دفرۆشین، دیسا ئەم سماقێ بو دەرڤە ژی فرێ دكەین، وەكو: توركیا و هۆلەندا و ئەلمانیا و دانیمارك هەر دەولەتەكا خواست ل سەر هەبیت، سماقا سپی پتر ماركێت دكرن، یا سۆر ئەم بۆ مێرسینێ فرێ دكەین».
ل ناوچەداریا دینارتە، ئیك كیلۆیا سماقێ ب سێ هزار هەتا حەفت هزار دینارا دهێتە فرۆتن و سێ جۆرێن سەرەكی هەنە: سماقا سۆر و سپی و بالیكی، بەرهەمێ سماقێ ئەڤ سالە ل دینارتە دگەهیتە پێنج هزار تەنان و گورانكاریێن كەشوهەوای كاریگەری ل سەر نەكریە، سێ ملیۆن و پێنجسەد هزار بنەدارێن سماقێ ل سەر رووبەرێ هەشت هزار دۆنەمێن ئەردی هاتینە چاندن.