سەرۆكێ هەرێما كوردستانێ، پێشوازی ل شاندەكێ رەڤەندا ئیراقی ل ئەمریكا ب سەرۆكایەتییا مارتن مەننا، سەرۆكێ ژۆرا بازرگانییا كلدانی – ئەمریكی كر و دوپاتی ل پێكڤەژیانێ و لێبۆرینێ كر.
نێچیرڤان بارزانی، سەرۆكێ هەرێما كوردستانێ رۆلێ رەڤەندا ئیراقی ل دەرڤە ژروویێ بهێزكرنا پەیوەندیێن ئیراقێ و هەرێما كوردستانێ ل گەل جڤاكێ نێڤدەولەتی و پشتەڤانییا وان د پێشئێخستنا ئابووری و گەشەپێدانێدا، بلند هەلسەنگاند».
سەرۆكێ هەرێما كوردستانێ د وێ دیدارێدا دوپاتی ل گرنگییا پاراستنا ناسنامەیا نیشتمانی و فرەهییا كلتووری و ئایینی یێ ئیراقییان و بهێزكرنا پێكڤەژیانا ئاشتییانە دناڤبەرا هەموو پێكهاتەیاندا كر.
شاندێ مێهڤان كەلتوورێ هەڤدوقەبوولكرنێ و پێكڤەژیانا ئاشتییانە و لێبۆرینێ د ناڤبەرا پێكهاتەیێن جودا دا ل هەرێما كوردستانێ بلند هەلسەنگاند و داكۆكی ل بهێزكرنا هاریكاریێ ل گەل هەرێما كوردستانێ ب تایبەتی د وارێ ئابووری و وەبەرئێنانێدا كر ب جۆرەكی كو پشتەڤانییا گەشەپێدانێ بكەت و دەلیڤەیا نوو بۆ پەیوەندییا د ناڤبەرا رەڤەندا ئیراقی ل دەرڤە و كوردستانێدا پەیدا بكەت.
شاندێ ناڤبری چەند بۆچوونەك دەرباەری كار و پڕۆژەیێن وەبەرئێنانێ ل دەشتا نەینەوا و هەرێما كوردستانێ بەرچاڤكرن.
هەروەسا نێچیرڤان بارزانی دوپاتی ل سەر پێگیرییا هەرێما كوردستانێ ب پێكڤەژیانا ئاشتییانە و لێبۆرینێ د ناڤبەرا هەموو تەخ و چینێن جڤاكی كر و دیاركر كو هەرێما كوردستانێ هەردەم وەكو نموونەیەك بۆ ئاشتیێ و فرەهیێ دێ مینیت.
بهێزكرنا پەیوەندییان د ناڤبەرا ئیراقیێن ناڤخوە و دەرڤەی وەلاتی و هاریكارییا هەڤپشك یا وان ژ پێخەمەت پاشەڕۆژەكا باشتر بۆ هەموویان ب گرنگ زانی. هەر د چارچۆڤەیێ وێ چەندێ دا هەموو بەرهەڤی بۆ پەیداكرنا هەموو ئاسانكارییان و دەلیڤەیێن گونجای یێن وەبەرئێنانێ ل هەرێما كوردستانێ بۆ شاندێ ناڤبری دیاركر.

بسپۆرەكێ دیرۆكا هەڤچەرخ ئاماژەكر، گوهۆڕینێن مەزن بڕێڤەنە ل سەر ئاستێ دەڤەرا رۆژهەلاتا ناڤین و نوكە دۆزا كوردان گەهشتییە ئاستەكێ بلند. هەروەسا دبێژیت، بۆ سەرئێخستنا پڕۆسەیا ئاشتیێ ژی ل توركیا هەم توركیا و هەم PKK ژی پێدڤی ب هاریكاریا پارتی و سەرۆك بارزانی یا هەی.
د. شێرزاد زەكەریا، پسپۆرێ دیرۆكا هەڤچەرخ ل زانكۆیا زاخۆ بۆ رۆژنامەیا (ئەڤرۆ) گۆت» كوردستان یا بەر ب قۆناغەكا نوو دچیت و ئێدی بەر ب پاشڤە نازڤریت، باشترین نموونە ژی ئەو گوهۆڕینێن ل رۆژهەلاتا ناڤین دهێنەكرن، ب دیتنا من دبیت كیانەكێ سیاسی بۆ كوردان بهێتە دروستكرن ئەڤجا یا دیارنینە دێ ئێك كیان بۆ كوردان هێتە ئاڤاكرن یان هەر پارچەیەكا كوردستانێ دێ كیانێ خوە هەبیت، ئەڤە دێ ڤەگەڕیت بۆ بڕیارێن وەلاتێن زلهێز ل جیهانێ، یا مرۆڤ پێ گەشبین ئەوە نوكە وەك بەرێ نەمایە بۆ نموونە ئیمانوێل ماكرۆن، سەرۆكێ فرەنسا ل كۆنگرەیێ سووریێ دا وەك پارێزەرەكێ ئاریشەیا كوردی ئاخڤت، ئانكو ئەو ئاخڤتنێن سەرۆكێ فرەنسا كرین كوردان پێدڤی ب ڤێ پشتەڤانیێ یا هەی، چونكە د دەمەكی دا ئەم پێدڤی ب هاریكارییا فەرمانبەرەكێ وەزارەتا دەرڤەیا فرەنسا یان ئەمریكا و بریتانیا هەبوو، ئەڤرۆ دۆزا كوردان یا ل بەراهییا هەموو دۆزان، پشتی شەڕێ غەزە و شەڕێ ل دەڤەرێ هاتیەكرن بێگومان دێ گوهۆڕین پەیدابن و د بەرژەوەندیا كوردانبیت، هەر شەڕەكێ مەزن ل جیهانێ پەیداببیت دێ گۆهۆڕین هێنەكرن چاوا پشتی شەڕێن جیهانی و شەڕێ سار گوهۆڕین هەبوون نوكە ژی دێ گوهۆڕین ل دەڤەرێ و جیهانێ پەیدابن، نەخشە دهێتە گوهۆڕین و كورد ژی دێ رۆلێ خوە بینن».
د. شێرزادی ئاماژەكر» لڤینێن دپلۆماسی ل هەرێما كوردستانێ ب هێزن، ب تایبەتی پێگەهەكێ بهێز یێ ل ناڤ كوردان هەی ئەوژی پێگەهێ لێڤەگەرێ كوردانە كو سەرۆك بارزانی یە، ژبلی بابەتێن سیاسی و فەرمی و سەرۆك بارزانی پێگەهەكێ تایبەت ل سەر ئاستێ دەڤەرێ و جیهانێ یێ هەی، چو كار ناهێنەكرن ل دەڤەرێ هەكە بۆچوونا هەرێما كوردستانێ و سەرۆك بارزانی نەهێتە وەرگرتن، نوكە ئەمریكا و ئۆرۆپا دخوازن هێشتا پێگەهێ خوە ل رۆژهەلاتا ناڤین بهێز بكەن ئەڤەژی دبیتە ئەگەر كوردان رۆل د ڤان گوهۆڕیناندا هەبیت، ژئالییەكێ دیڤە پڕۆسەیا ئاشتیێ ل توركیا یا گەهشتییە ئاستەكی هەم حوكمەتا توركیا و هەم ژی PKK پێدڤی ب هاریكارییا پارتی دیموكراتی كوردستان و سەرۆك بارزانی یا هەی بۆ ناڤبەریێ د ناڤبەرا هەردو ئالییاندا، پارتی ژی یا رژدە ل سەر وێ چەندێ پڕۆسەیا ئاشتیێ سەربگریت، ژ بەر كو دێ دەڤەر ئارامیێ ب خوەڤەبینیت و ئەڤ چەندە د بەرژەوەندییا كوردان دایە».
هەروەسا ئاماژەكر» دڤێت كورد ئەڤرۆ پتری هەر دەمەكی دی د ئێكگرتی بن هەمبەر گوهۆڕینێن دهێنەكرن، ب تایبەتی سەركردایەتییا سیاسییا كوردی ل هەرێما كوردستانێ، بەرژەوەندییا نەتەوەیی دانیتە پێش هەموو بەرژەوەندییان، گەلەك یا گرنگە سەركردایەتییا سیاسییا هەرێما كوردستانێ زێدەتر خوە نێزیكی خەلكێ خوە بكەت، چونكە خەلكی باوەری دایە وان ئالیێن سیاسی و ل سەر ئاستێ دەڤەرێ و جیهانێ رێز ل سەركردایەتییا كوردی دهێتەگرتن ژبەر ڤێ شەرعییەتا كو ژئالیێ خەلكی ڤە ب دەستڤە هاتی، پاشەڕۆژەكا گەش ل هەمبەری كوردان یا هەی ل سەر ئاستێ هەر چار پارچەیێن كوردستانێ هەكە كورد بزانن دێ چاوا سەرەدەریێ دگەل گوهۆڕینان كەن».