قەیس وەیس:

چاڤەڕێ‌ دهێتە كرن ئەڤرۆ ل دەمژمێر حەفتی شەڤ هەلبژارتیێ‌ ئیراقێ‌ دێ‌ مێڤاندارییا هەلبژارتیێ‌ فلەستینێ‌ ژ چارچووڤەیێ‌ قۆناغا سێیێ‌ و دووماهیێ‌ ژ ڤاڤارتنێن كێشوەرێ‌ ئاسیا و دەربازبوون بۆ مۆندیالا جیهانی ئەوا دێ‌ ل هۆلا گرتییا شەعب ل پایتەختێ‌ ئیراقێ‌ بەغدا هێتە كرن، حەفت یاریزانێن كوردستانی بۆ ڤێ‌ یاریێ‌ دێ‌ د بەرهەڤبن.
ل دووڤ لیستەیا بەلاڤكری یا هەلبژارتیێ‌ هەلبژارتیێ‌ ئیراقێ‌ یێ‌ سربی فازلین ماتیچ حەفت یاریزانێن كوردستانی هاتینە داخواز كرن كو پێكهاتینە هەر ئێك ژ، موراد عەلی، محەمەد عەلی و زنار هشیار ژ یانەیا زاخۆ، دیسان فەرید رەعدی ژ یانەیا ئەلكەرخ یا بەغدایی، هەروەسان محەمەد ئەمین عەبدولخالق و میر ناریمان ژ یانەیا غاز ئەلشیمال، یاریزانێ‌ حەفتێ‌ رێكان عوسمان یێ‌ ڕەڤەندا كورد ل ئۆرۆپا و یانەیا شورتە یا بەغدایی.
لدۆر ڤێ‌ یەكێ‌ موراد عەلی ئێك ژ یاریزانێن داخوازكری بۆ رۆژنامەیا ئەڤرۆ گۆت: جهێ‌ خوەشحالیێ‌ یە نیڤا پێكهاتیێ‌ ئیراقێ‌ ژ یاریزانێن كوردستانی بیت و ئەڤە ژی وێ‌ چەندێ‌ دیار دكەت كو یارییا باسكێت بۆلێ‌ بەر ب پێشڤەچوویە، سێ‌ یاریزانێن یانەیا زاخۆ بۆ ناڤ رێزێن هەلبژارتیێ‌ ئیراقێ‌ نە یا ب سانەهییە لێ‌ ژبەركو ئاست و شیانێن یاریزانان گەلەك دباشن و نایابن لەوما ژی ڕاهێنەری پشت گەرمی ب مە كرییە، دەستخووشەییا هەموو یاریزانێن كوردستانی دكەم ب ئۆمێدین دێ‌ ئاستێن بلند نیشان دەین.
بۆ زانین ل 25ێ‌ ڤێ‌ مەهێ‌ هەلبژارتیێ‌ ئیراقێ‌ دێ‌ یارییا خوە یا دویێ‌ و ڤەبڕ بەرانبەر هەلبژارتیێ‌ ئوردن ل هۆلا گرتییا شەعب ل بەغدا كەت و دڤێ‌ یاریێ‌ دا دێ‌ پلێتا دەربازبوونێ‌ بۆ قۆناغا دووماهیێ‌ و دەربازبوون بۆ كۆپا ئاسیا دیاربیت و پلێتا قۆناغا دووماهیێ‌ یا دەربازبوون بۆ مۆندیالا جیهانی.

رەمەزان زەكەریا
د داخویانیەكێ دا ئەندامێ‌ فدراسیۆنا فۆتبولا كوردستانێ ئاشكراكر ئەوان یاسایێن خوە هەنە بۆ نەهێلانا توندوتیژیێ دناڤ یاریگەهان دا دگەل یاریزان و دادڤانان، چەند بەند و مادە هەنە هەر یانەیەكا دهێتە سزادان ل گۆر بەندو مادەیێن یاسایێن یێن فدراسیۆنا مەنە، وەكۆ یاریكرن بێ پشتەڤان و یان یانە بهێتە سزادان یان دووركرن دشیاندایە یانە بهێتە سزادان ب گەلەك مادە و بەندان، وەكۆ فوتبۆلێ‌ رێگری لێكرینە هەتا رادەیەكێ ل گۆر یاسایێن هەی سالانە سزا دهێنە توندكرن بۆ وان توندوتیژیێن دهێنە ئەنجامدان ، هەردەمێ فدراسیۆنێ‌ هەست پێكر كو خەمساری ژ لایێ كارگێریا یانەیێ هەیە دێ هێتە سزادان .
زێدەتر ئازاد محەمەد سەعید بۆ رۆژنامەیا ئەڤرۆ گۆت: یانەیا ئاكرێ هاتە سزادان سەرەرای كو بەرەڤانی ژی یاریزانێن یانەیا هەولێر كر لێ نەشیان ب دروستی كنترۆلا یاریزان و جەماوەرێ‌ خوە بكەن لەورا ب دو ملیۆن دیناران هاتنە سزادان، هەر یاریزانەك بگەهێتە دادڤانی وەك توندوتیژی دادڤانی ماف هەیە یاریێ ب دووماهی بینیت ب ئەنجامێ سێ ب چنە بۆ یانەیا توندوتیژی نەكری.
ناڤبری گۆتژی: یاریزانا یاسایێن خۆ هەنە هەر یاریزانەكێ تاوانبار بیت دێ هێتە سزادان ل گرژیا یانەیا ئاكرێ وهەولێر جەماوەر هاتە سزادان ئەگەر ئەڤ چەندە بۆ چەند جارا هاتە دوبارەكرن دێ یانە هێتە سزادان ل دابەزاندنێ بۆ پلەكێ وەك چەوا یانەیا كویە پلەكێ هاتە خوار ،ب پێنج ملیۆنا هاتە سزادان چەند خال ژی لێ هاتنە خوار.
هەروەسان ئازاد محەمەد گۆت: مۆندیالا كۆنیفا پار سال هاتە پاشختن ئەگەر ئەم نەبووین هندەك تیم نەشیان ڤیزایێ وەربگرن لەورا هندەك هەرێم نەشیان ژبەر نەوەر‌نەگرتنا ڤیزایێ تیم كێمبوون هەتا نەهاتیە ئەنجامدان، ئەڤسالە دێ كۆمبوونەك ل هەیڤا ئادارێ ل ئیتالیا هێتە ئەنجامدان، كوردستان یا بەرهەڤە بۆ مۆندیالا كۆنیفایێ ئەگەر بهێتە ئەنجاندان حكومەتێ ژی پشتەڤانیا خۆ دیاركریە،رەنگە گوهۆرین ب یاریزانا بهێتە كرن بۆ مۆندیالا كۆنیفا بۆ هەلبژارتیێ‌ كوردستانێ.
ئەندامێ فدراسیۆنا فۆتبولا كوردستانێ ئەوچەندە ڕەدكر كو دادڤانێن پارێزگەها دهۆكێ‌ دكێمن و گۆت : نەخێر دادڤانێن پارێزگەها دهۆكێ‌ دكێم نینن ل سەر ئاستێ هەرێما كوردستانێ زوورترین دادڤان یێ ل سلێمانێ، پشتی سلێمانیێ دهۆك دهێت پێش هەولێر، ئاریشەك هەیە زۆرترین دادڤان یێ ل كەركووك و ئازادن بۆ هەر خولەكێ‌ دادڤانیێ بكەت ژبەركو یانە نینە، ب گشتی رەوشا دادڤانا زۆر یا باشە گازندەیا دادڤانا ئەو بوو كو گرنگی پێ ناهێتە دان بەلێ چارە سەربووە ب تنێ چەند دادڤانەك ئاستێ وان باش نەبووە هاتینە سزادان

چاڤەڕێ‌ دهێتە ئەڤرۆ ل هۆلا گرتییا چالاكیێن وەرزشی ل باژێرێ‌ دهۆكێ‌ هەڤڕكیێن قارەمانییا سوپەرا ئیراقێ‌ بۆ یاریزانێن كیك بۆكسێنگێ‌ ل سەر ئاستێ‌ كوڕان و كچان بهێتە كرن، ئەوا دهێتە پێشبینیكرن باشترین یاریزانێن ئیراقێ‌ و كوردستانێ‌ پشكداربن ژبۆ ژێگرتنا هەلبژارتیێ‌ ئیراقێ‌ بۆ قارەمانیێن داهاتی.
لدۆر ڤێ‌ یەكێ‌ مەحفۆز ئیبراهیم ئەندامێ‌ فدراسیۆنا بۆكسینگا ئیراقێ‌ دیاركر ئێك ژ مەزنترین و ب هێزترین قارەمانیێن ل سەر ئاستێ‌ ئیراقێ‌ دێ‌ ئەڤرۆ ل دهۆكێ‌ بناڤێ‌ سۆپەرا ئیراقێ‌ هێتە كرنو هەتا 22ێ‌ ڤێ‌ مەهێ‌ یا بەردەوامبیت، ئەڤ قارەمانیە بتنێ‌ دێ‌ یاریزانێن پێشتر دناڤ رێزێن هەلبژارتیێ‌ ئیراقێ‌ دا و باشترین یاریزانێن د قارەمانییا وەرزێ‌ 2024ێ‌ دا دێ‌ پشكداربن و یاریزانێن رێزێن ئێكێ‌ و دوێ‌ یێن كێشێن جودا دێ‌ بۆ ناڤ رێزێن هەلبژارتیێ‌ ئیراقێ‌ هێنە داخوازكرن پێخەمەت بەرهەڤی بۆ قارەمانیێن داهاتی یێن عەرەبی و ئاسیایی، ژ پارێزگەها دهۆكێ‌ سێ‌ یاریزانێن كوڕ و حەفت یاریزانێن كچ پشكدارن.
هەروەسان ناڤهاتی گۆت: شێوازێ‌ قارەمانیێ‌ ل سەر سێ‌ سیستەمێن نێڤدەولەتی بن ئەو ژی full contact – k1 – point fighting) و نابیت یاریزان پشكداربیت و خودانێ‌ كەمەرا قەهوایی نەبیت، شەڕێ‌ ناسناڤی بۆ سیستەمێ‌ فۆل كۆنتاك و كەی وان دێ‌ ژ كێشا 51كگم دەستپێكەت هەتا +91كگم، هەروەسان بۆ سیستەمێ‌ پۆسنت فایكین ژ كێشا 54كگم هەتا كێشا +94 كگم بیت كو دێ‌ ل دووڤ شێواز و یاسایا فدراسیۆنا نێڤدەولەتی wako بن.
ژلایێ‌ خوەڤە سالح كەكو ڕاهێنەرێ‌ تیما یانەیا دهۆك و هەلبژارتیێ‌ ئیراقێ‌ دۆپاتكر كو بەرهەڤیێن وان گەهشتینە كۆپیتكێ‌ و دێ‌ شەڕی كەن بۆ دەستڤە ئینانا ناسناڤان و گۆت: ل سەر ئاستێ‌ كوران دو یاریزانێن یانەیا دهۆك و ئێكێ‌ یانەیا زاخۆ پشكدارە، ل سەر ئاستێ‌ كچان مە حەفت یاریزان بەرهەڤكرینە و گەشبینن دێ‌ ناسناڤێن كچان زێدەتر بن ژ یێن كوڕان و دەلیڤەیا وان باشترە ژ یاریزانێن كوڕ، ب هیڤی نە ب گەهینە ئارمانجا خوە كۆمەكا باش یا ناسناڤان ب دەستڤە بینن.

شاهۆ فەرید:

تیما فوتبۆلا یانەیا پیرس بەردەوامە ل سەر بەرهەڤیێن خوە بۆ ڤاڤارتنێن خولا پلا سێ یا ئیراقێ ئەوا دێ قوناغا ئێكێ تنێ ل سەر ئاستێ پارێزگەهێ ب پشكداریا 10 یانەیان هێتە كرن و هەڤركی دێ‌ بۆ دو پلێتێن دەربازبوونێ بەر ب قۆناغا دویێ‌ كەن.
لدۆر ڤێ‌ یەكێ‌ و دووماهی زانیاری د داخویانیەكێ دا د. بەهزاد سالح سەرۆكێ یانەیا پیرس بۆ رۆژنامەیا ئەڤرۆ گۆت: ئەم وەكۆ كارگێریا یانەیێ هەموو شیانێن خوە پالپشتیا تیمێ دكەین، ژلایێ دارایی ڤە ژی كاپتن هەرژەنگ بابەكر زێباری ستوویێ خوەڤە گرتییە، هیچ پالپشتیەكا گشتی جهێن پەیوەندیدار بۆ مە ناهێتە دان، ئەم ئەڤان ڤاڤارتنان ژی تیما خوە پشت راستین دێ ئاست و ئەنجامەكێ هەر یێ باش پێشكێشكەت سەرپەرشتیا كاپتن سەبری ستاڤێ دگەل، هیڤی و ئارمانجامەیە پلێتا دەربازبوونێ ب دەستڤەبینین.
ژلایەكێ دووڤە راهێنەرێ تیمی سەبری سلێمان گۆت: هەتا نوكە ئەم نەهاتینە ئاگەهداركرن دێ كەنگی ڤاڤارتن هێنە ئەنجامدان، ئەكادێمیا یانەیێ پرە ژ یاریزانێن باش و خودان شیان و تیمەكا باش پێكبنین بۆ ئەڤێ خولێ، هیڤی و ئارمانجامە یا سەرەكی پلێتا دەربازبوونێ یە، دێ كاركەین بۆ وێ چەندێ هەموو ئاستێن خولا دەربازكەین هەتا بگەهینە خولا ستێرێن ئیراقێ، كارگێریا یانەیێ دگەل یاریزان و راهێنەران هاریكارە بۆ نیشاندانا ئاستێن باش.
سەبری گۆت ژی: هەر راهێنەرەكێ دگەل یانەیا پیرس كاربكەت هیڤییا وی یا سەرەكی بەرز راگرتنا ناڤێ یانەیێ یە دهەر قارەمانی و خولەكێ دا، مەرەما مە دەستڤەئینانا ناسناڤا نینە یا سەر مە پێدڤی چێكرنا یاریزانایەە، د ئەڤان چار سالێن بوری دا شیاینە چەندین یاریزانێن باش بەرهەم بینین و بەرهەڤكەین، ئەم كار سەر وێ چەندیێ دكەین تیما ئاستێ ئێكێ هەموو ژ یاریزانێن خوە بەرهەڤبكەین و پێدڤیامە پێشەكارا و بیانیا نەبیت، چاڤەریێنە كادێ كەنگی دەمێ خولێ هێتە دیاركرن دا بشێن باشترین شێوە خوە بەرهەڤبكیەن.

شاهۆ فەرید:

تیما فوتبۆلا یانەیا شێلادزێ بەرهەڤیێن هەرە باش و هێز كرینە بۆ خولا پلەیا دو یا كوردستانێ ئەڤی وەرزی وەسا دهێتە پێشبینیكرن هژمارەكا زەحمەت بیت دناڤا كۆما خوە بەربژێرا سەرەكی بیت بۆ دەربازببونێ ئەوا بڕیارە هەڤڕكیێن خولێ‌ ل 15ێ‌ ئادارا بهێت دەستپێبكەت.
د داخویانیەكێ دا كاروان باقی سكرتێرێ یانەیی بۆ رۆژنامەیا ئەڤرۆ گۆت: مە بەرهەڤیێن باش كرینە بۆ وەرزێ ئەڤ سالە ب ئینانا راهێنەرێ ئیرانی عەلی سولتان پناهـ خودان ئەزموون و هەلگرێ باوەرنامەیا ئەی یا ئاسیا كو چەندین یانەیێن بەرنیاس راهێنەراتی كریە و خودان شیانە، ئەڤە ماوەیی هەیڤەكێ یە ئەم راهێنانێن بەردەوام دكەین و ئاستێ تیمێ بەر ب باشبوونێ چوویە بەردەوامی دۆڤچوونێ بۆ پێكهاتێ تیمێ دكەین، ئەم وەكۆ تاكە یانە ل سنورێ دەڤەرا ئامێدیێ پشكدارین دخولا پلا دو دا، پرانیا یاریزانێن مە یێن دەڤەرێ نە و خودان شیانن دگەل دو یاریزانێن پیشەكار ناڤ پێكهاتێ تیمێ زێدەبووینە پتر خزمەتا یانەیێ بهێتەكرن.
كاروان باقی گۆت ژی: هەموو بەرهەڤی هاتینەكرن بۆ دەربازبوونێ ژبلی ویێ مە چ هەلبژارتنێن دی نینن، تیمێن بەرامبەر ژی مە باش خواندینە و دێ شیێن راوەستینین ئەم ئەڤ سالە دێ بۆ وان هەڤركەكا زەحمەت بین، داخوازیێ ژ جهێن شولەژێ و حزبی و سەرمایەداریێن دەڤەرێ دكەین خوە ل یانەیا شێلادزێ بكەنە خودان، دەستێ مەبگرن دا بشێن پتر خزمەتا وەرزشا دەڤەرێ بكەین و بێ كێشەیێن دارایی دەربازی پلا ئێك بین و خەونا جەماوەریێ یانەیا شێلادزێ بۆ بجهبینین.
بۆ زانین خولا پلا ئێكا كوردستانێ‌ ب پشكدارییا 20 یانەیان هاتینە بەلاڤكرن ل سەر دو كۆمان یاریێن وان دێ‌ ب شێوەیێ‌ خول ئێك قۆناغ هێنە كرن، تیما شێلادزێ‌ د كۆما ئێكێ‌ دایە ئێكەم یارییا خوە دێ‌ بەرانبەر یانەیا خەلاتێ‌ پێنجۆین ل باژێرێ‌ شێلادزێ‌ كەت.

بڕیارە سوبەهی و شەمبییا بهێت ل دەمژمێر 2:30 پشتی نیڤرۆ یاریێن گەڕا 12ێ‌ ژ هەڤڕكیێن خولا پلا پلا ئێكا كوردستانێ‌ یا فوتبۆلێ‌ بهێنە كرن، هەرسێ‌ یانەیێن پارێزگەهێ‌، دهۆك، سێمێل و تەناهی هیڤیێن دەستڤە ئینانا ناسناڤی ژ دەستداینە لێ‌ یاریێن ڤێ‌ گەڕێ‌ دی بنە پەرژانەك بۆ خوە دوورئێخستن ژ رێزێن دووماهیێ‌.
یاریێن سوبەهی
تیما یانەیا تەناهی دێ‌ ل یاریگەها شەهید فرانسۆ حەریری بیتە مێڤانا یانەیا زانكۆیا جیهان د یارییەكا دۆپاتكرنێ‌ دا بۆ پاراستنا جهێ‌ خوە، تەناهی خودانا 12 خالانە ل رێزا هەشتێ‌ دهێت ژ دو سەركەفتن، شەش وەكهەڤییان، خودانێن ئەردی 16 خال كۆمكرینە ل رێزا شەشێ‌ دهێت، هەر ژ یاریێن رۆژا ئەینی بازیان- بابان، خاك- چەمچەمال.
دهۆك و سێمێل دێ‌ جهێ‌ خوە پارێزن
بڕیارە شەمبییا بهێت چار یاریێن مایی ژ هەڤڕكیێن گەڕا 12ێ‌ بهێنە كرن، یانەیا دهۆك دێ‌ ل یاریگەها خوە یانەیا شورجە مێڤان كەت، گەشبینی بۆ ئەلهۆیێن چیا پەیدابووینە كو وەرزێ‌ ئەڤ سالە دێ‌ مانا خوە پارێزیت ئەوا د نوكە دا 12 خال هەین رێزا نەهێ‌ دهێت ب سێ‌ سەركەفتن و سێ‌ وەكهەڤییان، یانەیا شۆرچە هەڤڕكا وێ‌ یە ئەوا 11 خال كۆمكرین رێزا 12ێ‌ دهێت، ژلایێ‌ خوەڤە یانەیا سێمێل دێ‌ بیتە مێڤانا یانەیا قەلادزێ‌ د یارییەكا دی یا گرنگ دا، كوڕێن دەشتا دۆبانێ‌ رێزا 10ێ‌ دهێن ب كۆمكرنا 12 خالان ژ سێ‌ سەركەفتن و سێ‌ وەكهەڤییان، لێ‌ مێڤاندارا وێ‌ خودانا سەڕێ‌ لیستێ‌ یە و هەڤڕكا ناسناڤی یە ئەوا 21 خال كۆمكرین، ئەڤ یارییە بۆ سێمێلییان دێ‌ یا بهێزبیت، ژلایەكێ‌ دووڤە ڕواندز دێ‌ هەلۆ مێڤان كەت.