قەیس وەیس:

چاڤەڕێ‌ دهێتە كرن ئەڤرۆ دەست ب هەڤڕكیێن گەڕا 16 یا قارەمانییا كۆپا ئیراقێ‌ یا فوتبۆلێ‌ بهێتە كرن، ئەوا دێ‌ ب شێوەیی ئێك یاری سەركەفتی ئێكسەر دەربازبتە قۆناغا هەشتێ‌.
دهۆك چاڤ ل دەربازبوونێ‌ یە
بڕیارە ئەڤرۆ ل دەمژمێر 7:30 شەڤ تیما فوتبۆلا یانەیا دهۆك ب پشت گەرمییا پشتەڤانێن خوە و مۆرالا بلند یا یاریزانێن خوە دێ‌ مێڤاندارییا یانەیا میسان كەت و چاڤ ل دەربازبوونێ‌ یە، ئەلهۆیێن چیا د خولا ستێرێن ئیراقێ‌ دا ل رێزا پێنجێ‌ دهێن ب34 خالان، میسان د خولا پلا نایاب دا رێزا شەشێ‌ دهێت ب كۆمكرنا 23 خالان ئەوا شیایی ل سەر كیشتێ‌ نەفتێ‌ ب لێدانێن پەنەلتییان دەربازبیتە ڤێ‌ قۆناغێ‌، تیما دهۆكێ‌ ژبلی كۆپا ئیراقێ‌ پشكدارە هەروەسان د كۆپا كەنداڤی دا ئەوا بڕیارە ل پێنجێ‌ ئادارا بهێت د قۆناغا پێش دووماهیێ‌ دا ببیە مێڤانا ئیتفاق یا سعۆدیێ‌ د یارییەكا گرنگ دا.
ل دۆر دووماهی بەرهەڤیێن دهۆكێ‌ هارۆن ئەحمەد ستێرا یانەیا دهۆك بۆ رۆژنامەیا ئەڤرۆ گۆت: بۆ یارییا ئەڤرۆ هەموو یاریزان ڕژدن ب مۆرالەكا بلند بشێن سەركەفتنێ‌ ل سەر مێڤانا خوە بینن، یاری ب سانەهی نابیت لێ‌ ب پشتەڤانییا جەماوەری و زاخا بلند یا یاریزانان گەشبینن دێ‌ ئەنجامەكێ‌ دلخوەشكەر ب دەستڤە ئینن، هەرچەندە تیما مە ل سێ‌ چەپەران شەڕی دكەت لێ‌ بۆ هەر قارەمانی و خولەكێ‌ مە پلان و شێوازێ‌ خوە هەیە، یا گرنگ ئەم بەردەوام پشتەڤانێن خوە كەیفخوەش بكەین.
ژ یاریێن دی یێن ئەڤرۆ، یانەیا پێشمەرگە دێ‌ ب هێزترین یاری دا بیتە بیتە مێڤانا یانەیا نەجەف ئەوا دێ‌ ل دەمژمێر پێنجێ‌ ئێڤاری هێتە ئەنجامدان، پێشمەرگە د خولا پلا نایابا ئیراقێ‌ دایە21 خال هەنە ل رێزا 13ێ‌ دهێت، ل سەر كیستێ‌ یانەیا كەربەلا ب لێدانێن پەنەلتییان دەبازبوویە ڤێ‌ قۆناغێ‌، ژلایێ‌ خوەڤە زەورا دێ‌ مینا مێڤان كەت و ئەلقاسم دێ‌ بیتە مێڤانا جەوییە.
بۆ زانین ئێكەم هەڤڕكیێن كۆپا ئیراقێ‌ ل وەرزێ‌ 1992-1993 بوو و یانەیا زەورا ب دەستڤە ئینا ئەوا د دیرۆكا ڤێ‌ كۆپایێ‌ دا پێنج جاران ناسناڤ ئینایی، جەوییە سێ‌ جاران، تەلەبە دو جاران، هەر ئێك ژ كەرخ و شورتە ناسناڤەك ئینایە، بۆ زانین دناڤبەرا قارەمانیان دا چەندین جاران هاتینە ڕاوەستاندن ژبەر ئەگەرێن جودا، پشكدارییا یانەیێن كوردستانی بڤی رەنگی بوون، هەولێر 14 جاران، دهۆك 10 جاران، برایەتی پێنج جاران، نەورۆز پێنج جاران، پێشمەرگە چار جاران، سێمێل سێ‌ جاران، ئارارات دو جار، هەر ئێك ژ بابا گورگور، بەردەرەش، پێشەوا، گارە، میدیا و پیرس جارەكێ‌ پشكداربووینە.

عەلی حاجی:

د داخویانیەکێ دا ئەندامێ دەستەیا کارگێریا یانەیا زاخۆ دیار کر پشتی ده‌ربازبوونا تیما وان بۆ چارگۆشه‌یا زێرین یا خولا پیشه‌كارێن ئیراقێ دێ یارییا وان یا ئێكێ بەرامبەر شورتە بیت ئه‌وا بڕیاره‌ ل سێ شه‌مبییا بهێت پایته‌ختێ ئیراقێ به‌غدا بهێته‌ كرن و دیار كر دێ گەلەک زەحمەت بیت لێ د وەرزشێ دا چ تشتەک مه‌حال نینە.
زێدەتر دلژار عەدنان بۆ رۆژنامه‌یا ئه‌ڤرۆ گۆت: ب سه‌رفه‌رازی ڤه‌ پشتی تیما مه‌ ده‌ربازبوویه‌ قۆناغا چارگۆشه‌یا زێرین د نوكه‌ دا به‌رهه‌ڤیێن باش دهێنه‌كرن، د قۆناغا خولێ دا تیما شۆرتە سەرکەڤتن ل سەر تیما مە تومار کربوو و ئەو ئەنجامە ژی د بەرژەوەندیا مە دا نینه‌، له‌وما ژی دڤێت ئه‌م خوساره‌ت نه‌بین و سێ سەرکەڤتنان ل سەر شۆرتە بینن هەتا دەربازبینه‌ قۆناغا دووماهیێ دا، سه‌رباری ئه‌ركێ مه‌ ب زه‌حمه‌ته‌ لێ چ تشت د وه‌رزشێ دا مه‌حال نینه‌ ژبەر هندێ ئەم بێ ئۆمێد نه‌بووینه‌ و هه‌موو یاریزان ڕژدن و دێ بەردەوام کار کەین داکو بشێن سەرکەڤتنێ تومار بکەین.
ناڤبری گۆت ژی: ژبۆ بهێزكرنا رێزێن تیما خوه‌ و چاره‌سه‌ركرنا ئه‌وان كێماسییان دگەل یاریزانەکێ هەلبژارتیێ لوبنانێ گەهشتینە رێکەڤتنێ دێ د ڤان دو رۆژان دا گەهیتە باژێرێ زاخۆ و پەیوەندیێ ب تیما مە کەت، ب هاتنا وی یاریزانی دێ تیما مە شێت ئاستەکێ باشتر پێشکێش کەت و ب هیڤی نه‌ ئه‌و كێماسییا هه‌یی چاره‌سه‌ر بكه‌ت.

شاهۆ فەرید:

ستێرا یانەیا دهۆك هانا ئاڤدەل یاریزانا هەلبژارتیێ‌ ئیراقێ‌ بۆ ماوەیێ‌ مەهەك بەرهەڤیێن دكەت بۆ قارەمانییا كۆپا دێڤێز یا نێڤدەولەتی و ڤاڤارتنێن دەربازبوون بۆ كۆپا جیهانی دا كەت، ئەوا بڕیارە هەڤڕكیێن ڤاڤارتنان ل دەستپێكا ئادارا بهێت وەلاتێ‌ مالیزیا مێڤاندارییا وێ‌ بكەت.
د داخویانیەكێ دا ئاڤدەل حەسەن راهێنەر و بابێ یاریزان هانایێ بۆ رۆژنامەیا ئەڤرۆ دیار كر: ئەڤە ماوەیێ یازدە سالانە هانا یاریزانا تێنسا ئەردی و ژ 2014 وەرە قارەمانا ئیراقێ یە، پشتی شیایی رێزبەندیا ئێكێ ل سەر ئاستێ‌ ئیراقێ‌ ب دەستخوەڤە بینت ب فەرمی وەكو یاریزانا ئیراقێ‌ دێ‌ پشكداری د قارەمانییا كۆپا دێڤێز و ڤاڤارتنێن دەربازبوونێ‌ بۆ كۆپا جیهانێ‌ كەت، بەرهەڤیێن مە رۆژانە د بەردەوامن ب پشتەڤانییا كارگێرییا یانەیێ‌ و گەشبینن دێ‌ ئەنجامێن دلخوەشكەر هەبن.
هەروەسان ناڤهاتی ئەوچەندە ژی گۆت: بەری پشكداریێ‌ د قارەمانیێ‌ دا بكەین دێ كەمپەكێ راهێنانان ل مالیزیا كەین ژبۆ گۆنجاندنا یاریزانان د سەقایێ‌ وێ‌ و باشترین بەرهەڤی هەبن، هانا تاكە یاریزانا كوردە و ژ دهۆكێ د ژیێ خوە دا دێ پشكداربیت و یاریزانێن دی یێن بەغدایێ‌ نە، قارەمانیا دێڤز كاپ یا تێنسا ئەردی بڕیارە ناڤەراستا هەیڤا ئادارێ ل مالیزیا بهێتە ئەنجامدان وەكو كچا دهۆكێ‌ ڕژدە بۆ دەستڤە ئینانا ئێك ژ رێزێن باش سەرباری ئەركێ‌ وێ‌ ب سانەهی نابیت.

د داخویانیەكێ‌ دا ئەندامێ‌ فدراسیۆنا كیك بۆكسینگا ئیراقێ‌ كەیفخوەشیا خوە دیار كر ژ سەرجەمێ‌ حەفت یاریزانان شەش ژ وان یێن كچێن پارێزگەهێ‌ چوونە دناڤ هەلبژارتیێ‌ ئیراقێ‌ دا بۆ وەرزێ‌ 2025 ئەوێن دێ‌ پشكداریێن د قارەمانیێن فەرمی یێن ئاسیایی و عەرەبی دا كەن.
مەحفۆز ئیبراهیم كو هەڤدەمدا سەرۆكێ‌ فدراسیۆنا كیك بۆكسینگا پارێزگەها دهۆكێ‌ یە بۆ رۆژنامەیا ئەڤرۆ گۆت: ژ بلی كو پارێزگەهێ‌ قارەمانییا سۆپەرا ئیراقێ‌ ب سەركەفتیانە دەربازكر ئەوا زێدەتری 85 یاریزانێن كور و كچ ل سەر ئاستێ‌ ئیراقێ‌ و كوردستانێ‌ پشكداربووین بۆ سێ‌ سیستەمێن نێڤدەولەتی بن ئەو ژی full contact – k1 – point fighting) یێن كێشێن جودا شەش یاریزانێن كچی ێن دهۆكێ‌ و یاریزانەكێ‌ كوڕ یێ‌ زاخۆ شیان بچنە دناڤ ڕێزێن هەلبژارتیێ‌ ئیراقێ‌ دا، هەرچەندە هیڤییا مە ئەو بوو ل سەر ئاستێ‌ كوڕان ژی ڕێژەكا باش پشكداربان، لێ‌ ئەڤ قارەمانییە یا ڤەكری نەبوو بەلكو تایبەت بۆ ئەوان یاریزانێن وەرزێ‌ بوری دناڤ رێزێن هەلبژارتیێ‌ ئیراقێ‌ و دووماهی قارەمانی رێزێن ئێكێ‌ ب دەستڤە ئینابوو لەوما ژی بۆ قارەمانییا سۆپەر هاتبوو ناڤكرن.
ناڤهاتی دەستخوەشییا كچێن دهۆكێ‌ و كوڕێ‌ زاخۆ كر و گۆت: ل سەر ئاستێ‌ كچان ئەنجامێن دلخوەش هەبوون و كونترۆلكرنا شەش یاریزانان ژ سەرجەمێ‌ حەفت كێشا بۆ ناڤر ێزێن هەلبژارتیێ‌ ئیراقێ‌ بەلگەیە كو كارەكێ‌ مەزن یێ‌ بەرهەڤییان ژلایێ‌ ڕاهێنەرێ‌ وان سالح كەكو ڤە هاتییە كرن و ئەم ڕژدین ئاستێ‌ كچان بەردەوام پێشڤە ببەین، دبیت لسەر ئاستێ‌ كوڕان بتنێ‌ یاریزانەكێ‌ زاخۆ بیت ئەوژی ب شیانێن خوە دەربازبوویە لێ‌ گەشبینم بۆ قارەمانیا داهاتی ڕێژەیا وان دێ‌ بەر ب زێدەبوونێ‌ چیت.
بۆ زانین د قارەمانییا سۆپەرا ئیراقێ‌ دا ئەو هەر شەش یاریزانێن كچ یێن رێزێن ئێكێ‌ هاتین هەر ئێك ژ، سازان هەڤال بۆ كێشا 48 كگم رێزا، پەیدا ئەحمەد بۆ كێشا 52 كگم، پەریسا بریندار بۆ كێشا 56 كگم، ئاشنا سالح بۆ كێشا 60 كگم، شایەن هاشم بۆ كێشا 65 كگم، نیدار سالح بۆ كێشا +70 كگم و هەڤالا وان شایان هاشم بۆ كێشا 54 كگم رێزا دویێ‌ هات، ل سەر ئاستێ‌ كوڕان یاریزانێ‌ یانەیا زاخۆ سیداد سەگڤان بۆ كێشا 54 كگم فۆل كۆنتاك رێزا ئێكێ‌ ب دەستڤە ئینابوو، هەروەسان یاریزانێن كوڕ یێن دهۆكێ‌ ئەوێن ڕێزێن دویێ‌ هاتن و وەكو یاریزانێن یەدەك هاتینە دانانا بۆ هەلبژارتیێ‌ ئیراقێ‌ هەر ئێك ژ ئاراس شێروان بۆ كێشا 60 كگم فۆل كۆنتاك، عەلی محەمەد بۆ كێشا 63 كگم فۆل كۆنتاك، زانا سالح بۆ كێشا 67 كگم فۆل كۆنتاك، نێجرڤان محەمەد بۆ كێشا 67 كەی وەن، مێڤان عەبدولكەریم بۆ كێشا 81 كگم و حەسەن مستەفا بۆ كێشا +91 كگم.

ب فەرمی لژنەیا دەستپاكیێ‌ و بەرهنگاربوونا ماددەیێن هۆشبەر د یاریێن مەیدانێ‌ دا یا ئۆلمپییا نێڤدەولەتی یاریزانێ‌ كینی برێمێن كیپكۆرێر ب شێوەیەكێ‌ بەروەخت ڕاگرت هەتا ئەنجامێن تاقیكرنا لەشی یا خوارنێن قەدەغەكری ماددەیێن هۆشبەر بهێنە دیاركرن.
د ڕاگەهاندنا خوە دا لژنەیا دەستپاكیێ‌ دیار كرییە كو ل 22ێ‌ ڤێ‌ مەهێ‌ هندەك بەلگە بەردەست كەڤتن كو یاریزانێ‌ كینی برێمێن كیپكۆرێر ماددەیێن هوشبەر ب كارئینایە بەری پشكدارییا خوە د ماراسۆنا سیدنی دا بكەت، پشتی شیایی د ڤێ‌ قارەمانیێ‌ دا بلەزترین دەم ب دەستڤە بینت بۆ درێژاهییا 5000م كو ب دو دەمژمێر و شەش خولەك و 18 چركان، بڕیارە ئەینییا بهێت ئەنجام ب دەركەڤن ژبۆ دیاركرنێ‌ چو ب كار ئینابن و چەند رێژەیە و چو جورە ماددە هاتینە ب كارئینان و هەكە یا قەدەغەكری ژی نەبیت بڕیار بهێتە دان.

یانەیا گالاتا سەرایی یا توركی سكالا ل سەر ڕاهێنەرێ‌ پۆرتۆگالی و یانەیا فەنەر پەخشە د چارچووڤەیێ‌ خولێ‌ توركییا ئەوا ب وەكهەڤی ب دووماهی هاتی تێدا توندوتیژی پەیدابوویی.
د نڤێسارا فەرمی دا یانەیا گالاتا سەرایی دیاكرییە ئەوا سكالایا خوە بۆ فدراسیۆنا فوتبۆلا ئۆرۆپا ئاراستە كرییە و تێدا خواستینە مۆرینیۆ بهێتە سزادان ژبەر داخویانیێن وی یێن رەكەزپەرسێ دژی یانە و جەماوەرێ‌ وان و گۆتیە: هەر یارییەكا دناڤبەرا هەدو یانەیان بهێتە كرن ب بەلگەڤە مۆرینیۆ ئاریشەیان دناڤبەرا پشتەڤانێن هەردوكا پەیدا دكەت بەری یاریێ‌ داخویانیێن توند و د دەمێ‌ یاریێ‌ دا لڤین نە جوان دكەت، ب هیچ ڕەنگەكی ئەم قەبولناكەین ژبەركو دبیتە ئەگەر روویێ‌ جوان یێ‌ وەرزشا توركیا تێكددەت.