عەلی حاجی:

د دیدارەکێ دا ژێلوان حەمەد یاریزانێ نوو یێ تیما فوتبۆلا یانه‌یا زاخۆ یا پشکدار د خولا ستێرێن ئیراقێ دا بۆ رۆژنامەیا ئەڤرۆ دیار کر وی دڤێت باشترین ئاست دگەل یانەیا زاخۆ پێشکێش بکەت و تیما وان ژ تیمێن گەلەک باشە د خولێ دا.
زێدەتر ژیلوان حەمەد گۆت: ژبەریا پەیوەندیێ ب یانەیا زاخۆ بکەم گەلەک هەڤبەست بۆ من ژ یانەیێن ئیراقێ هات بوون لێ هەلبژارتنا زاخۆ بۆ من ب ساناهی بوو ژبەر وێ تیما ب هێز و رێک و پێک د خولێ دا هەیی و هاتنا ئەحمەد یاسینی ژی وەل من کر ئەز یانەیا زاخۆ ب هەلبژێرم، د نوکە دا ژ هەمی روویەکێ ڤە تیما مە د قۆناغەکا باش دا دەرباز دبیت و دێ شێت ژی هەڤرکیێ ل سەر ناسناڤی بکەت، ژبەر هەبوونا کوالێتیا یانەیا زاخۆ دێ شێم باشترین ئاستێ خوە پێشکێش بکەم و دێ هەمی بزاڤا كه‌م ژی دەم بگەهمە گوپیتکا ئاستێ خوە و یا پێدڤی ژی بیت ل سەر من دێ ئەنجام دەم.
ناڤبری گۆت ژی: د نوکە دا تیما مە ل سەر ڕێیەکا دروات دچیت د پێناڤی یانەیا زاخۆ و جەماوەرێ وێ دا دێ هەمی شیانان مەزێخین و جەماوەرێ زاخۆ هند یێ سەرنچ ڕاکێشە مە ئەو دیمەن خوە ل یانەیێن ئۆرۆپایێ ژی نەدیتیە.
بۆ زانین یاریزان ژێلوان حه‌مه‌د ئێكه‌م یارییا خوه‌ یا فه‌رمی دگه‌ل زاخۆ كری به‌رانبه‌ر یانه‌یا ئه‌لقاسم بوو ئه‌وا ب سه‌ركه‌فتنا كوڕێن خابووری ب دووماهی هاتی ب شه‌ش گۆلان به‌رانبه‌ر دو گۆلان و بڤێ ئه‌نجامێ شیاین ببنه‌ قاره‌مانێن قۆناغا ئێكێ یا خولا ستێرێن ئیراقێ بۆ جارا ئێكێ د دیرووكا خوه‌ دا پشتی ل رێزا ئێكێ هاتن ب كۆمكرنا 38 خالان سه‌رێ لیستێ هاتین.

شاهۆ فەرید:

تیما فۆتبولا یانەیا دهۆك ئەوا پشكدار خولا پلا ئێك یا كوردستانێ د قۆناغا ئێكێ دا ئاست و ئەنجامێن لاواز دەستڤە ئینان و ئەگەر لسەر ڤان ئەنجامان بەردەوام بن دێ پاشڤە چنە پلا دو یا كوردستانێ‌.
ل دور ڤێ‌ یەكێ‌ د داخویانیەكێ دا سەرپەرشتێ تیمێ وەحید رەشید بۆ رۆژنامەیا ئەڤرۆ دیار كر: پشتی قۆناغا ئێكێ مە ئەنجامێن خراپ دەستڤە ئیناین، پشتی چار یاریێن دەستپێكی راهێنەری دەست ژ كارێ‌ خوە ڤەكێشایی و چەندین یاریزانان ژی ئاستێ پێدڤی پێشكێشی نەكر، پشتی قۆناغا ئێكێ هەر زوو مە دەست بەرهەڤیێن قۆناغا دویێ كرن و دێ باشتر ڤەگەرین، ئەگەرێ وان ئەنجامان ژی تیم هەر ژ داكەفتنێ یا لاواز بۆ ئەڤە تیمەكا نوو مە پێكئیناتی، درەنگ مە دەست بەرهەڤیانێن خوە كربوو.
ناڤهاتی ئەوچەندە ژی گۆت: پشتی چوونا ڕاهێنەری ب فەرمی مە هاریكارێ‌ وی ل جهێ‌ وی دانایە بۆ یاریێن مایی، مە چو راهێنەرێن نوو نە ئینان دێ‌ بۆ یاریێن مایی ب مورالەكا بلندتر هەڤركیێ كەین و دەستان ژ هیڤیێن خوە بەرنادەین، هەر سێ پێشەكارێن خوە مە گۆهارتینە و جهێ وان یێن باشتر مە ئیناینە بۆ تیمێ، هندەك یاریزانێن كورد ژی تیم هێلایە و یاریزانێن مە كێمتر لێهاتنە، ئەم هێشتا هیڤی نە دوبارە بۆ هەڤڕكێ بكەین بۆ پلێتا دەربازبوونێ ئەو ئارمانجا مە یا سەرەكیە، دەربازبوونا مە دمینتە لسەر ئەنجام و ئاستێ تیمێ یاریێن مایی هەموو دگرنگن بۆ مە چۆنكە جێوازیا خالان پەیدا بوویە ئەڤە دێ بارێ مە سڤك كەت و ب هێزتر ئەم هەڤڕكیێ‌ بۆ سەركەفتنان ژی بكەین.

چاڤەڕێ‌ دهێتە كرن ئەڤرۆ چار یاریێن دی ژ هەڤڕكیێن گەڕا ئێكێ‌ یا قۆناغا پاشكۆ دەربازبوون بەر ب قۆناغا 16 یا قارەمانییا یانەیێن ئۆرۆپا قارەمانێن خولا چامپیۆنز لیگا بهێنە ئەنجامان، یاریێن ب هێز و ئاگرین دناڤبەر یانەیێن ئەلمانی و ئسكۆتلەندی ژلایەكێ‌ دیڤە ئیتالی و هۆلەندی هێنە كرن.
گەڤ ل سەر پرۆژەیێ‌ بایرنێ‌ هەنە
حەز ژێكەرێن یانەیا بایرن میۆنخ و پشتەڤانێن وەرزشی ل دەمژمێر 11 شەڤ چاڤەڕێ‌ یارییەكا ب هێزن بۆ تیما وان بەرانبەر یانەیا سێلتیك یا ئسكوتلەندی ئەوا دێ‌ ل یاریگەها سێلتیك پارك هێتە كرن، یانەیا ئەلمانی خودانا شەش ناسناڤێن چامپیۆنزێ‌ دێ‌ بزاڤێ‌ كەت بەردەوامیێ‌ ل سەر پرۆژەیێ‌ خوە یێ‌ ناسناڤێ حەفتێ‌ بدەت د بەرانبەر دا یانەیا ئسكۆتلەندی ئەوا ب تنێ‌ جارەكێ‌ ناسناڤ دەستڤە ئینایی دناڤ ئەرد و جەماوەرێ‌ خوە دا ب هیڤییە مفایی ژێ‌ وەربگریت و دەلیڤەیەكێ‌ بخوە پەیدابكەت، هەرچەندە دیرووكا دیدارێن هەردو تیما د بەرژوەندییا یانەیا بافاریا دایە كو ل سەرجەمێ‌ چار یاریان سێ‌ سەركەفتن و وەكهەڤییەك هەیە.
میلان بەرانبەر هێزا هۆلەندی یە
د هەمان دەمدا ژلایێ‌ خوە یانەیا ئەی سی میلان یا ئیتالی هەلگرا حەفت ناسناڤێن چامپیۆنزێ‌ دێ‌ ل یاریگەها فاینۆرد بیتە مێڤانا یانەیا فاینۆرد رۆتردام یا هۆلەندی خودانا ئێك ناسناڤ د یارییەكا دی یا هەڤڕكی دا بۆ گەشكرنا پلێتا دەربازبوونێ‌ بەر ب قۆناغا 16ێ‌، هەردو یانە بەری 56 سالا د قۆناغا كۆما بەرانبەری ئێك بووینە و هەر تیمەكێ‌ سەركەفتنەك ئینایە، د یارییە ئەڤ شەڤە دا گوهۆڕین پەیدابووینە و هەردو تیم ئاست و ئەنجامێن باش ئیناینە.
شەڕێ‌ چامپیۆنزێ‌ بەردەوامە
ژ یاریێن دی یێن ئەڤرۆ كو هێزا یاریێن وان كێمتر نینن ژ یاریێن پێشتر، یانەیا مۆناكۆ یا فرەنسی دێ‌ ل یاریگەها خوە یانەیا بەنفیكا یا پۆرۆتۆگالی خودانا دو ستێرێن چامپیۆنزێ‌ مێڤان كەت ئەوا دێ‌ ل دەمژمێر 11شەڤ هێتە كرن، دبیت دیدارێن پێشتر یێن هەردو یانەیا د بەرژوەندییا د بەرژوەندییا بەنفیكا دایە ئەوا سێ‌ سەركەفتن و وەكهەڤییەك هەیە، دووماهی یاری ژی هەر د قۆناغا ئێكێ‌ یا ڤێ‌ چامپیۆنزێ‌ بوو ئەوا بەری زێدەتری دو مەهان بوو، ژلایەكێ‌ دووڤە یانەیا كلۆپ برۆچ یا بەلجیكی دێ‌ ل یاریگەها خوە یانەیا ئەتلانتا ل دەمژمێر 8:45 شەڤ مێڤان كەت، ئەڤ یارییە دێ‌ بیتە ئێكەم دیدارا دناڤبەرا هەردو یانەیان دا ئەوێن چو ناسناڤێن چامپیۆنزێ‌ ب دەستڤە نە ئیناین.
هەشت یانەیێن ئێكسەر دەربازبووین
بۆ زانین ئەو هەر هەشت یانەیێن ل رێزا ئێكێ‌ هەتا هەشتێ‌ ل سەر لیستا گشتی هاتین ئێكسەر دەربازبووینە قۆناغا 16ێ‌ یا چامپیۆنزێ‌ ئەو ژی، یانەیێن لیڤەرپۆل، بەرشەلۆنا، ئارسنال، ئینتەر میلان، ئەتلەتیكۆ مەدرید، بایرن لیڤەركۆزن، لیل، ئاستۆن ڤێلا.
شێوازێ‌ یارییان و دەربازبوونێ‌
هەر 36 یانەیێن پشكدار ل سەر چار ئاستێن جودا و دووڤ پلەكرنا وەرزێ‌ بۆری هاتبوونە بەلاڤكرن ئەوا پۆلینكرن ژلایێ‌ فیدراسیۆنا فوتبۆلا ئۆرۆپا هاتیە دانان، یاریێن وان ب شێوەیێ‌ خول ئێك قۆناغ د هاتنە كرن، هەر تیمەكێ‌ هەشت یاری ئەنجامداینە، چار یاری د ناڤ ئەردێ‌ خوە دا و چار ژ دەرڤەیی یاریگەها خوە، شێوازێ‌ دەربازبوونێ‌ بۆ قۆناغا 16 پشتی ب دووماهی هاتنا قۆناغا ئێكێ‌ دێ‌ ل دووڤ دووماهییا رێزبەندییا هەر36 تیما هێتە دیار كرن، ئەو تیمێن ل رێزا ئێكێ‌ هەتا هەشتێ‌ ئێكسەر دێ‌ دەربازبنە قۆناغا 16ێ‌، ئەو یانەیێن رێزا نەهێ‌ هەتا 24ێ‌ دێ‌ یاریێن خوە ب شێوەیێ‌ دو گەڕ ئەنجامدەن ژبۆ دەربازبوونا هەشت تیمێن دی بۆ قۆناغا 16ێ‌، لێ‌ ئەو یانەیێن ل رێزا 25 هەتا 36ێ‌ هاتین ئەو دێ‌ خاترا خوە ژ قارەمانیێ‌ خوازن و هێنە دووركرن.
دیاركرنا ژڤانێ‌ یاریێن قۆناغا 16ێ‌ و دووماهیێ‌
بۆ زانین پشتی دەربازبوونا هەشت یانەیێن قۆناغا پاشكۆ دێ‌ ل قۆناغا 16ێ‌ دا شێوازێ‌ هاتنۆچوون دناڤبەرا یانەیان هێتە كرن هەتا دگەهیتە یارییا دووماهیێ‌، یاریێن قۆناغا 16ێ‌ دێ‌ ل چارێ‌ ئادارا بهێت دەستپێكەن، ل هەشتێ‌ نیسانێ‌ قۆناغا هەشتێ‌ بن، ل هەمان مەهـ ل 28ێ‌ نیسانێ‌ یاریێن پێش دووماهیێ‌ هێنە كرن، یارییا دووماهیێ‌ دێ‌ ل 31ێ‌ ئەیارا سالا 2025ێ‌ ل یاریگەها ئالیانز ئارینا یا بایرن میۆنخ وەلاتێ‌ ئەلمانییا هێتە كرن.