ئەڤرۆ، زنارتۆڤی:

هونه‌رمه‌ند سه‌میر یوسف عیسا، ل سالا 1963 ێ، ل گوندێ گرگێ ل ده‌ڤه‌را سلۆپیا ل باكورێ كوردستانێ ژ دایك بوویه‌، د بنیات دا ئاسوری كلدانیه‌، د دیداره‌كێ دا بۆ رۆژناما ئه‌ڤرۆ دبێژیت: دناڤا گوندێ مه‌ دا پرانیا خه‌لكێ گوندی موسلمان بوون و 20% ێ، ئه‌م مه‌سیحی كلدانی بووین، د زارۆكاتیا خۆ دا د مالدا مه‌ ب كلدانی د ئاخفت و ژ ده‌رڤه‌یی مالێ ئه‌م ب كوردی د ئاخفتین، چونكی زمانێ كوردی و كلدانی ژی زمانێ دایكێ بوو، چ جوداهی بۆ مه‌ نه‌بوو، هه‌ردو زمان بۆ مه‌ وه‌كهه‌ڤبوون، ل سالا 1969 ێ، بۆ خواندنێ ئه‌ز چوومه‌ باژێرێ سته‌نبولێ و من ل وێرێ زمانێن توركی و فره‌نسی خواندن.
ناڤهاتی گۆت ژی: ل سالا 1976 ێ، ل ئیسته‌نبولێ ئه‌ز چووم من كورسه‌كێ مۆزیكێ خواند، ل وێرێ من ده‌ست ب كارێ مۆزیكێ كر و من خوە فێری ژه‌نینا سازێ كر، بۆ ده‌مێ سێ سالان من ل سه‌ر موزیكێ خواند، ل وی ده‌می من گوهداریا رادیۆیا ئێریڤانێ و رادیۆیا به‌غدا دكر و من گوهێ خۆ ددا سترانێن كوردی، من گوهداریا سترانێن كاراپێتێ خاچۆیی و محه‌مه‌د عارفێ جزیری و حه‌سه‌ن جزراوی و سه‌عید ئاغایی دكرن، موزیكا كوردی گه‌له‌ك كاریگه‌ری ل سه‌ر من هه‌بوو، سترانگۆتن ژی ئێك ژ خه‌یالێن من یێن هه‌ره‌ مه‌زن بوو، ده‌م هاتوچوو من ژی سترانگۆتن، هه‌ر چه‌نده‌ ل وی سه‌رده‌می گۆتنا سترانێن كوردی و كلدانی ل توركیا قه‌ده‌غه‌بوون، ل سالا 1982 ێ، ئه‌ز چوومه‌ پاریس ل وه‌لاتێ فره‌نسا، ده‌مێ ئه‌ز چوویم من سازا خوە ژی ل گه‌ل خۆ بر، ئه‌ز نه‌دشیام سازا خۆ بهێلم، ل وێرێ من ده‌ست ب كارێ هونه‌ری كر و ل سالا 1984 ێ، من پشكداری د ئاهه‌نگه‌كێ داكر ل وه‌لاتێ فره‌نسا، ل وی ده‌می رۆژنامه‌ڤانێن فره‌نسی ل مه‌ كۆمبوون و پرسیار ژ من كر، ئه‌ڤه‌ چ ئامیره‌ تو دژه‌نی و ئه‌ڤه‌ چ زمانه‌ تو پێ سترانان دبێژی، من ژی گۆتێ ئه‌ڤه‌ زمانێ كوردی ئه‌ز سترانان پێ دبێژم و رۆژناما ( پۆپلی دۆمان) یا فره‌نسی بوو، دیداره‌ك ل گه‌ل من و من به‌حسێ كوردان و هونه‌رێ كوردی و كلدانی بۆ وان كر و پشتی هنگێ من ژیانا هه‌ڤژینیێ پێكئینا و من چار كور و كچه‌ك هه‌نه‌.
سه‌میر هێشتا دبێژیت: ل سالا 1987 ێ، ل وه‌لاتێ ئه‌لمانیا من بۆ خۆ گرۆپه‌كێ هونه‌ری چێكر و ئه‌ز چوومه‌ ئاهه‌نگ و هه‌لكه‌فتێن كوردان ل وه‌لاتێن ئورۆپی، ل هه‌مان سال من كاسێته‌كا سترانان ب ناڤێ ( لێ لێ یادێ) به‌لاڤكر، پاشی ل سالا 1989 ێ، من كاسێته‌كا دیتر ب ناڤێ ( سینه‌م) به‌لاڤكر، د هه‌ر كاسێته‌كێ دا من سترانه‌ك یا ژی دو ستران ب زمامێ كلدانی ژی دگۆتن، پشتی هنگێ من كاسێته‌كا دیتر ب ناڤێ ( نازلیێ) من به‌لاڤكر، ئه‌و كاسێته‌ من ل وه‌لاتێ سوید چێكر، ل دووڤ دا من سێ كاسێت ب زمانێ كلدانی چێكرن و به‌لاڤكرن.
وی هونه‌رمه‌ندی گۆت ژی: من كلیپا خۆ یا ئێكێ ب ناڤێ ( ئاخ وه‌لاتێ من) به‌لاڤكریه‌، ب زمانێ كلدانی من چێكر، هه‌روه‌سا خه‌لكێ مه‌ گه‌له‌ك نه‌خۆشی و كۆچبه‌ری دیتیه‌، له‌وما من ئه‌و كلیپ ل سه‌ر دووریا وه‌لاتێ خۆ چێكر، پشتی هنگێ من سترانا ( نازلیێ) كلیپكر و من ل پاریسێ وێنه‌كریه‌، لدووڤدا من سترانا ( میرێ من) كلیپكر، پاشی من سترانا (ئه‌سمه‌رێ) كلیپكر و ئه‌و سترانه‌ من ل زۆزانێن هه‌ردو وه‌لاتێن فره‌نسا و ئیتالیا وێنه‌كریه‌، خه‌لكی مه‌ یێ كلدانی ژی حه‌ز ژ وان سترانان كریه‌، ئه‌و ستران و كلیپێن من ل گه‌له‌ك ته‌له‌ڤزیۆنان هاتینه‌ په‌خشكرن، هه‌روه‌سا من په‌یوه‌ندیێن باش ل گه‌ل هونه‌رمه‌ند شڤان په‌روه‌ری و حه‌سه‌ن شه‌ریفی و هوزان شه‌مدینی هه‌نه‌، هه‌روه‌سا من هه‌ڤالینی ل گه‌ل هه‌ردو هونه‌رمه‌ندێن نه‌مر سه‌عید گاباری و سه‌عید یوسفی هه‌بوو، دیسا من په‌یوه‌ندی و تێكه‌لی ل گه‌ل هونه‌رمه‌ندان جۆلیانا جۆندو و جه‌نان ساوا و چه‌ندین هونه‌رمه‌ندێن دیتر هه‌نه‌، هه‌رده‌م من ڤیایه‌ خزمه‌تا هونه‌رێ كوردی بكه‌م.
سه‌میری ئه‌و ژی گۆت: من حه‌ز ل سه‌ر كارێ سینه‌مایێ ژی هه‌یه‌، ل سالا 1982 ێ، ل پاریسێ من كارێ ئه‌كته‌ریێ د فلمێ سینه‌مایی یێ ( دیوار) دا كریه‌، كو ئه‌و فلمه‌ ژ ده‌رهێنانا ده‌رهێنه‌رێ مه‌زنێ كورد( یلماز گۆنایی) بوویه‌، ل وی ده‌می یلمازی داخواز ژ من كر، ئه‌ز پشكداریێ د وی فلمێ سینه‌مایی دا بكه‌م و كو ئه‌ز د ژیێ 19 سالیێ دابووم، چه‌ندین هونه‌رمه‌ند و ئه‌كته‌رێن كورد پشكداری د وی فلمی دا كریه‌، پاشی من پشكداری د فلمێ ده‌رهێنه‌رێ كورد هونه‌ر سه‌لیمی دا كر یێ بناڤێ ( بژی ئازادیا كوردستانێ)، د وی فلمی دا من موزیك دژه‌نی، هه‌روه‌سا میدیاێن فره‌نسی گه‌له‌ك دیدار و ریپۆرتاژ ل سه‌ر هونه‌رێ من به‌لاڤكرینه‌، ل سالا 2017 ێ، ئه‌ز هاتیمه‌ هه‌رێما كوردستانێ و من پشكداری د به‌رنامه‌كێ هونه‌ری دا كر ل وار تیڤی و ل رادیۆیا دهۆكێ، نوكه‌ ژی ئه‌ز ل سه‌ر كارێ خۆ یێ هونه‌ری یێ به‌رده‌وامم و كار ل سه‌ر چێكرنا هنده‌ك به‌رهه‌مێن نوو یێن هونه‌ری دكه‌م.

هه‌رهین محه‌مه‌د:

سترانبێژ سالار زاخۆیی د دیداره‌كێ دا بۆ به‌رپه‌رێ هونه‌ری یێ رۆژنامه‌یا ئه‌ڤرۆ گۆت: نوكه‌ كار ل سه‌ر چێكرنا سترانێن سینگل دكه‌م وه‌كو روونشتن ب كوالتیه‌كا باش و دێ ل ستودیۆیێ هێنه‌ تۆماركرن و هه‌ردیسان به‌ری چه‌ند رۆژان من سه‌ره‌دانا هونه‌رمه‌ند سه‌لام یوسڤی كر و من لبه‌ره‌ به‌رهه‌مه‌كێ وینێزیكی دوازده‌ سترانان ب كوالتیه‌كا باش نوی بكه‌م و ل گه‌ل عودێ بێژم و ئه‌وی ده‌ستویری دایه‌ من و په‌یڤ ژی هه‌موو بۆ من نڤیسینه‌و ئه‌وی گۆته‌ من هه‌ربه‌رهه‌مه‌كێ من ته‌ بڤێت دشێ نوی بكه‌ی، به‌لێ مافێ وان نه‌هێته‌ خوارن یێن په‌یڤ و ئاواز داناین.
ل دۆر نووترین كارێ خوه‌ یێ هونه‌ری وه‌كو ستران سالاری گۆتژی: نوكه‌ كارێ چێكرنا كلیپه‌كێ دكه‌م بناڤێ (ئه‌ز حه‌ز ژ ته ‌دكه‌م) په‌یڤ و ئاواز دلدار و ژڤانه‌كێ نێزیك دێ وێژی توماركه‌م و كه‌مه‌ دیوتوبی دا.
سالاری گۆتژی: نووكرنا سترانا چو جاران بۆ سترانبێژی نابیته‌ به‌رهه‌م بۆ وان ئه‌وێن كه‌سان ئه‌وێن دهونه‌ری دگه‌هن، به‌لێ ئێك بەرەبابێ نوی یه‌ و گه‌له‌ك تێنه‌گه‌هیت و دبیت ب رێیا وێ سترانێ بهێته‌ پێش و ئه‌كتیڤا وێ خوه‌ش دبیت لڤین بكه‌ڤنه‌ ئه‌كاوانتێن و به‌رنیاس بیت ، به‌لێ نابیته‌ مولك بۆ وی ژزاروكینی دكه‌ش و هه‌وایێسترانان دابووم و هێدی هێدی بوومه‌ سترانبێژ و ده‌مێ ئه‌زێ زارۆك بابێ من تومارگه‌هـ هه‌بوو ل گه‌ل ره‌حمه‌تی مه‌جید نه‌عمه‌ت تومارگه‌ها ئه‌رده‌وان یا وان بوو و هه‌كه‌ ته‌ماشه‌ی كلیپێن من بهێـه‌ كرن ده‌مێ ژیێ من پێنچ سال ئه‌ز ل گه‌ل هونەرمەند حاجی زاخۆیی و عه‌بدولواحد و ئدریس زاخۆیی و هندی من دیتی ده‌ورو به‌رێن من سترانبێژبوون و هێدی هێدی من راهێنان ل سه‌ر ده‌نگێ خوه‌ دكرن و گه‌له‌ك جاران ستران گۆتنێ گه‌له‌ك ده‌نگێ راقی نه‌ڤێت و یاگرنگه‌ كا مرۆڤ چ دبێژیت و خه‌لك حه‌زژ گۆتنا مرۆڤی دكه‌ت و كا چه‌وا مرۆڤ رۆحیه‌تێ دده‌تێ و هه‌موو كه‌سان ده‌نگێ وان خوه‌شه‌، به‌لێ بزانن كاربینن و بزانن سترانێ ب هه‌لبژێرن وه‌كودیژی تشتی نان پێڤه‌ نه‌هێت ئه‌ز ناكه‌م و هه‌كه‌ ستران نانی مه‌ده‌ته‌من ئه‌ز سترانان نابێژم و چه‌ند هیڤیا من بیت و ده‌نگێ من یێخوه‌ش بیت و ژماره‌ ئێك دژیانا من دا ئه‌وه‌ ده‌مێ مرۆڤ كاره‌كی بكه‌ت و ب رێیا وی كاری داهاته‌ك بۆ مرۆڤی ژێ بهێت وهه‌كه‌نه‌چمه‌ ده‌واتان ئه‌ز ئێك كلیپ چێناكه‌م و هه‌یڤانه‌ دچمه‌ پێنج شه‌ش ده‌واتان و سترانێت ئه‌ز ل ده‌واتان ژی دبێژم پتریا وان یێن سترانبێژێن زاخۆ نه‌ و سترانێن ئارام پتر ل سه‌ر ده‌نگێ من دهێن.
ل دووماهیێ ناڤهاتی گۆت: پشتی زاخۆ بوویه‌ ئیدارا سه‌ربه‌خۆ پشته‌ڤانی ل سه‌ندیكا هونه‌رمه‌ندان و رێڤه‌به‌ریا ره‌وشه‌نبیری دهێته‌كرن، به‌لێ ئه‌و پشته‌ڤانیێ ل مه‌ ناكه‌ن و چ رۆلێن مه‌زن دسه‌ندیكایێ دا نابینم و ئه‌ز ئه‌ندامم و من ناسنامه‌ چێنه‌كریه‌ هێشتا و ئه‌و كێماسیه‌ ژ منه‌ و بیرا من دهێت ئاهه‌نگه‌ك ل زاخۆ ل پرێ هاته‌كرن و هه‌ر ئێك ژ مه ‌سه‌د و پێنجی هزار دانێ و هنده‌ك سترانبێژێن دی هاتنه‌ وێرێ چل وه‌ره‌قێن دولاری دانێ و بتنێ گرنگێ ده‌نه‌ سترانبێژێن ژ ده‌رڤه‌ و پاره‌كێ وه‌سا ده‌نه‌ مرۆڤی مرۆڤ شه‌رم دكه‌ت ئه‌و نامه‌یا پاره‌ تێدا ڤه‌كه‌ت.