ئامێدیێ، مەحمود نهێلی:

بەهرام عریف یاسین، بەرپرسێ لقێ 18 یێ‌ پارتی ل ئامێدیێ‌، د سمینارەكێ دا ل گەل كادرێن لقێ تیشك ئێخستە سەر دووماهی پێشهاتێن سیاسی ل سەر ئاستێ هەرێمێ و ئیراقێ و چەندین بەرچاڤڕۆنی سەبارەت پەیوەندی و كێشەیێن د ناڤبەرا حكومەتا فیدرال و یا هەرێما كوردستانێ دا و بنپێكرنا دەستووری و بڕینا بودجە و مووچەیێ خەلكێ هەرێمێ دانە كادران و دبێژیت: پێدڤییە خودان ئیرادە و ئێك گۆتار و ئێك هەلویست و ئێك بڕیار بین ژ بۆ بەرەڤانیكرن و پاراستنا مافێن گەلێ كوردستانێ.
دیسا هەلبژارتنێن پەرلەمانێ ئیراقێ و بەرهەڤیێن پێدڤی و پرۆسەیا ئاشتیێ د ناڤبەرا توركیا و پەكەكێ دا و رۆلێ گرنگێ سەرۆك بارزانی و حكومەتا هەرێمێ تەوەرەێن دی یێن پەیڤا ناڤهاتی بوون.
هەروەسا بەرپرسێ لقێ تەكەزی ل سەر باشتر هەڤكاری و هەماهنگیێ ل گەل دام و دەزگەهێن جودا كر ژ بۆ خزمەتا وەلاتییان و گۆت: «پێدڤییە ئەم هەموو ب رەفتار و خزمەت و كارێن خوە د ئاستێ مەزناتیا پارتی و جهێ باوەریا جەنابێ سەرۆك بارزانی و پارتا خوە دا بین، ژ بەركو پارتی بۆ خزمەتا كوردستانێ و گەلێ وێ هاتیە دامەزراندن».

دهۆك، لەزگین جۆقی:

سەرۆكێ باژێرڤانیا شێخان بۆ رۆژناما ئەڤرۆ دیار كر، پتر ژ هزار و 500 ناڤێن فەرمانبەرێن سەنتەرێ قەزا شێخان هەتا نوكە گەهشتینە باژێرڤانیێ، هەر فەرمانبەرەكێ شایستەیێ وەرگرتنا پارچە ئەردی بیت، ل دووڤ كارتا ئاكنجیبوونێ دێ كار ل سەر كەین، هەر ئێك ل دەڤەرا خۆ دێ پارچا خۆ یا ئەردی وەرگریت.
خالد نەرمۆ، سەرۆكێ باژێرڤانیا قەزا شێخان گۆت: «ل دووڤ بڕیارا حكومەتا هەرێما كوردستانێ كار بۆ بەلاڤكرنا پارچەیێن ئەردی ل شێخان بەردەوامە و پشتی چەند رێكارێن پێدڤی دهێنە كرن، هەمی فەرمانبەرێن مەرج ژێ دگرن دێ پارچەكا ئەردی وەرگرن، كارەكێ مەزن بۆ بەلاڤكرنا پارچەیێن ئەردی ل سەر فەرمانبەرێن دەڤەرا شێخان هاتیە كرن و ل نێزیك دێ قووناغا ئێكێ یا بەلاڤكرنا پارچەیێن ئەردی دەست پێكەت».
گۆتژی: «پرۆسەیا ئامادەكرنا پارچەیێن ئەردی ل شێخان یا بەردەوامە، ل سەنتەرێ باشوورێ شێخان ئەرد هاتیە دەستنیشانكرن و پشتی هەمی رێكارێن یاسایی ب دوماهی دهێن، فەرمانبەر دێ‌ پارچەیێن ئەردی وەرگرن».

هەولێر، قائید میرۆ:

رێڤەبەرێ گشتیێ دیوانا وەزارەتا پەروەردێ ئاشكراكر، لیژنەیەك هاتیە پێكئینان و بڕیارە جلكێن قوتابیان بۆ سالا بهێت بهێنە گوهۆڕین و دبێژیت: بۆ سالا نوو یا خواندنێ دێ هەمان جلكێن بەرێ بن و ناهێنە گوهۆڕین.
رەگەز رەشید، رێڤەبەرێ گشتیێ دیوانا وەزارەتا پەروەردێ بۆ رۆژناما ئەڤرۆ دیاركر، بڕیار هاتیەدان بۆ سالا بهێت گوهۆڕین ب سەر شێوازێ جلكێن قوتابیان دا بهێت و گۆت: «بەلێ ئەڤ سالە جلكێن قوتابیان دێ ب هەمان رەنگ و دیزاینێ سالا بۆری بن، ئانكو بۆ سالا خواندنێ‌ 2025 – 2026 دێ وەكی خۆ بیت، بەلێ بۆ سالا بهێت یا خواندنێ 2026 – 2027 دێ گوهۆڕین ب سەردا هێت و ئەو شێوازێ نوكە یێ جلكان نامینیت».
رەگەز رەشید گۆتژی: «لیژنەیەك بۆ ڤێ مەرەمێ هاتیە پێكئینان و ئەو لیژنە دێ پێداچوونێ بۆ بابەتێ گوهۆڕینا جلكێن قوتابیان كەت و بڕیارێ ل سەر دەت، هەردەمێ بڕیار هاتەدان، ئەڤە دێ‌ هێتە پەسەندكرن و بەلاڤكرن، هەروەسا دیزاینێ نوو یێ جلكێن قوتابیان دێ دەینە بازاڕی و بازرگان كار ل سەر كەن بۆ بەرهەڤكرنێ».

رەمەزان زەكەریا:

ل سنۆرێ دەڤەرداریێن ئاكرێ و بەردەڕەشێ هەژمارەكا رێك و پران د قووناغا بجهئینانێ دانە.
ئەندازیار محسن میرانی، رێڤەبەرێ رێك و پران ل ئاكرێ بۆ ئەڤرۆ گۆت: «كابینەیا نەهێ یا حكومەتا هەرێما كوردستانێ ب سەرۆكاتیا مەسرور بارزانی، گرنگیەكا باش ب كەرتێ رێك و پران دایە ل سنۆرێ هەر دو دەڤەرداریێن ئاكرێ و بەردەڕەشێ‌«.
ناڤبری گۆتژی: «نوكە ب گوژمێ چار ملیار و 500 ملیۆن دیناران، ل سنۆرێ دەڤەرداریێن ئاكرێ و بەردەڕەشێ رێك دهێنە دروستكرن و هەژمارەك د قووناغا بجهئینانێ دانە و هەژمارەكا نوو ژی دهێنە دروستكرن و هندەك دهێنە نووژەنكرن، ئەڤ پرۆژە ل سنۆرێ دەڤەرداریێن ئاكرێ و بەردەڕەشێ‌ و ناوچەداریێن دینارتە و بجیل و گردەسێن دهێنە ئەنجامدان».
زێدەتر گۆت: «ئەو پڕۆژەیێن دهێنە بجهئینان، نێزیكی 50 پڕۆژەیانە كار ل سەر دهێتە كرن، هندەك ژ وان 60% تەمامبووینە و هندەك ژی ب تەمامی ب دووماهی هاتینە».

شێخان، بارزان مزووری:

ئەندازیار خالد دیاب، رێڤەبەرێ ئاڤا ناحیا زێلكان بۆ رۆژناما ئەڤرۆ دیار كر، بڕیار ل سەر دروستكرنا مەزنترین پڕۆژەیێ ستراتیجی یێ راكێشانا ئاڤێ ژ بەنداڤا مووسلێ‌ و رووبارێ خازر و مەندان بۆ ناحیا زێلكان و كۆمەلگەها مەهەت و گوندێن سەر ب وێ ناحیێ ڤە هاتیەدان و دبێژیت: بجهئینانا پڕۆژەی دێ‌ قەیرانا كێمئاڤیێ ب دوماهی هێت.
ناڤبری گۆت: «نوكە هەموو كار ب دوماهی هاتینە، پارە ژی بۆ هاتیە تەرخانكرن، ب تنێ مایە كۆمپانیا كاری ل سەر بكەت».
گۆتژی: «پڕۆژە گەلەك یێ گرنگ و مەزنە، ب گوژمێ زێدەتری 18 ملیار دیناران ژ لایێ ئیدارا نەینەوا ڤە دێ‌ هێتە بجهئینان».

عادل ئەمین، رێڤەبەرێ‌ ناحیا فەییدیێ‌ بۆ رۆژناما ئەڤرۆ دیار كر، كۆمەكا پڕۆژەیێن خزمەتگوزاری ل سنوورێ‌ ناحیا فەییدیێ‌ و كۆمەلگەها دۆمیز دهێنە بجهئینان و دێ‌ خزمەتەكا باش بۆ خەلكێ‌ ڤێ‌ دەڤەرێ‌ كەن و دبێژیت: ئەو پڕۆژە ژ جۆتسایدكرنا نیڤەكا فەییدیێ‌ و ئاڤ و سۆلینان و ئاڤڕێژان و هێلا كارەبێ‌ پێك دهێن و ب گوژمێ‌ دو ملیار و 400 ملیۆن دیناران دهێنە بجهئینان.
ناڤهاتی گۆت: «كارێ‌ چێكرنا نەخۆشخانەیا فەییدیێ‌ یا سێ‌ قاتی ب دووماهی هاتیە و ئەو پڕۆژە ژی ب گوژمێ‌ نێزیكی دو ملیار دیناران هاتییە بجهئینان، ل گەل دابینكرنا هەموو كەلوپەلێن ساخلەمییێ‌، دیسا نوكە ل تاخێن وارڤین ستی و ل گەل جادەكا 20 مەتری ب گوژمێ‌ دو ملیار و 400 ملیۆن دیناران دهێنە بجهئینان و د قووناغا دووماهیێ‌ دانە، گوژمێ‌ گشتیێ‌ وان پڕۆژەیان نێزیكی حەفت ملیار دینارانە».